ဢၼ်ယႃႉၵဝ်း ဢၼ်ၶတ်းၶႂၢင်

ဢၼ်ယႃႉၵဝ်း ဢၼ်ၶတ်းၶႂၢင်

------------------------------
ၼႂ်းလုၵ်ႈၼႆႉ ၽႂ်ၵေႃႈဢမ်ႇလွတ်ႈလႆႈတၢင်းၽိတ်း၊ ပေႃးၶႂ်ႈလွတ်ႈတၢင်းၽိတ်းၵေႃႈ ဢမ်ႇလူဝ်ႇႁဵတ်းသင် သေမဵဝ်းၼႆၼၼ်ႉၵူၺ်းယဝ်ႉ။

ၵူၺ်းၵႃႈ ပေႃးဝႃႈၵိူတ်ႇပဵၼ်ၵူၼ်း မူၼ်းပဵၼ်ႁၢင်ႈ ယၢင်ႈၶဝ်ႈမႃးၼႂ်းလေႃးၵၼႆႉယဝ်ႉလႄႈ ဢမ်ႇႁဵတ်းသင် ၵႂႃႇသေမဵဝ်းပေႃးၼႆၸိုင် ၶႅၼ်းၽိတ်းလူင်ၽိတ်းလၢင် ၽိတ်းၼႃႇသေပိူၼ်ႈၼၼ်ႉယဝ်ႉ။
ၵွပ်ႈၼၼ် တိုၼ်းတေလႆႈႁဵၼ်းၵၢၼ်။
ၵူၼ်းပႆတၢင်းၼႆႉမၢင်ပွၵ်ႈ ယင်းၵႆႉၸၢင်ႈၶီႉလုတ်းယူႇ၊ တေႃႈၼၼ် ၵူၼ်းႁဵတ်းၵၢၼ်ၼႆၵေႃႈ မၢင်ပွၵ်ႈမၢင်လႂ် ဢမ်ႇလွတ်ႈလႆႈ ဢၼ်ၽိတ်းၼင်ႇၵဝ်ႇ၊ တီႈဢၼ် ၽိတ်း
ၼၼ်ႉၵေႃႈ တိုၼ်းတေလႆႈ ၶၢမ်ႇတၢင်းၽိတ်းၼႆၼၼ်ႉယဝ်ႉ။
ယွၼ်ႉၸိူင်ႉၼႆသေ ဢမ်ႇလူဝ်ႇလႆႈမႆႈၸႂ်ၸွမ်းလႄႈ ဢမ်ႇၸႂ်ႈလွင်ႈမႆႈၸႂ်သင်ၸွမ်း မၼ်းတိုၼ်းပဵၼ် လေႃးၵထမ်ႇတြႃးယဝ်ႉ။ ပိူင်ပဵၼ်ၾိင်ႈၽႃႉ ၼႆႉမၼ်းဢမ်ႇ ၸိုၼ်ႈသႂ်လႆႈတႃႇသေႇ၊ ၶိင်ႇၾူၼ်ၵေႃႈ ၾူၼ် ဢမ်ႇၸႂ်ႈၶိင်ႇ ၾူၼ်ၵေႃႈၾူၼ်၊ မၢင်ပွၵ်ႈလူမ်းလူင်ထွင်းပတ်ႉသႂ်ႇ ၵေႃႈမီး
ယဝ်ႉ။ ၸၢတ်ႈပၢၼ်ၵူၼ်းႁဝ်းၵေႃႈ တေဢမ်ႇ လွတ်ႈလႆႈ လွင်ႈသေႉၼႄး၊ လွင်ႈႁၼ်တၢင်းၾိတ်း လႄႈ လွၵ်ႈမၢပ်ႇမႂ်ၵိၼ်ႁူဝ်ၵၼ်။
ပေႃးဝႃႈလႆႈၶၢမ်ႇမႃးလွင်ႈၸိူဝ်းၼၼ်ႉမူတ်းမူတ်းယဝ်ႉ ၼႆ မၼ်းတေပဵၼ် ဢဵၼ်ႁႅင်းတေႃႇသူႈ ၸၢတ်ႈပၢၼ် ၵႂႃႇမိူဝ်းၼႃႈဢိူဝ်ႈ၊ လႆႈထူပ်းမႃးၼမ်ၵႃႈႁိုဝ်ၵေႃႈ လႆႈတၢင်းႁူႉ တူဝ်ထူပ်းႁဝ်းလႆႈမႃး မီးမႃးၵႃႈၼၼ်ႉယဝ်ႉ။
တႃႇတေပဵၼ်မႃးမိတ်ႈ၊ လႅဝ်း၊ ၽၢႆၽၢႆၼၼ်ႉ လႆႈ
တၢမ်ၾႆးလႅင်လႅင်သေ လႆႈၺႃးၶွၼ်ႉၸွၵ်း လဵၵ်းလူင်ထုပ်ႉ
ပေႃႉသႂ်ႇ ဢၢၼ်ႇၵမ်းပေႃးဢမ်ႇၶႂ်ႈလႆႈၼၼ်ႉယဝ်ႉ။ လႆႈၶၢမ်ႇတင်းႁႅင်းၼမ်ႉ ၵဵဝ်ၼမ့်လူင်လေႃႇသႂ်ႇ ဢမ်ႇႁူႉမႃး ပဵၼ်လၢႆပွၵ်ႈလၢႆၽဝ်ႇယဝ်ႉသေ ၸင်ႇတေ
ပဵၼ်မႃး ၵူၼ်းႁေႃႈ ႁိူဝ်းၶႅၼ်ႇၵေႃႉၼိုင်ႈၼၼ်ယဝ်ႉ။
ၵူၺ်းၵႃႈ တီႈၼိူဝ်ၵၢၼ်ယၢပ်ႇလူင်ၼၼ်ႉ ပိူင်လူင်မၼ်းတေႉ ပဵၼ်လွင်ႈဝႆႉဝၢင်း ၼမ်ႉၸႂ် ဢၼ်ၶႂ်ႈ
ပဵၼ်ၼႆၼၼ်ႉယဝ်ႉ။ သင်ဝႃႈ ပလၢတ်ႈလူမ်ႉ ၵႂႃႇလႄႈ တေဢမ်ႇလႆႈဝႃႈ ၸဝ်ႈၵဝ်ႇတူၵ်းသုမ်း။ သင်ပလၢတ်ႈလူမ့် သေၶိုၼ်းသိုပ်ႇလူမ်ႉၼွၼ်းယူႇ ဢမ်ႇၶိုၼ်းလုၵ်ႉၼႆတေႉ လႆႈဝႃႈ တူၵ်းသုမ်းတေႉ။
ၵွပ်ႈၼၼ် ၸၢတ်ႈပၢၼ်ၵူၼ်းႁဝ်း တူၵ်းသုမ်း ဢမ်ႇတူၵ်းသုမ်းဢၼ်ဝႃႈၼၼ်ႉ ဢဝ်ပလၢတ်ႈလူမ်ႉၼၼ်ႉ မႃးတႅၵ်ႈၼိူင်းတေဢမ်ႇလႆႈ။ ပလၢတ်ႈလူမ်ႉယဝ်ႉသေ တေ ၶိုၼ်းလုၵ်ႉ ဢမ်ႇလုၵ်ႉဢၼ်ၼႆၵူၺ်း ဢၼ်တေတႅၵ်ႈၼိူင်း လႆႈ။
(Frank Woolworth ) ၾရၼ်ႉဝူးလ်ဝꧡ် ၼႆႉ
တႃႇတေပဵၼ်မႃး ၵူၼ်းၸိုဝ်ႈသဵင်ယႂ်ႇ ၸဝ်ႈလၢၼ်ႉၶွင် Store ၸတူဝ်းၼႆႉ လႆႈၶတ်းၸႂ်မႃးပဵၼ်လၢႆပွၵ်ႈလၢႆၵမ်း။
ပိုတ်ႇႁႃႈသႅင်ႇ တႃႇသၢမ်သႅင်ႇ ၵေးလၢင်းတိုၵ်ႉသုမ်းယူႇ။ ၵူၺ်းမၼ်းဢမ်ႇယွမ်းၵၢၼ်ႉၼႃႈၵၢၼ်မၼ်း၊ ၶိုၼ်းမႄးလၢႆႈႁၢင်ႈၽၢင် လႄႈ လွၵ်းလၢႆးမၼ်းသေ ၶိုၼ်းၸႂ်ႉၵူၼ်းၶၢႆမၼ်းသိုပ်ႇ ၶၢႆၵႂႃႇထႅင်ႈ၊ ဢမ်ႇပေႃးႁိုင် ၸိုဝ်ႈသဵင်သႅင်ႇၸတူဝ်းမၼ်း လိုဝ်းမႃးသေ တေႃႈလဵဝ်ပိုတ်ႇဝႆႉလၢၼ်ႉၸတူဝ်း သႅင်ႇၽႄ ပေႃးတဵမ် မိူင်းဢ​မႄႇရၵၢၼ်ႇၵႂႃႇယဝ်ႉ။
ၶဝ်ၸိူဝ်းၼႆႉ ဢၼ်ႁၢမ်ႈတၢပ်ႈ ဢၼ်ၶတ်းၶႂၢင်ၼၼ်ႉ ၶဝ်ဢမ်ႇဝႆႉပဵၼ်လွင်ႈယႂ်ႇ။ ၶဝ်ၶတ်းၸႂ်သေလႄႈ ဝႆႉလွင်ႈ
ယႂ်ႇတႃႇၸၢတ်ႈပၢၼ်ၶဝ်ၵႂႃႇတင်းၼႃႈတိၵ်းတိၵ်းၵူၺ်း။ ပေႃးမီးၼမ်ႉၸႂ်ၸိူင်ႉၼင်ႇၶဝ်ၼၼ်ႉ ၽႂ်ၶႂ်ႈၶၢတ်းၶႂၢင် ႁၢမ်ႈ
တၢပ်ႈၵေႃႈ ၸၢတ်ႈပၢၼ်ၶဝ်တိုၼ်းၶိုၼ်ႈယႂ်ႇၼၼ့်ယဝ့်။
ၽၢႆႇၼႃႈၶဝ်ၼၼ်ႉ ၶႂ်ႈတမ်းဝၢင်းဝႆႉ ဢၼ်ႁေႉဢၼ်ႁၢမ်ႈ ၵေႃႈ တေယိပ်ႇယၼ်ၶိုၼ်ႈၵႂႃႇ မိူၼ်ပိူၼ်ႈၶိုၼ်ႈၶူဝ်လႆၵူၺ်း။
ပိူင်လူင်မၼ်း ၶႂ်ႈထူပ်းတင်းယၢပ်ႇ လွင်ႈယၢပ်ႇတၢၼ်ႇ ႁိုဝ်ၵေႃႈယဝ့် ယိူင်းမၢႆၸဝ်ႈၵဝ်ႇ ဢၼ်ၶႂ်ႈပဵၼ်ၼၼ်ႉ ယႃႇပွႆႇ
ၽႃႈပႅတ်ႈလႃးလႃး။ ယိူင်းမၢႆဢၼ်ၸဝ်ႈၵဝ်ႇၶႂ်ႈပဵၼ်ၼၼ်ႉ ဝူၼ်ႉႁၼ်ဝႆ့ၼႂ်းတႃသေ တမ်းဝၢင်းၽႅၼ်ၵၢၼ်ၵႂႃႇၸူးမၼ်း လႄႈ ၵူၺ်းၵႃႈ မိူဝ်ႈတိုၵ်ႉၶဝ်ႈၸူး ယိူင်းမၢႆၸဝ်ႈၵဝ်ႇၼၼ်ႉ တေမီးဢၼ်ၵိၼ်ႇၶွင်ႈ၊ ဢၼ်ယႃႉၵဝ်းၸွမ်းသဵၼ်ႈတၢင်း ၸဝ်ႈၵဝ်ႇယူႇ ယွၼ်ႉၼၼ် သင်ဝႃႈၸဝ်ႈၵဝ်ႇ လူမ်ႉၵႂႃႇၵေႃႈ လုၵ်ႉသေ သိုပ်ႇပႆလႄႈ။
ၵၢင်ဝၢဝ်ႇၼႆႉ ၺႃးလူမ်းထွင်းသႂ်ႇၵႃႈႁိုဝ်ၵေႃႈ ၶိုၼ်ႈသုင် ၵႃႈၼၼ့်ယဝ့် ပေႃးဢမ်ႇမီးလူမ်းထွင်း ပေႃးဢမ်ႇမီးလူမ်း သၢၼ်ၶတ်းၼႆ တေဢမ်ႇၶိုၼ်ႈလႆႈသုင်၊ ၵူၼ်းႁဝ်းၵေႃႈ ပေႃးဢမ်ႇမီး ဢၼ်ႁၢမ်ႈတၢပ်ႈ ဢၼ်ၶတ်းၶႂၢင် ပေႃးၼႆ တေဢမ်ႇမီးလွင်ႈ ၶိုၼ်ႈယႂ်ႇ၊ သင်ထူပ်းမႃးၵေႃႈ ၵႆႉလေႇ ယွမ်းၵၢၼ်ႉယွမ်းသုမ်းၼၼ်ႉယဝ်ႉ။ လွင်ႈၶတ်းၶႂၢင် လွင်ႈႁၢမ်ႈတၢပ်ႈၼၼ်ႉ ဢဝ်ဝႆႉပဵၼ် ၵၢၼ်တူဝ်ထူပ်းလႄႈ ႁဵတ်းႁႂ်ႈၸႂ်ၸဝ်ႈၵဝ်ႇ ၵႅၼ်ႇၶႅင်လိူဝ်မႃး လိူဝ်ၵဝ်ႇသေ တေ
ႁဵတ်းႁႂ်ႈတေႃႇသူႈလႆႈၵႂႃႇတင်းၼႃႈထႅင်ႈၼႆၼၼ်ႉယဝ်ႉ။
ၼပ်ႉယမ်ၽူႈလူလိၵ်ႈႁဝ်းၶင်တင်းသဵင်ႈသေ---