"သွၵ်ႈႁႃလွၼ်ႉၵႅၼ်ၽဝတူဝ်ၵဝ်ႇ"

========================
ပေႃးတႆးၵေႃႉၶဝ်ယၢမ်ႈလႆႈတူၺ်း ဢပုမ်ႇၸိူင်းဢၼ်
ၼိုင်ႈ ဢၼ်ၸိုဝ်ႈၸိူင်းဝႃႈ မူဝ်ႊဢႃႊၼႃႊၼႆၼၼ်ႉၼႆ
တေၶဝ်ႈၸႂ်လီလိူဝ် ၼႂ်းႁူဝ်ၶေႃႈလိၵ်ႈႁူဝ်ၼႆႉယူႇ။
ဢမ်ႇပႆႇယၢမ်ႈတူၺ်းၼႆၵေႃႈ ဢမ်ႇပဵၼ်သင်လႂ် ၽူႈ
တႅမ်ႈ တေမႃးၶႆႊတီႈၵႅပ်ႈမၼ်းယူႇ သင်ဝႃႈၶႂ်ႈတူၺ်း
တီႈၵႂၢင်ႈမၼ်းၵေႃႈ သိုပ်ႇႁႃတူၺ်းဢဝ်ႁင်းၵွၺ်းၶႃႈ။

တီႈၼႂ်းဢပုမ်ႇၸိူင်းမူဝ်ႊဢႃႊၼႃႊ(MOANA)ၼၼ်ႉ
လၢတ်ႈဝႆႉဝႃႈ ၵႃႈၼႂ်းပၢင်ႇလၢႆႇလူင်ၼၼ်ႉ ယင်းမီးဝႆႉ
ၵုၼ်ၶိူဝ်းၵူၼ်းၶိူဝ်းၼိုင်ႈ။ၶဝ်ယုမ်ႇယမ်ဝႃႈ တီႈယူႇၶဝ်
ၼၼ်ႉ လွတ်ႈၽေးလွတ်ႈၶဵၼ်ၵူႊလွင်ႈၼႆယဝ်ႈ။

ယဝ်ႉၵေႃႈ ၶဝ်မီးပၵ်းပိူင်ႁၢမ်ႈတၢပ်ႈဝႆႉဝႃႈ ၽႂ်ၵေႃႈ
တေဢမ်ႇလႆႈ ဢွၵ်ႇၼွၵ်ႈၶႂၢင်ႇၼမ်ႉႁိမ်းၵုၼ်သေ
ၽၢတ်ႇဢွၵ်ႇၵႂႃႇၵႆၼႆႉယဝ်ႉ။ၵူၼ်းၵူႊၵေႃႉၵေႃႈ ထွမ်ႇ
ႁပ်ႉႁဵတ်းၸွမ်း ပၵ်းပိူင်ဢၼ်ႁၢမ်ႈဢွၵ်ႇပူၼ်ႉတီႈယူႇ
တၼ်းသဝ်းၼၼ်ႉ။ၵူၺ်းၵႃႊဢၼ်ဢမ်ႇၶႂ်ႈႁပ်ႉၸွမ်း
ပၵ်းပိူင်ၼၼ်ႉၵေႃႈ သမ်ႉမီးမႃးၵေႃႉၼိုင်ႈၼင်ႇၵဝ်ႇ
ပဵၼ်လုၵ်ႈယိင်းပူႇၵႄႇဝၢၼ်ႈ ယိင်းဢွၼ်ႇမူဝ်ႊဢႃႊ
ၼႃႊၼၼ်ႉယဝ်ႉ။

မၼ်းၼၢင်းဢိမ်ႇၸၢၼ်ႈ ဢၼ်တေလႆႈယူႇတီႈၼႂ်း
ၵုၼ်လူင်ၼၼ်ႉၵႂႃႇတေႃႇၸူဝ်ႈ။မိူဝ်ႇၸၢၼ်ႈၼႃႇဢၼ်
တေလႆႈႁၼ်ယူႇတီႈၵႅပ်ႈၼႆႉၵူၺ်း။မၼ်းၼၢင်းၶႂ်ႈႁၼ်
ဝႃႈ ပေႃးၶဝ်ႈၵႂႃႇတီႈၼႂ်း ပၢင်ႇလၢႆႇၵႂၢင်ႈၵႂၢင်ႈလူင်ၼႆႉ
တေမီးသင် တေႁၼ်သင်၊တေထူပ်းသင်။မၼ်းၼၢင်း
ၵေႃႈဢဝ်ၵႂႃႇမွၵ်ႇၼႄပေႃႈ ၼႄမႄႈၶဝ်တူၺ်း ပေႃႈ
ၶဝ်ဢမ်ႇၶႂၢင်ႉပၼ်လႆႈ ယွၼ်ႉဝႃႈမၼ်းမီးၽေး ယဝ်ႉ
ၵေႃႈ တေၽိတ်းပၵ်းပိူင်ပူႇမွၼ်ႇႁဝ်း ၼႆယဝ်ႉ။

ပုၼ်ႈတႃႇၵူၼ်းၶိုၼ်ႈယႂ်ႇၶဝ် ၵမ်ႉၼမ်ၼႆႉယၢမ်ႈလႆႈ
ပဵၼ်ၵူၼ်းတိုဝ်မႃး ၵူႊၵေႃႉယဝ်ႈ။ယွၼ်ႉၵွပ်ႈၼၼ်
ၶႂ်ႈဝႃႈႁိုဝ်ဝႃႈ တွၼ်ႈတႃႇမူဝ်ႊဢႃႊၼႃႊတႄႉ ၸႂ်ၶႂ်ႈ
ဢွၵ်ႇဢႅဝ်ႇလႄႇ တီႈၼႂ်းပၢင်ႇလၢႆႇၵႂၢင်ႈၵႂၢင်ႈလူင်ၼႆႉ
တိုၼ်းဢမ်ႇႁၢႆ။ထိုင်ဝၼ်းၼိုင်ႈ မၼ်းၼၢင်းလွမ်လွမ်
ၶီႇႁိူဝ်းဢွၵ်ႇၵႂႃႇ ၵူၺ်းၵႃႊၵၢမ်ႉႁၢႆႉတေႃႉတေႉတၼ်း
ပူၼ်ႉ ၶွပ်ႇလႅၼ်လိၼ်ၵုၼ်ၵွၺ်း ၺႃးၼမ်ႉထင်ႇပတ်ႉ
ပၼ်ႁိူဝ်းမၼ်းပိၼ်ႇပႅတ်ႈလႄႈ မၼ်းၼၢင်းၵေႃႈ ၵႃႈ
လႆႈၶတ်းၸႂ်လုၺ်းမႃးၶိုၼ်း။ဢိုမ်ႉ..တေပဵၼ်ၼင်ႇဝႃႈ
ယူႇ ၵဝ်ဢမ်ႇၵိုင်လီၵႂႃႇ တေထွမ်ႇဢဝ်ၵႂၢမ်းပေႃႈႁဝ်း
သေယူႇသဝ်းၵႂႃႇၵတ်းၵတ်း ယဵၼ်ယဵၼ်ၵွၺ်းယဝ်ႉ။

ဢၢင်ႈတႅပ်းတတ်းၸႂ်ယူႇ ၵူၺ်းၵႃႊဢမ်ႇလႆႈ။တိုၵ်ႉၶႂ်ႈ
ၵႂႃႇယူႇတိၵ်းတိၵ်း။လိုၼ်းသုတ်းၵေႃႉဢၼ်ၵမ်ႉထႅမ်
မၼ်းၼၢင်းၵေႃႈ မီးမႃးယူႇၵေႃႉၼိုင်ႈ ပဵၼ်ၼၢႆးၶဝ်။

ပၼ်ႁႅင်းၸႂ်ဢမ်ႇၵႃး ပၼ်ပႃးႁိူဝ်းလႄႈမွၵ်ႇၼေပၼ်
သဵၼ်ႈတၢင်းတႃႇၵႂႃႇၸူး ဢၢႆးလၢဝ်းလူင်ပၢင်ႇလၢႆႇ။
မူဝ်ႊဢႃႊၼႃႊၵေႃႈ လႆႈသိုပ်ႇၶၢဝ်းတၢင်းၵႂႃႇမိူဝ်ႈၶိုၼ်း
ဢၼ်ၼၢႆးၶဝ်သဵင်ႈၼၼ်ႉယဝ်ႉ။မူဝ်ႊဢႃႊၼႃႊ ဢွၵ်ႇ
ၵႂႃႇတီႈၵုၼ်တီႈယူႇၵဝ်ႇၶဝ်သေ သွၵ်ႈႁႃတီႈပွင်ႇၽဝ
လႄႈ ပုၼ်ႈၽွၼ်းလွင်ႈယႂ်ႇမၼ်းယူႇယဝ်ႉ။

ၼႂ်းၶၢဝ်းတၢင်းပၢင်ႇလၢႆႇၼၼ်ႉ မၼ်းၼၢင်းလႆႈထူပ်း
ၺႃးၽေးၶဵၼ်ၼမ်လၢႆၼႃႇ လွင်ႈလီၵူဝ်လွင်ႈၸႂ်လဵၵ်ႉ
လွင်ႈႁၢမ်ႈၵေႃႉသေႈ ၸိူဝ်းၼႆႉပေႃးၸေးပေႃးၸွတ်ႇ
ၵူၺ်းၵႃႊတႆးၵေႃႉမၼ်းၼၢင်း ဢၼ်တေပၼ်ႁႅင်းၸႂ်
ယူႇတႃႇသေႇၼၼ်ႉတႄႉ ပဵၼ်ပၢင်ႇလၢႆႇလူင်ယဝ်ႈ။

လိုၼ်းသုတ်းမူဝ်ႊဢႃႊၼႃႊ ဢမ်ႇတၢႆၵူၺ်းဢမ်ႇၵႃး
ၶိုၼ်းပွၵ်ႈမႃး မွၵ်ႇလၢတ်ႈၶႆႊၼႄ ၶၢဝ်းတၢင်းၽဝ
ဢၼ်မၼ်းၼၢင်း လႆႈႁူပ်ႉလႆႈထူပ်းၼၼ်ႉ တီႈပီႈတီႈ
ၼွင်ႉ တီႈပေႃႈမႄႈသေ ၸူဝ်းႁွင်ႉသူၼ်းတုမ်ၶဝ်ၶဝ်ႈ
ဢႅဝ်ႇလႄႇ တီးၼႂ်းပၢင်ႇလၢႆႇယႂ်ႇၵႂႃႇလူင်ၼၼ်ႉယဝ်ႈ။
ၵူႊၵေႃႉၵေႃႈ ဢမ်ႇထဵင်ယဝ်ႉၵမ်းၼႆႉ ယွၼ်ႉဝႃႈမၼ်း
ၼၢင်း ႁဵတ်းၼႄလၵ်းထၢၼ်မႃးယဝ်ႉလူး ပေႃးဝႃႈ
ႁဝ်မီး ၸႂ်ၶႂ်ႈပဵၼ်ႁႅင်းၵၢမ်ႇ ႁႅင်းၺၢၼ်ႇသေၶတ်းၸႂ်
ၼႆၸိုင် ႁဝ်းတေဢမ်ႇတၢႆ ၼႂ်းၶၢဝ်းတၢင်းပၢင်ႇလၢႆႇ
လႆႈၼႆၼၼ်ႉ။

************
ပုၼ်ႈတႃႇၵေႃႉမီး ယိူင်းဢၢၼ်းယႂ်ႇသုင် မၢင်ပွၵ်ႈမႃး
ႁဝ်းတေလႆႈလိူၵ်ႈပႆႇၵေႃႉလဵဝ်ၵူၺ်းယဝ်ႈ။ယွၼ်ႉဝႃႈ
ၽႂ်တေဢမ်ႇႁတ်းၸုၼ်ႉ သင်ႁဝ်းဢမ်ႇႁဵတ်းၼႄ ႁႂ်ႈ
ၶဝ်ႁၼ်။

မိူဝ်ႈၵမ်းတေႇၸမၼ်းၼၼ်ႉ ၵူႊၵေႃႉမိူၼ်ၼင်ႇ ပေႃႈ
မႄႈပီႈၼွင်ႉႁိမ်းႁွမ်းၸိူဝ်းၼႆႉ ၶဝ်တေဢမ်ႇၽွမ်ႉလႆႈ
ၸႂ်ၸွမ်း ၼင်ႇၸဝ်ႈၵဝ်ႇၵမ်းလဵဝ်။မၢင်ၵေႃႉယင်းတေ
ထတ်းသၢင်သေႉၼေးၵွၼ်ႇ။ယႃႇပေၽိတ်းၸႂ်တီႈၶဝ်
ႁႂ်ႈၶတ်းၸႂ် ၼေၼမ်ႉၼေတူဝ် ယိူင်းမၢႆႁဝ်းၵွၼ်ႇ ဝၢႆး
မႃး ပေႃးႁဝ်းဢွင်ႇမၢင်ႇယဝ်ႉ ၶဝ်တေယွမ်းႁပ်ႉႁဝ်း
မႃးႁင်းၵွၺ်းယူႇ။

တွင်းဝႆႉလီလီၶႃႈၼႃ မိူဝ်းလဵၵ်ႉလဵၵ်ႉၼုမ်ႇၼုမ်ႇၼႆႉ
ပေႃးၸဝ်ူၵဝ်ႇဢမ်ႇလုၵ်ႉပႆ ထိုင်မိူဝ်ႈထဝ်ႈမႃးၸိုင်
ၸဝ်ႈၵဝ်ႇတေလႆႈ လႅၼ်ႈလမ်းၸွမ်းၵူၼ်ႈပိူၼ်ႈ ဢမ်ႇ
ႁၢင်ႉ။ယႃႇႁႂ်ႈႁိမ်းႁွမ်း မႃးယိပ်းၵမ်ၽဝၸဝ်ူၵဝ်ႇသေ
ၵမ်း။

ယုမ်ႇယမ်ဝႃႈ တေပဵၼ်ႁႅင်းၸႂ် တႃႇတႆးၵေႃႉ ၽူႈလူ
လိၵ်ႈႁဝ်းၶဝ်ၵူႊၵေႃႉယူႇဢေႃႈ။

မႂ်ႇသုင်ၵၢင်ၼႂ်ၶႃႈ-

ၼေႃႇလၢဝ်မိူင်း ၼွင်ဢူႇ
30.ၼူဝ်ႇဝႅမ်ႇပိူဝ်ႇ.217
ဝၼ်းသုၵ်း
Page-တွၼ်ႈထိုင်ၵေႃႉၸႂ်တူၵ်း