ၵွပ်ႈသင် ၶဝ်လႆႈလီလႆႈပဵၼ် ၵွပ်ႈသင်ၶဝ်ဢွင်ႇမၢင်ႇ

ၵွပ်ႈသင် ၶဝ်လႆႈလီလႆႈပဵၼ် ၵွပ်ႈသင်ၶဝ်ဢွင်ႇမၢင်ႇ

သင်ၸဝ်ႈၵဝ်ႇႁၼ်ဝႃႈပိူၼ်ႈၼၼ်ႉပေႉႁဵတ်းလႆႈငၢႆႈတေႉဢၼ်ဝႃႈၼၼ်ႉ တႃႇၶဝ်ဢၼ်ယၢပ်ႇ ၼၼ်ႉ ၶဝ်ႁဵတ်းမႃးၼမ်သေၶၢမ်ႈပူၼ်ႉမႃးယဝ်ႉလႄႈၸွင်ႇလႆလႄႈဝႃႈႁၼ်ၶဝ်ႁဵတ်းငၢႆႈ။ ၶိုၼ်းဝူၼ်ႉပၼ်ဝႃႈ ဢၼ် ၸဝ်ႈၵဝ်ႇၶတ်းၸႂ်သေ ပိူၼ်ႈဢမ်ႇႁူႉၸွမ်းလွင်ႈယၢပ်ႇၸဝ်ႈၵဝ်ႇၼၼ်ႉ တူၺ်းလႄႈ။ ၸဝ်ႈၵဝ်ႇ

တေပွင်ႇၸႂ်လွင်ႈငၢႆႈၶဝ်ၼၼ်ႉယူႇ။

သင်ၸဝ်ႈၵဝ်ႇႁၼ်ဝႃႈ ပိူၼ်ႈၼၼ်ႉပေႉၶၢႆလႆႈလီ ၶၢႆၵူၼ်းသိုဝ်ႉမၼ်းၼမ်တေႉဢၼ်ဝႃႈၼၼ်ႉ၊ တႃႇၶဝ် တေထိုင်လႆႈမွၵ်ႈၵႃႈၼၼ်ႉၵေႃႈ ၶဝ်လႆႈၶတ်းၸႂ်ၵပ်းသိုပ်ႇၶဝ်ႈဢွၵ်ႇၵူၼ်းၼမ်လႄႈ လွင်ႈႁဵတ်းသၢင်ႈ လႄႈၼမ်ႉၸႂ်ၶဝ် လီၼၼ်ႉယဝ်ႉ။ ပေႃးၸဝ်ႈၵဝ်ႇၶႂ်ႈႁူႉလႆႈလီပေႃးၼႆ ဝူၼ်ႉၶိုၼ်းတူၺ်း ဢၼ်ၸဝ်ႈၵဝ်ႇ လႆႈၶတ်းၸႂ်မႃးတင်းၼမ်ၼၼ်ႉတူၺ်းလႄႈ ၸဝ်ႈၵဝ်ႇတေပွင်ႇၸႂ်မႃးယူႇ။

သင်ၸဝ်ႈၵဝ်ႇႁၼ်ပိူၼ်ႈဝႃႈ ၶဝ်ပေႉမီးၵၢၼ်ၼမ် ပေႃးဢမ်ႇသူႈတၼ်းသေပွၵ်ႈၼၼ်ႉ ၵွပ်ႈဝႃႈလွင်ႈၵပ်း သၢၼ်ၶဝ်လီသေ လွင်ႈၶတ်းၸႂ်ၶဝ်ၵေႃႈလီၼၼ်ႉယဝ်ႉ။ ပေႃးၸဝ်ႈၵဝ်ႇၶႂ်ႈပွင်ႇၸႂ်ၼိူဝ်ၶဝ် ဝူၼ်ႉတူၺ်း ၶိုၼ်းၶၢဝ်းယၢမ်းၸဝ်ႈၵဝ်ႇ ၼိုင်ႈဝၼ်းၼၼ်ႉ ၸဝ်ႈၵဝ်ႇၸႂ်ႉၸိူင်ႉႁိုဝ်သေပူၼ်ႉသုတ်းၵႂႃႇၼၼ်ႉလႄႈ။

သုၼ်ႇလႆႈသုၼ်ႇပဵၼ် ဢၼ်ဝႃႈၼၼ်ႉ မၼ်းလႆႈမႃးတီႈ လွင်ႈၶတ်းၸႂ်သေၸွင်ႇၵွႆႈလႆႈမႃးၼၼ်ႉယဝ်ႉ၊ ၵူၼ်းႁဝ်းၵမ်ႉၼမ် လွင်ႈၶတ်းၸႂ် လႄႈလွင်ႈယၢပ်ႇပိူၼ်ႈၼၼ်ႉ သမ်ႉဢမ်ႇႁၼ်ၸွမ်းသေ ႁၼ်ၶဝ်လႆႈ လီလႆႈပဵၼ်လႄႈၼင်ႈသေ ၶွႆၶဝ်ယူႇၼၼ်ႉယဝ်ႉ။ ၼႂ်းၸိူဝ်းၵူၼ်းႁိမ်းႁွမ်းၸဝ်ႈၵဝ်ႇပဵၼ်ၽႂ်ဢၼ်ဝႃႈ ၼၼ်ႉ ဝူၼ်ႉတူၺ်းၶိုၼ်းဢဝ်လႄႈ။

တီႈတေႉမၼ်း တႃႇၶဝ်တေႁွတ်ႈထိုင်သၢင်ႉၼႆႉၵေႃႈ ၶဝ်လႆႈၶတ်းၸႂ်မႃးၵႃႈႁိုဝ်ဢၼ်ဝႃႈၼၼ်ႉ၊

ၶဝ်လႆႈၽိုၵ်းႁဵတ်း ၽိုၵ်းသေလႅၼ်ႇမႃးတၢၼ်ႇႁိုဝ်ႁႂ်ႈပေႃးထိုင်တၢၼ်ႇၼႆႉ ဢၼ်ဝႃႈၼၼ်ႉ၊

ၶဝ်လႆႈၶၢမ်ႇတၢင်းလွင်ႈတုၵ်ႉၶႃႉမႃးတၢၼ်ႇႁိုဝ်သေၸွင်ႇထိုင်မွၵ်ႈၼႆႉ ဢၼ်ဝႃႈၼၼ်ႉ၊

ၶဝ်လႆႈၸူႉႁွမ်တွမ်မႃးလၢႆပီလၢႆလိူၼ်သေၸွင်ႇၵွႆႈမီးမႃး ဢၼ်ဝႃႈၼၼ်ႉ။

ၶဝ်လႆႈလူႉသုမ်းမႃးလၢႆပွၵ်ႈလၢႆၵမ်း၊ ၶဝ်လႆႈလွင်ႈၸဵပ်းဝၢတ်ႇလၢႆပွၵ်ႈလၢႆၵမ်းမႃး ဢၼ်ဝႃၼၼ်ႉ

ၸဝ်ႈၵဝ်ႇၼင်ႈသေဝူၼ်ႉတူၺ်းၶိုၼ်း ၸၢတ်ႈပၢၼ်ၸဝ်ႈၵဝ်ႇဢၼ်ၶၢမ်ႈပူၼ်ႉမႃးၼၼ်ႉ တူၺ်းၶႃႈလႄႈ၊

ၸႂ်ႈ၊ ဢမ်ႇၸႂ်ႈဢၼ်ဝႃႈၼၼ်ႉ။

သင်ဝႃႈၸဝ်ႈၵဝ်ႇၶတ်းၸႂ်မႃးယူႇလႄႈ လွင်ႈဢွင်ႇမၢင်ႇၸဝ်ႈၵဝ်ႇသမ်ႉဢမ်ႇတၢၼ်ႇၶဝ်ၼၼ်ႉ ၵွပ်ႈဝႃႈလွင်ႈထိင်းၸႂ် လွင်ႈဝႆႉဝၢင်းၸႂ် လွင်ႈမေႃဝႆႉၸႂ်ယၢဝ်းၸဝ်ႈၵဝ်ႇ ဢမ်ႇပဵင်းၶဝ်လႆႈၼၼ်ႉယဝ်ႉ။

ပေႃးဝႃႈၶႂ်လႆႈ သုၼ်ႇလႆႈသုၼ်ႇပဵၼ်ၸၼ်ႉသုင် ဢၼ်လီထိသုတ်းပေႃးၼႆ တၢင်းၶတ်းၸႂ်ၸဝ်ႈၵဝ်ႇၵေႃႈ တေလႆႈပဵၼ်ဢၼ်ၶတ်းၸႂ်ထိသုတ်း ဢၼ်ၵိုင်ႇငၢမ်ႇၵတ်တီႈသုတ်းၼၼ်ႉယဝ်။ သင်ဝႃႈၶတ်းၸႂ်ဢိတ်း ဢိတ်းၵေႃႈ သုၼ်ႇလႆႈသုၼ်ႇပဵၼ်ၵေႃႈ တေလႆႈဢိတ်းဢိတ်း ၵိုင်ႇငၢမ်ႇၵၼ်တင်းတင်းၶတ်းၸႂ်ၸဝ်ႈ ၵဝ်ႇၼၼ်ႉၵူၺ်း။ ၸႂ်ႈဢမ်ႇၸႂ်ႈ ဢၼ်ဝႃႈၼၼ်ႉ ၼင်ႈသေဝူၼ်ႉတူၺ်းလႄႈ။

ယွၼ်ႉၼၼ် တေႇဢဝ်မိူဝ်ႈၼႆႉၵႂႃႇ ၸဝ်ႈၵဝ်ႇၶႂ်ႈလႆႈ ၶႂ်ႈပဵၼ်ၸိူင်ႉႁိုဝ် သမ်ႉၶတ်းၸႂ်ဝႆႉၸိူင်ႉႁိုဝ် ဢၼ်ဝႃႈ ၼၼ်ႉ ၸွင်ႇမၼ်းမႅၼ်ႈဢၼ်လဵဝ်ၵၼ်ႁႃႉ ၸွင်ႇမၼ်းတေတူၵ်းထုၵ်ႇႁႃႉ ဢၼ်ဝႃႈၼၼ်ႉ ထတ်းသၢင်ႈ သေတေလႆႈတႅပ်းတတ်းၵႂႃႇႁင်းၸဝ်ႈၵဝ်ႇယဝ်ႉ။

ၸဝ်ႈၵဝ်ႇသမ်ႉၶႂ်ႈဢွင်ႇမၢင်ႇၸိူင်ႉႁိုဝ်

ၸဝ်ႈၵဝ်ႇသမ်ႉ ၶတ်းၸႂ်ဝႆႉၸိူင်ႉႁိုဝ်

ၸဝ်ႈၵဝ်ႇယၢမ်ႈလႆႈလွင်ႈဢွင်ႇမၢင်ႇသင်မႃး

ၸဝ်ႈၵဝ်ႇယၢမ်ႈၶတ်းၸႂ်သင်မႃး

ၸဝ်ႈၵဝ်ႇ ပဵၼ်ၵူၼ်းၼင်ႈသေၶွႆပိူၼ်ႈႁႃႉ

ၸဝ်ႈၵဝ်ႇပဵၼ်ၵူၼ်းၸိၼႄသဵၼ်ႈတၢင်းပိူၼ်ႈႁႃႉ

ၸဝ်ႈၵဝ်ႇပဵၼ်ၵူၼ်းယၢမ်ႈတူၵ်းသုမ်းမႃးယူႇၵူႈမဵဝ်းႁႃႉ

ၸဝ်ႈၵဝ်ႇၶၢမ်ႈလႆႈလွင်ႈယၢပ်ႇသေ ဢွင်ႇမၢင်ႇမႃးတႃႇသေႇႁႃႉ?

ၼပ်ႉယမ်ၽူႈလူလိၵ်ႈ ၽူႈပၼ်ႁႅင်း ႁဝ်းၶဝ်ယႂ်ႇၼမ်သေ

ပၢႆးဝူၼ်ႉၶပ်ႉ