တႃႇတေမေႃလၢတ်ႈၵႂၢမ်းၶႅမ်ႉၶႅမ်ႉၼၼ်ႉ တေလႆႈလၢတ်ႈၸိူင်ႉႁိုဝ်ႉ…..?

တႃႇတေမေႃလၢတ်ႈၵႂၢမ်းၶႅမ်ႉၶႅမ်ႉၼၼ်ႉ တေလႆႈလၢတ်ႈၸိူင်ႉႁိုဝ်ႉ…..?

တႃႇတေလၢတ်ႈၵႂၢမ်းၼၼ်ႉ လူဝ်ႇလၢတ်ႈယူႇဝႃႈၼႆသေတႃႉ တႃႇတေလၢတ်ႈႁႂ်ႈ ပဵၼ်ၵႂၢမ်း လီၼၼ်ႉၵေႃႈ ပဵၼ်ဢၼ်လွင်ႈယႂ်ႇဝႆႉတေႉတေႉ။

ယဝ်ႉၵေႃႈ လွင်ႈလၢတ်ႈလီၼႆႉ ပဵၼ်ၽိင်ႈၵူၼ်းႁဝ်း ပဵၼ်ပၵ်းပိူင်ၵူၼ်းႁဝ်း ၼၼ်ႉယဝ်ႉ။ လွင်ႈလၢတ်ႈၵႂၢမ်း လၢႆးလၢတ်ႈၵႂၢမ်းၼႆႉၵူၼ်းႁဝ်းၵူႈၵေႃႉလႆႈလၢတ်ႈ ယူႇၵူႈဝၼ်း ၸဵမ်လွင်ႈ ၼႃႈၵၢၼ်၊ လွင်ႈဢူၺ်းၵေႃႉဢူၺ်းသေႈ၊ လွင်ႈၸိူဝ်းၵူၼ်း ႁိမ်းႁွမ်း၊ လွင်ႈတႃႇ သုၼ်ႇတူဝ် ၸဝ်ႈၵဝ်ႇၸၵႂႃႇ လွင်ႈဢၼ်ၵပ်းသိုပ်ႇၶဝ်ႈဢွၵ်ႇ ၵၼ် (80%) ပိူဝ်းသိူၼ်ႉၼႆႉ ပဵၼ်လွင်ႈ ဢၼ် ၵပ်းသိုပ်ႇၵၼ် လၢတ်ႈတေႃႇၵၼ်၊ လၢႆလၢႆၼၼ်ႉယဝ်ႉ။

သင်ဝႃႈၸဝ်ႈၵဝ်ႇလႆႈႁဵတ်းၵၢၼ်ၼမ်ၵႃႈႁိုဝ်ၵေႃႈ ၸဝ်ႈၵဝ်ႇတေလႆႈၵပ်းသိုပ်ႇ လၢတ်ႈတေႃႇ ၵူၼ်းၼမ်ၵႃႈၼၼ်ႉယဝ်ႉ၊ ယွၼ်ႉၼၼ် တႃႇတေလၢတ်ႈဢွၵ်ႇပဵၼ် လွင်ႈလီၼၼ်ႉၵေႃႈ လူဝ်ႇ လႆႈလဵပ်ႈႁဵၼ်းဝႆႉယူႇယဝ်ႉ။ လုၵ်ႈႁဵၼ်ၶဝ်ၵမ်ႈၽွင်ႈ ၶဝ်တေၽၢင်ႉမႅၼ်ႈမိူဝ်ႈ ၶူးသွၼ်ၶဝ် မွၵ်ႇ လၢတ်ႈၶေႃႈၵႂၢမ်း ၶူးသွၼ်ၶဝ်မေႃလၢတ်ႈ ႁႂ်ႈၵူၼ်းထွမ်ႇၸၼ်ၸႂ် ၶဝ်ႈၸႂ်၊ ထွမ်ႇဢမ်ႇမေႃ ၶၢၼ်ႉ ၼၼ်ႉယူႇ။ ၵူၺ်းၶူးသွၼ် မၢင်ၵေႃႉၶဝ်မေႃလၢတ်ႈၼႃႇတေႉၵေႃႈဢမ်ႇၸႂ်ႈၼင်ႇၵဝ်ႇ ၶဝ်ႁူႉ လွၵ်းလၢႆး လၢႆးလၢတ်ႈလၢႆးၸႃလႄႈ ၶဝ်လၢတ်ႈၵႂႃႇၸွမ်းလွၵ်းလၢႆးမၼ်းၼၼ်ႉယဝ်ႉ။

တႃႇတေႁႂ်ႈပဵၼ်ၵေႃႉလၢတ်ႈၵႂၢမ်းၶႅၼ်ႇၼၼ်ႉ မၼ်းၵဵဝ်ႇပႃး လွၵ်းလၢႆးဝႆႉဝၢင်း တူဝ် လႄႈတိၼ် မိုဝ်းၵေႃႉလၢတ်ႈၶဝ် ၼၼ်ႉယဝ်ႉ။ ၵဝ်ၶႃႈလႆႈငိၼ်းၽူႈလၢတ်ႈ ၵႂၢမ်းၶဝ် လၢတ်ႈဝႃႈ တႃႇတေ လၢတ်ႈၵႂၢမ်းၶႅၼ်ႇၼၼ်ႉ (တေလႆႈဝႆႉၸႂ်ၼိမ်ꧦသေ လၢတ်ႈ၊ တေလႆႈဝႆႉတူဝ်ၼိမ်ꧦသေလၢတ်ႈ၊ တေလႆႈဝႆႉသဵင်ၼိမ်ꧦသေလၢတ်ႈ၊ တေလႆႈလၢတ်ႈႁႂ်ႈပေႃးၸိုမ်းၶဝ်ႈၼႂ်းဢူၵ်းၼႂ်းၸႂ်ၵူၼ်းထွမ်ႇ မၼ်းၼႆ ၼၼ်ႉ ယဝ်ႉ) တႃႇတေႁႂ်ႈတဵမ်ထူၼ်ႈလႆႈလွင်ႈၸိူဝ်းၼႆႉၵေႃႈ တေလႆႈလၢတ်ႈ ၵျၢင်ႉ ဢဝ် ၸွင်ႇတေလႆႈၼၼ်ႉယဝ်ႉ။

႑-တႃႇတၢင်ႇၵေႃႉတေလၢတ်ႈၼၼ်ႉ ႁႂ်ႈမေႃပၼ်ႁႅင်း၊ (တႃႇတေထၢမ်ၶေႃႈထၢမ် တႃႇတၢင်ႇ ၵေႃႉတေလၢတ်ႈၼၼ်ႉ ပေႃးၸဝ်ႈၵဝ်ႇထွမ်ႇပၼ်ၼမ်ၼမ်ၵေႃႈ ႁႅင်း ၸႂ်ၶဝ်တေမီးမႃးၼမ်ꧦ)

႒- လၢတ်ႈသိုဝ်ႈꧦယူဝ်းꧦ ႁႂ်ႈၸႅင်ႈလႅင်းလီ လႄႈလၢတ်ႈႁႂ်ႈထိုင်တီႈၵမ်းလဵဝ်။ (လၢတ်ႈဢဝ်ပွတ်းꧦသေႁႂ်ႈတီႈပွင်ႇတဵမ်ထူၼ်ႈၼၼ်ႉတေႁဵတ်းႁႂ်ႈမီးၽွၼ်းလီ )

႓- ပေႃးပိူၼ်ႈလၢတ်ႈၼႆ ဝႆႉၸႂ်ယႂ်ႇꧦယၢဝ်းꧦသေႁႂ်ႈထွမ်ႇပၼ်၊ (လွင်ႈထွမ်ႇပၼ် ဢၼ်ပိူၼ်ႈ လၢတ်ႈၼၼ်ႉ တေႁဵတ်းႁႂ်ႈၵူၼ်းလၢတ်ႈမၼ်း မီးလွင်ႈႁၢၼ်ႉၸႂ်)

႔- ယႃႇလၢတ်ႈ သၢၼ်ၶတ်းသေ တတ်းၶၢတ်ႇၵႂၢမ်းပိူၼ်ႈ မိူဝ်ႈပိူၼ်ႈလၢတ်ႈ။

(ယႃႇလၢတ်ႈၵႂၢမ်းတၢင်ႇတၢင်းၽိတ်းလႄႈယႃႇလၢတ်ႈပၼ်တၢင်းႁၼ်ထိုင်ပိူၼ်ႈ)

႕- ယိပ်းၸႂ်ႉ လွင်ႈပဵၼ်လူႉသေ ဢဝ်တင်းပိူင်တႅၵ်ႈမႃးလၢတ်ႈၼႄပၼ်။

(ဢဝ်ပိူင်တႅၵ်ႈတီႈပွတ်းမၼ်းမႃးလၢတ်ႈၼႄပၼ် လွင်ႈဢၼ်ၶႂ်ႈငၢႆးၵၼ်ၼၼ်ႉ)

႖-ယႃႇလၢတ်ႈၵႂၢမ်းဢမ်ႇၼပ်ႉယမ်ပိူၼ်ႈ ၶေႃႈၵႂၢမ်းဢၼ်ထၢင်ႇလဵၵ်ႉပိူၼ်ႈ။

(ၶေႃႈၵႂၢမ်ႈဢၼ်လၢတ်ႈႁႂ်ႈပိူၼ်ႈဢမ်ႇႁၢၼ်ႉၸႂ် ၶေႃႈၵႂၢမ်းၶီႇၼဵၵ်းတဵၵ်းတဵင်)

႗- ယႃႇလၢတ်ႈၵႂၢမ်းႁိပ်ႈၼႅတ်ႈ၊

(ဝႆႉသတိသေ ဝႆႉၸႂ်ၼိမ်ꧦလၢတ်ႈလွႆးꧦလႄႈလၢတ်ႈမၢၼ်ႇꧦၽဵၼ်ႈꧦ)

႘- ယႃႇဢဝ်ၸႂ်ႉ လွင်ႈလၢတ်ႈၵႂၢမ်းၼမ် ၵႂၢမ်းယႂ်း။

(ဝူၼ်ႉတႃႇၶဝ်တႃႇႁဝ်းသေ မၵ်းမၼ်ႈၶၢဝ်းယၢမ်းသေလၢတ်ႈ၊ ဝႆႉၵႃႈၶၼ်ၶၢဝ်း ယၢမ်းသေ လၢတ်ႈ၊ ပေႃးတေလၢတ်ႈယၢဝ်း ႁႂ်ႈၵိုတ်းလိုဝ်ႈသေလၢတ်ႈ)

႙- ယႃႇဢဝ်ၶၢဝ်ႇ တၢင်ႇမဵဝ်းသေမႃးလၢတ်ႈပူၼ်ႉလၢတ်ႈလိူဝ်။

(ၸဝ်ႈၵဝ်ႇၶႂ်ႈလၢတ်ႈၸႂ်ပေႃးသၼ်ႇၵေႃႈ ပေႃးလၢတ်ႈၵႂႃႇၸၢင်ႈတိူၵ်ႉၶိူၵ်ႈၸႂ် ၵူၼ်းထွမ်ႇ ၶဝ်ၵမ်ႈ ၽွင်ႈ)

႑႐- လၢတ်ႈႁႂ်ႈ ၶိုၼ်းငိၼ်းသဵင် ၵူၼ်းထွမ်ႇတုမ်ႉတွပ်ႇလၢတ်ႈတွပ်ႇပၼ်ၶိုၼ်း။

(လၢတ်ႈႁႂ်ႈၵူၼ်းထွမ်ႇၶဝ်ၶိုၼ်းတွပ်ႇပၼ်ၼႆႉ ပဵၼ်ဢၼ်ၸၼ်ၸႂ်ၵူၼ်းထွမ်ႇမၼ်း ဢၼ်ၼိုင်ႈ ယဝ်ႉ)

႑႑- လၢတ်ႈႁႂ်ႈၶေႃႈၵႂၢမ်းၸဝ်ႈၵဝ်ႇ မီးဢသၢၵ်ႈမီးၸႂ်၊ ႁႂ်ႈပိူၼ်ႈပေႃးငႄးထွမ်ႇ။)

(ၶေႃႈၵႂၢမ်းလၢတ်ႈၸဝ်ႈၵဝ်ႇ ဢၼ်မီးဢသၢၵ်ၼၼ်ႉ ႁဵတ်းႁႂ်ႈသုမ်ႇငမ်းလႆႈ မၢၵ်ႇႁူဝ်ၸႂ်ၵူၼ်း ထွမ်ႇမၼ်းၼၼ်ႉယဝ်ႉ)

႑႒-ႁႂ်ႈမေႃယွၼ်းတၢင်းၶႂၢင်ႉတီႈတၢင်ႇၵေႃႉ။

(ၸဝ်ႈၵဝ်ႇတေလႆႈၸွႆႈထႅမ်ၸိူင်ႉႁိုဝ်ၶေႃႈထၢမ်ၸဝ်ႈၵဝ်ႇၼၼ်ႉ တေပဵၼ်ပၢႆးၵပ်းသိုပ်ႇၵႂႃႇတင်း ၼႃႈၼၼ်ႉယဝ်ႉ)

႑႓-ဢၼ်ပိူၼ်ႈဢဝ်တေႃးသသေၶႂ်ႈႁႃလိူင်ႈၼၼ်ႉ ဢဝ်လွၵ်းလၢႆးဢူၼ်ႈဢွၼ်ႇ သေတုမ်ႉ တွပ်ႇပၼ်ၶိုၼ်းလႄႈ၊ (ဢၼ်ပိူၼ်ႈဢဝ်လွင်ႈၸင်း ဢဝ်လွင်ႈဢမ်ႇ ႁၼ် လီ သေႁႃလိူင်ႈၼၼ်ႉ ဢဝ်ၶိုၼ်းလွင်ႈဢၼ်ႁၼ်လီသေ ဢဝ်မျၢတ်ႉတႃႇၼၼ်ႉဢဝ်ၶိုၼ်းလွင်ႈပေႉၶဝ်လႄႈ)

႑႔- သင်ယွၼ်းတၢင်းႁၼ်ထိုင်မႃး ယႃႇပေဝႆႉၸႂ်ဝႆး၊ ၸႂ်ႁိပ်ႈၸႂ်ၼႅတ်ႈ။

(လူဝ်ႇဝူၼ်ႉႁႃဢဝ်လွင်ႈတၢင်းဢၼ်ၶိုၵ်ႉလိူဝ်သေၶိုၵ်ႉၼၼ်ႉ တုမ်ႉတွပ်ႇပၼ်)

႑႕- ဢဝ်ၸႂ်သႂ်ႇၼိူဝ်ၼႃႈၵၢၼ်သေ ဝူၼ်ႉပၼ်ၸွမ်းလႄႈ။

(မီးသတိသေ ဢဝ်ၸႂ်ၸပ်းသႂ်ႇဢၼ်ဝႃႈၼၼ်ႉ ပၼ်လႆႈၽွၼ်းလီမၼ်း တႃႇတေ လၢတ်ႈတွပ်ႇ ၶိုၼ်းၼၼ်ႉဢိူဝ်ႈ)

တွၼ်ႈတႃႇတေလၢတ်ႈလႆႈၵႂၢမ်းၶႅမ်ႉလႅပ်ႈ မေႃလၢတ်ႈမေႃၸႃၼၼ်ႉ ပိူင်လူင်မၼ်းတေႉ ၶေႃႈၵႂၢမ်းဢၼ်ၸဝ်ႈၵဝ်ႇလၢတ်ႈၼၼ်ႉ ႁႂ်ႈပဵၼ်ၶေႃႈၵႂၢမ်းဢၼ် ၸွႆႈထႅမ် ပၼ်လႆႈ ၶေႃႈႁၼ် ထိုင်တီႈၵူၼ်းထွမ်ႇ၊ လၢတ်ႈယဝ်ႉ ႁႂ်ႈပႃးလွင်ႈၵၢၼ်တူင်ႉၼိုင် တူဝ်ၶိင်းလႄႈ တိၼ်မိုဝ်း ၸဝ်ႈၵဝ်ႇ၊ ၸဝ်ႈၵဝ်ႇတေလႆႈၶဝ်ႈၸႂ်ၼိူဝ်လွင်ႈၸဝ်ႈၵဝ်ႇလၢတ်ႈၼၼ်ႉၼႄပိူၼ်ႈ၊ ပေႃးယဝ်ႉ ပၼ်ၶိုၼ်းၶေႃႈထၢမ်တီႈၵူၼ်းထွမ်ႇ ဢၼ်ၶဝ်ဢမ်ႇၸႅင်ႈလီ၊ ယဝ်ႉၵေႃႉ ပႃးၸႂ်ပႃးၶေႃးသေ တွပ်ႇပၼ်ၵႃႈၼင်ႇၶဝ်ပွင်ႇၸႂ်၊ လွင်ႈတၢင်းဢၼ်ၸဝ်ႈၵဝ်ႇလၢတ်ႈၼၼ်ႉ ယႃႇပေႁႂ်ႈပိူင်ႈၽိတ်း ၵႂႃႇလွင်ႈယိူင်းဢၢၼ်း ဢၼ်ၶႂ်ႈလၢတ်ႈၼၼ်ႉ၊ ၸၵႂႃႇလၢႆးလၢတ်ႈၵႂၢမ်းၵူႈသမ်ႇသႅၼ်ပိူင်ၼၼ်ႉ ၶတ်းၸႂ်ႁႂ်ႈတဵမ်ထူၼ်ႈလႆႈသေ ပဵၼ်ၵူၺ်းၵတ်ႉၶႅၼ်ႇ ပၢႆးလၢတ်ႈပၢႆးၸႃမႃးဢမ်ႇႁၢင်ႉ။

ဢၼ်ပိူၼ်ႈဢွင်ႇမၢင်ႇယူႇထိုင်ဝၼ်းမိူဝ်ႈၼႆႉၵေႃႈ ၶဝ်ႈပႃးလွင်ႈလၢတ်ႈၸႃၶဝ်ၶႅမ်ႉၼၼ်ႉၵေႃႈ ပႃးယူႇၼၼ်ႉယဝ်ႉ။ ၶေႃႈၵႂၢမ်းဢၼ်ပိူၼ်ႈလၢတ်ႈလႄႈ ၸဝ်ႈၵဝ်ႇႁူႉၵႂႃႇၸိူဝ်းၼၼ်ႉ ယႃႇထွမ်ႇ ပႅတ်ႈလၢႆလၢႆ ႁႂ်ႈမေႃဢဝ်ၸႂ်ႉတိုဝ်းပႃးၼႂ်ႂ်းၸၢတ်ႈပၢၼ်ၸဝ်ႈၵဝ်ႇ ၼင်ႇႁိုဝ်ပေႃးတေၶိုၼ်ႈယႂ်ႇ ၸွမ်းၼႆၼၼ်ႉယဝ်ႉ။

လၢတ်ႈ ႁႂ်ႈပိူၼ်ႈယွမ်းႁပ်ႉၶေႃႈၵႂၢမ်းၸဝ်ႈၵဝ်ႇၼၼ်ႉ မၼ်းတေႁဵတ်းႁႂ်ႈၵုမ်းထိင်းလႆႈၸႂ်ၵူၼ်း ထွမ်ႇမၼ်းလႄႈ ပဵၼ်ပၼ်ၺႃႇလၢႆးလၢတ်ႈဢၼ်ၼိုင်ႈၼႆၼၼ်ႉယဝ်ႉ။ ဢဝ်သေလွင်ႈꧦ လွင်ႈ ဢၼ်မိူၼ်ၵၼ်မႃး လၢတ်ႈမိူၼ် ၵၼ်သေတႃႉၵေႃႈ ပေႃးဝႃႈ ဢမ်ႇမေႃလၢတ်ႈၼႆ တႃႇႁႂ်ႈ ပိူၼ်ႈယွမ်းႁပ်ႉၼၼ်ႉ မၼ်းယၢပ်ႇဝႆႉ၊ ပိူၼ်ႈလၢတ်ႈ ၵူၼ်းထွမ်ႇဢမ်ႇယွမ်းႁပ်ႉ ၸဝ်ႈၵဝ်ႇ လၢတ်ႈပိူၼ်ႈ ယွမ်းႁပ်ႉ ပေႃး ဝႃႈ ၼႆၸိုင် လႆႈဝႃႈၸဝ်ႈ ၵဝ်ႇမီး လၢႆးလၢတ်ႈ လၢႆးၸႃ ပၼ်ၺႃႇမၼ်းၼၼ်ႉယဝ်ႉ။

ႁႂ်ဢွၼ်ၵၼ်မေႃလၢတ်ႈမေႃၸႃ မေႃႁူႉမေႃႁၼ် လၢႆးလၢတ်ႈပၼ်ၺႃႇသေ ဢၼ် ၸဝ်ႈၵဝ်ႇ လၢတ်ႈၼၼ်ႉၵေႃႈ ႁႂ်ႈပဵၼ်ၶေႃၵႂၢမ်းလီ ၶေႃႈၵႂၢမ်းဝၢၼ် လႄႈႁႂ်ႈၵူၼ်းၸိူဝ်းႁိမ်းႁွမ်း ၶိုၼ်းယႂ်ႇလူၺ်ႈၵၼ်သေၵမ်း။

ပၢႆးဝူၼ်ႉၶပ်ႉ

႕-႑-႒႐႑႘