ႁၼ်တင်းၼွၵ်ႈၵူၺ်း ယႃႇၵိုင်ႉၵင်ႉတႅပ်းတတ်းဝႃႈ တင်းၼႂ်းမၼ်းမိူၼ်ႁိုဝ်

မၢၵ်ႇၽိတ်ႉလုၵ်ႈလႅင်လႅင်ဢွၼ်ႇလုၵ်ႈၼိုင်ႈၼၼ်ႉ ပေႃးတူၺ်းဢဝ်တင်းၼွၵ်ႈမၼ်းတေႉ

လႅင်ၸွင်းႁွင်းသေ မိူၼ်ၼင်ႇဝႃႈတင်းၼႂ်းမၼ်း တေၸဵမ်းၼၼ်ႉယဝ်ႉ။ ၵူၺ်းၵႃႈ

ဢမ်ႇမိူၼ်ၼင်ႇ ဢၼ်ထၢင်ႇဝႆႉဝႃႈမၼ်းတေၸဵမ်းၼၼ်ႉ ယိုင်ႈႁူၺ်ႇမၼ်းလႅင်လီ

ယိုင်ႈၽဵတ်းလီၼၼ်ႉယဝ်ႉ။

တႅင်တမ်ႇပူႇၼႆႉ ပေႃးတူၺ်းတင်းၼွၵ်ႈမၼ်း ၶဵဝ်လၢႆးမူၼ်ႇမူၼ်ႇဝႆႉ

မိူၼ်ၼင်ႇဝႃႈ တင်းၼႂ်းမၼ်းတေၶူမ် တေၽၢတ်ႇၼၼ်ႉယဝ်ႉ၊

ၵူၺ်းၵႃႈ ဢမ်ႇမိူၼ်ၼင်ႇ ဢၼ်ထၢင်ႇဝႆႉၼၼ်ႉ

ယိုင်ႈသုၵ်းလီ တင်းၼႂ်းမၼ်း ယိုင်ႈလႅင်သေၸဵမ်းဝႆႉၼၼ်ႉယဝ်ႉ။

မၢၵ်ႇမႆႉတၢင်ႇမဵဝ်းၵေႃႈ ဢၼ်မိူၼ်ၼၼ် မီးယူႇထႅင်ႈတင်းၼမ်။ ၵူၺ်းၵႃႈ ဢၼ်ၶႂ်ႈလၢတ်ႈတေႉ

ၵူၼ်းႁဝ်းၼၼ်ႉယဝ်ႉ၊ ၵူၼ်းႁဝ်းၼႆႉ သၽႃႇဝမၼ်း တိုၼ်းလၢၵ်ႇလၢႆးၼၼ်ႉယဝ်ႉ၊ ပေႃးဢမ်ႇၸႂ်ႈ

ၵူၼ်းၼမ်ႉၸႂ်တဵမ်ထူၼ်ႈၶဝ်၊ ႁၼ်ပိူၼ်ႈမၢင်ၵေႃႉ ၶဝ်ႁဵတ်းၼၼ် ၶဝ်ႁဵတ်းၼႆ ယူႇတီႈၵႆၵႆသေ

မုင်ႈႁၼ်ဢွၼ်ႇၵူၺ်း ဢမ်ႇႁူႉလူၺ်ႈလွင်ႈႁဵတ်းသၢင်ႈပိူၼ်ႈ လီလီသေ၊ ၶဝ်ၼၼ်ႉႁဵတ်းၼၼ်

ၶဝ်ၼၼ်ႉႁဵတ်းၼႆ လၢမ်းထတ်းသၢင်ႈလူင်ၵႂႃႇ ၸွမ်းၼင်ႇဢၼ်ၸဝ်ႈၵဝ်ႇထၢင်ႇ၊

လွင်ႈထၢင်ႇဢၼ်ဝႃႈၼႆႉ ၶႂ်ႈၸႂ်ႈၵေႃႈတေၸႂ်ႈ ဢမ်ႇၶႂ်ႈၸႂ်ႈၵေႃႈ တေဢမ်ႇၸႂ်ႈ၊ ယွၼ်ႉဢမ်ႇႁူႉလႆႈလီလီ

တင်းၼႂ်းၸႂ်ပိူၼ်ႈၼၼ်ႉယဝ်ႉ။ မၢင်ပွၵ်ႈႁဝ်းထၢင်ႇဝႃႈ ၶဝ်ပဵၼ်ၵူၼ်း ၸိူင်ႉၼၼ်ၸိူင်ႉၼႆ

ၵူၼ်းယႃႉ ၵူၼ်းၵဝ်း ၵူၼ်းသုၵ်ႉ ၵူၼ်းယုင်ႈ၊ ၵူၺ်းၵႃႈ ပေႃးဝႃႈၸဝ်ႈၵဝ်ႇ ဢမ်ႇႁူႉဝႆႉလွင်ႈပိူၼ်ႈလီလီ

ဢမ်ႇႁူႉ ဢၵျွင်းလွင်ႈတၢင်းပိူၼ်ႈလီလီပေႃးၼႆ ဢၼ်ၸဝ်ႈၵဝ်ႇထၢင်ႇၼၼ်ႉ ၸၢင်ႈပိၼ်ႈၽူၼ်ၵေႃႈ

ပဵၼ်ဢိူဝ်ႈ၊ မိူၼ်ၼင်ႇဢၼ်လၢတ်ႈမႃး မၢၵ်ႇၽိတ်ႉလႄႈ တႅင်တမ်ႇပူႇၼၼ်ႉ။

ပေႃးတေဝႃႈတီႈတေႉမၼ်း ၵူၼ်းႁဝ်းၼႆႉ ယွၼ်ႉပဵၼ်ၵူၼ်း ပုထုၸၼ်ႇၵူၺ်းလႄႈ

လွင်ႈၽိတ်းလႄႈ လွင်ႈထုၵ်ႇၽႂ်ၵေႃႈ မီးယူႇတင်းသွင်ဢၼ်၊ ယူႇတီႈၸဝ်ႈၵဝ်ႇၵေႃႉၼိုင်ႈသေ

ပိူၼ်ႈတၢင်ႇၵေႃႉၼၼ်ႉ ပေႃးၸဝ်ႈၵဝ်ႇတူၺ်းဢဝ်တၢင်းၽိတ်းမၼ်းၵူၺ်းၵေႃႈ ၵူၼ်းၵေႃႉၼၼ်ႉ

မိူၼ်ၼင်ႇဝႃႈ ပဵၼ်ၵူၼ်းမီးတၢင်းၽိတ်း ၵူၼ်းမိူၵ်ႈၵူၼ်းလိူင်းၵႂႃႇယဝ်ႉ။

သင်ဝႃႈ ၸဝ်ႈၵဝ်ႇတူၺ်းဢဝ် ဢၼ်လီလွင်ႈလီပိူၼ်ႈၵူၺ်းၵေႃႈ မိူၼ်ၼင်ႇဝႃႈၵူၼ်းၵေႃႉၼၼ်ႉ

ပဵၼ်ၵူၼ်းလီၼၼ်ႉယဝ်ႉ။ ယူႇတီႈပိူၼ်ႈတၢင်ႇၵေႃႉသေ ပေႃးၶဝ်တူၺ်းၶိုၼ်း တီႈတူဝ်ႁဝ်းၵေႃႈ

တေပဵၼ်မိူၼ်ၼင်ႇ ဢၼ်ႁဝ်းတူၺ်းႁၼ်ၼိူဝ်ပိူၼ်ႈၼၼ်ႉၵူၺ်း၊ ပေႃးပိူၼ်ႈတူၺ်းႁၼ် တူၺ်း

ဢဝ် ဢၼ်ႁၢႆႉ လွင်ႈႁၢႆႉ လွင်ႈဢမ်ႇလီႁဝ်းၼၼ်ႉၵူၺ်းၵေႃႈ မိူၼ်ၼင်ႇဝႃႈ ႁဝ်းၼႆႉပဵၼ်ၵူၼ်း

ႁၢႆႉ ၵူၼ်းဢမ်ႇလီၵႂႃႇယဝ်ႉ။ ယူႇတီႈၸဝ်ႈၵဝ်ႇသေ ပေႃးပိူၼ်ႈတူၺ်းႁၼ်ဢၼ် ႁၢႆႉဢၼ်ဢမ်ႇလီ

ႁဝ်းၼၼ်ႉသေ တႅပ်းတတ်းပၼ်ႁဝ်းဝႃႈ ႁဝ်းပဵၼ်ၵူၼ်း ဢမ်ႇလီပေႃးၼႆႉ

ၸွင်ႇၸဝ်ႈၵဝ်ႇတေလႆႈၸႂ် တေၵျိူၵ်ႈႁိုဝ် - ၼႆဝူၼ်ႉဢဝ်ႁင်းၵူၺ်းၸဝ်ႈၵဝ်ႇလႄႈ။

ၵူၼ်းႁဝ်းၼိုင်ႈၵေႃႉၼႆႉ မၼ်းယူႇတီႈ လၢႆးဝႆႉဝၢင်းၸႂ် ပိုၼ်ႉၶၢမ်ႇၼမ်ႉၸႂ်ၶဝ် လီႁႃႉ ဢမ်ႇလီ

ၼၼ်ႉၵူၺ်း၊ ဢမ်ႇၼၼ် လၢႆးဝႆႉဝၢင်းၸႂ်ၶဝ် ၸၼ်ႉသုင်ႁႃႉ ၸၼ်ႉတႅမ်ႇၼၼ်ႉယဝ်ႉ။

ၵူၼ်းၵေႃႉဢၼ် လၢႆးဝႆႉဝၢင်းၸႂ် ဢမ်ႇလီ၊ ပိုၼ်ႉၶၢမ်ႇၼမ်ႉၸႂ်မၼ်းဢမ်ႇလီပေႃးၼႆ

ၵူႈၸိူဝ်းၵူႈလွင်ႈၼၼ်ႉ မၼ်းတေတူၺ်းႁၼ် ဢၼ်ဢမ်ႇလီပိူၼ်ႈၼၼ်ႉၵူၺ်း။

ပေႃးပိူၼ်ႈႁဵတ်းလီ ၵၢၼ်လီ ၼႆသမ်ႉဢမ်ႇမေႃႁူမ်ၸူမ်းၸွမ်းထႅင်ႈ၊ ယေႃႉ-- ပေႃးႁၼ်

ပိူၼ်ႈႁဵတ်းလွင်ႈဢမ်ႇလီပွၵ်ႈၼိုင်ႈၼႆတေႉ လၢတ်ႈပေႃးဢမ်ႇယဝ်ႉ၊ ႁိုင်လၢႆပီၵေႃႈ ပၢႆၵဵပ်းသိမ်းဝႆႉ

ၼႂ်းၸႂ်သေ ဢဝ်ဝႆႉလၢတ်ႈၼႄလုၵ်ႈၼႄလၢၼ်ထႅင်ႈၵွၼ်ႇ၊ ဢၼ်ၼႆႉ လၢတ်ႈၼႄဝႃႈ ၵူၼ်းမီး

ၼမ်ႉၸႂ်တူၵ်းတႅမ်ႇ ၵူၼ်းမီးၼမ်ႉၸႂ်ဢမ်ႇၶိုၼ်ႈသုင်ၶဝ်ၼၼ်ႉယဝ်ႉ။ ယဝ်ႉၵေႃႈ ၵူၼ်းမီးၼမ်ႉၸႂ်

တူၵ်းတႅမ်ႇၶဝ်ၼၼ်ႉ ၵႆႉယူႇလူၺ်ႈ  ၸႂ်တေႃးသ ၸႂ်မေႃႁ ၸႂ်မႃႇၼ ၼၼ်ႉယဝ်ႉ။ ပေႃးဝႃႈ

ၶဝ်ႁၼ်ပိူၼ်ႈၼႆၵေႃႈ ယွၼ်ႉၶဝ်တူၺ်းႁၼ် ဢၼ်ဢမ်ႇလီပိူၼ်ႈၼၼ်ႉၵူၺ်းလႄႈ ၼႂ်းၸႂ်ၶဝ်

ၵုမ်ႇပဵၼ် တေႃးသ မေႃႁ ယူႇၵူၺ်း။ ပေႃးဝႃႈဢမ်ႇႁၼ်လီ ဢၼ်လီၼိူဝ်ပိူၼ်ႈပေႃးၼႆ

ၸႂ်ၸဝ်ႈၵဝ်ႇၵေႃႈ တေဢမ်ႇၵျေႃႇ တေဢမ်ႇမူၼ်ႈ၊ ဢၼ်ၼႆႉ ၸွင်ႇပႃးၸဝ်ႈၵဝ်ႇၼႆ ထတ်းသၢင်ႈတူၺ်းၶိုၼ်း တူဝ်ၸဝ်ႈၵဝ်ႇတႃႉ။

ၵူၼ်းမီးၼမ်ႉၸႂ်လီ ၼမ်ႉၸႂ်ၶိုၼ်ႈယႂ်ႇၶဝ်ၼၼ်ႉၸမ်ႉ ပိၼ်ႈၽူၼ်ၵၼ်တင်း ၵူၼ်းမီးၼမ်ႉၸႂ်

ဢမ်ႇလီၶဝ်ၼၼ်ႉယဝ်ႉ။ ပေႃးဝႃႈၶဝ်တူၺ်းၵူၼ်းၼိုင်ႈၵေႃႉၼႆ  တူၺ်းၵူၼ်းသင်ၵေႃႈယဝ်ႉ

ဢမ်ႇဝႃႈ ၵူၼ်းႁၢႆႉ ၵူၼ်းယွၼ်း ၸၵႂႃႇၶဝ်မေႃတူၺ်းဢဝ် ဢၼ်လီပိူၼ်ႈၼၼ်ႉယဝ်ႉ။

ပေႃးဝႃႈႁဝ်းတူၺ်းဢဝ် ဢၼ်လီပိူၼ်ႈပေႃးၼႆ လွင်ႈလီပိူၼ်ႈၼၼ်ႉ ဢဝ်မႃးၸႂ်ႉၼႂ်း

ၸၢတ်ႈပၢၼ်ႁဝ်းၵေႃႈလႆႈ ဢဝ်ၶိုၼ်းလၢတ်ႈၼႄလုၵ်ႈၼႄလၢၼ် တႃႇပၼ်ႁႅင်းၸႂ်ၵေႃႈလႆႈ၊

ႁၼ်ၽႂ်ၵေႃႈ ယွၼ်ႉတူၺ်းဢဝ် ဢၼ်လီပိူၼ်ႈၵူၺ်းလႄႈ ၸႂ်ၸဝ်ႈၵဝ်ႇၵေႃႈတေမူၼ်ႈတေသိူဝ်း၊

ၵူၼ်းႁဝ်း ပေႃးယူႇၸွမ်းလွင်ႈမေႃဝႆႉၸႂ် မူၼ်ႈၸႂ်သိူဝ်းၼႆ ဢသၢၵ်ႈၵေႃႈယၢဝ်းၼၼ်ႉယဝ်ႉ။

လွင်ႈၸႂ်လမ် တေႃးသ မေႃးႁ ၵေႃႈတေဢႄႇမၢင်ၵႂႃႇၼၼ်ႉယဝ်ႉ။

ၶႂ်ႈဝႃႈလႄႈဝႃႈဢမ်ႇၸႂ်ႈ ၵူၼ်းႁဝ်းၼႆႉ ႁၼ်ၶိုၼ်းတူဝ်ၸဝ်ႈၵဝ်ႇ ပဵၼ်ၵူၼ်းလီလွၼ်ႉလွၼ်ႉယဝ်ႉ။

ယဝ်ႉၵေႃႈ လွင်ႈဢမ်ႇလီၸဝ်ႈၵဝ်ႇၼၼ်ႉ သိမ်းဝႆႉပေႃးၼႃႇသေ သိမ်းငိုၼ်းသိမ်းၶမ်းယဝ်ႉ။

ၵ။ ႁဝ်းပဵၼ်ၵူၼ်းမႃးၼိုင်ႈၸၢတ်ႈၼႆႉ ႁဝ်းဝႆႉၵႃႈၶၼ်တူဝ်ႁဝ်းၵႃႈႁိုဝ်ၵေႃႈ ၶတ်းၸႂ်ႁႂ်ႈမေႃဝႆႉ

ၵႃႈၶၼ်တူဝ်ပိူၼ်ႈ မိူၼ်ႁဝ်းၼၼ်ႉလႄႈ။

ၶ။ လူဝ်ႇၶတ်းၸႂ်ႁႂ်ႈပဵၼ်ၵူၼ်း မီးၼမ်ႉၸႂ်တဵမ်ထူၼ်ႈ၊

င။ လူဝ်ႇလႆႈပဵၼ်ၵူၼ်း မေႃတူၺ်းႁၼ် ၽၢႆႇပိူၼ်ႈၽၢႆႇႁဝ်း။

ၸ။ ၵူၼ်းႁဝ်းၼႆႉ ယွၼ်ႉဢမ်ႇႁၼ်ၵၢမ်ႇၵၼ်လႄႈ ဢမ်ႇထုၵ်ႇလီထၢင်ႇလဵၵ်ႉပိူၼ်ႈ။

သ။ ၸဝ်ႈၵဝ်ႇဢမ်ႇၽိတ်း ၸဝ်ႈၵဝ်ႇႁဵတ်းမၢၼ်ႇမႅၼ်ႈယူႇတႃႇသေႇဢၼ်ဝႃႈၼၼ်ႉ

      မၼ်းဢမ်ႇမီး။

ၵွပ်ႈၼၼ် ႁၼ်တင်းၼွၵ်ႈမၼ်းၵူၺ်း ယႃႇၵိုင်ႉၵၢင်ႉတႅပ်းတတ်းဝႃႈ မၼ်းၼၼ်ႉ

မိူၼ်ၼၼ် မႂ်းၼၼ်ႉမိူၼ်ၼႆလူင်ယူႇ။

ႁႂ်ႈဢဝ်ပဵၼ်တွၼ်ႈသွၼ်တူဝ် ၽႂ်မၼ်းသေ---

ပၢႆးဝူၼ်ႉၶပ်ႉ

Credit : Original