ၵူၼ်းၽၢၼ်/ၵူၼ်းမီး၊ ၵူၼ်းၽၢၼ်မိူၼ်ၵူၼ်းမီး၊
ၵူၼ်းမီးမိူၼ်ၵူၼ်းၽၢၼ်/ ၽၢၼ်သိုပ်ႇၽၢၼ်၊ မီးသိုပ်ႇမီး
ၵူၼ်းၽၢၼ်
႑- ၵူၼ်းၽၢၼ်ၼမ်ႉၸႂ် ၽၢၼ်ၸေတၼႃႇ တႃႇႁဵတ်းပၼ်
ၵၢၼ်ၵူၼ်းတင်းၼမ် လႄႈ လွင်ႈလူႇလွင်ႈတၢၼ်း။
႒- ၽၢၼ်ၶူဝ်းၶွင်ငိုၼ်းၶမ်း ဢမ်ႇမီးသင်တႃႇတေၸႂ်ႉ
လႆႈတႃႇတူဝ်ၵဝ်ႇ လိူဝ်သေယွၼ်းၵိၼ်ဢၼ်လဵဝ်။
ၵူၼ်းမီး
႑ - ၵူၼ်းမီးၼမ့်ၸႂ် ၵူၼ်းမီးၸေတၼႃႇ ၶႂ်ႈႁဵတ်း ၶႂ်ႈသၢင်ႈ
ပၼ် ၵၢၼ်ၵူၼ်းၼမ် လႄႈ လွင်ႈလူႇလွင်ႈတၢၼ်း။
႒- ၵူၼ်းမီးငိုၼ်းၶမ်း ၶူဝ်းၶွင်လိူင်ႇမၢၵ်ႈလီ။
(ၵူၼ်းၽၢၼ်မိူၼ်ၵူၼ်းမီး ၵူၼ်းမီးမိူၼ်ၵူၼ်းၽၢၼ်)
႑- ၵူၼ်းၵေႃႉဢၼ်ၽၢၼ်ၶူဝ်းၶွင်ငိုၼ်းၶမ်းၼၼ်ႉ
ပိၵ်ႉသမ်ႉဝႃႈမၼ်းၽၢၼ်ၵေႃႈ ပေႃးဝႃႈမၼ်းမီးၼမ်ႉၸႂ်
ၸေႇတၼႃႇလီ ဢဝ်ႁႅင်းတူဝ်ၸဝ်ႈၵဝ်ႇ ႁဵတ်းသၢင်ႈ
ပၼ်ၵၢၼ်ၵူၼ်းၼမ်ၼႆတေႉ မၼ်းၽၢၼ်ၶူဝ်းၶွင်ၵေႃႈ
ယွၼ်ႉမၼ်းမီးၼမ်ႉၸႂ်လီ ၸေတၼႃႇလီလႄႈ ၸင်ႇႁွင်ႉဝႃႈ
မၼ်းမိူၼ်ၵူၼ်းမီး၊
႒- ၵူၼ်းမီးၶူဝ်းၶွင် ငိုၼ်းၶမ်းတဵမ်ႈထူၼ်ႈဝႆႉယူႇၼၼ်ႉ
ပိၵ်ႉသမ်ႉဝႃႈမၼ်းမီးတၢၼ်ႇႁိုဝ်ၵႃႈႁိုဝ်ၵေႃႈ တႃႇတူဝ်
မၼ်းၵေႃႈ မၼ်းဢမ်ႇႁတ်းၸၢႆႇ၊ တႃႇၵူၼ်းတင်းၼမ်
ၵေႃႈ ဢမ်ႇဢဝ်ၸႂ်ႉဢဝ်တိုဝ်း ဢမ်ႇႁတ်းၸႂ်ႉ ဢမ်ႇႁတ်း
ၸၢႆႇၼၼ်ႉ မၼ်းမီးယူႇၵေႃႈ ယွၼ်ႉမၼ်း ဢမ်ႇဢဝ်ၸႂ်ႂ်ႉ
ဢမ်ႇဢဝ်ၸၢႆႇလႄႈ ၸွင်ႇႁွင်ႉဝႃႈ မၼ်းမိူၼ်ၵူၼ်းၽၢၼ်။
(ၽၢၼ်ယဝ်ႉ သိုပ်ႇၽၢၼ် မီးယဝ်ႉသိုပ်ႇမီး)
႑- ၸဝ်ႈၵဝ်ႇဢမ်ႇမီးၶူဝ်းၶွင်ငိုၼ်းၶမ်းဢီသင် ဢမ်ႇမီးသင်
သေဢိတ်း လိူဝ်သေယွၼ်းၵိၼ်တီႈပိူၼ်ႈ၊ သမ်ႉဢမ်ႇမီးပႃး
ၼမ်ႉၸႂ် ၶႂ်ႈၸွႆႈၶႂ်ႈႁဵတ်းၶႂ်ႈသၢင်ႈ ပၼ်တႃႇပိူၼ်ႈ တႃႇၵူၼ်းၼမ်
ပေႃးၼႆ ယွၼ်ႉၽၢၼ်ငိုၼ်းၶမ်းၶူဝ်းၶွင်ၵူၺ်းဢမ်ႇၵႃး ၽၢၼ်
ပႃး ၼမ်ႉၸႂ် ၽၢၼ်ပႃးၸေႇတၼႃႇထႅင်ႈလႄႈ ၸင်ႇလႆႈႁွင်ႉဝႃႈ
ၽၢၼ်ယဝ်ႉ သိုပ်ႇၽၢၼ်။
႒- ၵူၼ်းမီးၶူဝ်းၶွင်ငိုၼ်းၶမ်း တဵမ်ထူၼ်ႈၼႂ်းႁိူၼ်းၼႂ်းယႄး
ၶဝ်ၼၼ်ႉ ၽိူဝ်လိူဝ်မီးၶူဝ်းၶွင်ငိုၼ်းၶမ်းၵူၺ်းဢမ်ႇၵႃး မီးပႃး
ၼမ်ႉၸႂ်လီ ၸေႇတၼႃႇလီ ၸွႆႈထႅမ်ပၼ် ၵၢၼ်ၵူၼ်းၼမ်
လႄႈ ၸွႆႈလူႇၸွႆႈတၢၼ်းပၼ် တီႈဢၼ်လူဝ်ႇႁဵတ်းလူဝ်ႇသၢင်ႈ
ၼၼ်ႉ ယွၼ်ႉမီးၶူဝ်းၶွင်ငိုၼ်းၶမ်းၵူၺ်း ဢမ်ႇၵႃး မီးပႃးၼမ်ႉ
ၸႂ်ၸေႇတၼႃႇလီလႄႈ ၸွင်ႇႁွင်ႉဝႃႈ မီးယဝ်ႉသိုပ်ႇမီး။
No comments:
Post a Comment