ၸဝ်ႈၽူဝ်လီ

မိူဝ်ႈပူၼ်ႉမႃးၼၼ်ႉ မီးၵူၼ်းၸၢႆးၵေႃႉၼိုင်ႈ
တႄႇၼႃႈႁိူၼ်းၸွမ်းယိင်းသၢဝ်ဢၼ်ႁၢင်ႈလီသေပိူၼ်ႈ
တီႈၼႂ်းဝၢၼ်ႈၶဝ်ယူႇၼၼ်ႉယူႇယဝ်ႉ ။

မေးၼၢင်းမၼ်းၼႆႉ ႁၢင်ႈလီလၢႆꧦၵူၺ်းဢမ်ႇၵႃး
ၼမ်ႉၸႂ်မၼ်းၼၢင်းၵေႃႈ ၽိူၵ်ႇၸိုၼ်ႈၶၢဝ်သႂ်လီၼႅၼ်ႇ
ယွၼ်ႉၼၼ် ၵေႃႉပဵၼ်ၽူဝ်မၼ်းၼၢင်း ၸင်ႇလႆႈႁၵ်ႉမၼ်းၼၢင်း သုတ်းႁူဝ်ၸႂ်ယူႇယဝ်ႉ ။



မၼ်းၼၢင်းၼႆႉ ၸဵမ်ၵၢၼ်ၼႂ်းၼႃႈႁိူၼ်း ၵၢၼ်မိုဝ်ႉၵၢၼ်ႁုင် လွင်ႈသၵ်ႉၶူဝ်း ႁဵတ်းလွင်ႈမူတ်းသႂ်
ၼင်ႇၵၢၼ်မႄႈၸဝ်ႈႁိူၼ်းၵေႃႉၼိုင်ႈတေလႆႈႁဵတ်းၼၼ်ႉ

ဢမ်ႇလႆႈလၢတ်ႈသင်သေလွင်ႈ မၼ်းၼၢင်းႁဵတ်းၶႅမ်ႉလႅပ်ႈလီတူၺ်းၵႂႃႇသဵင်ႈမူတ်းယဝ်ႉ။

ယူႇၸွမ်းၵၼ်ႁိုင်မႃး ၶၢဝ်းယၢမ်းပူၼ်ႉၵႂႃႇ ပီႊသိုပ်ႇပီႊ
လိူၼ်သိုပ်ႇလိူၼ် ႁိုင်မႃးယဝ်ႉ မၼ်းၼၢင်းလႆႈပဵၼ်တၢင်း
ပဵၼ်ၽိဝ်ၼိူဝ်ႉၼင်ႁႅင်ႈသေ ႁဵတ်းႁႂ်ႈၽိဝ်ၼႃႈမၼ်းၼၢင်း
လွၵ်ႈဢွၵ်ႇမႃး ႁဵတ်းႁႂ်ႈၼႃႈတႃမၼ်းၼၢင်းလႆႈႁၢင်ႈၸႃႉ
ၵႂႃႇသေဢမ်ႇၵႃး ပဵၼ်ပႃးၸွမ်းတူဝ် မၼ်းၼၢင်းလႂ်ယဝ်ႉ

ၽွင်းယၢမ်းၸိူင်ႉၼၼ် ၵေႃႉပဵၼ်ၽူဝ်သမ်ႉ မီးၼႃႈၵၢၼ်
ၵိုင်ႉၵၢင်ႉတေလႆႈဢွၵ်ႇၶၢဝ်းတၢင်းၵႂႃႇတၢင်ႇတီႈလႄႈ
ဢမ်ႇလႆႈယူႇလုမ်းလႃးတူၺ်းထိုင်မၼ်းၼၢင်း ....

မိူဝ်ႈဢၼ်ၼႃႈၵၢၼ်မၼ်းၸၢႆးယဝ်ႉတူဝ်ႈလီငၢမ်းယဝ်ႉ
လႄႈ ဢွၵ်ႇၶၢဝ်းတၢင်းတေပွၵ်ႈႁိူၼ်း မိူဝ်းႁႃမေးၼၢင်း
ၶိုၼ်းၼၼ်ႉ လႆႈပဵၼ်ၽေးၵိုင်ႉၵၢင်ႉ လူတ်ႉပိၼ်ႈသေ
ႁဵတ်းႁႂ်ႈတႃမၼ်းၸၢႆး မွတ်ႇၵႂႃႇတင်းသွင်ၽၢႆႇယူႇယဝ်ႉ

ယၢမ်းမိူဝ်ႈထိုင်တီႈႁိူၼ်းၼၼ်ႉ မၼ်းၸၢႆးေၵႃႈဢမ်ႇလႆႈ
ႁၼ် တၢင်းပဵၼ်ဢၼ်ႁၢင်ႈၸႃႉ တီႈတူဝ်လႄႈၼႃႈတႃ
ဢၼ်မေးမၼ်းၸၢႆးပဵၼ်ယူႇ ။

ၼႂ်းၵႄႈၵၢင်တၢင်းႁၵ်ႉၶဝ်သွင်ၵေႃႉၼၼ်ႉ ဢမ်ႇမီးလွင်ႈ
လႅၵ်ႈလၢႆႈတေႃႇၵၼ်သေ ယိုင်ႈၶႅၼ်းႁၵ်ႉၵၼ် တိူဝ်းၼမ်
လိူဝ်ၵဝ်ႇမႃး ၵူႊမိုဝ်ႉၵူႊဝၼ်းယဝ်ႉ ။

ယူႇဢမ်ႇတၼ်းႁိုင် တၢင်းပဵၼ်မေးၼၢင်းမၼ်း
ပဵၼ်ႁၢဝ်ႈႁႅင်းၶိုၼ်ႈမႃးတိၵ်းꧦလႄႈ ထိုင်တီႈယူတ်းယႃ
ဢမ်ႇလႆႈသေ ၵမ်းလိုၼ်းသုတ်း မေးၼၢင်းမၼ်းလႆႈ
သဵင်ႈသၢၵ်ႈၵိုတ်းလိုဝ်ႈလူမ်းထူၺ်ႈၸႂ်ၵႂႃႇယူႇယဝ်ႉ ။

ၽွင်းယၢမ်းၸိူင်ႉၼၼ်မၼ်းၸၢႆးပဵၼ်ဢၼ်တိူဝ်ႉၸႂ်
တီႈသုတ်းယဝ်ႉ လွင်ႈလႆႈသုမ်းမေးႁၵ်ႉဢွၼ်ႇမၼ်း
ၵႂႃႇၼႂ်းၸူဝ်ႊပၢၼ်........

ဝၢႆးသေႁႅၼ်းပၢင်ၸႃႉပၼ်မေးၼၢင်းမၼ်း ၶႅမ်ႉလႅပ်ႈယဝ်ႉတူဝ်ႈလီၵူႊလွင်ႈယဝ်ႉၼၼ်ႉ မၼ်းၸၢႆး
တႅပ်းတတ်းသဵၼ်ႈၸႂ် တေပွၵ်ႈမိူဝ်းယူႇၶိုၼ်း တီႈဝၢၼ်ႈ
ၸႃႇတိမၼ်းၸၢႆးၶိုၼ်းၼႆယဝ်ႉ ။

ဝၢႆးမႃး မၼ်းၸၢႆးၶတ်းၸႂ်ယူတ်းယႃမၢၵ်ႇတႃၶွင်မၼ်း ႁၼ်လီၶႅၼ်းၶိုၼ်း တင်းသွင်ၽၢႆႇယဝ်ႉလႄႈ.......

ၽွင်းမိူဝ်ႈမၼ်းၸၢႆးတိုၵ်ႉတေတေႃႉၶူဝ်းဢွၵ်ႇဝၢင်းႁိူၼ်း
မၼ်းယူႇၼၼ်ႉ မီးၵူၼ်းႁိမ်းႁိူၼ်းၵေႃႉၼိုင်ႈ
ၸင်ႇလႆႈထၢမ်ၵႂၢမ်းမႃးဝႃႈ.........

မိူဝ်ႈမေးသူယင်းတိုၵ်ႉမီးသၢႆၸႂ်ယူႇၼၼ်ႉ ၶဝ်ပဵၼ်ၵူၼ်း
လုမ်းလႃးတူၺ်းထိုင်ႁဵတ်းၵူႊၸိူဝ်ႉၵူႊလွင်ႈပၼ်သူ
မိူဝ်ႈၽွင်းသူတႃမွတ်ႇ တူၺ်းသင်ဢမ်ႇႁၼ်ၼၼ်ႉ ။

ၵမ်းၼႆႉၽႂ်တေမႃးလုမ်းလႃး ႁဵတ်းဝေႇယႃႇဝိတ်ႉၸႃႉ
ပၼ်သူယဝ်ႉလႃႇ ပၢႆသလိူဝ်တႃသူၵေႃႈမွတ်ႇယူႇ ။

မိူဝ်ႈလႆႈငိၼ်းၸိူင်ႉၼၼ်ယဝ်ႉ မၼ်းၸၢႆးၸင်ႇတွပ်ႇၶိုၼ်း
ဝႃႈ တႃၵဝ်ၶႃႈဢမ်ႇလႆႈမွတ်ႇလေႃႇ ၵွပ်ႈဝႃႈၵဝ်ၶႃႈ
ႁဵတ်းၵႅင်ႈပဵၼ်ၵူၼ်းတႃမွတ်ႇၵူၺ်း..........

ယွၼ်ႉဝႃႈၵဝ်ၶႃႈဢမ်ႇၶႂ်ႈႁႂ်ႈမေးၶႃႈဝူၼ်ႉၼမ်သေတိူဝ်ႉၸႂ်
ယူႇ တီႈဢၼ်ၶႃႈလႆႈႁၼ်ၼႃႈတႃမၼ်းၼၢင်းႁၢင်ႈၸႃႉ
မၼ်းတေႁဵတ်းႁႂ်ႈ မေးၶႃႈ လႆႈၸဵပ်းၸႂ်ႁႅင်း လိူဝ်သေ
တၢင်းပဵၼ်ဢၼ်ၼၢင်းလႆႈၶၢမ်ႇယူႇ ။

ပိၵ်ႉသမ်ႉဝႃႈ ၼႃႈတႃႁၢင်ႈၽၢင်မၼ်းၼၢင်းႁၢင်ႈၸႃႉ
ၵႂႃႇသေတႃႉ ၵူၺ်းၵႃႈ ႁူဝ်ၸႂ်မၼ်းၼၢင်း ယင်းတိုၵ်ႉႁၢင်ႈ
လီ တွၼ်ႈတႃႇၶႃႈယူႇၵူႊၶၢဝ်းယၢမ်း........

မၼ်းၼၢင်းပဵၼ်ၵူၼ်းမီးၼမ်ႉၸႂ်လီၸႅတ်ႈၸၢင်ႇ
မၼ်းၼၢင်းပဵၼ်မေးၼၢင်းဢၼ်သိုဝ်ႈယူဝ်းတေႃႇၵဝ်ၶႃႈ

ၶႃႈၶႂ်ႈႁၼ်မၼ်းၼၢင်းမီးတၢင်းသိူဝ်းၸႂ်တဵမ်ꧦထူၼ်ႈꧦလႄႈ ၸင်ႇလႆႈႁဵတ်းၵႅင်ႈပဵၼ်ၵူၼ်းတႃမွတ်ႇယဝ်ႉ ။

တွၼ်ႈသွၼ် - 
========

မိူဝ်ႈၵေႃႉၼိုင်ႈတင်းၼိုင်ႈလႆႈတႅပ်းတတ်း တႄႇၼႃႈႁိူၼ်း
တေဢၢၼ်းၸႂ်ႉၸၢတ်ႈပၢၼ်ယူႇႁူမ်ႈၸွမ်းၵၼ်ယဝ်ႉ
ၼၼ်ႉ လွင်ႈမၢင်လွင်ႈၵေႃႈ ထုၵ်ႇလီႁဵတ်းပဵၼ်ၵူၼ်းတႃ
မွတ်ႇသေ ယႃႇပေတူၺ်းႁၼ်ပႃးယဝ်ႉ ။

လွင်ႈယူပ်ႈယွမ်း လႄႈ လွင်ႈၽိတ်းပိူင်ႈၼၼ်ႉ
ၵူၼ်းႁဝ်းတိုၼ်းမီးဝႆႉယူႇၵူႊၵေႃႉဢိူဝ်ႈ ဢမ်ႇမီးၽႂ်ဢၼ်
တဵမ်ထူၼ်ႈၵူႊလွင်ႈꧦလႆႈသႄႊ.......

ၵူၼ်းဢၼ်ဢဝ်လွင်ႈယူပ်ႈယွမ်း တီႈဢူၼ်ႈဢွၼ်ႇၵူၼ်း
တၢင်ႇၵေႃႉသေ မႃးႁဵတ်းပဵၼ်ၽွၼ်းလီတူဝ်ၵဝ်ႇ
ဢဝ်ပေႉပုၼ်ႈၼိူဝ်ပိူၼ်ႈၼၼ်ႉ ပဵၼ်တၢင်းယၢမ်ႈၵူၼ်းမိူၵ်ႈမႂ်ႈၶဝ်ၵူၺ်းယဝ်ႉ ။

မိူဝ်ႈၵူၼ်းၵေႃႉၼိုင်ႈမီးလွင်ႈယူပ်ႈယွမ်းလႄႈ ၵေႃႉၼိုင်ႈ
သမ်ႉထႅမ်ပၼ်ႁႂ်ႈတဵမ်ထူၼ်ႈၼႆ ၼႆႉယဝ်ႉပဵၼ်မဵတ်ႉတႃႇ
ဢၼ်ၸႅတ်ႈၸၢင်ႇ ဢၼ်တေႁဵတ်းႁႂ်ႈ လူၵ်ႈၶူင်းၵၢင်
ႁၢင်ႈလီၶိုၼ်ႈလႄႈ လႆႈၸႂ်ႉၸၢတ်ႈပၢၼ်သိူဝ်းၸႂ်တဵမ်ထူၼ်ႈယဝ်ႉ ။

ၼပ်ႉၼမ်ထိုင်ၽူႈပၼ်ႁႅင်းလူဢၢၼ်ႇၵူႊၵေႃႉယူႇၶႃႈ
ပိၼ်ႇ - မွၵ်ႇႁၢမ်းဢၢႆ ( ဝဵင်းသဝ်ႁိၼ် )
17.05.2018  ဝၼ်းၽတ်း