ၵေႃႉဢမ်ႇလူလိၵ်ႈလႄႈ ၵေႃႉလူလိၵ်ႈ

ၵေႃႉဢၼ်မီးပၢႆးႁူႉပၢႆးႁၼ်လိၵ်ႈလၢႆးၼၼ်ႉ ႁူဝ်တိုၼ်းပူၼ်ႉလိူဝ်ၵေႃႉဢၼ်ဢမ်ႇမီးပၢႆးႁူႉပၢႆးႁၼ်လိၵ်ႈလၢႆးၼၼ်ႉ

ယူႇတႃႇသေႇယဝ်ႉ။  ၵူၼ်းမိူင်းဝၼ်းတူၵ်းၶဝ် ဢၼ်ၶဝ်ၶႅၼ်ႇလိူဝ် ၵျႃႉလိူဝ်ၵူၼ်းမိူင်းဝၼ်းဢွၵ်ႇၼႆႉၵေႃႈ ပဵၼ်ယွၼ်ႉ

ၶဝ်လူလိၵ်ႈၼမ်ၼၼ်ႉယဝ်ႉ။ 

တီႈမိူင်း ဢိင်ႇၵလၼ်ႇၼၼ်ႉ ပေႃးဝႃႈၶဝ်ႁဵတ်းပွၵ်ႉႁိူၼ်းၼိုင်ႈပွၵ်ႉ (မူႇဝၢၼ်ႈ)ၼႆ ဢၼ်တိုၼ်းတေလႆႈမီးပႃးၼၼ်ႉ ပဵၼ်ႁူင်းတူၺ်းလိၵ်ႈၼၼ်ႉယဝ်ႉ။ ပဵၼ်ႁူင်းတူၺ်းလိၵ်ႈၼႆၵေႃႈ ဢမ်ႇၸႂ်ႈဝႃႈပဵၼ် လိၵ်ႈၶဝ်မဵဝ်းလဵဝ် လိၵ်ႈၼႂ်းၵမ်ႇၽႃႇၼႆႉ ၶဝ်ႁႃမႃးသႂ်ႇ ႁႃမႃးဝႆႉတႃႇၵူၼ်းလူလိၵ်ႈ ၵူၼ်းလဵပ်ႈႁဵၼ်းၶဝ်ၼၼ်ႉ ပႃးတင်း လိၵ်ႈလူင်တႆးႁဝ်းၼႆႉၵွၼ်ႇ။

မိူင်းဢိင်ႇၵလၼ်ႇၼႆႉ ပႅၵ်ႉသမ်ႉဝႃႈ ပဵၼ်ၵုၼ်ဢွၼ်ႇဝဵင်းၼိုင်ႈဝႃႈၼႆသေတႃႉၵေႃႈ ပဵၼ်ငဝ်ႈဝဵင်းဢၼ်ဢုပ်ႉပိူင်ႇလႆႈ ၸိုင်ႈမိူင်းၼႂ်းလုမ်ႈၽႃႉၼႆႉတင်းၼမ်ၵွၼ်ႇ။

လူလိၵ်ႈၼႆႉ ပၼ်လႆႈ တၢင်းႁူႉ တၢင်းႁၼ်လၢႆလၢႆၵူၺ်းဢမ်ႇၵႃး ပၼ်လႆႈတၢင်းႁူႉဢၼ်ၵဵဝ်ႇလူၺ်ႈ လွင်ႈဢၼ် ၸဝ်ႈၵဝ်ႇဢမ်ႇပႆႇႁူႉ ၽွၼ်းလီ ၽွၼ်းၸႃႉမၢင်ၸိူဝ်ႉမၢင်မဵဝ်း ဢၼ်ၵပ်းၵၢႆႇလူၺ်ႈ တႃႇတူဝ်ၵူၼ်း တႃႇဢသၢၵ်ႈ ၵူၼ်းၵေႃႈတေလႆႈႁူႉပႃးဢိူဝ်ႈ။   ယွၼ်ႉၼၼ် ပေႃးဝႃႈမီးၶၢဝ်းယၢမ်းတၼ်းၼႆ ႁႂ်ႈလူပၼ်လိၵ်ႈ။

လွင်ႈလူလိၵ်ႈၼႆႉ ပၼ်လွင်ႈလၢၵ်ႇလၢႆးထူးသၢၼ်းတႃႇၸဝ်ႈၵဝ်ႇၵႃႈႁိုဝ်ၼႆ 

႑ႉ လူလိၵ်ႈၼႆႉ ႁဵတ်းႁႂ်ႈဢွၵ်းဢေႃတိုၼ်ႇသၢၼ်ႈယူႇတႃႇသေႇ။

လူလိၵ်ႈၼႆႉ မၼ်းပဵၼ်ဢၼ်လဵင်ႉတၢင်းၵိၼ်ဢွၵ်းဢေႃလႄႈ ႁဵတ်းႁႂ်ႈဢွၵ်းဢေႃႁဵတ်းၵၢၼ်လႆႈလီၼၼ်ႉယဝ်ႉ။

ဢွၵ်းဢေႃၼႆႉၵေႃႈ မၼ်းမိူၼ်ၵၼ်တင်းမၢၵ်ႇႁႅင်းၶႅၼ်ၶႃ ဢၼ်ၵျၢင်ႉပၼ်လႄႈ ၵႅၼ်ႇၶႅင်ၼၼ်ႉယဝ်ႉ၊ ဢွၵ်းဢေႃၵေႃႈ

တေႃႈၼၼ် ပေႃးႁဝ်းၵႆႉလူဝ်လိၵ်ႈပၼ်ၼႆ မိူၼ်တင်းႁဝ်းၵျၢင်ႉပၼ်ႁႅင်းဢွၵ်းဢေႃႁႂ်ႈၵႅၼ်ႇၶႅင်လီၼၼ်ႉယဝ်ႉ။

႒ႉ လူလိၵ်ႈၼႆႉ ႁဵတ်းႁႂ်ႈဢႃရုင်ႇဢဝ်ၸႂ်သႂ်ႇလႆႈလီ။

ၼႂ်းၸၢတ်ႈပၢၼ်ၵူၼ်းၼႆႉ ပေႃးဝႃႈၶႂ်ႈဢွင်ႇမၢၼ်သေဢၼ်ဢၼ်ပေႃးဝႃႈၼႆၸိုင် လွင်ႈဢဝ်ၸႂ်သႂ်ႇၼၼ်ႉ ပဵၼ်ဢၼ်

လမ်ႇလွင်ႈသေပိူၼ်ႈၼၼ်ႉယဝ်ႉ။ ယွၼ်ႉၼၼ် မိူဝ်ႈႁဝ်းလူလိၵ်ႈၼႆႉ ပဵၼ်ၵၢၼ်ၽိုၵ်းဢဝ်ၸႂ်သႂ်ႇ ၵၢၼ်ဢၼ်ႁဝ်းႁဵတ်း

ယူႇၼၼ်ႉယဝ်ႉ။ ႁဝ်းလူလိၵ်ႈ ႁဝ်းဢဝ်ၸႂ်သႂ်ႇၼႂ်းလိၵ်ႈၼၼ်ႉသေ လူယဝ်ႉဝူၼ်ႉၸွမ်း ႁၼ်ၼႂ်းတႃၸွမ်းၵႂၢမ်းလၢတ်ႈ

တီႈၼႂ်းလိၵ်ႈၼၼ်ႉ မၼ်းႁဵတ်းႁႂ်ႈႁဝ်းၸႂ်ၼိမ်သေ ၽိုၵ်းၸႂ်ႁႂ်ႈမီး ဢႃႇရုင်ႇ လွင်ႈဢဝ်ၸႂ်သႂ်ႇၼၼ်ႉ တေၵႅၼ်ႇၶႅင်မႃး

ၼၼ်ႉယဝ်ႉ။

႓ႉ မီးပႁူႉသုတၼမ်တိူဝ်းလိူဝ်မႃး

လွင်ႈလူလိၵ်ႈၼႆႉ ႁဵတ်းႁႂ်ႈႁဝ်းမီး တၢင်းႁူႉတၢင်းႁၼ် ပႁူႉသုတၼမ်တိူဝ်းလိူဝ်မႃးသေ ပၢႆးဝူၼ်ႉပၢႆးႁၼ်ၵေႃႈ

ၶိုၼ်ႈသၢင်ႉၶိုၼ်ႈသုင်မႃးၼၼ်ႉယဝ်ႉ။  ပပ်ႉလိၵ်ႈၼၼ်ႉ ဝၢင်ဝၢင်ဢွၼ်ႇၵူၺ်းၵေႃႈ မၼ်းၶဝ်ႈပႃးဝႆတၢင်းႁူႉတၢင်းႁၼ်

ဢၼ်ၸဝ်ႈၵဝ်ႇတေလႆႈၸႂ်ႉၶိုၼ်းၼၼ်ႉလႄႈ ၸဝ်ႈၵဝ်ႇလူလႆႈပပ်ႉမၼ်းၼမ်ၵႃႈႁိုဝ်ၵေႃႈ တေပဵၼ်ၽွၼ်းလီတႃႇ

ၸဝ်ႈၵဝ်ႇၼမ်ၵႃႈၼၼ်ႉယဝ်ႉ။

႔ႉ လူလိၵ်ႈၼႆႉ ႁဵတ်းႁႂ်ႈလွင်ႈၸႂ်သုၵ်ႉယုင်ႈယွမ်းလူင်း။

ပပ်ႉလိၵ်ႈၶႅမ်ႉၶႅမ်ႉ၊ ဢမ်ႇၼၼ် ပပ်ႉၸိူင်းၶႅမ်ႉၶႅမ်ႉၼၼ်ႉ မၼ်းၸုင်ၸၼ်လႆႈၵူၼ်းလူမၼ်း ထိုင်လႆႈတၢင်ႇဝၢၼ်ႈ

တၢင်ႇမိူင်း လႄႈထိုင်ၼွၵ်ႈၵမ်ႇၽႃႇပုၼ်ႉၵွၼ်ႇ၊ ယွၼ်ႉဝႃႈ မိူဝ်ႈၸဝ်ႈၵဝ်ႇတိုၵ်ႉလူၼၼ် မၼ်းႁဵတ်းႁႂ်ႈၵူၼ်းလူ

မၼ်း ဢဝ်ဢႃႇရူင်ႇၸပ်းသႂ်ႇၼႂ်းပပ်ႉ ၼႂ်းၸိူင်းၼၼ်ႉသေ မိူၼ်ၼင်ႇပုတ်းမႆႉလွင်ႈၵႂႃႇၸွမ်းၼမ်ႉလႄႈ ဢဝ်ၸႂ်လွင်ႈၵႂႃႇ

ၸွမ်းၼႂ်းၸိူင်းၼၼ်ႉယဝ်ႉ၊ ယွၼ်ႉၼၼ် သင်ဝႃႈၸဝ်ႈၵဝ်ႇမီးလွင်ႈသုၵ်ႉယုၵ်ႈၸႂ်ၵေႃႈ ၸႂ်သုၵ်ႉယုင်ႈၼၼ်ႉတေႁၢႆၵႂႃႇ

ၸွမ်းၼႂ်းၸိူင်း ၼႂ်းပပ်ႉဢၼ်လူဢၢၼ်ႇၼၼ်ႉယူႇယဝ်ႉ။

႕ႉ လူလိၵ်ႈၼႆႉ ႁဵတ်းႁႂ်ႈၼွၼ်းလပ်းလီ။

ဢၼ်တိုၵ်ႉလူလိၵ်ႈယူႇသေၼွၼ်းလပ်းၵႂႃႇၼၼ်ႉ မီးတင်းၼမ်။ တေပဵၼ်ယွၼ်ႉဢမ်ႇမီးတင်းယၢမ်ႈလူလိၵ်ႈ။

ၵူၺ်းၵႃႈ သင်ဝႃႈၸဝ်ႈၵဝ်ႇမီးတင်းယၢမ်ႈလူလိၵ်ႈမိူဝ်ႈတေၼွၼ်းလႄႈပႆႇၼွၼ်းၼၼ်ႉပေႃးၼႆ ထိုင်တီႈၸဝ်ႈၵဝ်ႇ

လူလိၵ်ႈပၼ်ယဝ်ႉသေ ၼွၼ်းလပ်းၵႂႃႇၼၼ်ႉ တေၼွၼ်းလပ်းလႆႈလီ ၼွၼ်းလပ်းလႆႈဝၢၼ်တေႉတေႉၼၼ်ႉယဝ်ႉ။

႖ႉ လူလိၵ်ႈၼႆႉ ႁဵတ်းႁႂ်ႈပွင်ႇၸႂ်ပၼ်ၼိူဝ်ပိူၼ်ႈမႃး။

ယွၼ်ႉဢမ်ႇမီးလွင်ႈပွင်ႇၸႂ်ပၼ်ၵၼ်လႄႈ ဢၼ်ဢမ်ႇထုၵ်ႇလီပဵၼ် လွင်ႈၽိတ်းၽႅၵ်ႇၵၼ်၊ ၽူဝ်မႄးၵၼ် ဢမ်ႇထုၵ်ႇ

လီပႅတ်ႈၵၼ်၊ ဢူၺ်းၵေႃႉၵၼ် ဢမ်ႇထုၵ်ႇလီၸတ်ႉတေႃႇၵၼ်ၼၼ်ႉၵေႃႈလႆႈပဵၼ်မႃးယွၼ်ႉဢမ်ႇပွင်ႇၸႂ်ပၼ်ၵၼ် ၼၼ်ႉ ယဝ်ႉ။ ပေႃးဝႃႈၸဝ်ႈၵဝ်ႇပဵၼ်ၵူၼ်းလူလိၵ်ႈၼမ်ၵေႃႉၼိုင်ႈၼႆ လွင်ႈၸိူဝ်းၼႆႉ မၼ်းတေယွမ်းလူင်းၵႂႃႇသေ တေမီးလွင်ႈ

ပွင်ႇၸႂ်ပၼ်ပိူၼ်ႈ လွင်ႈယၢပ်ႇပိူၼ်ႈ၊ လွင်ႈၵပ်ႉၵိၼ်းပိူၼ်ႈ၊ လွင်ႈႁဵတ်းလွင်ႈသၢင်ႈပိူၼ်ႈၸိူဝ်းၼၼ်ႉယဝ်ႉ။ ၵေႃႉဢမ်ႇလူ

လိၵ်ႈၼၼ်ႉ ႁၼ်ပိူၼ်ႈတင်းၼွၵ်ႈမၼ်းၵေႃႈ ထၢင်ႇၽိတ်းငၢႆႈ၊ ထၢင်ႇပိူင်ႈငၢႆႈၼၼ်ႉယဝ်ႉ။ ပေႃးဝႃႈၸဝ်ႈၵဝ်ႇပဵၼ်ၵူၼ်း

လူလိၵ်ႈၼမ်မႃးပေႃးၼႆၸိုင် ၸဝ်ႈၵဝ်ႇတေဢမ်ႇၸႂ်ႈၵူၼ်းထၢင်ႇၽိတ်းပိူၼ်ႈငၢႆႈ၊ လႄႈတေပဵၼ်ၵူၼ်းပွင်ႇၸႂ်ၼိူဝ်ပိူၼ်ႈ

မႃးၼမ်လိူဝ်ၼၼ်ႉယဝ်ႉ။

ၶူးသွၼ်၊ မေႃသွၼ်ၵေႃႉလႂ်ၵေႃႈယဝ်ႉ ဢမ်ႇပၼ်လႆႈတၢင်းႁူႉတၢင်းႁၼ် လုၵ်ႈႁဵၼ်းတဵမ်ထူၼ်ႈလႆႈၼႂ်းၸူဝ်ႈပၢၼ်။ ၵူၺ်းၵႃႈ ပေႃးဝႃႈမေႃႁဵတ်းႁႂ်ႈလုၵ်ႈႁဵၼ်း မီးတၢင်းယၢမ်ႈလူလိၵ်ႈလူလၢႆး လႄႈႁဵတ်းႁႂ်ႈလုၵ်ႈႁဵၼ်းၶဝ်ႈၸႂ်လိၵ်ႈလၢႆး

ၵေႃႈလႆႈဝႃႈပဵၼ်ၶူးသွၼ်၊ မေႃသွၼ်ဢၼ်ၵတ်ႉၶႅၼ်ႇၵေႃႉၼိုင်ႈယဝ်ႉ။  ၶူးသွၼ်ၼွၵ်ႈမိူင်းၵေႃႉၼိုင်ႈယၢမ်ႈလၢတ်ႈဝႃႈ

"ၽႂ်ၶႂ်ႈဝႃႈသင် ၽႂ်ၶႂ်ႈသေႉၸိူင်ႉႁိုဝ်ၵေႃႈယဝ်ႉ ပေႃးဝႃႈၸဝ်ႈၵဝ်ႇႁၵ်ႉတူဝ်ၸဝ်ႈၵဝ်ႇယူႇၸိုင် သွၼ်ဢဝ်ပၺ်ၺႃႇတၢင်းႁူႉ

တၢင်းႁၼ်လႄႈ၊ လူပၼ်လိၵ်ႈၼမ်ၼမ်လႄႈ၊ သင်ဝႃႈႁၵ်ႉပေႃႈမႄႈၸဝ်ႈၵဝ်ႇၵေႃႈ သွၼ်ဢဝ်ပၺ်ၺႃႇလႄႈလူလိၵ်ႈ

ပၼ်ၼမ်ၼမ်လႄႈ၊ သင်ဝႃႈႁၵ်ႉၸိူဝ်ႉၶိူဝ်းဝၢၼ်ႈမိူင်းၵေႃႈ သွၼ်ဢဝ်ပၺ်ၺႃႇလႄႈ လူလိၵ်ႈပၼ်လႄႈ" ၼႆၼၼ်ႉယဝ်ႉ။

သွၼ်ပၺ်ၺႃႇဢၼ်ဝႃႈၼႆႉ ပဵၼ်ဢၼ်သွၼ်ဢဝ်တၢင်းႁူႉတၢင်းႁၼ် သွၼ်ဢဝ်တၢင်းဝူၼ်ႉ ႁႂ်ႈမေႃဝူၼ်ႉလႄႈ ႁႂ်ႈမေႃဝူၼ်ႉသေၶူင်သၢင်ႈဢွၵ်ႇ ႁဵတ်းဢွၵ်ႇမႃးလႄႈ သိုပ်ႇဢဝ်လွင်ႈတူဝ်ထူပ်းတီႈၶူးသွၼ် မေႃသွၼ်ၵႂႃႇထႅင်ႈ ၶၢဝ်းၵႆၼၼ်ႉယဝ်ႉ။

ပေႃးၶႂ်ႈၶိုၼ်ႈယႂ်ႇ ယႃႇလိုမ်းသွၼ်ဢဝ်ပၺ်ၺႃႇလႄႈ ယႃႇလိုမ်းလူလိၵ်ႈပၼ်ၼမ်ၼမ်။

ပၢႆးဝူၼ်ႉၶပ်ႉ

Credided: စွယ်စုံကျမ်း