7 February ဝၼ်းၸိူဝ်ႉၸၢတ်ႈၸိုင်ႈတႆး လႄႈ ၶူၼ်ႉၶိုၼ်း လိၵ်ႈႁူမ်ႈမၢႆပၢင်လူင်

မႂ်ႇသုင်ၶႃႈ .........

        7 February "ဝၼ်းၸိူဝ်ႉၸၢတ်ႈၸိုင်ႈတႆး" ဝၼ်း
ၵိုၵ်းပိုၼ်းလမ်ႇလွင်ႈယႂ်ႇလူင် ပုၼ်ႈတႃႇၸိူဝ်ႉၸၢတ်ႈ
ၸိုင်ႈတႆးႁဝ်းၶႃႈလႄႈ "ဝၼ်းၼမ်ႉၸႂ်ပၢင်လူင်"၊
"ဝၼ်းငဝ်ႈႁၢၵ်ႈလိၵ်ႈႁူမ်ႈမၢႆပၢင်လူင်"၊ ဝၼ်းပၢင်ၵုမ်
ဢုပ်ႇဢူဝ်းလူင်ႈၼႃႈ ပၢင်ၵုမ်လူင်ပၢင်လူင် (20) ပၢၵ်ႇ
ပီမိူင်း (1947) ဢၼ်လႆႈဢွၼ်ၼမ်း ႁႂ်ႈမီးလိၵ်ႈႁူမ်ႈမၢႆ
ပၢင်လူင် ဢၼ်ၵိုၵ်းပိုၼ်းဝႆႉၼၼ်ႉ ၶွပ်ႈၶူပ်ႇထိုင်မႃး
72 ပီ (1947 - 2019)ၼႂ်းဝၼ်းမိူဝ်ႈၼႆႉၶႃႈယဝ်ႉ။


​​         တေႃႈၼင်ႇၼၼ် ဝၼ်းလူင်းလၢႆးမိုဝ်းလိၵ်ႈႁူမ်ႈမၢႆ
ပၢင်လူင် 12 February 1947 ဢၼ်လႆႈမၵ်းမၼ်ႈပဵၼ်
ဝၼ်းမိူင်းႁူမ်ႈတုမ် လႄႈ ​​ၵေႃႇတင်ႈပဵၼ်မႃး မိူင်းႁူမ်ႈတုမ်
ၼၼ်ႉ​​ၵေႃႈ ၶွပ်ႈၶူပ်ႇထိုင်မႃး 72 ပီယူႇယဝ်ႉ။

          တင်ႈတႄႇပီ 1947 ၼၼ်ႉ​​သေ 7 February ၵူႈပီ
ၼၼ်ႉ လႆႈမၵ်းမၼ်ႈပဵၼ်မႃး "ဝၼ်းတႆး" "ဝၼ်းမိူင်းတႆး"
"ဝၼ်းၸိူဝ်ႉၸၢတ်ႈၸိုင်ႈတႆး" ၼႆယူႇယဝ်ႉ။

       7 February ဢၼ်ဢွၼ်ႁွင်ႉၵၼ်မႃးဝႃႈ "ဝၼ်းတႆး"
"ဝၼ်းမိူင်းတႆး" "ဝၼ်းၶိူဝ်းတႆး" ၼႆၼၼ်ႉ ဢမ်ႇၸႂ်ႈ
ဝၼ်းဢၼ် မိူင်းတႆး ၸိူဝ်ႉၶိူဝ်းတႆး ၸိူဝ်ႉၸၢတ်ႈတႆးႁဝ်း
ၸင်ႇတိုၵ်ႉတႄႇမီးမႃးဝၼ်းၼႆႉၵူၺ်း။

         ၸွမ်းလူၺ်ႈၸဝ်ႈပၢႆးပိုၼ်းတႆးႁဝ်းၶဝ် တႅမ်ႈၼႄဝႆႉ
ၼၼ်ႉၸိုင် "တႆး" ၼႆႉ ၸဵမ်မိူဝ်ႈပူၼ်ႉမႃး ႁႃႈႁဵင် (5000)
ပီ (BC 3000) ၼၼ်ႉ တိုၼ်းယၢမ်ႈမီးမိူင်းသဝ်း​​ၶေႃမႃး။
မိူင်းတႆးယၢမ်ႈမီးၸဝ်ႈ​​ႁေႃသႅင် ၸဝ်ႈသိူဝ်ၶၢၼ်ႇၾႃႉ
ၽွင်းငမ်းမိူင်းမႃး ၼႂ်းၵုၼ်​​ဢေးသျႃး ၸဵင်ႇၸၢၼ်း
ဝၼ်းဢွၵ်ႇ ၵိုၵ်းပိုၼ်းဝႆႉယိုင်ႈယႂ်ႇၵူၺ်းဢမ်ႇၵႃး၊ မိူဝ်ႈပီ
(BC 94) တႆးတႄႇၼပ်ႉ သၵ်ႉၵရၢတ်ႈပီတႆးမႃး​​သေ
ပီၶရိတ်ႉ 2019 (AD 2019) ယၢမ်းလဵဝ်ၼႆႉ ပီတႆးႁဝ်း
ၶႃႈ ထိုင်မႃး 2113 ၼီႈ ၼႆၼၼ်ႉ ပဵၼ်လၵ်းထၢၼ်ပိုၼ်း
ဢၼ်ၼႅၼ်ႈၼႃလႄႈ မိူင်းတႆးမီးပိုၼ်းဢၼ်ၵိုၵ်းလုမ်ႈၾႃႉ
မႃး ပီယၢဝ်းၶၢဝ်းႁိုင်ၼႆၼၼ်ႉ ၶႂ်ႈႁႂ်ႈၵူၼ်းမိူင်းတႆး
ၸၢဝ်းၶိူဝ်းၼႂ်းမိူင်းတႆးႁဝ်းၶႃႈ ႁူႉထိုင်ၵၼ်ၵူႈ​​ၵေႃႉ​​
​​သေၵမ်း။

            7 February 1947 ၼႆႉ ပဵၼ်ဝၼ်းၵိုၵ်းပိုၼ်း
ၸိူဝ်ႉၸၢတ်ႈၸိုင်ႈတႆး ၽွမ်ႉႁူမ်ႈၵၼ်၊ ပဵၼ်ဝၼ်းဢၼ်
ၸဝ်ႈၾႃႉလႄႈ ၵူၼ်းမိူင်း ၽွမ်ႉႁူမ်ႈပဵၼ်ၼမ်ႉၼိုင်ႈ
ၸႂ်လဵဝ်ၵၼ်၊ ယိူင်းဢၢၼ်းပုၼ်ႈတႃႇဢုပ်ႉပိူင်ႇမိူင်းတႆး
ႁင်း​​ၶေႃ ၼႆ​​သေ ၶွတ်ႇၽွတ်ႈၶွင်ႇသီႇၸိုင်ႈတႆး (ဢၼ်ပႃး
ၸဝ်ႈၾႃႉ 7 ၸဝ်ႈ လႄႈ ၵူၼ်းမိူင်း 7 ​​ၵေႃႉ )၊ ပဵၼ်ဝၼ်း
ဢၼ်မၵ်းမၼ်ႈ ၵႂၢမ်းၸိူဝ်ႉၸၢတ်ႈၸိုင်ႈတႆး
(ၶိူင်းတႆး ၶိူဝ်းရႃႇၸႃႇ .......)
မၵ်းမၼ်ႈၸွမ်ပိဝ် (တုင်း) ၸိူဝ်ႉၸၢတ်ႈၸိုင်ႈတႆး (လိူင်
ၶဵဝ် လႅင် ၼႂ်းၵၢင်မီး ဝူင်းလိူၼ်ၶၢဝ်) ၼၼ်ႉလႄႈ
မၵ်းမၼ်ႈပဵၼ် "ဝၼ်းၸိူဝ်ႉၸၢတ်ႈၸိုင်ႈတႆး" ပုၼ်ႈတႃႇ
မၢႆၵိုၵ်းပိုၼ်းမႃးၼၼ်ႉယူႇယဝ်ႉ။

         "ဝၼ်းၸိူဝ်ႉၸၢတ်ႈၸိုင်ႈတႆး" ဢၼ်ပဵၼ်ဝၼ်းထီႉ
7 February 1947 ၼႆႉ ပဵၼ်ဝၼ်းလမ်ႇလွင်ႈၵိုၵ်းပိုၼ်း
ပုၼ်ႈတႃႇ ၸိူဝ်ႉၸၢတ်ႈၸိုင်ႈတႆးႁဝ်းၶႃႈၵူၺ်းဢမ်ႇၵႃး၊
ပဵၼ်ဝၼ်းလမ်ႇလွင်ႈၵိုၵ်းပိုၼ်းပုၼ်ႈတႃႇ မိူင်းႁူမ်ႈတုမ်
လႄႈ ၵူႈၸၢဝ်းၶိူဝ်း၊ ပဵၼ်ဝၼ်းဢၼ်ဢွၼ်ၼမ်း ႁႂ်ႈ
ၽူႈဢွၼ်ႁူဝ် တႆး ၊ ၶၢင် ၊ ၶျၢင်း လႆႈမႃးဢုပ်ႇၵုမ်ၵၼ်
ႁၢင်ႈႁႅၼ်း ပုၼ်ႈတႃႇ​​တေဢုပ်ႇဢူဝ်းတင်းမၢၼ်ႈလႄႈ
ထိုင်မႃးမိူဝ်ႈဝၼ်းထီႉ 12 February 1947 ၼၼ်ႉ
ၽူႈဢွၼ်ႁူဝ် တႆး ၊ ၶၢင် ၊ ၶျၢင်း လႄႈ မၢၼ်ႈ ၸင်ႇလႆႈမႃး
ဢုပ်ႇဢူဝ်းၵၼ် ၊ ၽွမ်ႉႁူမ်ႈၵၼ် လူင်းလၢႆးမိုဝ်း လိၵ်ႈ
ႁူမ်ႈမၢႆပၢင်လူင် ပုၼ်ႈတႃႇ​​တေဢဝ်လွတ်ႈလႅဝ်းၵွၼ်း​​ၶေႃ
တီးဢိင်းၵလဵတ်ႈၸွမ်းၵၼ် လႄႈ ၽွမ်ႉႁူမ်ႈၵၼ်
ၵေႃႇတင်ႇမိူင်းႁူမ်ႈတုမ်ၼၼ်ႉၸွမ်းၵၼ်မႃးလႄႈ
ၸင်ႇမီးမိူင်းႁူမ်ႈတုမ်ၼႆႉမႃး ​​တေႃႇထိုင်ဝၼ်းမိူဝ်ႈၼႆႉ
ယူႇယဝ်ႉ။

           ယွၼ်ႉလူၺ်ႈမီး 7 February 1947 "ဝၼ်း
ၸိူဝ်ႉၸၢတ်ႈၸိုင်ႈတႆး" ၼႆႉ ပဵၼ်ဝၼ်းငဝ်ႈႁၢၵ်ႈ ပုၼ်ႈ
တႃႇလိၵ်ႈႁူမ်ႈမၢႆပၢင်လူင်၊ ပဵၼ်ဝၼ်းပၢင်ၵုမ်ဢုပ်ႇဢူဝ်း
လူင်ႈၼႃႈ ပုၼ်ႈတႃႇ​​တေဢုပ်ႇဢူဝ်းတင်းမၢၼ်ႈ​​သေ
မီးဝၼ်းလူင်းလၢႆးမိုဝ်း လိၵ်ႈႁူမ်ႈမၢႆပၢင်လူင် 12
February 1947 ဢၼ်မၵ်းမၼ်ႈပဵၼ်မႃး "ဝၼ်းမိူင်း
ႁူမ်ႈတုမ်" လႄႈ မိူင်းႁူမ်ႈတုမ်ဢၼ်ဝႃႈၼၼ်ႉ ၸင်ႇၵိူတ်ႇ
ပဵၼ်မီးမႃး​​သေ ဝၼ်းထီႉ 4 January 1948 ဢၼ်မၵ်း
မၼ်ႈပဵၼ်ဝႃႈ "ဝၼ်းလွတ်ႈလႅဝ်းၵွၼ်း​​ၶေႃ" ဢၼ်ဝႃႈ
ၼၼ်ႉ​​ၵေႃႈ ၸင်ႇလႆႈမီးမႃးၼၼ်ႉယူႇယဝ်ႉ။

         ၼမ်ႉၸႂ်ပၢင်လူင် လႄႈ လိၵ်ႈႁူမ်ႈမၢႆပၢင်လူင်ၼႆႉ
​​ၵေႃႇသၢင်ႈပၼ်လွင်ႈၶွတ်ႇလိူတ်ႈ ၽွမ်ႉႁူမ်ႈၵၼ်မႃး
ၼၼ်ႉလႄႈ မိူင်းတႆး ၊ မိူင်းၶၢင် ၊ မိူင်းၶျၢင်း ၊ မိူင်းမၢၼ်ႈ
ၸင်ႇၽွမ်ႉမိူဝ်ႈၵၼ် လႆႈလွတ်ႈလႅဝ်းၵွၼ်း​​ၶေႃတီႈ
ဢင်းၵိတ်ႉၼၼ်ႉမႃးယူႇယဝ်ႉ။

         "ၼမ်ႉၸႂ်ပၢင်လူင်" ဢၼ်ဝႃႈၼၼ်ႉ ပဵၼ်ၼမ်ႉၸႂ်
ၽွမ်ႉႁူမ်ႈၵၼ်၊ ပဵၼ်ၼမ်ႉၸႂ် ပုၼ်ႈတႃႇၼပ်ႉထိုင်လူလွမ်
ပႂ်ႉပႃး လႄႈ ပွင်သၢင်ႈႁဵတ်းၸွမ်းၼင်ႇ ၵႂၢမ်းမၼ်ႈၵႅၼ်ႇ
ဢၼ်ၸွမ်သိုၵ်းဢွင်ႇသၢၼ်း လႄႈ ၽူႈၼမ်းၶၢင် ၊ ၶျၢင်း
တႆး ႁဝ်းၶဝ်ပိၼ်ႇပၢႆႇပၼ် ၵႂၢမ်းမၼ်ႈၵႅၼ်ႇၵၼ်ဝႆႉၸိူဝ်း
ၼၼ်ႉလႄႈ၊ ၶေႃႈမၼ်ႈၵႅၼ်ႇ ၼႂ်းလိၵ်ႈႁူမ်ႈမၢႆပၢင်လူင်
ဢၼ်ၽွမ်ႉႁူမ်ႈလႆႈၸႂ်လူင်းလၢႆးမိုဝ်းၵၼ်ဝႆႉ မိူဝ်ႈ
ဝၼ်းထီႉ 12 February 1947 တီႈပၢင်ၵုမ်လူင်ပၢင်လူင်
ၼႂ်းၸိုင်ႈတႆးၼၼ်ႉယူႇယဝ်ႉ။

​​​        ​​ပေႃးဢမ်ႇမီးၼမ်ႉၸႂ်ပၢင်လူင်ၸိုင် လိၵ်ႈႁူမ်ႈမၢႆ
ပၢင်လူင် (ပီ 1947)ဢၼ်ဝႃႈၼၼ်ႉ​​ၵေႃႈ ​​တေဢမ်ႇမီးမႃး။
​​ပေႃးဢမ်ႇမီးလိၵ်ႈႁူမ်ႈမၢႆပၢင်လူင်ၼၼ်ႉ​​ၵေႃႈ
မိူင်းႁူမ်ႈတုမ်ဢၼ်ဝႃႈၼၼ်ႉ​​ၵေႃႈ ​​တေဢမ်ႇမီးမႃးလႆႈ
​​လႄႈ၊ ၼမ်ႉၸႂ်ပၢင်လူင် ​​၊ ၶေႃႈမၼ်ႈၵႅၼ်ႇပၢင်လူင် ၊ လိၵ်ႈ
ႁူမ်ႈမၢႆပၢင်လူင်ဢၼ်ဝႃႈၼၼ်ႉ ၵဵဝ်ႇၶွင်ႈၵွင်ႉၵၢႆႇဝႆႉ တိုၼ်း
ၶၢတ်ႇၵၼ်ဢမ်ႇလႆႈလႄႈ မၼ်းတိုၼ်းၵိုၵ်းပိုၼ်းယူႇဝႆႉ
ၼႂ်းႁူဝ်ၸႂ်ၸိူဝ်ႉၶိူဝ်းတႆး ၵူၼ်းမိူင်းတႆး ၸဵမ်မိူဝ်ႈဝၼ်း
ၼၼ်ႉမႃးၶႃႈယဝ်ႉ။

                           (ၼမ်ႉၸႂ်ပၢင်လူင်)
                          7 February 1947

         7 February ဝၼ်းၼမ်ႉၸႂ်ပၢင်လူင် ဝၼ်းၸိူဝ်ႉ
ၸၢတ်ႈၸိုင်ႈတႆးၽွမ်ႉႁူမ်ႈၵၼ်ဢၼ်ဝႃႈၼႆႉ ၸဝ်ႈၾႃႉ
ဢိၵ်ႇၵူၼ်းမိူင်း ဢၼ်ပဵၼ်ၸုမ်း (႐ွမ္းျပည္လြ တ္လပ္
ေရးအဖဲြ႕ခ်ဳပ္) ရ.ပ.လ ၽွမ်ႉႁူမ်ႈၼမ်ႉၸႂ်ၵၼ်​​သေ
ဢွၼ်ၵၼ်ႁဵတ်းပၢင်ၵုမ်။ မိူဝ်ႈၼၼ်ႉ ၸဝ်ႈယဵပ်ႇၾႃႉ
ပဵၼ်ၽူႈၼင်ႈၸိုင်ႈ၊ လုင်းၵျႃႇပု ပဵၼ်ၽူႈၵႅဝ်ႈပၢင်။
တီႈပၢင်ၵုမ်ၼၼ်ႉ လိူၵ်ႈတင်ႈၶွတ်ႇၽွတ်ႈပဵၼ်မႃး ၸုမ်း
"ၶွင်ႇသီႇၸိုင်ႈတႆး" (Shan State Council) ဢၼ်ၽူႈ
တၢင်တူဝ်ၵူၼ်းမိူင်းၶဝ်ႈပႃး (7) ​​ၵေႃႉ လႄႈ ၸဝ်ႈၾႃႉ
မိူင်းတႆးၶဝ်ႈပႃး (7) ၸဝ်ႈ ႁူမ်ႈၵၼ်တင်းသဵင်ႈ ၶဝ်ႈပႃးဝႆႉ
14 ​​ၵေႃႉယဝ်ႉ။ ယိူင်းဢၢၼ်းဢဝ် "ၶွင်ႇသီႇၸိုင်ႈတႆး" ၼႆႉ
ပဵၼ် ၶွင်ႇသီႇဢုပ်ႉပိူင်ႇမိူင်းႁင်း​​ၶေႃၵႂႃႇယူႇယဝ်ႉ။

        တီႈပၢင်ၵုမ်ၼႆႉၼင်ႇၵဝ်ႇ ဢွၼ်ၵၼ်တႅပ်းတတ်း
မၵ်းမၼ်ႈမႃး တုင်း (ၸွမ်ပိဝ်) လိူင် ၊ ၶဵဝ် ၊ လႅင် သၢမ်သီ
ၸပ်းၵၼ်၊ ၵၢင်မၼ်းမီးလိူၼ်လူင်ဝူင်းယႂ်ႇ သႂ်ႇႁိူဝ်ႈ လႄႈ
ဢိၵ်ႇလူၺ်ႈၵႂၢမ်းတၢင်ႇတုင်း (ၸွမ်ပိဝ်) တႆးမႃးယူႇယဝ်ႉ။
တုင်း (ၸွမ်ပိဝ်) တႆးၼႆႉ မၵ်းမၼ်ႈမိူဝ်ႈဝၼ်းထီႉ 7
February 1947 လႄႈ လႆႈဝႃႈ ၸဝ်ႉလိူဝ်ၸွမ်ပိဝ်
မိူင်းႁူမ်ႈတုမ်ၼၼ်ႉၵွၼ်ႇယဝ်ႉ။

       မိူဝ်ႈဝၼ်းထီႉ 7 February 1947 ၼၼ်ႉ ၸွမ်သိုၵ်း
ဢွင်ႇသၢၼ်း တိုၵ်ႉမီးဝႆႉတီႈတႃႈၵုင်ႈ (ယၢၼ်ႇၵုင်ႇ)၊
ပႆႇႁွတ်ႈၽႅဝ်မႃးတီႈပၢင်လူင်။ တႆးတင်းမၢၼ်ႈ​​ၵေႃႈ ယင်း
ဢမ်ႇပႆႇလႆႈဢုပ်ႇၵၼ်​​သေဢိတ်းၼၼ်ႉယဝ်ႉ။

        ဝၼ်းထီႉ 7 February 1947 ၼၼ်ႉ မၵ်းမၼ်ႈ
ၸွမ်ပိဝ်တႆးယဝ်ႉ​​သေ တီႈပၢင်ၵႅဝ်ႈပူၵ်းတုင်း (ၸွမ်ပိဝ်)
ၸိူဝ်ႉၸၢတ်ႈတႆးပွၵ်ႈဢွၼ်တၢင်းသုတ်း မိူဝ်ႈဝၼ်းထီႉ 11
February 1947 ၼၼ်ႉ ၸွမ်သိုၵ်းဢွင်ႇသၢၼ်း လႄႈ
ၽူႈဢွၼ်ႁူဝ်ၸၢဝ်းၶိူဝ်းၶဝ်​​ၵေႃႈ ၶိုၼ်ႈႁွတ်ႈၵႃႇရဝ
ၼပ်ႉယမ်ၵၼ်ယူႇယဝ်ႉ။ မိူဝ်ႈၵွၼ်ႇဢွၼ်ပူၼ်ႉမႃးၼၼ်ႉ
တုင်း (ၸွမ်ပိဝ်) တႆးႁူမ်ႈၵၼ် ဢမ်ႇယၢမ်ႈမီးမႃး၊ မီးဝႆႉ
တုင်း (ၸွမ်ပိဝ်) ၸဝ်ႈၾႃႉမိူင်းၽႂ်မၼ်း မိူင်းလႂ်မိူင်း
ၼၼ်ႉၵူၺ်း။ ယၢမ်းလဵဝ် ၸင်ႇလႆႈမီးမႃး တုင်း (ၸွမ်ပိဝ်)
ၸိူဝ်ႉၸၢတ်ႈတႆးႁူမ်ႈၵၼ်။

      (​​ၶေႃႈတႅပ်းတတ်းၽူႈဢွၼ်ႁူဝ် ၶၢင် ၊ ၶျၢင်း ၊ တႆး
                 ပုၼ်ႈတႃႇဢုပ်ႇဢူဝ်းတင်းမၢၼ်ႈ
        တီႈပၢင်ဢုပ်ႇဢူဝ်းလူင်ႈၼႃႈ ပၢင်ၵုမ်ပၢင်လူင်)

           ဝၼ်းထီႉ 6 February 1947 ၽူႈတၢင်တူဝ်ၶၢင်
ၶဝ် လႆႈႁွတ်ႈၽႅဝ်မႃးတီႈပၢင်လူင်​​သေ ၽူႈဢွၼ်ႁူဝ်တႆး
လႄႈ ၶၢင် ဢုပ်ႇဢူဝ်းၵၼ်​​သေ လႆႈ​​ၶေႃႈတႅပ်းတတ်းၵၼ်
မႃး ၼင်ႇတီႈတႂ်ႈၼႆႉ -

1. ၸွမ်းလူၺ်ႈလွၵ်းပိူင်တီႇမူဝ်ႇၶ​​ရေႇသီႇၼၼ်ႉ​​သေ
​​တေလႆႈမီးၸၼ်ႉထၢၼ်ႈ လွင်ႈသုၼ်ႇလႆႈသုၼ်ႇပဵၼ်
ၽဵင်ႇပဵင်းၵၼ်တင်းမၢၼ်ႈ ၼင်ႇတဵမ်တဵမ်ထူၼ်ႈထူၼ်ႈ။

2. ၽူႈတၢင်တူဝ်တႆး လႄႈ ၶၢင် ဢၼ်​​တေၶဝ်ႈပႃးၼႂ်း
ၸုမ်းပွင်ၵၢၼ် (ၽွင်းလူင်) ၸွမ်ၸိုင်ႈမိူင်းၶဝ်ၼၼ်ႉ
တိုၼ်းတေလႆႈမီးသုၼ်ႇဢဝ်ပုၼ်ႈၽွၼ်း ပုၼ်ႈတႃႇ
ၼႂ်းတွၼ်ႈၼႃႈလိၼ်ၽွင်းငမ်းၽႂ်မၼ်းၼၼ်ႉ တဵမ်ထူၼ်ႈ
ၵူၺ်းသေဢမ်ႇၵႃး၊ တေလႆႈမီးသုၼ်ႇႁူမ်ႈပွင်ၵၢၼ်ၸွမ်း
ၼႂ်းတွၼ်ႈၵၢၼ်ၽၢႆၵႅတ်ႇၶႄႁႄႉၵင်ႈၸိုင်ႈမိူင်း
(တပ်ႉသိုၵ်း) ၊ ၽၢႆႇတိတ်း​​တေႃႇၵပ်းသိုပ်ႇၼွၵ်ႈမိူင်း ၊
ၽၢႆႇၵၢၼ်ၶွၼ်ႇၸိုင်ႈမိူင်း လႄႈ ၵၢၼ်လူတ်ႉၾႆးၸိူဝ်းၼႆႉ
ယူႇယဝ်ႉ။

3. ၵဵဝ်ႇလူၺ်ႈလွင်ႈၶၢင် တၢင်ႇယွၼ်း​​ၵေႃႇတင်ႈ
​​ၸေႈမိူင်းၶၢင်ၼၼ်ႉ ယူႇတီႈပၢင်ၵုမ်ၼႆႉ ႁၼ်လီၸွမ်း
​​ၶေႃႈယိုၼ်ႈတၢင်ႇထိုင် ၶၢင်ၶဝ်ၼၼ်ႉယူႇ။

4. ၶေႃႈမၼ်ႈၵႅၼ်ႇလိၵ်ႈႁူမ်ႈမၢႆ ဢွင်ႇသၢၼ်း-ဢီႇတလီ
ၶွင်လူင်ပွင်ၸိုင်ႈမၢၼ်ႈ လႄႈ လူင်ပွင်ၸိုင်ႈဢင်းၵိတ်ႉ
(ပရိတိသျ်ႉ) ၶဝ်ၼၼ်ႉ တိုၼ်း​​တေဢမ်ႇလႆႈဢဝ်မႃး
ၵပ်းၵၢႆႇသင်ၸွမ်း တႆး လႄႈ ၶၢင်။

5. ဝၢႆးလႆႈလွတ်ႈလႅဝ်းၵွၼ်း​​ၶေႃယဝ်ႉ သင်ဝႃႈၶႂ်ႈၽၢတ်ႇ
ဢွၵ်ႇတီႈ မိူင်းႁူမ်ႈတုမ်ၶိုၼ်းၼႆၸိုင် ၸွမ်းၼင်ႇၵၢင်ၸႂ်
ႁဝ်း ၶႂ်ႈၽၢတ်ႇဢွၵ်ႇမိူဝ်ႈလႂ်​​ၵေႃႈ တိုၼ်း​​တေလႆႈမီးသုၼ်ႇ
လႆႈၽၢတ်ႇဢွၵ်ႇ။

         ထိုင်မႃးယၢမ်းၵၢင်ၶမ်ႈ (ဝၼ်းထီႉ 6 February 1947) ၼၼ်ႉ ၽူႈတၢင်တူဝ်ၶျၢင်းၶဝ် ႁွတ်ႈၽႅဝ်မႃးတီႈ
ပၢင်လူင်ႇ။ ဝၼ်းထီႉ 7 February 1947 ယၢမ်းဝၢႆးဝၼ်း
2:00 မူင်း ၽူႈတၢင်တူဝ် ၶၢင် ၊ ၶျၢင်း ၊ တႆး လႆႈသိုပ်ႇ
ဢုပ်ႇဢူဝ်းၵၼ် တီႈပၢင်ၵုမ်ၼၼ်ႉ၊ ဝၢႆး​​သေဢဝ်​​ၶေႃႈတႅပ်း
တတ်း ၶၢင် လႄႈ တႆး သပ်းလႅင်းၼႄပၼ်ၶိုၼ်း ၽူႈ
တၢင်တူဝ်ၶျၢင်းၶဝ်ယဝ်ႉ ယူႇတီႈၽူႈတၢင်တူဝ်ၶျၢင်းၶဝ်
တုၵ်းယွၼ်းၽိူမ်ႉထႅမ်​​ၶေႃႈတႅပ်းတတ်း ၼင်ႇတီႈတႂ်ႈၼႆႉ
​​သေ တင်းသဵင်ႈႁၼ်လီၵမ်ႉထႅမ် ၽွမ်ႉႁူမ်ႈလႆႈၸႂ်ၵၼ်မႃး
ယူႇယဝ်ႉ။

             (​​ၶေႃႈတုၵ်းယွၼ်းၽိူမ်ႉထႅမ်ၶွင် ၶျၢင်း)

1. ၵဵဝ်ႇလူၺ်ႈငိုၼ်းၶွၼ်ႇငဝ်ႈငုၼ်းၵၢင်ၼၼ်ႉ ၸွမ်း
ၼင်ႇမိူင်းတႆးမီးသုၼ်ႇလႆႈၼၼ်ႉ ၶၢင် လႄႈ ၶျၢင်း​​ၵေႃႈ
ၸွမ်းလူၺ်ႈသၢႆမၢႆႁူဝ်ႉၼပ်ႉၵူၼ်းမီးၼၼ်ႉ ႁႂ်ႈမီးသုၼ်ႇ
လႆႈၼင်ႇၵၼ်။

2. သင်ဝႃႈငိုၼ်းၸႂ်ႉၸၢႆႇ ၽၢၼ်ႇတႃႇငိုၼ်းတွင်း
တီႈတွၼ်ႈလိၼ်ၶျၢင်းၶဝ် ဢမ်ႇပဵင်း​​ပေႃးၼႆၸိုင်၊ တေလႆႈ
ဢဝ်ငိုၼ်းၶွၼ်ႇတီႈၼႂ်းမိူင်းမၢၼ်ႈၼၼ်ႉ ၸႂ်ႉတိုဝ်းၽိူမ်ႉ
ထႅမ်ပၼ်ၵႂႃႇ။

3. တေလႆႈၶွတ်ႇၽွတ်ႈ​​ၵေႃႇတင်ႈၶိုၼ်ႈမႃး ၸုမ်းပွင်
ၵၢၼ်ၶွင်ႇသီႇၼမ်းၼႃႈ မုၵ်ႉၸုမ်းၵူၼ်းမိူင်းသၼ်လွႆ
ၽွမ်ႉႁူမ်ႈ (Supreme Council of the United Hill
people - SCOUHP)၊ ၶွင်ႇသီႇၼမ်းၼႃႈၼႆႉ ​​တေလႆႈမီး
ဢၢမ်းၼၢတ်ႈတဵမ်ထူၼ်ႈၵူႈလွင်ႈ ပုၼ်ႈတႃႇ​​တေတႅပ်း
တတ်းပၼ်လႆႈ လွင်ႈဢၼ်ၵဵဝ်ႇလူၺ်ႈတင်း​​ပေႃႇလသီႇ
ၼႂ်းဝူင်ႈၵၢင် ၵူၼ်းမိူင်းသၼ်လွႆ လႄႈ လူင်ပွင်ၸိုင်ႈ
မိူင်းမၢၼ်ႈ ၸိူဝ်းဢၼ်ၵိူတ်ႇၶိုၼ်ႈမီးမႃးၵူႈပိူင်ပိူင်။

          ပုၼ်ႈတႃႇမိူင်းသၼ်လွႆ လႄႈ မိူင်းမၢၼ်ႈထုင်ႉ
လိၼ်ပဵင်း ဢဝ်လွတ်ႈလႅဝ်းၵွၼ်း​​ၶေႃ တီႈဢင်းၵိတ်ႉ
ၸွမ်းၵၼ်ၼၼ်ႉ ၽူႈဢွၼ်ႁူဝ် ၶၢင် ၊ ၶျၢင်း ၊ တႆး
(ၸဝ်ႈၾႃႉ ရ. ပ.လ) ၽူႈဢွၼ်ႁူဝ်မိူင်းသၼ်လွႆ လႆႈဢုပ်ႇ
ဢူဝ်းၵၼ် တီႈပၢင်ၵုမ်လူင်ပၢင်လူင်​​သေ လႆႈႁၢင်ႈႁႅၼ်း​​
ၶေႃႈမၼ်ႈၵႅၼ်ႇ ​​၊ ၶေႃႈတူၵ်းလူင်း ၽွမ်ႉလႆႈၸႂ်ၵၼ်ဝႆႉ
ယဝ်ႉတူဝ်ႈလီငၢမ်းယူႇယဝ်ႉ။

​​​          ​​ၶေႃႈမၼ်ႈၵႅၼ်ႇ ​​ၶေႃႈတူၵ်းလူင်းၽွမ်ႉႁူမ်ႈလႆႈၸႂ်
ၽူႈဢွၼ်ႁူဝ် ၶၢင် ၊ ၶျၢင်း ၊ တႆး မိူဝ်ႈဝၼ်းထီႉ 7 February 1947
ၼၼ်ႉပဵၼ် မူႇပိူင်ငဝ်ႈၶၢမ်ႇပိုၼ်ႉၼမ်း
လိၵ်ႈႁူမ်ႈမၢႆပၢင်လူင် ဢၼ်ၵိုၵ်းပိုၼ်းဝႆႉၼၼ်ႉလႄႈ ပဵၼ်
လွၼ်ႉၵႅၼ်ၼမ်ႉၸႂ်ပၢင်လူင်၊ ငဝ်ႈၶၢမ်ႇပိုၼ်ႉ တႃႇႁႂ်ႈပဵၼ်မႃး
လိၵ်ႈႁူမ်ႈမၢႆပၢင်လူင်ၼၼ်ႉယူႇယဝ်ႉ။

မႆႉသၢင်းၶမ်း