လဝ်ႈယႃႈလႄႈ ပၢႆးၸႂ်

ၵူၼ်းၵမ်ႈၽွင်ႈ ၵိူဝ်းမၢင်ႇၶႂ်ႈၵျေႃႇလႄႈၵိၼ်လဝ်ႈယႃႈ၊ ၵမ်ႈၽွင်ႈၸမ်ႉ
တိူဝ်ႉၸႂ် သုၵ်ႉၸႂ် ယွၼ်ႉၼႃႈၵၢၼ်ဢမ်ႇၶႅမ်ႉလႅပ်ႈ၊ ယွၼ်ႉၼႃႈႁိူၼ်း
မီးလွင်ႈဢမ်ႇၶႅမ်ႉလႅပ်ႈသေဢဝ်လဝ်ႈယႃႈယႃၸႂ်။

ၽွင်းမိူဝ်ႈမဝ်းလဝ်ႈယႃႈယူႇၼၼ်ႉတေလိုမ်းလွင်ႈသုၵ်ႉၸႂ်
တိူဝ်ႉၸႂ်ၵႅပ်ႉၼိုင်ႈယူႇ ၵူၺ်းၵႃႈ ပေႃးတၢင်းမဝ်းလဝ်ႈယႃႈ
ပေႇယဝ်ႉၼႆ တေလႆႈတိူဝ်ႉၸႂ်သုၵ်ႉၸႂ် မိူၼ်ၵဝ်ႇၵူၺ်း။



ၵၢပ်ႈဝၢၼ်ႈမိူင်းၶိုၼ်ႈယႂ်ႇယၢမ်းလဵဝ်ၼႆႉၼႂ်းၵုၼ်ယူးရူပ်ႉၼၼ်ႉ
ၵူၼ်းပဵၼ်တၢင်းပဵၼ်ထၢတ်ႈၸႂ်တူၵ်းလိူင်ႇၽႄႈတႄႉတႄႉ။
     ယွၼ်ႉၼၼ်လႄႈ မေႃယႃၶဝ် ဢဝ်ယႃႈၽိၼ်ႇႁဵတ်းယႃႈယႃ
တႃႇယႃၸႂ်လူႉၸႂ်တူၵ်း  ၵူၺ်းၵႃႈ မိူဝ်ႈတေႇၸႂ်ႉတိုဝ်းယႃၸိူဝ်းၼၼ်ႉ
လွင်ႈၸႂ်လူႉၸႂ်တူၵ်းႁၢႆၵႂႃႇၵႅပ်ႉၼိုင်ႈသေတႃႉ ပေႃးၸႂ်ႉတိုဝ်း
ႁိုင်မႃးၼႆ ဢမ်ႇယႃလႆႈလွင်ႈၸႂ်လူႉၸႂ်တူၵ်းသေဢမ်ႇၵႃး
ပၢႆးမႃးၸပ်းယိၼ်ႉယႃႈ (addiction) ၵႂႃႇယဝ်ႈ။

 ၼႂ်းၵႃႈလွင်ႈတၢင်းတႃႇႁဵတ်းႁႂ်ႈၸႂ်တူၵ်းၼၼ်ႉ ပႃးလဝ်ႈယႃႈမဵဝ်းၼိုင်ႈယူႇ။
ပေႃးၸပ်းၸွႆးလဝ်ႈယႃႈ သေၸႂ်ႉတိုဝ်းလဝ်ႈယႃႈပွၵ်ႈမၼ်းႁိုင်ယဝ်ႉၼႆ
မၢၵ်ႇႁူဝ်ၸႂ် ပွတ်ႇတပ်းတေလူႉ၊  ပိူင်ၶွတ်ႇၽွတ်ႈဢွၵ်းဢေႃၵေႃႈ
ႁဵတ်းၵၢၼ်ဢမ်ႇၽဵင်ႇပဵင်းၵၼ် ( Brain Chemistry Imbalance)၊
ပေႃးပဵၼ်ၼႆမႃး ၸၢင်ႈၸပ်းတၢင်းပဵၼ်ၸႂ်တူၵ်း၊ ပၢႆးယူႇလီၵေႃႈ တေလူႉ၊
ပေႃးၸပ်းတၢင်းပဵၼ်တီႈတူဝ်ယဝ်ႉၼႆ ၸၢင်ႈတိူဝ်ႉၶိူၵ်ႈပႃးပၢႆးၸႂ်ယူႇ။

 ယႃႈၽိၼ်ႇယႃႈမႃႉၸိူဝ်းၼႆႉ ယွၼ်ႉပဵၼ်မဵဝ်းၽိတ်းပၵ်းပိူင်လႄႈ
ၵေႃႉဢၼ်သူႇၵိၼ်သမ်းယႃႈၽိၼ်ႇ ယႃႈမႃႉၼၼ်ႉ ဢမ်ႇမီးလွင်ႈႁူမ်ႇလူမ်ႈ၊
ပိူၼ်ႈဢမ်ႇႁူႉၸွမ်းလွင်ႈမၼ်းသူႇသမ်းၵိၼ်ယႃႈသေတႃႉၵေႃႈ
မၼ်းႁူႉ လွင်ႈမၼ်းသူႇသမ်းယႃႈလႄႈလွမ်ၵူဝ်ပိူၼ်ႈတိ ၵူဝ်ပိူၼ်ႈၺွပ်း၊
ႁိုင်ႁိုင်မႃး ဢမ်ႇႁတ်းမႃးႁိူၼ်းပေႃးမႃးႁိူၼ်း လွမ်ၵူဝ်ပိူၼ်ႈတိပိူၼ်ႈမတ်ႉ၊
ၵမ်ႈၽွင်ႈ ပၢႆႈဢွၵ်ႇဝၢၼ်ႈဢွၵ်ႇဝဵင်းၸဝ်ႈၵဝ်ႇၵွၼ်ႇ။

 ပေႃးယွင်ႇယႃႈ မဝ်းယႃႈမႃးယဝ်ႉၼႆဢမ်ႇႁူႉလုၵ်ႈ ဢမ်ႇႁူႉမေး၊
ဢမ်ႇႁူႉပေႃႈဢမ်ႇႁူႉမႄႈ၊ ဢမ်ႇႁူႉပီႈ ၼွင်ႉၸိူဝ်ႉၶိူဝ်းယဝ်ႈ။
ၵေႃႉယွင်ႇလဝ်ႈယႃႈၼၼ်ႉ လုၵ်ႈမေးပေႃႈမႄႈမၼ်းၵေႃႈ မၼ်းႁတ်းႁႅမ်ၵွၼ်ႇ။
ပေႃးတူၺ်းၼႂ်းၶၢဝ်ႇလွင်ႈၵူၼ်းႁႅမ်ပေႃႈမႄႈလုၵ်ႈမေး လႄႈ ႁႅမ်တူဝ်ၵဝ်ႇတၢႆၼႆ
ၵမ်ႉပႃႈၼမ်ပဵၼ်ၵူၼ်းယွင်ႇလဝ်ႈ ယႃႈယဝ်ႈ။

 ပေႃးၸပ်းယိၼ်ႉလဝ်ႈယႃႈ မဵဝ်းယွင်ႇမဝ်းယဝ်ႉၼႆ
လႆႈၶၢမ်ႇၽွၼ်းၸႃႉ ၸွမ်းၼင်ႇပႃႈတႂ်ႈၼႆႉယဝ်ႉ-
1. ငိုၼ်းၶမ်းမူတ်းသဵင်ႈ
2. လွင်ႈထဵင်ၽိတ်းမေႃးၵၼ် တိူဝ်းၼမ်မႃး
3. ၸပ်းတၢင်းပဵၼ်ရေႃးၵႃႇ
4. ၸိုဝ်ႈသဵင်လူႉ
5. ၸၢင်ႈလႆႈၼွၼ်းဢိူၵ်ႇဢၼ်ဝူၺ်ႇႁၢင်ႈ ၸိူဝ်းပဵၼ်ႁၢၵ်ႈ၊ ၽၢႆႈဢွၼ်ႇ၊ ၽၢႆႈလူင်
6. ပၺ်ႇၺႃႇထိုင်ႉၼိုၵ်းထိူင်း ။

ယွၼ်ႉၽွၼ်းၸႃႉႁူၵ်းပိူင်ၼႆႉသေတိူဝ်ႉၶိူၵ်ႈပႃးၸႂ် ထၢတ်ႈၸႂ်ၸၢင်ႈတူၵ်း၊
ၸၢင်ႈၵူဝ်ပိူၼ်ႈတိပိူၼ်ႈၺွပ်း၊ၸၢင်ႈယွင်ႇမဝ်းမႃႈ၊ ဝၢႆးတၢႆၵႂႃႇယဝ်ႉၼႆ
ၸၢင်ႈတူၵ်းဢပႄႇသီႇၽုင်ႇၵွၼ်ႇယဝ်ႉ။
ယွၼ်ႉၼၼ်လႄႈ ႁႂ်ႈဝႄႈယႃႈမဝ်းၵမ်ယႃႇၸမ် ယႃႇၸၢမ်းလႃးလႃး၊
ၸိူဝ်းၸပ်းၸွႆးလဝ်ႈယႃႈၼၼ်ႉၵေႃႈၸူဝ်ႈၵႃႈ လဝ်ႈယႃႈပႆႇယႃႉႁဝ်း၊
ပႆႇမူၺ်ႉ ၶိူဝ်းႁဝ်းႁၢႆမူတ်းၼၼ်ႉထုၵ်ႇလီတိုတ်းပႅတ်ႈဝႆးဝႆး ၵူႈၽႂ်မၼ်းယူႇ။

ၽိုၼ်ဢိင် =
https://www.youtube.com/watch?v=j-SqQDPGW2k
https://www.verywellmind.com/common-causes-of-depression-1066772
သိင်ၵႃလေႃဝႃၻသုတ်ႈ၊ ပႃထိၵဝၵ်ၵ၊ ၻီꧠၼိၵႃယ။

ႁႅင်းၸႂ်ၶႅင် သီႇသႅင်ႇ