လိူၼ်သိပ်းဢဵတ်းမူၼ်လႄႈ ၶဵင်ႇသၢင်ႇပုတ်ႈ

                                        

ႁွတ်ႈထိုင်မႃး ၶၢဝ်းဢွၵ်ႇဝႃႇယဝ်ႉၼႆလႄႈ လႆႈႁၼ် ပီႈၼွင်ႉတႆးႁဝ်းၶႃႈ ၵၢၼ်ၼမ်ႁႅင်းၵႂႃႇ တေႉတေႉ။ တူၺ်းၵႂႃႇႁိူၼ်းလႂ်ၵေႃႈ ၵူၼ်းထဝ်ႈၶဝ် ဢဝ်မႆႉ သၢၼ်ႁဵတ်း ၶဵင်ႇသၢင်ႇပုတ်ႈဝႆႉယူႇယဝ်ႉ။ ၵႂႃႇတူၺ်းႁိူၼ်းလႂ်ၵေႃႈ ၵၢၼ်သုၵ်ႉတေႉ၊ ပူႇထဝ်ႈ ၼၢႆးထဝ်ႈ ပေႃးဢမ်ႇလႆႈယူႇလီလီၼၼ်ႉၶႃႈ။ သၢၼ်ႁႂ်ႈ လၢႆးမၼ်းႁၢင်ႊလီၵွႆးမဝ်ႇၵႃး ဢဝ်ၼမ်ႉ ယႃႈ သီလိူင်မႃးယွမ်ႉပၼ် ႁႂ်ႈပေႃးႁၢင်ႊလီမႃးထႅင်ႈ ၵွၼ်ႇ။ ၵူၼ်းထဝ်ႈသမ်ႉ ႁဵတ်းၶဵင်ႇသၢင်ႇပုတ်ႈ ၵူၼ်းၼုမ်ႇသမ်ႉဢဝ်သႃႉ၊ ဢဝ်ထူင်၊ ပႃးၽႃႉ သေ ၵႂႃႇတၢင်းႁႆႊတၢင်းသူၼ် ၵႂႃႇဢဝ် ၸိူဝ်းဢၼ်ၽုၵ်ႇ ဝႆႉ ၼႂ်းႁႆႊၼႂ်းသူၼ် ၸိူဝ်းၼၼ်ႉယဝ်ႉ။

ယွၼ်ႉသင်လႄႈ ပီႈၼွင်ႉတႆးႁဝ်း လႆႈႁၢင်ႈ ႁႅၼ်း ပေႃးတၢၼ်ႇၼႆႉလႃႇၼႆၸိုင် ၵွပ်ႈပိူဝ်ႈ တေ ထိုင်ဝၼ်းလိူၼ်သိပ်းဢဵတ်းမူၼ်း၊ ၽြႃးပဵၼ်ၸဝ်ႈ ႁဝ်းၶႃႈၼႆႉ ၶၢဝ်းတၢင်းၼႂ်းဝႃႇသၢမ်လိူၼ် မိူဝ်း မိူင်းၽီသေ မိူဝ်းၶျွတ်ႈမႄႈၸဝ်ႈ။ ၵမ်းၼႆႉသမ်ႉ ပဵၼ် ဝၼ်းလူင်းမႃး ၼႂ်းမိူင်းၵူၼ်းႁဝ်းၶႃႈလႄႈ ဢွၼ်ၵၼ် ႁၢင်ႈႁႅၼ်း ပႂ်ႉႁပ်ႉတွၼ်ႈ ၽြႃးပဵၼ်ၸဝ်ႈ ႁဝ်း ၼၼ်ႉၶႃႈ

ဢဝ်လၢႆးၸိူင်ႉႁိုဝ်သေ ႁပ်ႉတွၼ်ႈလႃႇ ပေႃးၼႆ ဢဝ်ၾႆးတဵၼ်းတႆႈ ႁႂ်ႈပေႃးလႅင်းလီ ႁၼ်ၸိုၼ်ႈၸၢင်ႇလီ၊ ဢဝ်ၼူၵ်ႉ၊ ဢဝ်တူဝ်း ဢဝ် ၵွင်မွင်းသေ ပႂ်ႉႁပ်ႉတွၼ်ႈၼၼ်ႉယဝ်ႉ။ ၸဵမ်ၽီ သၢင်၊ သတ်း၊ ၵူၼ်း တူဝ်မီးသၢႆၸႂ် တင်းမူတ်း မူၼ်ႈမူၼ်ႈသိူဝ်းသိူဝ်းသေ ပႂ်ႉႁပ်ႉတွၼ်ႈ ၽြႃးပဵၼ် ၸဝ်ႈႁဝ်းၶႃႈယဝ်ႉ။

ဢၼ်ၵႂႃႇဢဝ်မႃး ၼႂ်းႁႆႊၼႂ်းသူၼ် မိူၼ် ၸိူင်ႉၼင်ႇ ႁူဝ်ၽိူၵ်ႇ၊ ႁူဝ်လိူင်၊ ႁူဝ်မၼ်း၊ ႁူဝ်လႅင်၊ ၶိင်၊ ဢႃႇလႃႇယုတ်ႉ၊ ၶျူး၊ ထူဝ်ႇယၢဝ်း၊ တႅင်ႁွမ်၊ တႅင်ဝၢၼ်၊ တႅင်သူမ်ႈ၊ တႅင်ၾၢင်၊ မၢၵ်ႇပၢဝ်ႉ၊ မၢၵ်ႇ ၵဵင်၊ မၢၵ်ႇဢေႃႇၸႃႇ၊ မၢၵ်ႇၵႃႇ၊ မၢၵ်ႇၸွၵ်း၊ မၢၵ်ႇ ဝၢၼ်၊ မၢၵ်ႇမၼ်ႉ၊ မၢၵ်ႇၽႃႈ၊ မၢၵ်ႇဢိုၼ်ႈ၊ မၢၵ်ႇဝူဝ်ႈ၊ မၢၵ်ႇၽိတ်ႉ ၸႃႉၸိူဝ်းဢၼ်ၽုၵ်ႇဝႆႉ ၼႂ်းႁႆႊၼၼ်ႉ ဢဝ်မႃးၵူႊမဵဝ်းမဵဝ်း ပေႃးဢမ်ႇၵိုတ်း သေမဵဝ်း ၼၼ်ႉယဝ်ႉ။ တူၼ်ႈၶဝ်ႈ၊ တူၼ်ႈၵူၺ်ႈ၊ တူၼ်ႈဢွႆႈ ၸိူဝ်းၼႆႉ ဢဝ်မႃးၵူပ်းတီႈသဝ် ၶဵင်ႇသၢင်ႇပုတ်ႈ ၼၼ်ႉယဝ်ႉ။

တီႈၶဵင်ႇၽြႃးၵေႃႈ ဢဝ်မႃးၵူပ်းမႃးလူႇ တၢၼ်း မိူၼ်ၵၼ်။ ၸိူဝ်းဢၼ်သိုဝ်ႉမႃး ၼႂ်းၵၢတ်ႇ ၼၼ်ႉ မိူၼ်ၼင်ႇ ထူင်ၶဝ်ႈမုၼ်း ၸိူဝ်းၼၼ်ႉၵေႃႈ မႃးလူႇပႃးယဝ်ႉ။ ဢၼ်ႁဵတ်းတီႈႁိူၼ်း မိူၼ်ၼင်ႇ ၶဝ်ႈမုၼ်းၽိူၵ်ႇ၊ ၶဝ်ႈမုၼ်းလႅင်၊ ၶဝ်ႈမုၼ်းႁေႃႇ ၼၼ်ႉၵေႃႈ လူႇယဝ်ႉ။ ပေႃးဝႃႈ မဵဝ်းယိုၼ်းထိုင်လႆႈ တႄႉ ဢဝ်မႃးလူႇၽြႃး လႄႈ ဢဝ်မႃးႁွႆႈတီႈ ၶဵင်ႇ သၢင်ႇပုတ်ႈ ဢၼ်ႁဵတ်းပၼ် တွၼ်ႈတႃႇ သၢင်ႇဢူႈ ပုတ်ႈ ယဝ်ႉ။

ယွၼ်ႉသင်လႄႈ ႁဵတ်းၶဵင်ႇသၢင်ႇပုတ်ႈလႃႇ ပေႃးၼႆ ၸဝ်ႈသၢင်ႇဢူႈပုတ်ႈ ၸဝ်ႈဢၼ်ယူႇၼႂ်း ၼမ်ႉ ၸဝ်ႈထွတ်ႈၸဝ်ႈမျၢတ်ႈၼၼ်ႉ မၼ်းဢမ်ႇ ၶဝ်ႈႁူမ်ႈ ႁေႃႇၸၢႆးၶႃးသေ သုင်းသွမ်း ၼႆလႄႈ ပီႈၼွင်ႉတႆးႁဝ်း ၸင်ႇလႆႈႁဵတ်း ၶဵင်ႇသၢင်ႇပုတ်ႈ ႁင်းၶေႃၶေႃယဝ်ႉ။ ၵူၼ်းတင်းၼမ်ယုမ်ႇယမ်ဝႃႈ သၢင်ႇဢူႈပုတ်ႈ ၼႆႉ ပဵၼ်ၸဝ်ႈ ဢၼ်ပၼ်ၽွၼ်းလီ တႃႇၵူၼ်းႁဝ်း လႆႈမၢၵ်ႈမီးလီပဵၼ် ၼႂ်းၸူဝ်ႈပၢၼ် ၵူၼ်းႁဝ်း ယၢမ်းလဵဝ် ၵမ်းလဵဝ် ၼႆယဝ်ႉ။

ၽူႈလႂ်ၽႂ်သေဢမ်ႇဝႃႈ ပေႃးလႆႈႁူပ်ႉထူပ်း ၺႃး သၢင်ႇဢူႈပုတ်ႈၸိုင် ႁဵတ်းၵၢၼ်သင်ၵေႃႈတေႃႇ ၵေႃႇသင်ၵေႃႈမၢၼ် ၶၢႆသင်ၵေႃႈ ၺႃးၵႃႊယႂ်ႇၶၼ် လူင် ၶျၢမ်းသႃႇလီ ၵမ်းလဵဝ်ယဝ်ႉ။ ပေႃးသၢင်ႇဢူႈ ပုတ်ႈ မႃးသုင်းသွမ်း ဢၼ်ႁဝ်း ဢွၼ်ၵၼ် ႁဵတ်း ဝႆႉ ၽုၵ်ႇဝႆႉ ၼႂ်းသူၼ်ႁဝ်းၸိူဝ်းၼၼ်ႉၵေႃႈ မၢၼ် ၵမ်းလဵဝ်ယဝ်ႉ ၼႆ ပူႇမွၼ်ႇၼၢႆးယႃႊ ၵူၼ်းထဝ်ႈၶဝ် ဝႃႈဝႆႉၼင်ႇၼႆလႄႈ ၸိူဝ်းၽုၵ်ႇဝႆႉ ၼႂ်းႁႆႊၼႂ်းသူၼ် ၼၼ်ႉ ဢွၼ်ၵၼ်ဢဝ်မႃးလူႇ တီႈၶဵင်ႇသၢင်ႇပုတ်ႈ ၼၼ်ႉၶႃႈယဝ်ႉ။

ပဵၼ်ဝၼ်း ၸဝ်ႈထွတ်ႈၸဝ်ႈမျၢတ်ႈၶဝ် ဢွၵ်ႇဝႃႇဢွၵ်ႇၵမ်ယဝ်ႉ တေဢွၵ်ႇႁႃ တုင်းသွမ်းၶႃႈ လူး။ ၵွပ်ႈၼႆ ဢွၼ်ၵၼ်ႁၢင်ႈႁႅၼ်း တႃႇလူႇယူႇ ယဝ်ႉ။ လွင်ႈပႂ်ႉႁပ်ႉတွၼ်ႈ ၽြႃးလူင်းမိူင်းၵူၼ်းသေ ပႂ်ႉလူႇလွင်းသွမ်း ၽြႃးပဵၼ်ၸဝ်ႈ တင်း ပႂ်ႉၶႂ်ႈႁႂ်ႈ သၢင်ႇ ဢူႈပုတ်ႈ မႃးသုမ်းသွင်းသေ ပဵၼ်ဢၼ်သုမ်ႇ မိူဝ်ႈလဵဝ်ၵၼ်ယဝ်ႉ။

လီၵျေႃႇတေႉတေႉ ပေႃးႁွတ်ႈထိုင်ၵၢင်ၼႂ် မိူဝ်ႈလိူၼ်ၵေႃႈ ၸမ်တေတူၵ်း ႁူဝ်မိူင်းၸမ်တေသႂ် မိူဝ်ၽွင်းၾႃႉတေႁုင်ႈၼၼ်ႉ ၵူၼ်းႁိူၼ်းၵူႊၵေႃႉ ဢွၼ်ၵၼ် တၢင်ႇသွမ်းတေႃႇ ၽြႃးပဵၼ်ၸဝ်ႈႁဝ်း ၽွမ်ႉၽွမ်ႉၵၼ်သေ ၶိုၼ်းၵႂႃႇတၢင်ႇတီႈ ၶဵင်ႇသၢင်ႇ ပုတ်ႈ ၽွမ်ႉၼႃႈၽွမ်ႉတႃၵၼ်ယဝ်ႉ။ သဵင်မူၵ်ႇတႅၵ်ႇ ၵေႃႈ ႁုၼ်ႈမေႃးၵႂႃႇသဵင်ႈယဝ်ႉ။ တီႈၼိူဝ် တွင်ႉၾႃႉ ၵေႃႈ မွၵ်ႇၾႆး မူၵ်ႇတႅၵ်ႇ ပေႃးလႅင်းၵႂႃႇ သဵင်ႈယဝ်ႉ။

ပေႃးတၢင်ႇတီႈႁိူၼ်း မၢဝ်ႇမၢဝ်ႇသၢဝ်သၢဝ် တင်းဝၢၼ်ႈ ဢွၼ်ၵၼ်ၵႂႃႇၶွၼ်ႈတီႈၼိူဝ်ၵွင်းမူး ၼၼ်ႉယဝ်ႉ။ မုၼ်ၸဝ်ႈႁဝ်းၶႃႈၵေႃႈ ဢွၼ်ဝႆႈၽြႃး သေ ဝႃႈၵႂၢမ်းတၢင်ႇသွမ်းတေႃႇၸွမ်းၵၼ် တင်း မူတ်းယူႇၶႃႈယဝ်ႉ။ ပေႃးတၢင်ႇယဝ်ႉၵေႃႈ ဢွၼ် ၵၼ် ၸုတ်ႇမူၵ်ႇတႅၵ်ႇၸွမ်းၵၼ် ၵျေႃႇၵျေႃႇမူၼ်ႈ မူၼ်ႈယဝ်ႉ။ ယူႇတီႈၼိူဝ်လွႆၼၼ်ႉသေ မၢဝ်ႇသၢဝ် ၶိုၼ်းဢုပ်ႇၵၼ် လၢတ်ႈတေႃႇၵၼ် တိူင်ႇပၢင်ႇၵၼ် ယဝ်ႉ၊ လႅတ်ႇၵေႃႈ လႅင်ၶိုၼ်ႈသုင်မႃးလွႆးလွႆး တိၵ်း တိၵ်းယဝ်ႉ ၸင်ႇဢွၼ်ၵၼ် ၶိုၼ်းလူင်းမႃးယဝ်ႉ။

တွၼ်ႈတႃႇ မၢဝ်ႇမၢဝ်ႇသၢဝ်သၢဝ်ၶဝ် တေ ၵျေႃႇ ၶမ်ႈၶိုၼ်းၼႆႉ ယင်းပႂ်ႉႁပ်ႉတွၼ်ႈဝႆႉယူႇၵွၼ်ႇ ယဝ်ႉ။ ဢၼ်ၼၼ်ႉၵေႃႈ ပဵၼ် တႆႈတဵၼ်းဢွၵ်ႇဝႃႇ ၶမ်ႈၶိုၼ်းလိူၼ်သိပ်းဢဵတ်းမူၼ်း ၼႆႉယဝ်ႉ။ မႃး တႆႈတဵၼ်းသေ မႃးၵႃႈပၼ်ႇၵွင်ၾႆး ၸွမ်းၵၼ်ႁေ မႃးပွႆႇႁူင်းၾႆးမိၼ်ၸွမ်းၵၼ် ထႅင်ႈၵွၼ်ႇဢေႃႈ။  ။

The Hsenpai Midea