ၵွပ်ႈသင် ထုၵ်ႇလီလူလိၵ်ႈ

ပပ်ႉလိၵ်ႈဢၼ်ဝႃႈၼႆႉ မိူၼ်ၼင်ႇၸၼ်ႉၸွမ် ဢၼ်ဢမ်ႇလႆႈတွပ်ႇၶဝ်ႈၼၼ်ႉယဝ်ႉ၊ ဢမ်ႇၼၼ်ၵေႃႈ မိူၼ်ၵျွင်းလူင်ဢၼ်ဢမ်ႇမီးၶူးသွၼ်သင်လႄႈဢမ်ႇလႆႈပၼ်ၵႃႈမၼ်းသေၶဝ်ႈၼၼ်ႉယဝ်ႉ။

ၶိူဝ်းၵူၼ်းႁဝ်းၼႂ်းလူၵ်ႈၼႆႉ ၸဵမ်လွင်ႈယူႇလွင်ႈၵိၼ် ၸၼ်ႉထၢၼ်ႈ ၵူႈၸိူဝ်းၵူႈလွင်ႈ မၼ်းၶိုၼ်ႈယႂ်ႇႁႃႉ၊ မၼ်းတူၵ်းတႅမ်ႇႁႃႉပေႃးၶႂ်ႈႁူႉၼႆ မၼ်းတေၼႄပၼ်တီႈ ဢၼ်ၶဝ်ၸႂ်ႉတိုဝ်း လိၵ်ႈလၢႆးပၢႆပေႇ ၽိင်ႈထုင်း၊ ၽဵင်းၵႂၢမ်း၊ ၵႂၢမ်းလၢတ်ႈၶဝ် ၼၼ်ႉၵူၺ်းၵေႃႈႁူႉလႆႈလီၼၼ်ႉယဝ်ႉ။

တီႈတေႉတေႉမၼ်း လူလိၵ်ႈဢၼ်ဝႃႈၼႆႉ မိူၼ်ၵၼ်တင်းၽုၵ်ႇတူၼ်ႈမႆႉ တူၼ်ႈမွၵ်ႇတူၼ်ႈမၢၵ်ႇ ၼၼ်ႉယဝ်ႉ။ တူၼ်ႈမႆႉၼႆႉ မၼ်းၸၢင်ႈပၼ်ၽွၼ်းလီ တႃႇၵူၼ်းႁဝ်းလႄႈ တႃႇၼမ်ႉလိၼ်ႁိၼ်ၽႃ ၼၼ်ႉယဝ်ႉ။ ႁိုင်ၵႃႈႁိုဝ်ၵေႃႈ မီးၽွၼ်းလီၵႃႈၼၼ်ႉ၊။

ပပ်ႉလိၵ်ႈၼႆႉ ပဵၼ်ဢူၺ်းၵေႃႉလီၼၼ်ႉယဝ်ႉ။ ႁဝ်းၽိတ်းမၼ်းၵေႃႈ မၼ်းဢမ်ႇမေႃၽိတ်းႁဝ်းၶိုၼ်း၊ သမ်ႉမေႃပၼ်တၢင်းႁူႉတၢင်းႁၼ် တႃႇၵူၼ်းႁၵ်ႉပပ်ႉလိၵ်ႈၶဝ်တင်းလၢႆၼၼ်ႉယဝ်ႉ။

ၵွပ်ႈသင်ထုၵ်ႇလီလူလိၵ်ႈ

တီႈတေႉမၼ်း ဢၼ်သွၼ်လိၵ်ႈယူႇၼၼ်ႉ ပဵၼ်တႃႇလဵင်ႉၼမ်ႉၸႂ်ၼၼ်ႉယဝ်ႉ။ ၵူၼ်းႁဝ်းၼိုင်ႈၵေႃႉၼႆႉ ၼမ်ႉၸႂ်ၼၼ်ႉ ပဵၼ်ဢၼ်လမ်ႇလွင်ႈတေႉတေႉ။ ၼင်ႇႁိုဝ်တေမေႃဝႆႉၼမ်ႉၸႂ် ၼၼ်ႉ ပိၵ်ႉသမ်ႉဝႃႈ ဢမ်ႇလႆႈသွၼ်ႁဵၼ်းသင်ၵေႃႈ ထုၵ်ႇလီလူလိၵ်ႈပၼ်ၼမ်ၼမ်ၼၼ်ႉယဝ်ႉ။

ဢၼ်ဢမ်ႇလူလိၵ်ႈသေ သွၼ်ၼႂ်းႁူင်းႁဵၼ်းသုတ်းယဝ်ႉလႆႈၸုမ်ႈၵႂႃႇၼၼ်ႉမီးတင်းၼမ်၊

ၵူၼ်းယဝ်ႉႁဵၼ်းလႆႈၸုမ်ႈမိူၼ်ၵၼ်သေတႃႉ ၵေႃႉလူလိၵ်ႈၼမ်လႄႈ ၵေႃႉဢမ်ႇလူလိၵ်ႈသင်ၼၼ်ႉ မၼ်းတိုၼ်းပိူင်ႈၵၼ်။ တေႃႈလဵဝ် ၼႂ်းလူၵ်ႈၼႆႉ ၵူၼ်းဢၼ်လႆႈၸုမ်ႈၶူးသေ ဢမ်ႇႁူႉဢမ်ႇမေႃသင် ဢမ်ႇမီးၼမ်ႉၵတ်ႉသင်ၼၼ်ႉမီးတင်းၼမ်၊ ယွၼ်ႉဝႃႈၶဝ်ဢမ်ႇလူလိၵ်ႈၼၼ်ႉယဝ်ႉ။

ယွၼ်ႉၼၼ် ယႃႇထၢင်ႇလဵၵ်ႉလွင်ႈလူလိၵ်ႈလႄႈ ထုၵ်ႇလီလူလိၵ်ႈပၼ်ၼမ်ၼမ်ၼၼ်ႉယဝ်ႉ။

ဢမ်ႇသင်ၵေႃႈ ႁဵတ်းဢဝ်ႁႂ်ႈမီးမႃးလႆႈယူႇ

ဢမ်ႇႁူႉသင်ၵေႃႈ ႁဵတ်းဢဝ်ႁႂ်ႈႁူႉမႃးလႆႈယူႇ

ဢမ်ႇမေႃသင်ၵေႃႈ ႁဵတ်းဢဝ်ႁႂ်ႈမေႃမႃးလႆႈယူႇ

ၵူၺ်းပေႃးဢမ်ႇႁဵတ်းသင်တေႉ တေဢမ်ႇလႆႈသင်သေလွင်ႈၼၼ်ႉယဝ်ႉ။

ၼႂ်းၸၢတ်ႈပၢၼ်ၼႆႉ ၸဝ်ႈၵဝ်ႇၶႂ်ႈႁူႉသင် လူလိၵ်ႈပၼ်တူၺ်းလႄႈ။

ၼႂ်းၸၢတ်ႈပၢၼ်ၼႆႉ ၸဝ်ႈၵဝ်ႇၶႂ်ႈမီးသင် လူလိၵ်ႈပၼ်တူၺ်းလႄႈ။

ၼႂ်းၸၢတ်ႈပၢၼ်ၼႆႉ ၸဝ်ႈၵဝ်ႇၶႂ်ႈႁဵတ်းသင် လူလိၵ်ႈပၼ်တူၺ်းလႄႈ။

လူလိၵ်ႈပၼ်မႃးၼမ်ယဝ်ႉ တၢင်းႁူႉၸဝ်ႈၵဝ်ႇ ဢၼ်ၶႂ်ႈႁူႉလႄႈ ဢမ်ႇဢမ်ႇယၢမ်ႈႁူႉ ဢၼ်ဢမ်ႇယၢမ်ႈငိၼ်း မႃးၸိူဝ်းၼၼ်ႉ တေႁူႉတေငိၼ်းမႃးသေ တေပဵၼ်ၵူၼ်းမီးတၢင်းႁူႉ ၵေႃႉၼိုင်ႈဢိူဝ်ႈ။

ပေႃးဝႃႈလူလိၵ်ႈပၼ်ၼႆ ၸဝ်ႈၵဝ်ႇၶႂ်ႈႁဵတ်းသင်ၵေႃႈ ၸဝ်ႈၵဝ်ႇတေဝူၼ်ႉလႆႈငၢႆႈၼႆၼၼ်ႉယဝ်ႉ။

တႃႇတေမေႃဝူၼ်ႉဢၼ်ဝႃႈၼၼ်ႉၵေႃႈ လူဝ်ႇလႆႈလူလိၵ်ႈပၼ်ၼမ်ၼမ်ၵွၼ်ႇ--။

ပေႃးၶႂ်ႈႁႂ်ႈၸၢတ်ႈပၢၼ်ၶိုၼ်ႈယႂ်ႇၵေႃႈ လူလိၵ်ႈပၼ်ၼမ်လႄႈ---။

ပေႃးၶႂ်ႈႁႂ်ႈၸၢတ်ႈပၢၼ်တူၵ်းတႅမ်ႇၵေႃႈ ဢမ်ႇလူလိၵ်ႈသင်သေယူႇၵႂႃႇလႆႈယူႇ--။

ပၢႆးဝူၼ်ႉၶပ်ႉ ပိၼ်ႇ။