ဝႆႉၸႂ်ယၢဝ်းယၢဝ်း

မိူဝ်ႈၼၼ်ႉ မီးၵူၼ်းၵေႃႉၼိုင်ႈ မၼ်းမီးဝႆႉငွႆးၵႃႈၶၼ်ယႂ်ႇလုၵ်ႈၼိုင်ႈယူႇယဝ်ႉ။ ငွႆးလုၵ်ႈၼၼ်ႉ မၼ်းဝႆႉၵႃႈၶၼ်ၼႃႇ ယၢမ်းတေၼွၼ်းၵေႃႈ မၼ်းဢဝ်ဝႆႉႁိမ်းတီႈႁူဝ်ၼွၼ်းမၼ်းသေၼွၼ်းၵူႈၶမ်ႈယူႇယဝ်ႉ။



မီးၼင်ႇၶမ်ႈၼိုင်ႈ ဢမ်ႇသၢင်ႇထုၵ်ႇသေ ဢဝ်ၽႃငွႆးၶွင်မၼ်းတူၵ်းလူင်းတႂ်ႈၵူႇၵႂႃႇလႄႈ ၵူၼ်းၵေႃႉၼၼ်ႉၵေႃႈငိၼ်းၸႂ်ဢမ်ႇလီသေ ပဵၼ်သေႃးၵယူႇႁင်းမၼ်းယူႇယဝ်ႉ။

မၼ်းဝူၼ်ႉဝႃႈ ငွႆးၼႆႉသင်ဢမ်ႇမီးၽႃဢူပ်းမၼ်းၸိုင် မၼ်းဢမ်ႇမီးၵႃႈၶၼ်သင်ယဝ်ႉၼႆသေ ဢဝ်ငွႆးၼၼ်ႉ ထိုမ်ႈဢွၵ်ႇႁူးလႅင်းၵႂႃႇယူႇယဝ်ႉ။

ယၢမ်းမိူဝ်ႈမိူင်းလႅင်းမႃးယၢမ်းၵၢင်ၼႂ်ၼၼ်ႉ ဢမ်ႇထၢင်ႇသေၽႃဢူပ်းငွႆးၼၼ်ႉ တူၵ်းသႂ်ႇတီႈဢၼ်လွင်တႂ်ႈၵူႇမၼ်း တီႈဢၼ်ဢမ်ႇႁဵတ်းႁႂ်ႈၽႃဢူပ်းငွႆးၼၼ်ႉၵွႆလႆႈၼၼ်ႉလႄႈ မၼ်းဝူၼ်ႉဝႃႈ ၵဝ်ဢဝ်ငွႆးထိုမ်ႈပႅတ်ႈယဝ်ႉလူး ၽႃဢူပ်းငွႆးၼႆႉၵေႃႈဢမ်ႇမီးၵႃႈၶၼ်သင်ယဝ်ႉၼႆသေ ယဵပ်ႇတိုပ်ႈလႅဝ်ပႅတ်ႈၽႃဢူပ်းငွႆးၼၼ်ႉယူႇယဝ်ႉ။

ယၢမ်းမၼ်းဢွၵ်ႇၼွၵ်ႈႁိူၼ်းၵႂႃၼၼ်ႉ လႆႈႁၼ်ငွႆးဢၼ်မၼ်းထိုမ်ႈဢွၵ်ႇႁူးလႅင်းမႃးၼၼ်ႉ ဢမ်ႇၵွႆသေႁွႆႈၵိင်ႇမႆႉဝႆႉယူႇယဝ်ႉ။

#တွၼ်ႈသွၼ်
မိူၼ်ၼၼ်ၼင်ႇၵဝ်ႇ မၢင်ပွၵ်ႈ ပၼ်ႁႃၼၼ်ႉ ဢၼ်ထုၵ်ႇလီပႂ်ႉၵေႃႈတေမီး ဢၼ်ထုၵ်ႇလီတူၺ်းၵေႃႈတေမီး ဢၼ်ထုၵ်ႇလီထိူင်းၵေႃႈတေၸၢင်ႈမီးယူႇယဝ်ႉ။ ဢမ်ႇထုၵ်ႇလီႁိပ်ႈ ဢမ်ႇထုၵ်ႇလီၼႅတ်ႈ ပၼ်ႁႃလူင်မၢင်လွင်ႈၼႆႉ မၼ်းဢမ်ႇလႆႈမိူၼ်ၼင်ႇဢၼ်ႁဝ်းဝူၼ်ႉဝႆႉၼၼ်ႉၵူၺ်း .....

လွင်ႈၸႂ်ႁိပ်ႈၼႅတ်ႈၼႆႉ မၼ်းမိူၼ်ၼင်ႇမိၵ်ႉသႃႇတူဝ်ၼိုင်ႈၼၼ်ႉယဝ်ႉ။ ပၼ်ႁႃမၢင်လွင်ႈၼႆႉ ဝူၼ်ႉလွင်ႈဢၼ်ဢမ်ႇလီသေ ၸၢင်ႈႁဵတ်းႁႂ်ႈမၼ်းႁုၵ်းႁၢႆႉၵႂႃႇလိူဝ်ၵဝ်ႇဢိူဝ်ႈ ၸၢင်ႈလႆႈထူပ်းလွင်ႈၶၢၼ်ၵိၼ်းၼႃႇလိူဝ်ၵဝ်ႇဢိူဝ်ႈ ......

ယွၼ်ႉၼၼ် လွင်ႈဝႆႉၸႂ်ယဵၼ်ယဵၼ်သေ ဝူၼ်ႉၼၼ်ႉၵေႃႈ ပဵၼ်ပၢႆးႁူႉဢၼ်ၼိုင်ႈမိူၼ်ၵၼ်ယဝ်ႉ။

လွင်ႈၶႂ်ႈပဵၼ်ၼၼ်ႉ သင်ဢမ်ႇပဵၼ်မႃးၸိုင် ယႃႇပေၸႂ်ႁိပ်ႈၸႂ်ၼႅတ်ႈသေ ႁဵတ်းႁွတ်းလူင်ၵႂႃႇလႄႈ .....

လွင်ႈမၢင်လွင်ႈၼႆႉ ႁဝ်းၶတ်းၸႂ်တၢၼ်ႇလႂ်ၵေႃႈယဝ်ႉ သင်ပႆႇထိုင်ၶၢဝ်းယၢမ်းၼႆၸိုင် မၼ်းၵေႃႈတေဢမ်ႇပႆႇၸၢင်ႈပဵၼ်မႃး ဝႆႉၸႂ်ယၢဝ်းယၢဝ်းလႄႈ ......

ထူပ်းတၢင်းယၢပ်ႇၸိူင်ႉႁိုဝ်ၵေႃႈလီ ယႃႇပေၸႂ်ႁိပ်ႈ ၸႂ်ၼႅတ်ႈသေၵႄႈလိတ်ႈသေၵမ်း .....

ပၼ်ႁႃမၢင်လွင်ႈၼႆႉ ထုၵ်ႇလီၵႄႈလိတ်ႈၵမ်းလဵဝ်ၼႆသေတႃႉ လွင်ႈၶဵင်ႇတႃႉမၢင်လွင်ႈၼႆႉ မၼ်းၸၢမ်းဝႃႈ ၸွင်ႇႁဝ်းတေမေႃဝႆႉၸႂ်ယၢဝ်းၼႆၼၼ်ႉဢိူဝ်ႈ ...

ယွၼ်ႉၼၼ် ဝႆႉၸႂ်ယၢဝ်းယၢဝ်းလႄႈ

လွင်ႈၸႂ်ယၢဝ်းၼႆႉ မၼ်းႁဵတ်းႁႂ်ႈတၢင်းၽိတ်းဢေႇသေ ပဵၼ်လွင်ႈလပ်ႉလွင်းတႃႇႁႂ်ႈဢွင်ႇမၢၼ်ဢၼ်ၼိုင်ႈဢိူဝ်ႈ ....

ၼပ်ႉယမ်ထိုင်ၽူႈလူလိၵ်ႈၵူႈၵေႃႉသေ
ဝၼ်းၼုမ်ႇ( လႃႈသဵဝ်ႈ )
႑႙ . ႘. ႒႐႑႙ ဝၼ်းၸၼ်