ၵႂၢမ်းၵၼ်ႇတေႃးဢေႃးၵႃႇသ လႄႈ ၵွၢမ်းတၢင်ႇသွမ်း ၽြႃးပဵၼ်ၸဝ်ႈ

                        ၵႂၢမ်းၵၼ်ႇတေႃး ဢေႃးၵႃႇသ [ပၢၼ်ၵဝ်ႇ]

    ဢေႃးၵႃႇသ ၵႃႇယၵမ်ႇ ဝၸီႇၵၢမ်ႇ မၼေႃးၵၢမ်ႇ ၼင်ႇၵႃႈတူဝ်ႁဵတ်း သူပ်းဝႃႈ ၸႂ်ၵျၢမ်ႇ ပဵၼ်ၵၢမ်ႇတုၸရူိၵ်ႈ ၶူိင်ႈမူိၵ်ႈ လမ်လၢင်ႇ မဝ်ႇၸၢင်ႇမဝ်ႇၸႅတ်ႈ ဢပႅတ်ႈလၢႆမဵဝ်းၸိူဝ်ႈၼၼ်ႉ ဢၵျူဝ်းပုၼ်ႈတႂၢၵ်ႈ ပေႇပၢၵ်ႈဢဝ်ႁၢႆ ယၢမ်းၼႆတမ်ႈတီႈ ၽြႃးရတၼႃႇ တြႃးရတၼႃႇ သင်ႇၶႃႇရတၼႃႇ တမ်ႈတီႈရတၼႃႇ ၸဝ်ႈမျၢတ်ႈသၢမ်ပိူင်ၸိူဝ်းၼၼ်ႉ ၶႃႈ
မႃးယမ်ၵူဝ် ဝၢင်းႁူဝ်ၵူမ်ႈတေႃႇ ပူႇၸေႃႇၶုပ်ႉၵွမ်းၼွမ်းဝႆႈ ႁႂ်ႈလႆႈထူၼ်ႈထိုင် ပထမ တုတိယ တတိယ ပွၵ်ႈၼိုင်ႈ သွင်ပွၵ်ႈသၢမ်ၽဝ်ႇၶုပ်ႉၶဝ်ႇယုၵ်ႉမိုဝ်းၶိုဝ်းတၢင်ႇ တၼ်းၶႂၢင်ႇသီႇသေႇ ဝၼ်ႇတေႇၼမေႃး ယွၼ်းၵၼ်ႇတေႃးဝႆႈတီႈၶႃႈယဝ်ႈ။

     ၼင်ႇဢၼ်ဢၵျူဝ်းႁၢင်ႈၶႃႈ လႆႈမႃးၵူမ်ႈၼႃႈ ယုၵ်ႉမိုဝ်းၶိုဝ်းတၢင်ႇ တၼ်းၶႂၢင်ႇ သီႇသေႇ ဝၼ်ႇတေႇၼမေႃး ယွၼ်ႈၵၼ်ႇတေႃးဝႆႈၼႆႉၸၢတ်ႈလႂ်ပၢၼ်လႂ် သေၵေႃႈႁႂ်ႈလႆႈလွတ်ႈသၢင်းၵၢင်းသေ ဢပေႇသီႇပိူင် ၵၢပ်ႈသၢမ်ပိူင် ရၢၼ်ႇသူႇႁႃႈပိူင် ဝိပတ်ႉတိတြႃးသီႇပိူင် ပျသၼႃႇတြႃးႁႃႈပိူင်ၸိူဝ်းၼၼ်ႉ သေလႄႈ တၼ်းၼႂ်း ၸၢတ်ႈသုတ်း ၸၢတ်ႈသဵင်ႈ ဝၼ်းလိုၼ်းမိူဝ်းၼႃႈၼၼ်ႉ ႁႂ်ႈႁူပ်ႉလႆႈသၢၼ်ႇတြႃး မၢၵ်ႈတြႃး ၽူဝ်ႇတြႃး ၼိပ်ႉပၢၼ်ႇတြႃးမျၢတ်ႈၼၼ်ႉ သၵ်းၵမ်းတီႈ

ၶႃႈဢေႃႈ။

                ၵႂၢမ်းၵၼ်ႇတေႃး ဢေႃးၵႃႇသ ၸိုင်ႈမိူင်း

       ဢေႃးၵႃႇသ ၵႃႇယၵၢမ်ႇ ဝၸီႇၵၢမ်ႇ မၼေႃးၵၢမ်ႇ ၼင်ႇၵႃႈတူဝ်ႁဵတ်း သူပ်းဝႃႈ ၸႂ်ၵျၢမ်ႇ ၼႂ်းၵၢမ်ႇသၢမ်ယိူင်ႈၸိူဝ်းၼၼ်ႉ သင်လႆႈဢဝ်ပိူင်ႈၽိတ်းၵႂႃႇ ပုၼ်ႈတႃႇယဵၼ်ႁၢႆ ယၢမ်းၼႆ တမ်ႈတီႈ ၽြႃးရတၼႃႇ တြႃးရတၼႃႇ သင်ႇၶႃႇရတၼႃႇ ၸဝ်ႈမျၢတ်ႈသၢမ်ပိူင်ၸိူဝ်းၼၼ်ႉ ၶႃႈမႃးယမ်ၵူဝ် ၼွမ်းႁူဝ်ၵူမ်ႈတေႃႇ ပူႇၸေႃႇၶုပ်ႉၵွမ်း ၼွမ်းဝႆႈတီႈၶႃႈဢေႃႈ

        ၼင်ႇၵႃႈတၢင်းလီတီႈၼႆႈ ႁႂ်ႈလႆႈလွတ်ႈလူၼ်ႉပူၼ်ႉသေ ဢပေႇသီႇပိူင် ၵၢပ်ႈသၢမ်ပိူင် ႁဵင်းၵၢတ်ႈပႅတ်ႇပိူင် ၶဵၼ်လူင်ႁႃႈပိူင် ပျသၼႃႇတြႃးႁႃႈပိူင် ၸိူဝ်းၼၼ်ႉသေလႄႈႁႂ်ႈၸဵဝ်း ႁူပ်ႉလႆႈ သၢၼ်ႇတြႃး မၢၵ်ႈတြႃး ၽူဝ်ႇတြႃး ၼိပ်ႉပၢၼ်ႇတြႃးမျၢတ်ႈၼၼ်ႉ သၵ်းၵမ်းလူၺ်ႈ တၼေႃး  ။

                  ၵႂၢမ်းၵၼ်ႇတေႃး ဢေႃးၵႃႇသ မိူင်းသူႈ

    ဢေႃးၵႃႇသ [3] ၸင်ႇၼႆႉတူဝ်ႁဝ်ႈၶႃႈ မီးတင်းမိုဝ်းသိပ်းၼိဝ်ႉ တၢင်ႇၶီႈမွမ်ႈၸွမ်ႁူဝ် ၼွမ်းတူဝ်ပူႇၸေႃႇၵၼ်ႇတေႃး ၽြႃးရတၼႃႇ တြႃးရတၼႃႇ သင်ႇၶႃႇရတၼႃႇ တမ်ႈတီႈရတၼႃႇ ၸဝ်ႈမျၢတ်ႈတင်းသၢမ် ၵူဝ်လႆႈၽိတ်းပိူင်ႈ ၵႃႇယၵၢမ်ႇ ဝၸီႇၵၢမ်ႇ မၼေႃးၵၢမ်ႇ သၢမ်သမ်ႇတုၸရိူၵ်ႈၸိူဝ်းၼၼ်ႉ သင်ဝႃႈတူဝ်ႁဝ်းၶႃႈ လႆႈၽိတ်းပူၼ်မႅၼ်ႈၵႂႃႇ ၶႅၼ်းတေႃႈၵရုၼႃႇ ပူတ်းပွႆႇဝၢင်းၽႃႈ ပၼ်ၶႃႈႁဝ်းၶဝ် သၵ်းၵမ်းလူၺ်ႈတၼေႃး

      ၵူႉသူဝ်ႇၼႃးမုၼ် ဢၼ်ႁဝ်ႈၶႃႈ လႆႈမႃးပူႇၸေႃႇၵၼ်ႇတေႃး ၽြႃးတြႃးသင်ႇၶႃႇ ရတၼႃႇၸဝ်ႈမျၢတ်ႈတင်းသၢမ် ၸိူဝ်းၼႆႉ ႁႂ်ႈလႆႈလွတ်ႈသၢင်းၵၢင်းသေ ၽေးၽယ ဢုပတ်ႉတဝတင်းသဵင်ႈ ႁႂ်ႈလႆႈႁွတ်ႈထိုင် ဝဵင်းတဵင်ႈၶေႇမႃႇ ဢမတ မၢၵ်ႈၺၢၼ်ႇၽူဝ်ႇၺၢၼ်ႇ ၼိပ်ႉပၢၼ်ႇတီႈၵတ်းယဵၼ် သၵ်းၵမ်းလူၺ်ႈတၼေႃး 

                          ၵႂၢမ်းတၢင်ႇသွမ်း ၽြႃးပဵၼ်ၸဝ်ႈ

    ဢၸိင်ႇတေႇယ-ၽြႃးပဵၼ်ၸဝ်ႈ ႁဝ်းၼႆႉတီႈၶႃႈၸမ်ႉ၊ ရူႇပဝႃႇ-ႁၢင်ႈၽၢင် တွၼ်းတၢင်ႇ တင်းသဵင်ႈလႄႈ၊ ၺႃႇၼဝႃႇ-ၺၢၼ်ႇပိင်ႇၺႃႇ ႁူႉႁၼ်ၽၢႆၽႂ်းလႄႈ၊ ဢိတ်ႉထိမႃ-ဢူငဝ်းၸဝ်ႈႁဝ်း ၵႄးလူၼ်ႉလိူဝ်ပူိၼ်ႈ လႄႈ၊ မုၼိၽၵဝႃႇ-ၸင်ႇလႆႈၸိုဝ်ႈဝႃႈ မုၼိၽၵဝႃႇ သုင်သုတ်းတီႈၶႃႈယဝ်ႉ၊ ၸေႇတီႇယသ်သ-ထႃတုၸေႇတီႇ သီႇၸဝ်ႈၸိူဝ်းၼၼ်ႉ၊ ဝၼ်ၼၵၼ်ထ ယသ်သသမ်ပၼ်ၼမ်-ၵႃႈပဵၼ်ႁၢင်ႈၽၢင် ဢၢႆႁွမ် ဢရသႃႇ တဵမ်ၽွမ်ႉပဵင်းလီလႄႈ၊ ဢိမမ်ပိၼ်တပႃတမ်ဝႃႇ-ၶဝ်ႈသွမ်းလႄႈသင်၊ ပုပ်ၽမ်ဝႃ-မွၵ်ႇလႄႈသင်၊ ဢၵ်ၵိတီပမဝႃ-လႅင်းၾႆးလႄႈသင်၊ တေမပူၸေမ-လူႇတၢၼ်းသဵင်ႈသဵင်ႈတီႈၶႃႈယဝ်ႉ၊ ဢသဝၵ်ၶယမ်-ဢၼ် ပဵၼ် ဢသဝသီႇမႄႈၸိူဝ်းၼၼ်ႉ ႁႂ်ႈလႆႈပူၼ်ႉလွတ်ႈသေၵမ်း၊ ဢိတမ်မေပုၺ်ၺမ် ၼိပ်ပၼသ်သ ပၸ်ၸယေႃ ႁေႃတု-ၵူႉသူဝ်ႇၼႃးမုၼ်ဢၼ်ႁဝ်းၶႃႈ လႆႈမႃးလူႇတၢၼ်းၵႂႃႇယဝ်ႉၼႆႉ ႁႂ်ႈလႆႈႁွတ်ႈထိုင် မၢၵ်ႈၺၢၼ်ႇၽူဝ်ႇၺၢၼ်ႇ ၼိပ်ႉပၢၼ်ႇတီႈၵတ်းယဵၼ် သၵ်းၵမ်းလူၺ်ႈတႃႈၼေႃး ။

                      ၵႂၢမ်းၸႅၵ်ႇၽႄ ၵူႉသူဝ်ႇ[ဢိမိၼႃ]

      ဢိမိၼႃ ပုၺ်ၺၵမ်မေၼ-လူၺ်ႈတေၸ ၵူႉသူဝ်ႇၼႃးမုၼ် ဢၼ်ႁဝ်းၶႃႈ လႆႈမႃးယုမ်ႇယမ်ၼပ်ႉထိုင် ၽြႃးတြႃးသင်ႇၶႃႇ လႆႈလူႇ ၶဝ်ႈ-မွၵ်ႇ-ၼမ်ႉ-လႅင်းၾႆး ၸၵႂႃႇတင်းသဵင်ႈၸိူဝ်းၼႆႉ ႁႂ်ႈလႆႈၵမ်ႉၸူး မႄႈပေႃႈ ဢႃၸရိယ ၺႃတိၵႃႇ ႁူမ်ႈလူၺ်ႈတေႇဝႃႇ မိူင်းၽီႁူၵ်းပၢင် မိူင်းသၢင်သၢဝ်းၶူင်း လူင်းမႃးတေႃႇတိူၵ်ႈ သိူၵ်ႈႁွတ်ႈ ဢဝီႇၸိ ၼိရယ ငရၢႆး တရိတ်သၢၼ်ႇ ပိတ်တႃႇ ဢသူရၵေႇ တေႇဢဝ်မိူင်းၵူၼ်းလွမ်ႉႁွပ်ႈ သုတ်းၶွပ်ႇ ၸၵျဝရႃႇ ဢၼၼ်ႇတၸၵျဝရႃႇ သတ်းတဝႃႇ တူဝ်ဢၼ်မီးတီႈၸၵေႃႈ ႁႂ်ႈၶၢႆႉႁႃတီႈလီ တူၵ်းတီႈၶီၵေႃႈ ႁႂ်ႈၶၢႆႉႁႃတီႈမျၢတ်ႈ ယႃႇၵၢတ်ႈယႃႇၵၢင်း လူၺ်ႈတေၸ ၵူႉသူဝ်ႇၼႃးမုၼ် ဢၼ်ႁဝ်းၶႃႈ လႆႈမႃးယိူင်းဢၢၼ်း လူႇတၢၼ်းၵႂႃႇယဝ်ႉၼႆႉ ႁႂ်ႈလႆႈၵမ်ႉၵႅမ်ထႅမ်ၸွႆႈ သူၸဝ်ႈႁဝ်းၶႃႈ ႁႂ်ႈလႆႈႁွတ်ႈထိုင် မၢၵ်ႈသီႇ ၽူဝ်ႇသီႇ ၼိပ်ႉပၢၼ်ႇၼိုင်ႈ သိုဝ်ႈၽႂ်ႁဵင်းမၼ်း တင်းသဵင်ႈသၵ်းၵမ်း လူၺ်ႈတီႈၶႃႈၼေႃး ။

ၵႂၢမ်းၸႅၵ်ႇၽႄၵူႉသူဝ်ႇ ၸဝ်ႈသိၼ်ထမ်း

     ၵူႉသူဝ်ႇမီးတီႈၼႆႈ မီးယႂ်ႇမီးၼမ် ႁဝ်းၶႃႈ သြႃႇတၵ်ၵႃႇ လႆႈသၢင်ႈ ပႃရမီမႃး လၢႆသႅၼ်ၵမ်ႇၽႃႇ တင်းသဵင်ႈတင်းလူင်ၼႆႉ ၸဵမ်ၽီၸဵမ်သၢင် ၸဵမ်သတ်းၸဵမ်ၵူၼ်း ဝေၼေယျသတ်ႉတဝႃႇ ၼႂ်းၸၵျဝရႃႇ ဢၼၼ်တၸၵျဝရႃႇ တင်းသဵင်ႈၶႅၼ်းတေႃႈ ႁူမ်ႁူမ်ၸူမ်းၸူမ်း သႃထုဢၼုမေႃတၼႃ လႆႈႁပ်ႉၵူႉသူဝ်ႇ ၽွၼ်းလီ ၽဵင်ႇပဵင်းၵၼ်သဵင်ꧦသၵ်းၵမ်းလူၺ်ႈတၼႃး ။

   တႃၼမျၢတ်ႈ သီလမျၢတ်ႈ ၽဝၼႃမျၢတ်ႈ ႁဝ်းၸဝ်ႈၶႃႈ တင်းသဵင်ႈတင်းလူင် ယႃႇတူၵ်းႁူင်ႈတူၵ်ႈႁၢႆ ၽီႁိမ်ဢမ်ႇလႆႈ ၵူၼ်းႁိမ်ဢမ်ႇလႆႈ ယွၼ်းၽၢၵ်ႇၽင်ဝႆႉၼႂ်းမၢၵ်ႇႁူဝ်ၸႂ်ႁဝ်းၶႃႈ တႃႇတဝ်ႈႁွတ်ႈ တီႈယွတ်ႈ သိူဝ်ႈသႃႇ ဢမတႃႇ ၼိပ်ပၢၼ်ႇၼ တီႈၵတ်းယဵၼ် သၵ်းၵမ်းလူၺ်ႈတၼေႃး ။

                       ၵႂၢမ်းၵၼ်ႇတေႃႇ သြႃႇသမ်းမႃး

  တူၼ်ၶမ်းၸဝ်ႈၶူးဝႃး ၼႂ်းၵၢမ်ႇတြႃးသၢမ်ယိူင်ႈ ၵူဝ်လႆႈပိူင်ႈၽိတ်းၵႂႃႇ ဢထမ်ႇမႃႇသၵ်းယိူင်ႈ ၶိူင်ႈၼႆႉႁႂ်ႈမူတ်းၸၢင်ႇ တူဝ်ၶႃႈၸင်ႇၵွမ်းဝၢင်ႇၶုပ်ႉဝႆႈ ႁႂ်ႈလႆႈထူၼ်ႈသၢမ်ထႃႇ ဝၼ်ႇတၼႃႇၵွမ်းယေႃး ယွၼ်းၵၼ်ႇတေႃးဝႆႈတီႈၶႃႈဢေႃႈ ။

ၸဝ်ႈၶမ်းလဵၵ်ႉ မိူင်းသူႈ ၵဵပ်းတႅမ်ႈတၢင်ႇၼႄ