တူၼ်ႈမႆႉလူင် လႄႈ ၽူႈမီးပၺ်ႇၺႃႇယႂ်ႇ

တူၼ်ႈမႆႉလူင် လႄႈ ၽူႈမီးပၺ်ႇၺႃႇယႂ်ႇ
-------------- ----- -----------------
ပိူင်ပဵၼ်တူၼ်ႈမႆႉၼႆႉ ၼိုင်ႈတူၼ်ႈယႂ်ႇ ၼိုင်ႈသုင်လီ ၵႃႈႁိုဝ်ၵေႃႈ ၵိင်ႇမၼ်းၵေႃႈ လူဝ်ႇမီးၼမ် ၽိူဝ်မၼ်းၵေႃႈ လူဝ်ႇၶဵဝ်ယူႇၼၼ်ႉယဝ်ႉ၊ ပေႃးပဵၼ်ၼၼ်ၵွၼ်ႇ ၸွင်ႇတေ ပၼ်တၢင်းၵတ်းယဵၼ် ၼူၵ့်ၶဝ်တင်းလၢႆလႄႈ တူၼ်ႈမၼ်း ၵေႃႈၸွင်ႇတေႁၢင်ႈလီ ၼႆယဝ်ႉ။
ပေႃးတူၼ်ႈမၼ်းသုင်လၢႆလၢႆၵူၺ်း ဢမ်ႇမီးၵိင်ႇ ဢမ်ႇမီးမႂ်သင်ၵေႃႈ လႆႈတင်းဝႃႈသုင် လၢႆလၢႆၵူၺ်း တေဢမ်ႇမီးၽွၼ်းလီ တႃႇၼူၵ်ႉၶဝ်တင်းလၢႆ လႄႈ တေဢမ်ႇၸၢင်ႈပိုင်ႈႁူမ်ႈ ပိုင်ႈၽူၺ်းၼႆၼၼ်ႉယဝ်ႉ။

ယွၼ်ႉၼၼ် ၵႂၢမ်းထုင်းမီးဝႆႉဝႃႈ
ꧦမႆႉလီၼိုင်ႈတူၼ်ႈ ၼူၵ်ႉလႆႈၵျေႃႇမူၼ်ႈ သႅၼ်တူဝ်။ꧦ ၼႆၼၼ်ႉယဝ်ႉ။
။ ၽူႈမီးပၺ်ႇၺႃႇႁဝ်းၵေႃႈ တေႃႈၼၼ်ယဝ်ႉ၊ ၼိုင်ႈမီးပၺ်ႇၺႃႇသုင်လီ ၼိုင်ႈလူဝ်ႇမီး လုၵ်ႈၼွင်ႉမၼ်း ၼမ်လႄႈ လုၵ်ႈၼွင်ႉၸိူဝ်းၼၼ့်ၵေႃႈ လူဝ်ႇမီးပႃးၼမ့်ၵတ့်
တၢင်းၶႅၼ်ႇၸွမ်းၼႆၼၼ်ႉယဝ်ႉ။
လုၵ်ႈၼွင်ႉၼမ်ၼၼ်ႉ ဝႆႉမိူၼ်ၼင်ႇ ၵိင်ႇမႆႉမၼ်း
ၼမ်သေ ၼမ်ႉၵတ်ႉတၢင်းၶႅၼ်ႇၼၼ်ႉ ဝႆႉမိူၼ်ၼင်ႇ မႂ်မၼ်းၼႆၼၼ်ႉယဝ်ႉ။
ပၺ်ႇၺႃႇၼိုင်ႈသုင်ၵႃႈႁိုဝ်ၵေႃႈ လီၵႃႈၼၼ်ႉယဝ်ႉ။ ၵူၺ်းၵႃႈ ပၺ်ႇၺႃႇဢၼ်ႁဝ်းမီးၼၼ်ႉ သင်ဝႃႈႁဝ်း ဢမ်ႇသိုပ်ႇသွၼ်ပၼ်လုၵ်ႈၼွင်ႉတ​ပေးသေ ႁဵတ်းၵၢၼ်ၵႂႃႇ ႁင်းၵေႃႉလဵဝ်ၼႆတေႉ ၵူၼ်းၵူႈၵေႃႉ ၵူႈတီႈ ၵူႈလဵၼ် တေၼၢၼ်းလႆႈ ပိုင်ႈႁူမ်ႈ တေၼၢၼ်းလႆႈထွမ်ႇငိၼ်း ၶေႃႈၵႂၢမ်းလီ ၶေႃႈၵႂၢမ်းသင်ႇသွၼ်ႁဝ်းၼၼ်ႉယူႇ။
ယဝ်ႉၵေႃႈ လုၵ်ႈၼွင်ႉၼမ်ၵႃႈႁိုဝ်ၵေႃႈ လီၵႃႈၼၼ့်ယဝ့် လုၵ်ႈၼွင်ႉၼၼ်ႉ မိူၼ်ၵိင်ႇၽႄမၼ်းၵူၺ်းသေ ဢမ်ႇၵႃး မိူၼ်ပႃး ႁၢၵ်ႈငဝ်ႈမၼ်းၼႆယဝ်ႉ မႆႉၼိုင်ႈတူၼ်ႈၼႆႉ ၵႃႈပေႉ မၼ်းၶႂ်ႈၶိုၼ်ႈသုင် တူၼ်ႈယႂ်ႇ ၽူၺ်းၼႃတၢၼ်ႇႁိုဝ်ၵေႃႈ ယဝ်ႉ ပေႃးဝႃႈႁၢၵ်ႈမၼ်းဢမ်ႇၼမ် ႁၢၵ်ႈမၼ်းဢမ်ႇယၢဝ်း ပေႃးၼႆတေႉ တူၼ်ႈမႆႉၼၼ်ႉ တေဢမ်ႇယူႇလႆႈၶၢဝ်းႁိုင် ယွၼ်ႉၼၼ် ႁၢၵ်ႇမၼ်းၵေႃႈ လမ်ႇလွင်ႈတေႉတေႉ။
သင်ဝႃႈႁဝ်းပူၵ်းပွင် ၽိူမ်ႉပၼ်ၼမ်ႉၵတ်ႉလုၵ်ႈၼွင်ႉ ႁဝ်း ႁႂ်ႈပေႃးၵတ်ႉၶႅၼ်ႇသေ တၢင်တူဝ်ႁဝ်းလႆႈပေႃးၼႆတေႉ သင်ဝႃႈႁဝ်းတၢႆၵႂႃႇၼႆၵေႃႈ ၸိုဝ်ႈသဵင် ၵုင်ႇၵုၼ်းမုၼ်ငဝ်း ႁဝ်းၼၼ်ႉ မီးလုၵ်ႈၼွင်ႉတင်းလင် တေတေႃႉတႆႇၶႆႈ ၼႄဢိူဝ်ႈ ဢၼ်ဝႃႈၼၼ်ႉ ဢမ်ႇထုၵ်ႇလီလိုမ်း။
ယဝ်ႉၵေႃႈ ႁၼ်ၸွမ်းထႅင်ႈဝႃႈ ၵူၼ်းၵေႃႉလဵဝ်ႁဵတ်းၵၢၼ် ႁင်းမၼ်းလႄႈ ၵူၼ်း သီႇႁႃႈသိပ်းၵေႃႉ ႁဵတ်းၵၢၼ်ၸွမ်း ၵၼ်ၼႆႉ တင်းၵႂႃႇၵႆ တင်းဝႆးလႄႈ တင်းယဝ်ႉၼမ်မၼ်း တိုၼ်းပိူင်ႈၵၼ်ယူႇ။
ယွၼ်ႉၼၼ် ၸိူဝ်းၽူႈမီးပၺ်ႇၺႃႇ ၼႂ်းတႆးႁဝ်း ၶႂ်ႈႁႂ်ႈ ၽုၵ်ႇသွမ်ႈပၼ် လုၵ်ႈၼွင်ႉ ၼမ်ၼမ်သေ လုၵ်ႈၼွင်ႉႁဝ်း ၼၼ်ႉဝၢႆးၼႆႉမႃး တေၶိုၼ်းပဵၼ် ၽူႈၵတ်ႉၶႅၼ်ႇ ၽူႈမီးပၺ်ႇၺႃႇ ၽူႈဢွၼ်ႁူဝ် ၵႂႃႇမိူဝ်းၼႃႈဢိူဝ်ႈ ၼႆၼၼ်ႉ၊ တိုၼ်းယုမ်ႇယမ်ဝႆႉ ႁူဝ်ပၢၵ်ႇတဵမ် (100%) ယူႇၼႆၶႃႈ။
ၼပ်ႉယမ်ယႂ်ႇၼမ်တင်းသဵင်ႈသေ ----- ၸဝ်ႈၶေမၼ်ႇတႃႉ မိူင်းသူႈ