ၵႂၢမ်းလီၵႂၢမ်းဝၢၼ် လၢႆလၢႆၵေႃႈ ဢမ်ႇၸႂ်ႈၵႂၢမ်းမၢၼ်ႇမႅၼ်ႈမူတ်း
----------------------------------------------------------------
မိူဝ်ႈလၢတ်ႈတေႃႇပိူၼ်ႈတေႉ ပဵၼ်ၵႂၢမ်းလီၵႂၢမ်းဝၢၼ်လၢႆလၢႆ
ၵူၺ်းၵႃႈ ၼႂ်းလေႃးၵလူင်ၼႆႉ ၶေႃႈၵႂၢမ်းဢၼ်လၢတ်ႈ ထုၵ်ႇႁူ
ထုၵ်ႇၸႂ်မူတ်းၵေႃႈ ပေႃးၵႂႃႇယုမ်ႇဝႃႈ ပဵၼ်ၶေႃႈၵႂၢမ်းလီ
မၢၼ်ႇမႅၼ်ႈမူတ်းၼႆတေႉ ၽိတ်းပိူင်ႈမူတ်းယဝ်ႉ။
ၵႂၢမ်းထုင်းတေႉမီးဝႆႉဝႃႈ
ၵႂၢမ်းလီ ၶဝ်ႈႁူၽႂ်ဢမ်ႇၸႃႉ
ၵႂၢမ်းၸႃႉၶဝ်ႈႁူၽႂ်ဢမ်ႇလီ၊ ဢၼ်ဝႃႈၼၼ်ႉတေႉ
ၸႂ်ႈယူႇၵူၺ်းတေဢမ်ႇၸႂ်ႈ ႁူဝ် 100% တဵမ်။
မိူဝ်ႈၶဝ်မီးတၢင်းလူဝ်ႇ တီႈပိူၼ်ႈၼၼ်ႉ လၢတ်ႈလီလၢတ်ႈဝၢၼ်။
မိူဝ်ႈၶဝ်ဢမ်ႇမီးတၢင်းလူဝ်ႇၼၼ်ႉ လၢတ်ႈၵႂၢမ်းပွတ်းၵႂၢမ်းပႅတ်း။
မိူဝ်ႈၶဝ်ဢမ်ႇလႆႈၸႂ်ပိူၼ်ႈၼၼ်ႉ လၢတ်ႈလႃႇပေႃးဢမ်ႇမီးတီႈ
လီဢဝ်။
လၢတ်ႈၵႂၢမ်းၸႃႉမႃး ႁဝ်းဢမ်ႇလႆႈၶီ
လၢတ်ႈၵႂၢမ်းလီမႃး ႁဝ်းလႆႈယၢပ်ႇ။ ဢၼ်ဝႃႈၼၼ်ႉ ၵမ်ႈၽွင်ႈၼႆႉ တေႁဵတ်းၵဵင်ႈလၢတ်ႈၵႂၢမ်းဝၢၼ် တႃႇတေ
လႆႈလီ လႆႈပဵၼ်ပုၼ်ႈသုၼ်ႇတူဝ်ၶဝ်ၼႆၼၼ်ႉယဝ်ႉ။ ၵူၺ်း ၼႂ်းၸႂ်မၼ်းတေႉ တေၶူမ်လိူဝ်သေ မၢၵ်ႇႁႅင်ႈၶူမ်ၵွၼ်ႇ။
ၼႂ်းၵူၼ်းႁဝ်းၼႆႉ ဢၼ်လီလႆႈၵူဝ်သေပိူၼ်ႈသုတ်းၸမ့် သူပ်းတေႉလၢတ်ႈဝၢၼ်တေႃႇပိူၼ်ႈသေ ၸႂ်ၶဝ်သမ်ႉၶူမ်ၼႆ ၼၼ်ႉယဝ်ႉ။ မိူဝ်ႈဢမ်ႇႁူႉၼၼ်ႉတေ့ တေႁဵတ်းၵေႃႉၵူၼ်း
ၸၼၼ်ႉယူႇ။ မၼ်းမိူၼ်ၵူၼ်းပျႃႉၸၢတ်ႈ ဢမ်ႇမီးၵေႃႈ လၢတ်ႈဢဝ်ၼၼ်ႉယဝ်ႉ။
မိူဝ်ႈဢမ်ႇႁူႉတေႉ လၢတ်ႈတေႃႇၵၼ် ႁဵတ်းၵၢၼ်ၸွမ်း ၵၼ် ၽိူဝ်ႇႁူႉမႃး ပဵၼ်တၢင်းၽိတ်းလၢႆလၢႆ မႃးပူဝ်ႉသႂ်ႇႁူဝ် ႁဝ်းၵေႃႈ မီးယဝ်ႉ။
တေလႆႈၽၢင်ႉဝႆႉ ၼႂ်းၵူၼ်းတင်းလၢႆၼၼ်ႉ ၵူၼ်းမေႃ လၢတ်ႈၵႂၢမ်းလီၵႂၢမ်းဝၢၼ်ၶဝ်။ တေလႆႈၵူဝ်ဝႆႉမိူၼ်ၼင်ႇငူး ၶဵဝ်ၼိူဝ်မႆႉၼၼ်ႉ ၽိူဝ်ႇႁူႉတူဝ်မႃး ငူးပေႃးမႃးမီးယူႇၼိူဝ် ႁူဝ်ႁဝ်းၼႆတေႉ ယၢပ်ႇဢိူဝ်ႈ။
ယွၼ်ႉၼၼ်
ၵႂၢမ်းလီၵႂၢမ်းဝၢၼ်လၢႆလၢႆၵေႃႈ ယႃႇထၢင်ႇဝႃႈ ပဵၼ်ၵႂၢမ်း မၢၼ်ႇမႅၼ်ႈၸိုဝ်ႈၸႂ်မူတ်းမူတ်း။
လၢတ်ႈၵႂၢမ်းလီၵႂၢမ်းဝၢၼ်သေ ၼႂ်းၸႂ်သမ်ႉဢမ်ႇပဵၼ် ၸိူင်ႉၼင်ႇဢၼ်ၶဝ်လၢတ်ႈၼႆတေႉ တေဢမ်ႇယူႇႁိုင်လႆႈ လူၺ်ႈဢူၺ်းၵေႃႉ။
ၼႂ်းလုၵ်ႈၼႆႉ ၵူၼ်းဢၼ်ၵႆႉၺႃးပိူၼ်ႈလႅၼ်ၵိၼ်ၼၼ့် ဢမ်ႇၸႂ်ႈဝႃႈ ပိူၼ်ႈလၢတ်ႈၵႂၢမ်းၵျၢမ်း ၵႂၢမ်းလိူင်းသေလႄႈ ၺႃးပိူၼ်ႈလႅၼ်ၵိၼ်ဢမ်ႇၸႂ်ႈ၊ လၢတ်ႈၵႂၢမ်းလီၵႂၢမ်းဝၢၼ် ပေႃးတၢၼ်ႇၼမ်ႉၽိုင်ႈသေ လႅၼ်ၵိၼ်ပိူၼ်ႈၵႂႃႇလၢႆလၢႆယဝ့်
ၵႂၢမ်းလီၵႂၢမ်းဝၢၼ်သေ ၸႂ်ဢမ်ႇလီဢမ်ႇဝၢၼ်ၸွမ်း ၼၼ်ႉ ၸူဝ်ႈၵႅပ်ႉၵမ်းၵူၺ်းတေႉ ဢမ်ႇတၼ်းႁူႉၶဝ်လႆႈ။
ၶူဝ်းၶွင်ၸဝ်ႈၵဝ်ႇ လႆႈပႃးၵႂႃႇၸွမ်းယဝ်ႉသေ ၸွင်ႇၵွႆႈႁူႉၼၼ်ႉ ႁမ်ႉၼမ်ယဝ်ႉ။
ၵွပ်ႈဢမ်ႇႁူႉလႄႈ ပၼ်ၵႂႃႇ၊ ယဝ်ႉၵေႃႈ ၸွမ်းၸႂ်ၶဝ်၊ ၵွပ်ႈထွမ်ႇၶဝ်လၢတ်ႈသေလႄႈ ဢမ်ႇတၼ်းႁူႉလႆႈ ၸႂ်ၶဝ် ၼႆၼၼ်ႉယဝ်ႉ။ ပေႃးႁိုင်ယဝ်ႉ ၸွင်ႇၵွႆႈႁူႉဝၢႆးလင်ၸမ်ႉ ၵႂၢမ်းဝၢၼ်ၼၼ်ႉ ၶူမ်လိူဝ်သေ မၢၵ်ႇႁႅင်ႈၶူမ်ထႅင်ႈလူး
ၵွၼ်ႇ။
ၸွင်ႇၵွႆႈႁူႉတူဝ်ဝၢႆးလင်ၼႆႉ လႆႈၸဵပ်းၸႂ်လိူဝ်သေ လႆႈႁူႉၸွမ်းၵမ်းလဵဝ်ၼၼ်ႉယဝ်ႉ။
ၵႂၢမ်းလီၵႂၢမ်းဝၢၼ်လၢႆလၢႆၵေႃႈ တေဢမ်ႇၸႂ်ႈ ၼမ်ႉၸႂ် လီၼမ်ႉၸႂ်ဝၢၼ်သေလၢတ်ႈမူတ်းꧦ ဢၼ်ဝႃႈၼၼ်ႉ ၶႂ်ႈႁူႉဝႆႉ တီႈတူဝ်ၽႂ်ၸႂ်မၼ်းလႄႈ မႃးပၼ်ၾၢင်ႉၵၼ်ဝႆႉ။
ဢမ်ႇမၢႆထိုင်ဝႃႈ ၵႂၢမ်းလီၵႂၢမ်းဝၢၼ်မူတ်းၼင်ႇၵဝ်ႇ မၼ်းယူႇတီႈ တူဝ်ၽူႈၵေႃႉဢၼ်လၢတ်ႈၼၼ်ႉသေ ထုၵ်ႇ
လီယုမ်ႇၵေႃႈယုမ်ႇ ဢမ်ႇထုၵ်ႇလီယုမ်ႇၵေႃႈ ယႃႇယုမ်ႇ။
ၵူၼ်းႁဝ်းၼႆႉၵမ်ႉပႃႈၼမ် ပေႃးဢမ်ႇမီး ပၺ်ႇၺႃႇၶၢမ်ႇ ပိုၼ်ႉမၼ်းဝႆႉၼႆ ပိူၼ်ႈလၢတ်ႈသင်ၵေႃႈ ၸၢင်ႈယုမ်ႇငၢႆႈ ၼၼ်ႉယဝ်ႉ။ ယွၼ်ႉဢမ်ႇမီးပၺ်ႇၺႃႇ ဢၼ်ထတ်းသၢင်ႈ ၶေႃႈၵႂၢမ်းပိူၼ်ႈ၊ လၢတ်ႈတေႉႁ လၢတ်ႈလဵၼ်ႈႁ ဢၼ်ဝႃႈ
ၼၼ်ႉ။
မၢင်မဵဝ်း ပေႃးလႆႈယုမ်ႇၵေႃႈ ယုမ်ႇတၢႆၼၼ်ႉယဝ်ႉ။ ၽူႈလူင်ႉလႅၼ်ႇၶဝ် မႃးသပ်းလႅင်းၼႄ ပၢႆၶႂ်ႈၸႂ်လမ်ၶဝ် ၶိုၼ်းသေၵွၼ်ႇ။
လွင်ႈယုမ်ႇဢၼ်ဝႃႈၼၼ်ႉၵေႃႈ လိူဝ်သေယုမ်ႇ
ၽြႃး တြႃး သင်ႇၶႃႇ သြႃႇ မႄႈပေႃႈ -ဢၼၼ်ႇတႁႃႈၸဝ်ႈ ယဝ်ႉ လိူဝ်သေၼၼ်ႉ တေလႆႈထတ်းသၢင်ႈသေယုမ်ႇ။
ၵိုင်ႉၵင်ႉယုမ်ႇၵေႃႈ ၸၢင်ႈၶီ ဢၼ်ဝႃႈၼၼ်ႉ မိူၼ် တေႇဝတၢတ်ႈ ပႃးလုၵ်ႈၼွင်ႉႁႃႈပၢၵ်ႇသေ ၵႂႃႇၵႃႉၼၼ်ႉ ၵႂႃႇၺႃး ၽီၽၢႆးၶဝ်ၽၢၼ်ႇႁဵတ်းၵူၼ်းသေလႅၼ်ဝႃႈ ´တင်းၼႃႈၼႆႉ ၶဝ်ႈၼမ်ႉတၢင်းၵိၼ်လိူင်ႇၼႃႇ ဢၼ်သူပႃးမႃးၼၼ်ႉ ဢမ်ႇတၢပ်ႈလူဝ်ႇဢဝ်ၵႂႃႇၼၵ်းႁဵတ်းသင် ထွၵ်ႇပႅတ်ႈမူတ်းမူတ်းသေ ၵႂႃႇမဝ်တူဝ်မဝ်ၸႂ်သူလႃႈ´ တူၺ်းလူး ဝူဝ်းသူၼၼ်ႉ ပေႃးဢွမ်ႇၶႂ်ႈပေႉလၢၵ်ႈလေႃႉယဝ့်
ယွၼ်ႉမၼ်းၼၵ်း လၢတ်ႈၸိူင်ႉၼႆသေ တေႇဝတၢတ်ႈၵေႃႈယုမ်ႇ ၵႂၢမ်းၽီလူး ၸိူဝ်းၼၼ်ႉငၢႆႈငၢႆႈ ယဝ်ႉၵေႃႈ ထွၵ်ႇပႅတ်ႈၶဝ်ႈၼမ်ႉတၢင်း
ၵိၼ်ၶဝ်မူတ်း ထၢင်ႇဝႃႈတင်းၼႃႈမီးၶဝ်ႈၼမ်ႉတၢင်းၵိၼ်တေႉ ၽိူဝ်ႇၵႂႃႇ ဢမ်ႇမီးသင်ၵိၼ်ယဝ်ႉလႄႈ ဢမ်ႇမီးႁႅင်းသေ ဢဝ်ပဵၼ်တၢင်းၵိၼ်ၽီၽၢႆးၵႂႃႇပႅတ်ႈတင်းမူတ်း တႃႇၵူၼ်းႁႃႈပၢၵ်ႇၼၼ်ႉ။
ယွၼ်ႉယုမ်ႇငၢႆႈ ဢမ်ႇမီးၶေႃႈထတ်းသၢင်ႈ ၸႂ်ႈတေႉ
ဢမ်ႇၸႂ်ႈတေႉဢၼ်ဝႃႈၼၼ်ႉယဝ်ႉ။
ၼပ်ႉယမ်ၽူႈလူလိၵ်ႈႁဝ်းၶဝ်တင်းသဵင်ႈသေ-- ၸဝ်ႈၶမ်းလဵၵ်ႉ
.jpg)
No comments:
Post a Comment