တေႁဵတ်းႁိုဝ် ဢဝ်မၢၵ်ႇၽိတ်ႉပွမ်ႈလဵင်ႉႁႂ်ႈမႅဝ်းၵိၼ်

 ေတႁဵတ်းႁိုဝ် ဢဝ်မၢၵ်ႇၽိတ်ႉပွမ်ႈ လဵင်ႉႁႂ်ႈမႅဝ်းၵိၼ်?
-------------------------------------------------------------
မိူဝ်ႈၵူႈပွၵ်ႈ လႆႈငိၼ်းဝႃႈ တီႈၶေႃးမႅဝ်းၼၼ်ႉ တေႁဵတ်းႁိုဝ် ဢဝ်ႁဵင်ႇၵႂႃႇႁွႆႈပၼ် ၼႆၼၼ်ႉ ယၢမ်ႈပဵၼ်ပၼ်ႁႃလူင်မႃးဢၼ်ၼိုင်ႈယဝ်ႉ။
ၵွပ်ႈမႅဝ်းလၵ်းလႅမ်ႁိုဝ် ႁၢႆႉႁိုဝ်တေႉဢမ်ႇႁူႉ သမ်ႉၶႂ်ႈႁၢႆ့ ဝႆႉလႄႈ ၸိူဝ်းပဵၼ်ၼူၼၼ်ႉ ၸင်ႇဢွၼ်ၵၼ် ၵုမ်ၵၼ်
သေ ၼႂ်းပၢင်ၵုမ်ၼၼ်ႉ ၼူတူဝ်ၼိုင်ႈၸင်ႇပၼ်တၢင်းၶႆႈၸႂ်ဝႃႈ
´ပေႃးမႅဝ်းမႃး ၼင်ႇႁိုဝ်ႁဝ်းတေႁူႉၼၼ့် ထုၵ်ႇလီဢဝ်ႁိင်ႇ ၵႂႃႇႁွႆႈပၼ်တီႈၶေႃးမႅဝ်းၼၼ်ႉဢိူဝ်ႈ´ ပေႃးဝႃႈမၼ်းမႃးၼႆ ႁဝ်းၵေႃႈတေလႆႈငိၼ်းသဵင်ႁိင်ႇၼၼ်ႉသေ တေလႆႈၶၢဝ်းယၢမ်း
လႅၼ်ႈပၢႆႈမၼ်းဢိူဝ်ႈ´ ပၼ်တၢင်းႁၼ်ထိုင်ၼင်ႇၼၼ်။
ဢဝ်ႁိင်ႇၵႂႃႇႁွႆႈၶေႃးမႅဝ်းတေႉ လၢတ်ႈၸႂ်ႈယူႇ ၵူၺ်းၵႃႈ ၼူတူဝ်လႂ် တေႁတ်းဢဝ်ႁိင်ႇၵႂႃႇႁွႆႈပၼ်ၶေႃးမႅဝ်း ၼႆၼၼ့် ပဵၼ်ပၼ်ႁႃလူင်ၶဝ်ဢၼ်ၼိုင်ႈယဝ်ႉ။
ဢၼ်ၶႂ်ႈလၢတ်ႈတေႉ ၼူၶဝ်ၸိူဝ်းဢၼ်လႆႈၵူဝ်မႅဝ်း ၼၼ်ႉတေႉ ပဵၼ်ထုင်းၸၢမ်ႇ ဢမ်ႇၸႂ်ႈပဵၼ်ပၼ်ႁႃလူင် သေတႃႉ ဢၼ်တႃႇတေဢဝ်ႁိင်ႇၵႂႃႇႁွႆႈလႆႈၶေႃးမႅဝ်းၼၼ်ႉ ယဝ်ႉ ပဵၼ်ပၼ်ႁႃလူင်ၶဝ်၊
ၶဝ်တေႁဵတ်းႁိုဝ်ယိပ်းၵမ် မႅဝ်းလႆႈ ႁႂ်ႈပေႃးပဵၼ်ၼင်ႇၸႂ်ၶဝ် ဢၼ်ၼႆႉ ပဵၼ်ပၼ်ႁႃ လူင်ၶဝ်လႄႈ ပဵၼ်ၶေႃႈထၢမ်လူင်ၶဝ်ယဝ်ႉ။
ၵေႃႉဢၼ်ဢွၵ်ႇၶေႃႈထၢမ်တေႉ ပဵၼ်မေႃႇၸီႇတူင်း ဢၼ်ပဵၼ်လူင်ပွင်ၶႄႇၶဝ်မိူဝ်ႈၼၼ်ႉယဝ်ႉ။
× × ×
ၵေႃႉဢၼ်တႅမ်ႈဝႆႉပိုၼ်း (မေႃႇၸီႇတူင်းCommunist ၵုၼ်မျူ ၼိတ့် လူင်ပွင်ၸိုင်ႈမိူင်းၶႄႇ ) Ross Terrill ၼၼ်ႉ မၼ်းသႂ်ႇဝႆႉ ၸိူင်းပွတ်းပုၵ်ႈၼိုင်ႈ တီႈၼႂ်းပပ်ႉ Aao: ABiography ၼၼ်ႉ။ မၼ်းသႂ်ႇဝႆႉသေမၢႆထိုင်ဝႃႈ မေႃႇၸီႇတူင်းၼႆႉ လွၵ်းလၢႆးပၢႆးဝူၼ်ႉတႃႇတိုၵ်းၽူႈၶဵၼ် မၼ်းၵျႃႉၼႃႇ ၶႅၼ်ႇၼႃႇၼႆလႄႈ တႅမ်ႈၼႄပိူင်ၽၢင်ႁၢင်ႈ
မၼ်းဢၼ်ၼိုင်ႈ ၼႆၼၼ်ႉယဝ်ႉ။
မီးပွၵ်ႈၼိုင်ႈ ဢၼ်ပဵၼ်လုၵ်ႈၼွင်ႉ မေႃႇၸီႇတူင်း သမ်မတ လျူ သျွၵ်ႉၶျီႇ၊ လႄႈ(ဝန်ကြီးချူပ်) ၶျူ ဢိၼ်လႆႇ မိူဝ်ႈၶဝ်မႃးထူပ်းၵၼ်ၼၼ်ႉ မေႃႇၸီႇတူင်း ၸင်ႇၸၢမ်းၺျၢၼ်ႇ ၶႃသွင်ၵေႃႉၼၼ်ႉသေထၢမ်ၶေႃႈထၢမ်။
သင်ဝႃႈမႅဝ်းတူဝ်ၼိုင်ႈ ၶႂ်ႈၵိၼ်မၢၵ်ႇၽိတ်ႉပွမ်ႈဝႃႈၼႆလႄႈ
သူတေႁဵတ်းႁိုဝ်လဵင်ႉမၼ်း?
မၢၵ်ႇၽိတ်ႉပွမ်ႈဢၼ်ဝႃႈၼၼ်ႉ လိူတ်ႇလိူတ်ႇ မႆႈမႆႈ ၽဵတ်းၽဵတ်း ယႃႇဝႃႈမႅဝ်းတေၵိၼ်လႃႈ တေႃႈၼင်ႇသႅဝ် မၼ်းၵူၺ်းၵေႃႈ မႅဝ်းၶဝ်ဢမ်ႇၶၢမ်ႇလႆႈ ဢၼ်ၼႆ့ ၼင်ႇႁိုဝ်
ႁႂ်ႈမႅဝ်းပေႃးၵိၼ်လႆႈၼႆၼၼ်ႉ တေႁဵတ်းႁိုဝ်?။
လျူ သွၵ်ႉၶျီႇ တွပ်ႇဢွၼ်တၢင်း- ငၢႆႈယူႇၵူၺ်းၶႃႈလေႃႇ ဢုၵ်ႉၵထလူင်ႁဝ်း ၵေႃႉၼိုင်ႈၺွပ်းဝႆႉယႃႇႁႂ်ႈမႅဝ်းတဵၼ်ႈလႆႈ သေ ၵေႃႉၼိုင်ႈၺွပ်းဢႃႈသူပ်းမႅဝ်း ႁဵတ်းၼၼ်သေဢဝ် မၢၵ်ႇၽိတ်ႉပွမ်ႈယဵတ်ႈသႂ်ႇပၼ်ၼႂ်းသူပ်းမႅဝ်းၼၼ်ႉတင်းလုၵ်ႈ ယဝ်ႉၵေႃႈ ဢဝ်ၶွၼ်ႉတမ်ႁႂ်ႈလူင်းၵူင်ၶေႃးမၼ်းၵႂႃႇ- မိူဝ်ႈၵႂၢမ်းမၼ်းလၢတ်ႈပႆႇသုတ်းလီၼၼ်ႉ မေႃႇၸီႇတူင်း ၸွင်ႇႁဵတ်းၵဵင်ႈတူၵ်းၸႂ်သေ တတ်းပႅတ်ႈၶေႃႈၵႂၢမ်းမၼ်းဝႃႈ လၢႆးမႂ်းႁဵတ်းၼႆႉ မိူၼ်ဢၼ်ပိူၼ်ႈၸႂ်ႉ လၢႆးၵႅမ်း တီႈမိူင်း မေႃႇၸၵူဝ်ႇယဝ်ႉ ယွၼ်ႉၼၼ် ဢၼ်ၼႆႉၵဝ်ပႆႇႁပ်ႉၶၢမ်ႇ။
မၢၵ်ႇၽိတ်ႉပွမ်ႈဢၼ်ဝႃႈၼႆႉ မဵဝ်းပိူၼ်ႈတမ်ၽွင်သေ ၵိၼ်ယဝ်ႉ။ ႁႂ်ႈမၼ်းၵိၼ်မိူၼ်ၵူၼ်းႁဝ်းၵိၼ်တေႉ တေၵႂႃႇ မိူၼ်လႆႈၶႃႈလေႃႇ။
ဢမ်ႇၸႂ်ႈ ႁႂ်ႈမၼ်းၵိၼ်ႁင်းမၼ်းဢိူဝ်ႈဢၼ်ၵဝ်ဝႃႈၼႆႉ။
ဢမ်ႇၸႂ်ႈဝႃႈတေလႆႈတဵၵ်းတဵင်ႁႂ်ႈမၼ်းၵိၼ်။
ႁဵတ်းၼၼ်သေမေႃႇၸီႇတူင်း ၶိုၼ်းဝၢႆႇၵႂႃႇၸူး ၶျူ ဢိၼ်ႇလႆႇသေဝႃႈ မႂ်းလူး မီးတၢင်းဝူၼ်ႉၸိူင်ႉႁိုဝ် လၢတ်ႈမႃးလႄႈ။
ဢုၵ်ႉၵထႁဝ်းၵေႃႈ ၸင်ႈယၢပ်ႇသင် မႅဝ်းၼၼ်ႉဢမ်ႇ လဵင်ႉတၢင်းၵိၼ်မၼ်းသေမွၵ်ႈသၢမ်ဝၼ်းၼႆႉ ပေႃးႁဵတ်းၼၼ်ယဝ်ႉ ဢဝ်ၽွင်မၢၵ်ႇၽိတ်ႉပွမ်ႈၼၼ်ႉ တႃးပၼ်ၵွၼ်ႈၼိူဝ်ႉသေ လဵင်ႉမၼ်းၼၼ်ႉၼႃႇ ပေႃးဝႃႈမၼ်းဢိုပ်းတၢင်းၵိၼ်ယဝ်ႉ ၵွၼ်ႈၼိူဝ်ႉၼၼ်ႉ တႃးဝႆႉၽွင်မၢၵ်ႇၽိတ်ႉပွမ်ႈၼႆ မၼ်းယင်းတေဢမ်ႇတၼ်းႁူႉၵွၼ်ႇလႃႈ။ တွပ်ႇပၼ်ၸိူင်ႉၼၼ်။
လၢႆးၼႆႉၵေႃႈ ပႆႇမႅၼ်ႈလၢႆးမၼ်းၼင်ႇၵဝ်ႇ ပဵၼ်လၢႆးဢၼ် ယွၵ်ႇလႅၼ် ႁဵတ်းႁႂ်ႈၵိၼ်ၼႆၼၼ်ႉယဝ်ႉ။
ပေႃးၼၼ် ဢုၵ်ႉၵထလူင်ႁဝ်းလၢတ်ႈတူၺ်းလူး ဝႃႈဢုၵ်ႉၵထလူင်ႁဝ်းမီးပၢႆးဝူၼ်ႉလီၸိူင်ႉႁိုဝ် ဢၼ်ဝႃႈၼၼ်ႉ။
မေႃႇၸီႇတူင်း ၸင်ႇယုမ်ႉယုမ်ႉသေလၢတ်ႈဝႃႈ လွင်ႈၼႆႉ ငၢႆႈငၢႆႈဢွၼ်ႇၵူၺ်း၊ တီႈပုမ်မႅဝ်းတင်းသွင်ၽၢၵ်ႇၶၢင်ႈၼၼ့် ဢဝ်ၽွင်မၢၵ်ႇၽိတ်ႉပွမ်ႈ တႃးပၼ် ၸိူင်ႉၼင်ႇပိူၼ်ႈတႃး ယႃတႃးၶတ်းၼၼ်ႉ ပေႃးႁဵတ်းၼၼ် ပုမ်မႅဝ်းၼၼ်ႉတေ လိူတ်ႇသေ တေႁဵတ်းႁႂ်ႈမၼ်းယူႇယၢပ်ႇ ပေႃးပဵၼ်ၼၼ် ၼင်ႇႁိုဝ်တီႈႁွႆးလိူတ်ႇၼၼ်ႉ ပေႃးတေႁၢႆၵႂႃႇၼႆ မၼ်းၵႃႈလႆႈ ဢဝ်လိၼ်ႉမၼ်းသေ လေးၵိၼ်ၵမ်း ဢိတ်ဢိတ်း တေႃႇႁွႆးလိူတ်ႇမၢၵ်ႇၽိတ်ႉပွမ်ႈၼၼ်ႉပေႃးႁၢႆ ၵႂႃႇ ဢမ်ႇတၢပ်ႈလူဝ်ႇၵႂႃႇတဵၵ်းတဵင်ႁႂ်ႈမၼ်းၵိၼ် ယဝ်ႉၵေႃႈ ဢမ်ႇတၢပ်ႈလူဝ်ႇၵႂႃႇယႃႉမၼ်း မၼ်းတေလေးလႅမ်ႉၵိၼ် ႁင်းမၼ်းၼၼ်ႉယဝ်ႉ၊ ပေႃးမၼ်းလႆႈလေးလႅမ်ႉၵိၼ်ႁင်း မၼ်းၵွၼ်ႇ မၼ်းၵေႃႈ ၸွင်ႇတေမီးလွင်ႈႁၢၼ်ႉၸႂ် ႁင်းမၼ်းယဝ်ႉ။
လျူ သွၵ်ႉၶျီ လႄႈ ၶျူ ဢိၼ်ႇလႆႇ ၵေႃႈ ယၢႆးႁူဝ်သေ လၢတ်ႈၸွမ်းဝႃႈ ၸႂ်ႈတေႉဢိူဝ်ႈမႂ်းးးး ၼႆယဝ်ႉ။
+++++++++
ၼပ်ႉယမ်ၽူႈလူလိၵ်ႈႁဝ်းၶဝ်တင်းသဵင်ႈသေ။
ပၢႆးဝူၼ်ႉၶပ်ႉ