ပေႃးမေႃထွမ်ႇ လႆႈပၺ်ႇၺႃႇ

ပေႃးမေႃထွမ်ႇ လႆႈပၺ်ႇၺႃႇ
-------------------------------
လႆႈၼႅင်ၸႂ် ယွၼ်ႉၵႂၢမ်းလၢတ်ႈ၊ လႆႈမီးပၺ်ႇၺႃႇ ယွၼ်ႉထွမ်ႇ ၼႆယဝ်ႉ။
ၵႂၢမ်းလီ ၵႂၢမ်းမီးၵႃႈၶၼ်ၸိူဝ်ႉၼၼ်ႉ ပေႃးပိူၼ်ႈလၢတ်ႈၼႆ ထွမ်ႇလႄႈ မၼ်းၸၢင်ႈႁဵတ်းႁႂ်ႈၶိုၼ်း မႄးလီ တီႈတူဝ်ၸႂ် ၸဝ်ႈၵဝ်ႇယဝ်ႉ။ ပေႃးထွမ်ႇၼမ်မႃး ၸဝ်ႈၵဝ်ႇၵေႃႈလႆႈပၺ်ႇၺႃႇၸွမ်းသေပဵၼ်ၵူၼ်းမီးပၺ်ႇၺႃႇ
ယွၼ်ႉမေႃထွမ်ႇၼႆၼၼ်ႉယဝ်ႉ။
ပေႃးမေႃ ထွမ်ႇဢဝ် လႆႈပၺ်ႇၺႃႇ
ပေႃးမေႃ ထွမ်ႇဢဝ် တွင်းလႆႈလီ
ပေႃးမေႃ ထွမ်ႇဢဝ် မေႃလၢတ်ႈလႆႈလီ။
လွင်ႈထွမ်ႇဢၼ်ဝႃႈၼၼ်ႉၵေႃႈ ယႃႇဝႆႉမၼ်းပဵၼ် ၵၢၼ်ဢၼ်မဝ်မၢင်လႃးလႃး မၼ်းပဵၼ်လွင်ႈယႂ်ႇဢၼ်
ၼိုင်ႈသေ တေႁဵတ်းႁႂ်ႈသၢင်ႇထုၵ်ႇမႃးလိူဝ်ၵဝ်ႇဢိူဝ်ႈ။
လွင်ႈထွမ်ႇဢၼ်ဝႃႈၼႆႉ ယွၼ်ႉမၼ်းလွင်ႈယႂ်ႇလႄႈ သၽႃႇဝ ပိူင်ပဵၼ်မၼ်း ပၼ်မႃးႁူသွင်ၽၢႆႇၼႆႉယူႇယဝ်ႉ။
ၵမ်ႉၼမ် တေၵႆ့ထွမ်ႇ ဢၼ်ဢမ်ႇၸိုဝ်ႈ ဢၼ်ဢမ်ႇၸႂ်ႈ ၸိူဝ်းၼၼ်ႉလၢႆလၢႆယဝ်ႉ ပေႃးထွမ်ႇယဝ်ႉၵေႃႈ ၸဝ်ႈၵဝ်ႇ ၵေႃႈၵႆႉပဵၼ်ၵူၼ်း ဢမ်ႇၸိုဝ်ႈဢမ်ႇၸႂ်ႈၼႆၼၼ်ႉယဝ်ႉ။
ပေႃးပဵၼ်လႆႈ ၶႂ်ႈႁႂ်ႈထွမ်ႇဢၼ် ပၼ်တၢင်းႁူႉ တၢင်းၶႆႈ ၸႂ်ၸဝ်ႈၵဝ်ႇလႄႈ ဢၼ်တေႁဵတ်းႁႂ်ႈ ၸဝ်ႈၵဝ်ႇ လႆႈလီလႆႈ ပဵၼ်ၵႂႃႇၼၼ်ႉၵူၺ်း။
ပေႃးၵႂႃႇၺႃး တီႈၸိူင်ႉၼၼ် ၵမ်ႈၽွင်ႈတေဢမ်ႇၶႂ်ႈ ထွမ်ႇ ဢမ်ႇၸၢင်ႈႁဵတ်းႁိုဝ်လႄႈ ယူႇၵႂႃႇ ထွမ်ႇၵႂႃႇႁဵတ်း ၼၼ်ၵူၺ်း၊ ဢမ်ႇႁူႉ ဢမ်ႇဝူၼ်ႉဝႃႈ ၶေႃႈၵႂၢမ်းၶဝ်လၢတ်ႈ ၼၼ်ႉမီးၽွၼ်းလီၵႃႈႁိုဝ်ၼႆ။ ပေႃးၵႂႃႇၺႃးတီႈၸိူင်ႉၼၼ် လႄႈ ဢမ်ႇမေႃထွမ်ႇဢဝ်ပေႃးၼႆ လႆႈဝႃႈလုတ်ႈၵႂႃႇသုမ်းၵႂႃႇ သုၼ်ႇလႆႈ သုၼ်ႇပဵၼ်ၸဝ်ႈၵဝ်ႇ ဢၼ်ၼိုင်ႈၼၼ်ယဝ်ႉ။
တေလႆႈၶတ်းၸႂ် ဝၢင်းၽႃႈ ဢၼ်ထွမ်ႇဢမ်ႇၸိုဝ်ႈ
ဢမ်ႇၸႂ်ႈ ၼၼ့်သေ ၶတ်းၸႂ်ထွမ်ႇ ဢၼ်ၸိုဝ်ႈဢၼ်ၸႂ်ႈ
ၼၼ်ႉဢိူဝ်ႈ၊ ယဝ်ႉၵေႃႈႁႂ်ႈပႃးတင်းယၢမ်ႈပၼ်။
ၸဝ်ႈၵဝ်ႇတေလႆႈထတ်းသၢင်ႈတူၺ်းၼႂ်းၸႂ်ၸဝ်ႈၵဝ်ႇ ပေႃးဝႃႈ ပႆႇမီးလွင်ႈယၢမ်ႈဢၼ်ထွမ်ႇ ပေႃးဝႃႈပႆႇမီး လူဝ်ႇ ၶတ်းၸႂ်ႁႂ်ႈမီးမႃးဢိူဝ်ႈ။ ပေႃးထွမ်ႇၵေႃႈ ယႃႇပေထွမ်ႇ မဝ်မဝ်မၢင်မၢင်၊ ပေႃးထွမ်ႇမဝ်မဝ်မၢင်မၢင်ၵေႃႈ တေလႆႈ မဝ်မဝ်မၢင်မၢင်ၼၼ်ႉၵူၺ်း။
ၵပ်းၵၢႆႇလူၺ်ႈ လွင်ႈထွမ်ႇၼႆႉသေ မီးယူႇ ဢင်ႇၵႃႇ ပႅတ်ႇပိူင်
႑ႉ ပေႃးပိူၼ်ႈလၢတ်ႈ ၵမ်ႉၼမ်ၵူၼ်းထွမ်ႇလႄႈ ဢၼ်ၶဝ်ႈ
ၸႂ်ထွမ်ႇမၼ်းမီးဢႄႇ ယဝ်ႉၵေႃႈဢၼ်တိုၵ်ႉလၢတ်ႈယူႇၼႆႉ သင်ပဵၼ်ဝႃႈတူဝ်ၸဝ်ႈၵဝ်ႇၼႆ တေလီၵႃႈႁိုဝ်ၼႆၼၼ်ႉယဝ့်။
ၽၢင်ႉပၼ် ယႃႇႁႂ်ႈမီးၸႂ်ၶီႈၵေ့ ပိူၼ်ႈလၢတ်ႈၸိူင်ႉၼၼ်။
႒ႉ ၵေႃႉလၢတ်ႈၼၼ်ႉၵေႃႈ လူဝ်ႇလႆႈပႃးၸႂ်ပႃးၶေႃး ၶဝ်ႈၸႂ် ၶဝ်ႈၶေႃးသေလၢတ်ႈ။ တေလႆႈပႃးၸႂ်ၸေတၼႃႇတဵမ်ထူၼ်ႈ လၢတ်ႈႁႂ်ႈပဵၼ်ၵႂၢမ်း မီးႁႅင်းၸႂ်၊ လႄႈ ၵႂၢမ်းယွင်ႈယေႃး။ ပေႃးလၢတ်ႈယဝ်ႉ တေလႆႈမီး ၶေႃႈထၢမ်လႄႈ ၶေႃႈတွပ်ႇ ၵူၼ်းထွမ်ႇလႄႈ ၵူၼ်းလၢတ်ႈ။
႓ႉ ပေႃးပိူၼ်ႈတိုၵ်ႉလၢတ်ႈယူႇၼၼ်ႉ ယႃႇဢဝ်ၸႂ်ၸဝ်ႈၵဝ်ႇ ၵႂႃႇႁွတ်ႈတီႈၼိုင်ႈယဝ်ႉတီႈၼိုင်ႈ တေလႆႈႁၢမ်ႈတၢပ်ႈပၼ် သင်ပဵၼ်ၼၼ်။ မၼ်းလၢတ်ႈၵႂၢမ်းယၢဝ်းၵေႃႈယဝ်ႉ ဢမ်ႇ ၼၼ် ဢမ်ႇပေႃးမီးၽွၼ်းလီၵေႃႈယဝ်ႉ ပေႃးထွမ်ႇပၼ် တေလႆႈႁူႉၼမ်ႉၸႂ်ၵေႃႉလၢတ်ႈၼၼ်ႉ ဝႃႈမၼ်းပဵၼ်ၵူၼ်း ၸိူင်ႉႁိုဝ်ၼႆၼၼ်ႉယဝ်ႉ။ ယဝ်ႉၵေႃႈ တေႁဵတ်းႁႂ်ႈၸဝ်ႈၵဝ်ႇ မီးတၢင်းယိုၼ်ႉၵၼ်ႈလႆႈလႄႈ မီးတၢင်းယၢမ်ႈမႃးၼႆယဝ်ႉ။
႔ႉ ၼႂ်းၸူဝ်ႈၶၢဝ်းလဵဝ် တီႈလဵဝ်ၵၼ် ပေႃးလႆႈယူႇၼႂ်းၵၢင် သေလႆႈငိၼ်း တင်းသွင်ၽၢႆႇသွင်တၢင်းပေႃးၼႆ လိူၵ်ႈထွမ်ႇ ဢၼ်မီးၵႃႈၶၼ်လႄႈ ဢၼ်တေလႆႈၽွၼ်းလီၼၼ်ႉဢိူဝ်ႈ။
ယႃႇပေထွမ်ႇတင်းသွင်ၽၢႆႇ မၼ်းတေဢမ်ႇလႆႈသင်တေႉ တေႉ။
႕ႉ ပေႃးလႆႈၼင်ႈထွမ်ႇၼႆယႃႇဝႆႉၸႂ်ၸဝ်ႈၵဝ်ႇ ဢုပ်ႇဢၢပ်ႇၼႃႇ ယွၼ်ႇၸႂ်ဝႆႉလီလီသေထွမ်ႇၵႂႃႇၼႆႉလီသေ ပိူၼ်ႈယဝ်ႉ။ ၸႂ်ဢုပ်ႇဢၢပ်ႇ ဢၼ်ဝႃႈၼၼ်ႉၵေႃႈ ပဵၼ်ၸႂ် ၵမ်ႉၶႂ်ႈလုၵ်ႉ ၵမ်ႉၶႂ်ႈၼင်ႈ ၶႂ်ႈၶဝ်ႈ ၶႂ်ႈဢွၵ်ႇ ပဵၼ်ၸႂ်ဢမ်ႇမီး သမႃႇထိၼၼ်ႉယဝ်ႉ။ ယဝ်ႉၵေႃႈ ႁူမ်ၸူမ်းပၼ် ၵေႃႉဢၼ် ႁဝ်းလႆႈမႃးထူပ်းလႄႈ လႆႈမႃးထွမ်ႇ ၶေႃႈၵႂၢမ်းမၼ်းလၢတ်ႈ
ၼႆၼၼ်ႉယဝ်ႉ။
႖ႉ တေလႆႈဝႆႉၸႂ် မိူၼ်ၸိူင်ႉၼင်ႇ ဢူၺ်းၵေႃႉဢူၺ်းသေႈ သေ မိုတ်ႈꧦၵိုဝ်းꧦထွမ်ႇၵႂႃႇလႄႈ။ ပေႃးၸဝ်ႈၵဝ်ႇထွမ်ႇလီလီ ပေႃးၼႆ ၵူၼ်းလၢတ်ႈမၼ်းၵေႃႈ တေလၢတ်ႈလီလီသေ ပၺ်ႇၺႃႇဢၼ်မၼ်းမီးၼၼ်ႉ မၼ်းတေဢမ်ႇၵိုတ်းဝႆႉ သင်သေ တေလၢတ်ႈပၼ်ႁဝ်းထွမ်ႇမူတ်းမူတ်း။ ၵူၼ်းလၢတ်ႈၼၼ်ႉၵေႃႈ ပေႃးၵူၼ်းထွမ်ႇမၼ်း ပႃးၸႂ်ထွမ်ႇ ၵွၼ်ႇ မၼ်းၸွင်ႇၵွႆႈပႃးၸႂ်လၢတ်ႈယဝ်ႉ။
႗ႉ ဝႆႉၸႂ်ယၢဝ်းယၢဝ်းသေထွမ်ႇ မိူဝ်ႈၶဝ်တိုၵ်ႉလၢတ်ႈယူႇ ၼၼ်ႉ ယႃႇႁိမ်ၶဝ်ႈ(ၸိမ်ၶဝ်ႈ)သေလၢတ်ႈၸွမ်း ယႃႇယႃႉ ယႃႇပၼ်တၢင်းသုၵ်ႉသၵ်ႉၶဝ်။ မိူဝ်ႈၶဝ်လၢတ်ႈပႆႇယဝ့်ၼၼ့် ယႃႇၸၼ်မႃးၽၢႆႇၸဝ်ႈၵဝ်ႇ။
႘ႉ တေလႆႈဝႆႉၸႂ်ဝႆႉတူဝ်ၸဝ်ႈၵဝ်ႇဝႃႈ တေဢမ်ႇလႆႈပဵၼ် ၵူၼ်းယႃႉၵူၼ်းၵဝ်း မိူဝ်ႈပိူၼ်ႈတိုၵ်ႉလၢတ်ႈ တိုၵ်ႉဢုပ်ႇၵုမ် ၵၼ်ယူႇၼၼ်ႉ။ ပေႃးမီးပၢင်ႁူပ်ႉထူပ်း တေလႆႈဝႃႈ ၶဝ်ၼႆႉ မေႃဢဝ်ၶၢဝ်းယၢမ်းလီသေ မေႃဢုပ်ႇဢူဝ်းၵၼ်ၼႆယဝ်ႉ။
ၵူၼ်းႁဝ်းၼႆႉ ႁိုင်ꧦၼၢၼ်းꧦ လူဝ်ႇလႆႈထတ်းသၢင်ႈၶိုၼ်း တီႈတူဝ်ၵဝ်ႇယူႇၵူႈၵေႃႉယဝ်ႉ။ မၼ်းမီးလွင်ႈၽိတ်းပိူင်ႈႁ မီးလွင်ႈဢမ်ႇသၢင်ႇထုၵ်ႇႁ ၼႆၼၼ်ႉ လူဝ်ႇလႆႈႁူႉ ပေႃးႁူႉ ယဝ်ႉၵေႃႈ ၶိုၼ်းမႄးၶိုၼ်းႁႂ်ႈ သၢင်ႇထုၵ်ႇ၊ ႁႂ်ႈလီ။ ယဝ်ႉၵေႃႈ ႁႂ်ႈမေႃတူၺ်းႁၼ်ၽၢႆႇပိူႈၼ်ႈ လႄႈၽၢႆႇႁဝ်း။
ၼႂ်းလေႃးၵၼႆႉ မီးဝႆၵေႃႉလၢတ်ႈလႄႈ ၵေႃႉထွမ်ႇယူႇ သွင်မဵဝ်း။ ပေႃးဢမ်ႇမီးၵေႃႉထွမ်ႇၵေႃႈ ၵေႃႉလၢတ်ႈၼၼ်ႉ
ၵေႃႈဢမ်ႇၸၢင်ႈလၢတ်ႈ။
တႃႇတေပၼ်ႁႅင်းၸႂ် ႁႂ်ႈၽူႈလၢတ်ႈၶဝ် လၢတ်ႈလႆႈ
ၼၼ်ႉ ပဵၼ်ၵေႃႉထွမ်ႇမၼ်းၼၼ်ႉယဝ်ႉ။
ၵမ်ႈၽွင်ႈ တႃႇတေလၢတ်ႈလႆႈ လွင်ႈဢၼ်ၸဝ်ႈၵဝ်ႇ ၶႂ်ႈလၢတ်ႈၼၼ်ႉ လႆႈလဵင်ႉတၢင်းၵိၼ် လႄႈၼမ်ႉၼဵင်ႈ
ၸဵမ်းၸိူဝ်းၼႆႉၵွၼ်ႇယဝ်ႉ။
လၢႆးႁဵတ်းႁႂ်ႈပိူၼ်ႈႁၵ်ႉ ဢၼ်ဝႃႈၼၼ်ႉၵေႃႈ လုၵ်ႉမႃးတီႈ ဢၼ်မေႃထွမ်ႇပၼ် ၼၼ်ႉၵေႃႈပႃးယူႇ ဢၼ်ၼိုင်ႈယဝ်ႉ။
ၵမ်ႈၽွင်ႈထွမ်ႇၵႂႃႇႁဵတ်းၼ် ပဵၼ်ဢူၺ်းၵေႃႉလီၵၼ်ၵႂႃႇ
ၵေႃႈ မီးယဝ်ႉ။
မိူဝ်ႈပိူၼ်ႈတိုၵ်ႉလၢတ်ႈယူႇလႄႈ ႁဵတ်းၽၢင်ႁၢင်ႈ ဢမ်ႇၶႂ်ႈ ထွမ်ႇၼႄတူဝ်ၼႄၶိင်းၼၼ်ႉ မိူၼ်တင်းလူလၢႆ
ၵၼ် ၼၼ်ႉယဝ်ႉ။
ပေႃးထွမ်ႇလီလီ ဢၼ်မၼ်းလၢတ်ႈၼၼ်ႉ မိူၼ်ၵၼ် တင်း ပၼ်ႁႅင်းၸႂ်လႄႈ ၼပ်ႉယမ်ၵၼ်ၼၼ်ႉယဝ်ႉ။
ဢၼ်ႁူႉလႆႈၸႂ်ပိူၼ်ႈၼၼ်ႉၵေႃႈ လုၵ်ႉမႃးတီႈ ထွမ်ႇဢၼ်ပိူၼ်ႈလၢတ်ႈၼၼ်ႉယဝ်ႉ။
ပေႃးထွမ်ႇၵႂၢမ်းမၼ်းလၢတ်ႈယဝ်ႉ မၼ်းၼႆႉ ပဵၼ်ၵူၼ်းမဵဝ်းသင်ဢၼ်ဝႃႈၼၼ်ႉၵေႃႈ ႁူႉၵႂႃႇၵမ်းလဵဝ်ယဝ်ႉ။
လွင်ႈထွမ်ႇဢၼ်ဝႃႈၼႆႉ ပဵၼ်ဢၼ် ဢမ်ႇလႆႈထၢမ်သေ
လႄႈ လႆႈႁူႉၼႆၼၼ်ႉယဝ်ႉ။
ၼပ်ႉယမ်ၽူႈလူလိၵ်ႈႁဝ်းၶဝ်တင်းသဵင်ႈသေ--- ၸဝ်ႈၶေမၼ်ႇတႃႉ မိူင်းသူႈ