ႁႂ်ႈမေႃတူၺ်းႁၼ်တင်းသွင်ၽၢႆႇ

>> မိူၼ်ႈၵွၼ်ႇꧦၼၼ်ႉမီးၵူၼ်းတႃမွတ်ႇၵေႃႉၼိုင်ႈ
ဢူၺ်းၵေႃႉမၼ်းၽိတ်ႈမွၵ်ႇၵႂႃႇၵိၼ်ၶဝ်ႈၶမ်ႈတီႈႁိူၼ်းၶဝ်
ၼႆလႄႈ မၼ်းၸၢႆးၵေႃႈယူႇယဝ်ႉ ။

>> ဝၢႆးသေမၼ်းၸၢႆးၵိၼ်ၶဝ်ႈယဝ်ႉꧦသေတေပွၵ်ႈႁိူၼ်း
ၶိုၼ်းၼၼ်ႉ လပ်းသိင်ႇမိုတ်းတၼ်မူတ်းယဝ်ႉလႄႈ
ဢူၺ်းၵေႃႉမၼ်းၸင်ႇဢဝ်ငွႆးၾႆးဢၼ်ၼိုင်ႈပၼ်မၼ်း
ယူႇယဝ်ႉ ။

>> ၸၢႆးၵူၼ်းတႃမွတ်ႇၸႂ်လမ်တေႃးသဢွၵ်ႇသႂ်ႇဢူၺ်း
ၵေႃႉမၼ်းလႄႈ လၢတ်ႈဢွပ်ႇမႃးဝႃႈ ႁူႉယူႇတႃၵဝ်မွတ်ႇ
မႂ်းဢဝ်ငွႆးၾႆးပၼ်ၵဝ်ႁဵတ်းသင် တင်ႈၸႂ်ႁဵတ်းၶိတ်ႈၵဝ်
ႁႃႉ ၼႆယူႇယဝ်ႉ ။
>> ဢူၺ်းၵေႃႉမၼ်းၸင်ႇတွပ်ႇၶိုၼ်းဝႃႈ ၼႂ်းယၢမ်းၵၢင်
ၶိုၼ်းဢၼ်လပ်းသိင်ႇၼၼ်ႉ သူတူၺ်းဢမ်ႇႁၼ်ပိူၼ်ႈ
သေတႃႉ ၼင်ႇႁိုဝ် ၵူၼ်းၸိူဝ်းဢၼ်တူၺ်းႁၼ်ၼၼ်ႉ
တေဢမ်ႇၽႃႇၺႃးသူ ႁဝ်းၸင်ႇပၼ်ၾႆးငွႆးတႃႇတႆႈႁၼ်
လႅင်းဢိူဝ်ႈ ။
>> ယၢမ်းၼၼ်ႉမၼ်းၸၢႆးၵေႃႈပွင်ႇၸႂ်မႃးယူႇယဝ်ႉ ။
>> သင်ဝႃႈၸဝ်ႈၵဝ်ႇတူၺ်းႁၼ်ဝူၼ်ႉႁၼ်ၽၢႆႇလဵဝ်ၵူၺ်း
ၸိုင် ၸဝ်ႈၵဝ်ႇတေဢမ်ႇပွင်ႇၸႂ်ပႃးၽၢႆႇပိူၼ်ႈ ။
>> သင်မေႃတူၺ်းႁၼ်တင်းသွင်ၽၢႆႇၸိုင် လွင်ႈထၢင်ႇ
ထိူမ်ၵၼ်ၼၼ်ႉၵေႃႈတေဢမ်ႇမီး ။
>> သင်ဝႃႈၸဝ်ႈၵဝ်ႇမီးလုၵ်ႈမီးသၢဝ်ၵေႃႉၼိုင်ႈၼႆဝူၼ်ႉ
ဝႃႈတေယွၼ်းၶူဝ်းၽၢၵ်ႇၼမ်ꧦတီႈၽၢႆႇၵူၼ်းၸၢႆးၼႆယူႇ ။
>> သင်ဝႃႈၸဝ်ႈၵဝ်ႇမီးလုၵ်ႈၸၢႆးၵေႃႉၼိုင်ႈၼႆၸိုင်ဝူၼ်ႉ
ဝႃႈ ၶႂ်ႈႁႂ်ႈၽၢႆႇၼၢင်းယိင်း ယွၼ်းၼင်ႇၸဝ်ႈၵဝ်ႇပဵၼ်လႆႈ
ၼၼ်ႉၵူၺ်း ။
>> သင်ဝႃႈၸဝ်ႈၵဝ်ႇမီးလုၵ်ႈပႂ်ႉၼႆၶႂ်ႈႁႂ်ႈမၼ်းၼၢင်းႁူႉ
ၵၢၼ်ၼႃႈႁိူၼ်း ပုၼ်ႈၽွၼ်းမၼ်းၼၢင်းၵူႈလွင်ႈၼႆယူႇ ။
>> သင်ဝႃႈလုၵ်ႈယိင်းၸဝ်ႈၵဝ်ႇၵႂႃႇၶိုၼ်ႈပႂ်ႉပိူၼ်ႈၼႆ ၶႂ်ႈႁႂ်ႈ
ၵူၼ်းၼႂ်းၼႃႈႁိူၼ်းၼၼ်ႉ ႁၵ်ႉလုၵ်ႈၸဝ်ႈၵဝ်ႇမိူၼ်လုၵ်ႈ
ၶဝ်ၼႆယူႇ ။
>> မိူဝ်ႈၸဝ်ႈၵဝ်ႇၶပ်းလူတ်ႉၵႃးၼၼ်ႉတေဝူၼ်ႉဝႃႈ
ၵူၼ်းပႆၶၢမ်ႈတၢင်းၶဝ် ပႆထိူင်းၼႃႇ ။
>> မိူဝ်ႈၸဝ်ႈၵဝ်ႇပဵၼ်ၵေႃႉပႆၶၢမ်ႈတၢင်းၼၼ်ႉ တေဝူၼ်ႉဝႃႈ
ၵူၼ်းၶပ်းလူတ်ႉၼၼ်ႉ ၶပ်းမႃးဝႆးၼႃႇ ။
>> သင်ဝႃႈၸဝ်ႈၵဝ်ႇပဵၼ်ပေႃႈလဵင်ႉပိူၼ်ႈၼႆတေဝူၼ်ႉဝႃႈ
လုၵ်ႈၸၢင်ႈဢမ်ႇပေႃးသူၼ်ၸႂ်တေႃႇၼႃႈၵၢၼ် ဢမ်ႇမေႃ
ဢဝ်ပုၼ်ႈၽွၼ်း ၼႂ်းၼႃႈတီႈတူဝ်ၵဝ်ႇ ။
>> သင်ဝႃႈၸဝ်ႈၵဝ်ႇပဵၼ်လုၵ်ႈၸၢင်ႈၼႆ တေဝူၼ်ႉဝႃႈ
ပေႃႈလဵင်ႉ မႄႈလဵင်ႉ ၶီႈပွင်ႉ ၶီႈလႃႇ ၵႆႉၸႂ်ႉ ၵႆႉလၢတ်ႈ
ဢမ်ႇမေႃဢီးလူလုၵ်ႈၸၢင်ႈၼႆယူႇယဝ်ႉ ။
>> သင်ဝႃႈၸဝ်ႈၵဝ်ႇပဵၼ်ၵူၼ်းသိုဝ်ႉၶူဝ်းၶွင်ၼႆ တေၵႆႉ
ယွၼ်းသဵတ်ႈယွၼ်းယွမ်းၵႃႈၶၼ်မၼ်းသေ ဝူၼ်ႉဝႃႈ
ၵူၼ်းၶၢႆမၼ်း ၶၢႆၵႃႈယႂ်ႇၼႃႇ ။
>> သင်ဝႃႈၸဝ်ႈၵဝ်ႇပဵၼ်ၵႃႉ ၵူၼ်းၶၢႆၼႆၸိုင် ယၢမ်းမိူဝ်ႈ
ထုၵ်ႇၵူၼ်းသိုဝ်ႉၶွင်ယွၼ်းယွမ်းၵႃႈမၼ်းၼၼ်ႉ တေဝူၼ်ႉ
ဝႃႈ ၵူၼ်းၵေႃႉၼႆႉ ၶီႈသဵတ်ႈၼႃႇ ။
>> ယႃႇၵုမ်ႇတူၺ်းႁၼ်ၽၢႆႇပုၼ်ႈသုၼ်ႇတူဝ်ၸဝ်ႈၵဝ်ႇ
ၽၢႆႇလဵဝ်ၵူၺ်းသေ ႁဵတ်းႁႂ်ႈၵူၼ်းတၢင်ႇၵေႃႉလႆႈတုၵ်ႉၸႂ်။
>> သင်ဝႃႈၸဝ်ႈၵဝ်ႇမေႃဝူၼ်ႉသွၼ်ႇႁၼ်ထိုင်ၸႂ်ပိူၼ်ႈၸႂ်
ႁဝ်းၼႆ လူၵ်ႈၶူင်းၵၢင်ၼႆႉတေလီယူႇမႃးတၢင်းၼမ်ဢိူဝ်ႈ။
သင်ဝႃႈၸဝ်ႈၵဝ်ႇမေႃတူၺ်းႁၼ်လွင်ႈတုၵ်ႉၵူၼ်းတၢင်ႇ
ၵေႃႉၶဝ် မေႃပွင်ႇၸႂ်ပၼ်လွင်ႈယၢပ်ႇၽိုတ်ႇၵူၼ်းတၢင်ႇ
ၵေႃႉၶဝ် မေႃပွႆႇဝၢင်းပၼ်လွင်ႈၽိတ်းပိူင်ႈၵူၼ်းတၢင်ႇၵေႃႉ
ၶဝ်ၼႆၸ​ိုင် ယူႇတီႈလႂ်ၵေႃႈတေလႆႈၵတ်းယဵၼ်ၸႂ်ယူႇ
ယဝ်ႉ ။
ၼပ်ႉယမ်ထိုင်ၽူႈပၼ်ႁႅင်းလူဢၢၼ်ႇၵူႈၵေႃႉယူႇဢေႃႈ
မွၵ်ႇႁၢမ်းဢၢႆ ( ဝဵင်းသဝ်ႁိၼ် )
5 . 2 . 2019 ဝၼ်းဢင်းၵၢၼ်း