ၵေႃႉဢွင်ႇမၢင်ႇလႄႈ ၵေႃႉဢမ်ႇဢွင်ႇမၢင်ႇ

ၵူၼ်းၵမ်ႈဢႄႇ တေဢွင်ႇမၢင်ႇသေ ၵူၼ်းၵမ်ႈၼမ် တေဢမ်ႇပေႃးဢွင်ႇမၢင်ႇၼၼ်ႉယဝ်ႉ။

ယွၼ်ႉသင်လႄႈ ပဵၼ်ၼၼ်လႃႇ ?

ၶေႃႈထၢမ်ဢၼ်ၼႆႉ ၽႂ်ၽႂ်ၵေႃႈ တေဝူၼ်ႉထၢမ်ၵၼ်ယူႇ။

ၵူၼ်းၵေႃႉၼႆႉ သမ်ႉဢွင်ႇမၢင်ႇ ယွၼ်ႉသင် ၵူၼ်းၵေႃႉၼၼ်ႉသမ်ႉဢမ်ႇဢွင်ႇမၢင်ႇ။

ၵေႃႉဢွင်ႇမၢင်ႇလႄႈ ၵေႃႉဢမ်ႇဢွၵ်ႇမၢင်ႇ ၶဝ်ပိူင်ႈၵၼ်ၸိူင်ႉႁိုဝ်လၢႆလၢႆ။

ပေႃးမႃးထတ်းသၢင်တူၺ်းၸိုင် ပေႃးမီးၶေႃႈထၢမ်ၵေႃႈ တိုၼ်းမီးၶေႃႈတွပ်ႇမၼ်းၼၼ်ႉယဝ်ႉ။ လဵပ်ႈႁဵၼ်းတူၺ်းၶေႃႈတွပ်ႇမၼ်းပေႃးၼၼ် -----

ၵေႃႉဢွင်ႇမၢင်ႇ--- ၸဝ်ႈၵဝ်ႇမီးလွင်ႈၶႂ်ႈလႆႈၸိူင်ႉႁိုဝ်ၼႆ ၸဝ်ႈၵဝ်ႇတိုၼ်းႁူႉလီတေႉတေႉ၊ လွင်ႈၶႂ်ႈလႆႈၼၼ်ႉ ၼင်ႇႁိုဝ်တေလႆႈၼႆ ဝူၼ်ႉႁႃ သွၵ်ႈႁႃလွၵ်းလၢႆးတႃႇတေလႆႈမၼ်းၼၼ်ႉယဝ်ႉ။ ၸဝ်ႈၵဝ်ႇဢၢၼ်းႁဵတ်းႁႂ်ႈ ပေႃးလႆႈၼႆ တိုၼ်းယုမ်ႇယမ်တူဝ်ၸဝ်ႈၵဝ်ႇတဵမ်တဵမ်။ ၶၢဝ်းယၢမ်း ဢၼ်ပူၼ်ႉၵႂႃႇၵူႈဝၼ်းၼၼ်ႉၵေႃႈ ဢဝ်သဵင်ႈၸွမ်းတႃႇ ဢၼ်ၸဝ်ႈၵဝ်ႇၶႂ်ႈလႆႈၼၼ်ႉယဝ်။

ၵေႃႉဢမ်ႇဢွင်ႇမၢင်ႇ--- ဢမ်ႇမီးယိူင်းဢၢၼ်းတႃႇၸၢတ်ႈပၢၼ်တင်းၼႃႈ တႅတ်ႈၼႅတ်ႈ၊ တႃႇဢွင်ႇမၢင်ႇ ဢမ်ႇဢွင်ႇမၢင်ႇၼၼ်ႉ ဝူၼ်ႉဝႃႈ ၵၢမ်ႇၸႃႇတေႁဵတ်းပၼ်ၵူၺ်း၊ လိူဝ်သေဝႃႈ မီးမိူဝ်ႈဝေႈဢမ်ႇလွတ်ႈယဝ်ႉ၊ ဢမ်ႇတွၼ်ႉႁဵတ်းၼမ်ႉၵတ်ႉၼႂ်းတူဝ်ၸဝ်ႈၵဝ်ႇဢွၵ်ႇမႃး။

ၵေႃႉဢွင်ႇမၢင်ႇ--- ၶဝ်ပဵၼ်ၵူၼ်းမေႃၸုႁွမ်တွမ်သေ ၶဝ်ႁဵတ်းၵၢၼ်သင်ၵေႃႈ မေႃၵႃႉၶၢႆလႆႈၵၢၼ်ဢၼ်ႁဵတ်းယူႇ ၼၼ်ႉယဝ်ႉ။ သင်ဝႃႈ ပဵၼ်ၸဝ်ႈၵၢၼ်ၵေႃႈ မေႃႁူၺ်းဢဝ် ၵူၼ်းႁဵတ်းၵၢၼ် ၶဝ်ႈၸႂ်ႁဵတ်းၵၢၼ်ၸဝ်ႈၵဝ်ႇၼၼ်ႉယဝ်ႉ။

ၵေႃႉဢမ်ႇဢွင်ႇမၢင်ႇၸမ်ႉ ၵႆႉပဵၼ်ၵူၼ်းမေႃႁႃတၢင်းၽိတ်းပိူၼ်ႈၼၼ်ႉယဝ်ႉ။ ၼင်ႇႁိုဝ်ၸေႇတၼႃႇပိူၼ်ႈတေလုႉၼၼ်ႉ ဝူၼ်ႉႁႃလွၵ်းလၢႆးမၼ်းယူႇတႃႇသေႇၼၼ်ႉယဝ်ႉ။ ၼႂ်းဢူၺ်းၵေႃႉ ဢၼ်မိုတ်ႈၵိုဝ်းၶဝ်ႈဢွၵ်ႇၸဝ်ႈၵဝ်ႇၼၼ်ႉၵေႃႈ မေႃသေႃႇသူၼ်းၶဝ်ႁႂ်ႈပဵၼ်ၵူၼ်းဢမ်ႇမေႃႁၼ်လီၼိူဝ်ပိူၼ်ႈၼၼ်ႉယဝ်ႉ။

ၵေႃႉဢွင်ႇမၢင်ႇၼၼ်ႉ ဝူၼ်ႉယဝ်ႉၶဝ်ၸွင်ႇၵွႆႈလၢတ်ႈ၊ ၶဝ်မေႃလၢတ်ႈၶေႃႈၵႂၢမ်း တင်းၼႃႈ တင်းလင်ၶဝ်ႈၵၼ်၊ လွင်ႈလီပိူၼ်ႈၼၼ်ႉ ဢဝ်လွင်ႈဢၼ်လီတၢင်ႇမဵဝ်းသေမႃးလၢတ်ႈတႅၵ်ႈၼိူင်း မႃးယုၵ်ႉယွင်ႈပၼ်။ ၶေႃႈၵႂၢမ်း ဢၼ်ၸဝ်ႈၵဝ်ႇဢမ်ႇလႆႈၸႂ်ၼၼ် ဢဝ်သိမ်းဝႆႉသေ ၶဝ်ၵေႃႈတိုၼ်းဢမ်ႇလၢတ်ႈ။ ၽၢင်ႉဝႆႉၶေႃႈၵႂၢမ်း ဢၼ်လၢတ်ႈလႄႈ တေထိၶိူၵ်ႈပိူၼ်ႈတၢင်ႇၵေႃႉၼၼ်ႉ တိုၼ်းဢမ်ႇလၢတ်ႈလႃးလႃး။

ၵေႃႉဢမ်ႇဢွင်ႇမၢင်ႇၸမ်ႉ ပိၼ်ႈၽူၼ်ၵၼ်တင်းၵေႃႉဢွင်ႇမၢင်ႇၼၼ်ႉယဝ်ႉ၊ ဢမ်ႇမေႃဝူၼ်ႉသီႇဝူၼ်ႉႁႃႈသေ လၢတ်ႈၼၼ်ႉယဝ်ႉ၊ ယွၼ်ႉၵႂၢမ်းလၢတ်ႈမၼ်းလႄႈ လႆႈထိၶိူၵ်ႈၵူၼ်းတၢင်ႇၵေႃႉၼၼ်ႉယဝ်ႉ။ ယဝ်ႉၵေႃႈႁဵတ်းႁႂ်ႈပိူၼ်ႈၸၢၼ်ႈၸင်း ၸဝ်ႈၵဝ်ႇၶိုၼ်း၊ ယွၼ်ႉၵႂၢမ်းလၢတ်ႈၸဝ်ႈၵဝ်ႇလႄႈဝၼ်းၼိုင်ႈမႃး ၸဝ်ႈၵဝ်ႇတေလႆႈၶၢမ်ႇၽွၼ်းၸႃႉလွင်ႈဢမ်ႇမေႃလၢတ်ႈလီတီႈၼိူဝ်ပိူၼ်ႈၼၼ်ႉယဝ်ႉ။

ၵေႃႉဢွင်ႇမၢင်ႇၼၼ်ႉပေႃးၵပ်းၵၢႆႇလူၺ်ႈလွင်ႈၵၢၼ်သင်သေဢမ်ႇဝႃႈ ၸဝ်ႈၵဝ်ႇႁူႉလႆႈလီငၢမ်းယဝ်ႉ ၸင်ႇၵွႆႈဢဝ်တင်းႁၼ်ထိုင်ၸဝ်ႈၵဝ်ႇၽႃသေလၢတ်ႈၼႄပိူၼ်ႈၼၼ်ႉယဝ်ႉ။

ၵေႃႉဢမ်ႇဢွင်ႇမၢင်ႇၸမ်ႉဢမ်ႇလဵပ်ႈႁဵၼ်းႁႂ်ႈႁူႉလီလီသေၵႆႉထတ်းသၢင်ၼၼ်ႉယဝ်ႉ၊ ႁၼ်ထိုင်ၸွမ်းၼင်ႇၵၢင်ၸႂ်ၵေႃႉလဵဝ်ၼၼ်ႉယဝ်ႉ၊ လွင်ႈဢၼ်ၸဝ်ႈၵဝ်ႇဢမ်ႇႁူႉၽၢႆႇႁူႉလၢႆႇသင်ၵေႃႈ ၵႆႉၸၢင်ႈၶဝ်ႈသုၵ်ႉယုင်ႈၸွမ်းၼၼ်ႉယဝ်ႉ။

ၵေႃႉဢွင်ႇမၢင်ႇၼၼ်ႉၶဝ်မေႃၶဝ်ႈၸႂ်လွင်ႈပိူၼ်ႈသေ ၵေႃႉဢၼ်ႁဵတ်းၵၢၼ်ၸွမ်းၵၼ် မိူၼ်ၵၼ် တီႈလဵဝ်ၵၼ်လႂ်ၸိူဝ်းၼႆႉ ၶဝ်မေႃမိုတ်ႈၵိုဝ်းၸမ်ၸႂ်ၶဝ်ႈဢွၵ်ႇပိူၼ်ႈလႆႈလီၼၼ်ႉယဝ်ႉ။

ၵေႃႉဢမ်ႇဢွင်ႇမၢင်ႇၸမ်ႉ ပေႃးဝႃႈၸဝ်ႈၵဝ်ႇဢမ်ႇမီးလွင်ႈလူဝ်ႇၸိုင် ယူႇမိူၼ်ၼင်ႇဢမ်ႇဢၢၼ်းပိုင်ႈဢိင်ပိူၼ်ႈလႄႈ ယူႇမိူၼ်ၼင်ႇၶဝ်ႈၸႂ်လွင်ႈပိူၼ်ႈၼၼ်ႉယဝ်ႉ။ ၵူၺ်းပေႃးမီးတၢင်းလူဝ်ႇမႃးတေႉ မေႃဢွၼ်ႈဝွၼ်းပိူၼ်ႈသေ လၢတ်ႈပေႃးတၢၼ်ႇပဵၼ်ပီႈပဵၼ်ၼွင်ႉၶဝ်ၼၼ်ႉယဝ်ႉ။

ၵေႃႉဢွင်ႇမၢင်ႇၼၼ်ႉ မေႃလၢတ်ႈၸႅင်ႈလႅင်းသေ မေႃဝႆႉၸႂ်ယႂ်ႇယၢဝ်းၼၼ်ႉယဝ်ႉ။ ဢၼ်လွင်ႈဢမ်ႇမီးတၢင်းႁၼ်ထိုင် မိူၼ်ၵၼ်ၼၼ်ႉလႄႈသင် ဢၼ်လႆႈယူႇၸွမ်းၵူၼ်းတီႈဢမ်ႇမိူၼ်ၵၼ်ၼၼ်ႉလႄႈသင်ၼႆ ၶဝ်မေႃယူႇမေႃၵိၼ်ၵေႃႉပိူၼ်ႈ ၼၼ်ႉယဝ်ႉ။

ၵေႃႉဢမ်ႇဢွင်ႇမၢင်ႇၼၼ်ႉ မေႃဝႆႉၸႂ်ပိၵ်ႉၽၵ်းတူပႅတ်ႈပိူၼ်ႈၼၼ်ႉယဝ်ႉ၊ ဢၼ်တၢင်းႁၼ်ထိုင်ဢမ်ႇမိူၼ်ၵၼ်ၼၼ်ႉၵေႃႈ ဢမ်ႇယိူၼ်ႉသီးၸႂ်ထွမ်ႇပၼ်လႆႈ၊ ၵူၼ်းတီႈဢမ်ႇမိူၼ်ၵၼ်ၼၼ်ႉၵေႃႈ ဢမ်ႇတူၺ်းလႆႈ။ ယွၼ်ႉပဵၼ်ၵူၼ်းပိၵ်ႉၽၵ်းတူၸႂ် ဝႆႉလႄႈသုၼ်ႇလႆႈသုၼ်ႇပဵၼ်ဢၼ်ထုၵ်ႇလႆႈၼၼ်ႉၵေႃႈ မၼ်းဢမ်ႇတူၺ်းႁၼ် ဢမ်ႇႁူႉ၊ တင်းဢူၺ်းၵေႃႉသေ ႁဵတ်း ၵၢၼ်ၸွမ်းၵၼ် ၽွမ်ႉတိၼ်ၽွမ်ႉမိုဝ်းၵၼ်ၵေႃႈမၼ်းဢမ်ႇယၢမ်ႈမီး။

ၵေႃႉဢွင်ႇမၢင်ႇၼၼ်ႉ ၶဝ်မေႃၶတ်းၸႂ်ႁႂ်ႈလႆႈလီ လႆႈပဵၼ်ၸွမ်းၵၢပ်ႈပၢၼ်ယူႇယၢမ်းလဵဝ်ႁႂ်ႈမိူၼ်ပိူၼ်ႈၼၼ်ႉယဝ်ႉ၊ ၵၢၼ်ၸဝ်ႈၵဝ်ႇ ၵၢၼ်ႁႃလဵင်ႉတွင်ႉၸဝ်ႈၵဝ်ႇ၊ ၸိူဝ်းႁိမ်းႁွမ်းၸဝ်ႈၵဝ်ႇ ၸၵႂႃႇၼႂ်းလူၵ်ႈၼႆႉပဵၼ်သင်ဝႆႉယူႇ ဢၼ်ဝႃႈ ၼၼ်ႉၶတ်းၸႂ်ႁႂ်ႈႁူႉၸွမ်းလႆႈလီၼၼ်ႉယဝ်ႉ။

ၵေႃႉဢမ်ႇဢွင်ႇမၢင်ႇၸမ်ႉ လိူဝ်သေၵၢၼ်ၸဝ်ႈၵဝ်ႇဢၼ်တိုၵ်ႉႁဵတ်းယူႇၼၼ်ႉ ဢမ်ႇသူၼ်ၸႂ် ဢမ်ႇၶဝ်ႈၸႂ် ဢမ်ႇမေႃႁူႉတၢင်ႇဢၼ်ထႅင်ႈ၊ ဢၼ်ဢမ်ႇမႃးတႅၵ်ႈသႅင်ႇၵၼ်သိုဝ်ႈၼႃႈတၼ်းတႃၸဝ်ႈၵဝ်ႇၼၼ်ႉ တိုၼ်းဝႃႈ ဢမ်ႇႁူႉသင်သေမဵဝ်းၼၼ်ႉယဝ်ႉ။

ၵေႃႉဢွင်ႇမၢင်ႇၼၼ်ႉ ၼႂ်းလေႃးၵၼႆႉလႄႈသင် ၼႂ်းၸၢတ်ႈပၢၼ်ၸဝ်ႈၵဝ်ႇၼၼ်ႉလႄႈသင် မေႃယူႇၽၢႆႇဢၼ်ႁဵတ်းသၢင်ႈႁၢင်ႈပွင်သေတူၺ်းထိုင်ၼၼ်ႉယဝ်ႉ၊ ၵၢၼ်ဢၼ်ၸဝ်ႈၵဝ်ႇဢွင်ႇမၢင်ႇၼၼ်ႉလႄႈသင် ဢၼ်ၸဝ်ႈၵဝ်ႇလႆႈတီႈယူႇလီလီၼႂ်းလူၵ်ႈၼႆႉတီႈၼိုင်ႈလႄႈသင် ပဵၼ်ယွၼ်ႉၼမ်ႉၵတ်ႉၸဝ်ႈၵဝ်ႇတဵမ်ထူၼ်ႈဢၼ်ဝႃႈ ၼၼ်ႉႁူႉႁၼ်လႆႈလီလီၼၼ်ႉယဝ်ႉ။ ဢၼ်ပၼ်ၵတိၼိူဝ်ပိူၼ်ႈၼၼ်ႉ ဢမ်ႇယႃႉဢမ်ႇပၼ်ၽိတ်းပိူင်ႈၵူၺ်းသေ ဢမ်ႇၵႃး မေႃႁဵတ်းႁႂ်ႈမီးၽွၼ်းလီမႃးလိူဝ်ၵဝ်ႇၼင်ႇဢၼ်ပၼ်ၵတိၵၼ်ဝႆႉၼၼ်ႉယဝ်ႉ။

ၵေႃႉဢမ်ႇဢွင်ႇမၢၼ်ႇၸမ်ႉ ၸဝ်ႈၵဝ်ႇတေႉဢမ်ႇၶႂ်ႈပၼ် သမ်ႉပဵၼ်ၵူၼ်းၶႂ်ႈလႆႈၼၼ်ႉယဝ်ႉ။ မေႃဝႆႉၸႂ်ၶႂ်ႈၵိၼ်ၶွင်လၢႆ ပိူၼ်ႈၼၼ်ႉယဝ်ႉ။ ပေႃးဝႃႈၶႂ်ႈလႆႈလၢႆလႄႈ ၺႃးမိူဝ်ႈဢမ်ႇလႆႈမႃး မေႃႁႃတၢင်ႇတၢင်းၽိတ်းပိူၼ်ႈဝႃႈ ပိူၼ်ႈပဵၼ်ၵူၼ်း လေႃးၽယႂ်ႇၼႆၼၼ်ႉယဝ်ႉ။

ၵေႃႉဢွင်ႇမၢင်ႇၼၼ်ႉ ၼႂ်းလူၵ်ႈၼႆႉၶဝ်လႆႈၵိူတ်ႇမႃးပဵၼ်ၵူၼ်းၸိူင်ႉႁိုဝ်ၵေႃႈ ၶဝ်မေႃႁၢၼ်ႉၸႂ်ၸွမ်းလူၺ်ႈ ၸၢတ်ႈပၢၼ်ၶဝ်ဢၼ်ၶဝ်ပဵၼ်ယူႇၼၼ်ႉယဝ်ႉ။ ယဝ်ႉၵေႃႉၶဝ်မေႃယူႇၸွမ်းလူၺ်ႈၵူၼ်းၸိူဝ်းႁိမ်းႁွမ်းသေ လႆႈၸႂ်ႁဵတ်းသၢင်ႈပၼ်ၵၢၼ်ၵူၼ်းၼမ် ၵၢၼ်ပရႁိတၼၼ်ႉယဝ်ႉ။

ၵေႃႉဢမ်ႇဢွင်ႇမၢင်ႇၸမ်ႉ ၼႂ်းလူၵ်ႈၼႆႉလႄႈသင် ၸိူဝ်းႁိမ်းႁွမ်းၸဝ်ႈၵဝ်ႇလႄႈသင် ဢမ်ႇမီးလွင်ႈယုမ်ႇယမ်သင် ၼၼ်ႉယဝ်ႉ။ ၵၢၼ်ႁူႉၸဝ်ႈၵဝ်ႇတင်းသဵင်ႈၼၼ်ႉ ဢဝ်ပဵၼ်လႆႈၽွၼ်းလီတႃႇတူဝ်ၸဝ်ႈၵဝ်ႇၵေႃႉလဵဝ်ၵူၺ်း။ ပေႃးႁဵတ်းၵၢၼ်ၵူၼ်းၼမ်ၵေႃႈ ၶႂ်ႈလႆႈၼမ်ႉမႅတ်ႈၼမ်ႉတွၼ်းၼၼ်ႉယဝ်ႉ။ ယဝ်ႉၵေႃႈလွင်ႈမၢၵ်ႈမီးၵေႃႈ တေဢမ်ႇၵႂႃႇလႆႈ ၶၢဝ်းယၢဝ်းႁုိင်။

ပေႃးမႃးႁုပ်ႈလၢတ်ႈတီႈၵႅပ်ႈမၼ်းၵေႃႈ ၵေႃႉဢွင်ႇမၢင်ႇလႄႈ ၵေႃႉဢမ်ႇဢွင်ႇမၢင်ႇၼၼ်ႉ လၢႆးဝႆႉဝၢင်းၼမ်ႉၸႂ်လႄႈသင် လွင်ႈႁဵတ်းသၢင်ႈလႄႈသင် ၵေႃႉၼိုင်ႈလႄႈၵေႃႉၼိုင်ႈ မိူၼ်ၼင်ႇဢမ်ႇႁူမ်ႈၼႂ်းၵမ်ႇၽႃႇလုၵ်ႈလဵဝ်ၼၼ်ႉယဝ်ႉ။ ဢၼ်လွင်ႈႁဵတ်းလွင်ႈသၢင်ႈလႄႈ လၢႆးဝႆႉဝၢင်းၸႂ်ၼၼ်ႉ ပႅၵ်ႇပိူင်ႈၵၼ်လႄႈ ႁဵတ်းႁႂ်ႈၸၢတ်ႈပၢၼ်ၵူၺ်းႁဝ်းပိူင်ႈၵၼ်ၵႂႃႇ ၽႃႉလႄႈလိၼ်ၼၼ်ႉယဝ်ႉ။

ၼပ်ႉယမ်ၽူႈလူလိၵ်ႈႁဝ်းၶဝ်တင်းသဵင်ႈသေ

ပၢႆးဝူၼ်ႉၶပ်ႉ ပိၼ်ႇတႅမ်ႈတၢင်ႇၼႄ။