ၵႃႈၶၼ် လႄႈ ၵူၼ်း

မီပွၵ်ႈၼိုင်ႈ မီးၵူၼ်းယွၼ်းၵေႃႉၼိုင်ႈ၊ ၵူၼ်းယွၼ်းၵေႃႉၼၼ်ႉ ၶႅၼ်မၼ်းၽၢႆႇသၢႆႉလႆႈပုတ်းဝႆႉသေ လႄႇႁႃယွၼ်းၵိၼ်တင်းတႂ်ႈတင်းၼိူဝ်ယူႇယဝ်ႉ၊ ပိူၼ်ႈၵေႃႈဢဵတ်းလူမၼ်း ၵႆႉၵႆႉတွၼ်ႈပၼ်တၢင်းၵိၼ် မၼ်းၸိူင်ႉၼၼ်။  မီးဝၼ်းၼိုင်ႈ မၼ်းႁွတ်ႈၵႂႃႇၽၢႆႇၼႃႈ ႁိူၼ်းလင်ၼိုင်ႈသေယွၼ်း၊ ၼႂ်းႁိူၼ်းလင် ၼၼ်ႉ ႁၼ် ၼၢင်းမႄႈၸဝ်ႈႁိူၼ်းဢွၵ်ႇမႃးသေ ထၢမ်ၵူၼ်းယွၼ်းၼၼ်ႉဝႃႈ မႂ်းၶႂ်ႈလႆႈငိုၼ်းႁႃႉ ထၢမ်ၵႂႃႇၸိူင်ႉၼႆ၊ ၵူၼ်းယွၼ်းၼၼ်ႉၵေႃႈ ငွၵ်းႁူဝ်ၼႄသေ ၼၢင်းမႄႈၸဝ်ႈႁိူၼ်းၼၼ်ႉၸင်ႇၶိုၼ်းဝႃႈ

ပေႃးမႂ်းၶႂ်ႈလႆႈငိုၼ်း ဢဝ်မၢၵ်ႇဢုတ်ႇဢၼ်မီးၼႃႈႁိူၼ်းၵဝ်ၼႆႉ ၵႂႃႇၶပ်ႉဝႆႉပၼ်ၵဝ် တင်းၽၢႆႇလင်ႁိူၼ်း ၼၼ်ႉလႄႈၼႆယူႇ၊ ၵူၼ်းယွၼ်းၼၼ်ႉ တင်းၸႂ်လမ်သေလၢတ်ႈဝႃႈ ၶႃႈႁဝ်းၶႅၼ်ပုတ်းဝႆႉၽၢႆႇၼိုင်ႈ ႁၼ်ယူႇ ၸိုင်သမ်ႉမႃးၸႂ်ႉၶႃႈၸိူင်ႉၼၼ်လႃႇ၊ ၼၢင်းမႄႈၸဝ်ႈႁိူၼ်းၼၼ်ႉ ဢမ်ႇတၵ်းသဵင်သင်သေ ဢွၵ်ႇႁိူၼ်းမႃး ဢဝ်မိုဝ်းၶွၼ်ၶႂႃၽၢႆႇလဵဝ်သေ တေႃႉဢဝ်မၢၵ်ႇဢုတ်ႇၼၼ်ႉ ၵႂႃႇဝႆႉတင်းလင်ႁိူၼ်းယူႇ ယဝ်ႉ ၶိုၼ်းလၢတ်ႈဝႃႈ ၸွင်ႇမႂ်းႁၼ် ၵဝ်ၵေႃႈဢဝ်မိုဝ်းၶွၼ်လဵဝ်သေ တေႃႉလႆႈဢိူဝ်ႈၼႆႁင်းမၼ်းယူႇ။ ႁဵတ်းၼၼ်သေ ၵူၼ်းယွၼ်းၼၼ်ႉၵေႃႈ ဢဝ်မိုဝ်းၶွၼ်လဵဝ်သေ တေႃႉပၼ်မၢၵ်ႇဢုတ်ႇ မႄႈၸဝ်ႈႁိူၼ်း ႁိုင်ၵႂႃႇၶၢဝ်းတၢင်းသွင်ၸိူဝ်ႈမူင်း၊ ပဵၼ်ဢၼ်ယဝ်ႉၵႂႃႇသေ ႁိူဝ်ႇၵေႃႈပေႃးယမ်းတင်းတူဝ်ဝႆႉယူႇယဝ်ႉ။

ၼၢင်းမႄႈၸဝ်ႈႁိူၼ်းၸင်ႇဢွၵ်ႇႁိူၼ်းမႃးသေ ဢဝ်ၽႃႈၸဵတ်ႉၼႃႈ မႃးပၼ်မၼ်းၸဵတ်ႉယူႇ၊ ၽႃႈၸဵတ်ႉၼႃႈၼၼ်ႉ သမ်ႉပဵၼ်သီၶၢဝ် ၽိူဝ်ႇၸၢႆးၵူၼ်းယွၼ်းၼၼ်ႉၸဵတ်ႉႁိူဝ်ႇယဝ်ႉ ဢဝ်ပဵၼ်သီလမ် ၵႂႃႇ၊ ပေႃးယဝ်ႉၵေႃႈ ၼၢင်းမႄႈၸဝ်ႈႁိူၼ်း ဢဝ်ငိုၼ်း ႒႐႐႐ ၵျၢပ်ႈပၼ်ၸၢႆးၵူၼ်းယဝ်ႉၼၼ်ႉယဝ်ႉ။

ၸၢႆးၵူၼ်းယွၼ်းၵေႃႈၸူမ်းလူင်ၸူမ်းလၢင်သေ လၢတ်ႈၵႂၢမ်းၶွပ်ႈၸႂ်ၸူး ၼၢင်းမႄႈၸဝ်ႈႁိူၼ်းယူႇယဝ်ႉ၊

ၼၢင်းမႄႈၸဝ်ႈႁိူၼ်းၼၼ်ႉဝႃႈ မႂ်းဢမ်ႇလူဝ်ႇမႃး လၢတ်ႈၵႂၢမ်းၶွပ်ႈၸႂ်ၸူးၵဝ် ဢၼ်မႂ်းလႆႈၵႂႃႇ ႒႐႐႐ ၼၼ်ႉၵေႃႈ ပဵၼ်ယွၼ်ႉ တၢင်းၶတ်းၸႂ်မႂ်း ဢၼ်မႂ်းဢဝ်ႁိူဝ်ႇမႂ်းလႅၵ်ႈဢဝ်ဢိူဝ်ႈၼၼ်ႉ ၼႆသေဢၢင်ႈၶဝ်ႈႁိူၼ်းၵႂႃႇ၊ မိူဝ်ႈၽွင်းယၢမ်းၼၼ်ႉ ၸၢႆးၵူၼ်းယွၼ်းၼၼ်ႉ ၸင်ႇဢွၵ်ႇမႃးလႆႈ တၢင်းဝူၼ်ႉဢၼ်ၼိုင်ႈသေ လၢတ်ႈဝႃႈ ၵဝ်ၶႃႈတေဢမ်ႇမီးဝၼ်းလိုမ်း ၼၢင်းမႄႈၸဝ်ႈႁိူၼ်းလႆႈၼႃႈ၊ ယဝ်ႉၵေႃႈ ၵဝ်ၶႃႈ ၶႂ်ႈယွၼ်းထႅင်ႈသေလွင်ႈၼိုင်ႈ ၸွင်ႇတေပၼ်၊ ဢၼ်ၶႃႈၶႂ်ႈယွၼ်းၼႆႉတေႉ ပဵၼ်ၽႃႈၸဵတ်ႉဢၼ်ပၼ်ၶႃႈၸဵတ်ႉႁိူဝ်ႇမိူဝ်ႈၵႆႈၼၼ်ႉ။ ၼၢင်းမႄႈၸဝ်ႈႁိူၼ်းၵေႃႈ ဢေႃႈဢၼ်ၼၼ်ႉႁႃႉ ဢဝ်ၵႂႃႇလႄႈ ၵဝ်ပၼ်မႂ်းယူႇ၊ ႁဵတ်းၼႆသေ ၸၢႆးၵူၼ်းယွၼ်းၵေႃႈ မီးတၢင်းသိူဝ်း ယုမ်ႉယုမ်ႉယၢႆႈယၢႆႈသေ ယၢၼ်ဢွၵ်ႇၼၢင်းမႄႈၸဝ်ႈႁိူၼ်းလင်ၼၼ်ႉၵႂႃႇယူႇယဝ်ူႉ။

ဝၢႆးသေပူၼ်ႉၵႂႃႇယဝ်ႉပီယၢဝ်းၶၢဝ်းႁိုင် ၸၢႆးၵူၼ်းယွၼ်းၵေႃႉၼၼ်ႉ ၸင်ႇၼုင်ႈတင်းသိူဝ်ႈၶူဝ်း တႅတ်ႈတႅတ်ႈၼႅတ်ႈၼႅတ်ႈဢွၼ်ႇသေ တင်းၽႃႈၸဵတ်ႉၼႃႈသီၶၢဝ်ဢွၼ်ႇမၼ်းၼၼ်ႉ မႃးၸုၵ်းယူႇ ၽၢႆႇၼႃႈႁိူၼ်းဢၼ်မၼ်းလႆႈတေႃႉဢုတ်ႇပၼ်ၼၼ်ႉယဝ်ႉ။  ၽိူဝ်ႇမၼ်းၸၢႆးႁၼ်ၼၢင်းမႄႈၸဝ်ႈႁိူၼ်း ၶိုၼ်းၼၼ်ႉၵေႃႈၶႂ်ႈၶၢဝ်ႉၶၢဝ်ႉဝႆႉယဝ်ႉလႄႈ ၼၢင်းမႄႈၸဝ်ႈႁိူၼ်း တင်းတွင်းဢမ်ႇတွင်းလီသေ ၸင်ႇထၢမ်ဝႃႈ ၸၢႆးမႃးႁႃၽႂ်ၼႆယူႇ၊ ၸၢႆးၵူၼ်းယွၼ်းၼၼ်ႉ ၸင်ႇလၢတ်ႈဝႃႈ ဢမ်ႇတွင်းၶႃႈလႆႈယဝ်ႉႁႃႉ ၼႆႉၽႃႈၸဵတ်ႉၼႃႈ ဢၼ်ပီႈၼၢင်းႁဝ်းပၼ်ၶႃႈဝႆႉၼၼ်ႉၼႆလႄႈ ၼၢင်းမႄႈၸဝ်ႈႁိူၼ်းၼၼ်ႉ ၸင်ႇတူၵ်းၸႂ်ၵႂႃႇဝႃႈ ဢူဝ်း----ႁူဝ်ႇ---ၼႆယူႇ။ ၸၢႆးၵူၼ်းယွၼ်းၼၼ်ႉၸင်ႇၶိုၼ်းသိုပ်ႇလၢတ်ႈထႅင်ႈဝႃႈ

မိူဝ်ႈၼၼ်ႉတေႉ ၶႃႈပဵၼ်ၵူၼ်းယွၼ်းဢွၼ်ႇၵေႃႉၼိုင်ႈ ၵူၺ်းတေႃႈလဵဝ်ၶႃႈႁဝ်းပဵၼ်ဝႆႉ ဢုၵ်ႉၵထ ၵုမ်ႇပၼ်ႇၼီႇဢၼ်ၼိုင်ႈဢေႃႈ။  မိူဝ်ႈၼၼ်ႉ ဢၼ်ၶႃႈႁဝ်းယွမ်းသူမ်းၵူႈလွင်ႈသေ လႄႇႁႃယွၼ်းၵိၼ် ယူႇၼၼ်ႉ ဝၢႆးမႃးထူပ်းၵၼ် တင်းပီႈၼၢင်းယဝ်ႉ လႆႈတေႃႉဢုတ်ႇပၼ် တေႇဢဝ်ဝၼ်းၼၼ်ႉမႃး ၶႃႈႁဝ်းၵေႃႈ ပဵၼ်ၵူၼ်းမီးႁႅင်းၸႂ်မႃးသေ ၸင်ႇသိုပ်ႇၶတ်းၸႂ်ၵႂႃႇၶႃႈဢေႃႈ ။ ပီႈၼၢင်းႁဝ်းၶႃႈၼႆႉ ပဵၼ်ၵေႃႉဢၼ် ပၼ်တၢင်းဝူၼ်ႉၶႃႈ ပဵၼ်ၵေႃႉဢၼ် ပူၵ်းပၼ်ႁႅင်းၸႂ်ၶႃႈ ဢၼ်ၶႃႈလႆႈယွမ်းသုမ်းၵႂႃႇ ၵူႈၸိူဝ်းၵူႈလွင်ႈၸိူဝ်းၼၼ်ႉယဝ်ႉ။ သင်ဝႃႈဢမ်ႇမႃးထူပ်း ပီႈၼၢင်းႁဝ်းၼႆၵေႃႈ ၶႃႈၼႆႉထၢင်ႇတေႉ တိုၵ်ႉတေပဵၼ်ၵူၼ်းလူမ်းထွင်းၵႂႃႇတင်းႁွင်ႇတင်းၸၢၼ်းယူႇၼၼ်ႉယဝ်ႉ။ ၼၢင်းမႄႈၸဝ်ႈႁိူၼ်းၼၼ်ႉၵေႃႈ ၶိုၼ်းလၢတ်ႈဝႃႈ ဢၼ်ၸၢႆးလႆႈပဵၼ်ၵႂႃႇတင်းသဵင်ႈတင်းမူတ်းၼႆႉ ပဵၼ်လူၺ်ႈၸၢႆးၶဝ်ၶတ်းၸႂ် ႁဵတ်းသၢင်ႈၵႂႃႇၵူၺ်း။ ၶႃႈၼၢင်းပၼ်တၢင်းႁၼ်ထိုင် ၸိူင်ႉႁိုဝ်ၵေႃႈ သင်ဝႃႈ ၸၢႆးၶဝ် ဢမ်ႇဢဝ်သႂ်ႇၸႂ်သေ သိုပ်ႇယွၼ်းၵိၼ်ၵႂႃႇၵေႃႈ မၼ်းတေဢမ်ႇပဵၼ်မႃးၸိူင်ႉၼႆၼင်ႇၵဝ်ႇ။

ၵူၺ်းၵႃႈတေႃႈလဵဝ်တေႉ မီးၶႅၼ်ၶွၼ်လဵဝ်ၵေႃႈ လႆႈပဵၼ်ၸဝ်ႈၵုမ်ႇပၼ်ႇၼီႇၵႂႃႇယဝ်ႉ၊ ယိၼ်းၸူမ်းၸွမ်း ပေႃးဢမ်ႇသုတ်းဢမ်ႇသဵင်ႈဢိူဝ်ႈၸၢႆး။ ၼၢင်းမႄႈၸဝ်ႈႁိူၼ်းလၢတ်ႈပၼ်ၸိူင်ႉၼၼ်သေ၊ ၸၢႆးၶႅၼ်ၶွၼ်လဵဝ်ၵေႃႈ ၶႂ်ႈတွပ်ႇၵုင်ႇၶိုၼ်း တီႈၼၢင်းမႄႈၸဝ်ႈႁိူၼ်းၼၼ်ႉလႄႈ ထၢမ်ပၼ်ႁိူၼ်း လင်ၼိုင်ႈ၊ ၵူၺ်းၵႃႈ ၼၢင်းမႄႈၸဝ်ႈႁိူၼ်း ဢမ်ႇႁပ်ႉၶၢမ်ႇ။ ၸၢႆးဢုၵ်ႉၵထသမ်ႉဝႃႈ ပဵၼ်သင်လႄႈ ဢမ်ႇယွမ်းႁပ်ႉဢဝ်ၼႆ ဝူၼ်ႉပေႃးဢမ်ႇပွင်ႇ။ ၼၢင်းမႄႈၸဝ်ႈႁိူၼ်း ၶူဝ်ၵမ်းၼိုင်ႈသေ ၶိုၼ်းလၢတ်ႈဝႃႈ ၶႃႈႁဝ်းၶဝ်ၵူၼ်းၼႂ်းႁိူၼ်းႁဝ်းၼႆႉတင်းသဵင်ႈ မီးၶႅၼ်သွင်ၶွၼ်မိူၼ်ၵၼ်မူတ်းဢိူဝ်ႈ ၼႆယဝ်ႉ။ ၵွပ်ႈၼၼ် တႃႇတေၸုၵ်းလႆႈၼိူဝ်ၶႃသွင်ၶွၼ်ႁင်းၸဝ်ႈၵဝ်ႇၼၼ်ႉ ၶႃႈႁဝ်းၶဝ် ပဵၼ်ဢၼ်ၵုမ်ႇထူၼ်ႈၼႃႇယဝ်ႉ၊ တႃႇၸၢတ်ႈပၢၼ်ႁဝ်း တေမီးတီႈပွင်ႇလီလီၼၼ်ႉလႄႈ တႃႇတေယူႇၵႂႃႇၼႂ်းလေႃးၵလူင်ၼႆႉ ၸဝ်ႈၵဝ်ႇတေလႆႈၶတ်းၸႂ်ႁင်းၸဝ်ႈၵဝ်ႇဢိူဝ်ႈ၊ ယဝ်ႉၵေႃႈ ၵူၼ်းႁူႉၸၵ်းၸိူဝ်းႁိမ်းႁွမ်းၸိူဝ်းၼၼ်ႉၵေႃႈ လီယုၵ်ႉယွင်ႈပၼ်ၵုင်ႇသိၵ်ႉၶႃႇၶဝ်ဢိူဝ်ႈ၊ ၸိူဝ်းဢၼ်ဢမ်ႇႁူႉၼၼ်ႉၵေႃႈ လီဝႆႉၵႃႈၶၼ်ၶဝ်ဢိူဝ်ႈ။

ပေႃးဝႃႈ ယူႇတီႈတူဝ်ၸဝ်ႈၵဝ်ႇသေ ဝႆႉၵႃႈၶၼ်ပိူၼ်ႈၵွၼ်ႇ ပိူၼ်ႈၵေႃႈၸင်ႇတေဝႆႉၵႃႈၶၼ် ၸဝ်ႈၵဝ်ႇၶိုၼ်းဢိူဝ်ႈ၊ သင်ဝႃႈၸဝ်ႈၵဝ်ႇ ဢမ်ႇယိုၼ်ႈပၼ်ဢွၼ်တၢင်းလႄႈ ၶႂ်ႈလႆႈတီႈပိူၼ်ႈဢွၼ်တၢင်း ဢၼ်ဝႃႈၼၼ်ႉ မၼ်းဢမ်ႇပဵၼ်လႆႈ။ ယဝ်ႉၵေႃႈလူဝ်ႇလႆႈၶတ်းၸႂ်မီးတၢင်းသိူဝ်း ၼႂ်းၼႃႈၵၢၼ်ၸဝ်ႈၵဝ်ႇ ၵွၼ်ႇ ၸၢတ်ႈပၼ်ဢၼ်ဝႃႈၼၼ်ႉ မၼ်းၸွင်ႇၵွႆႈမီးၵႃႈၶၼ်မႃးၼၼ်ႉယဝ်ႉ။ ၵၢၼ်ဢၼ်ၸဝ်ႈၵဝ်ႇလႆႈၸႂ်

လႄႈ လႆႈႁဵတ်းယူႇၼၼ်ႉ ပိၵ်ႉသမ်ႉဝႃႈ မၼ်းဢမ်ႇလႆႈငိုၼ်းၼမ်တၢၼ်ႇ ပိူၼ်ႈႁဵတ်းၵၢၼ်တၢင်ႇဢၼ် ၵေႃႈယဝ်ႉ ပေႃးဝႃႈႁဝ်းမေႃဝႆႉၼမ်ႉၸႂ် မေႃႁၢၼ်ႉၸႂ် မေႃၵျေႃႇၸႂ်ၼႆ ၵူႈၸိူဝ်းၵူႈလွင်ႈတေထူၺ်ႈၸႂ်လူမ်သေ ၸိူဝ်းဢၼ်လႆႈၼမ်ယဝ်ႉ ဢမ်ႇမီးလွင်ႈပဵင်းပေႃး ဢမ်ႇမီးလွင်ႈႁၢၼ်ႉၸႂ်ၼၼ်ႉယဝ်ႉ။

ၼမ်ႉယမ်ၽူႈလူလိၵ်ႈႁဝ်းၶဝ်တင်းသဵင်ႈသေ --

ပၢႆးဝူၼ်ႉၶပ်ႉ

Credit:  www.phothutaw.com