တေႁဵတ်းႁိုဝ်သေ ဝႆႉဝၢင်းၸႂ်

တွၼ်ႈတႃႇတေမေႃဝႆႉဝၢင်းၸႂ်ၼၼ်ႉ မၼ်းလမ်ႇလွင်ႈသေပိူၼ်ႈယဝ်ႉ  တွၼ်ႈတႃႇတေယူႇသဝ်းၵႂႃႇ ၼႂ်းမိူင်းလေႃးၵ ၶူင်းၵၢင်လူင်ၼႆႉ၊ ပေႃးဝႃႈဢမ်ႇမေႃဝႆႉဝၢင်းၸႂ် ပေႃးၼႆ မိူင်းၶူင်းၵၢင်လူင်ၼႆႉ ၵႂၢင်ႈတၢၼ်ႇႁိုဝ်ၵေႃႈ တေၵႅပ်ႈတႃႇ  ၵူၼ်း ဢမ်ႇမေႃဝႆႉဝၢင်းၸႂ်ၶဝ်ၼၼ်ႉယဝ်ႉ။  ယွၼ်ႉၼၼ် ၼင်ႇႁိုဝ် တေလႆႈဝႆႉဝၢင်းၸႂ်ၸိူင်ႉႁိုဝ် တေလႆႈယူႇၵိၼ်

ၵႂႃႇၸိူင်ႉႁိုဝ်ၼႆ လူတူၺ်း ဢၼ်တႅမ်ႈဝႆႉ လွင်ႈဝႆႉဝၢင်းၸႂ် တီႈတႂ်ႈၼႆႉတူၺ်းၶႃႈလႄႈ တေပဵၼ်ဢၼ်ၵမ်ႉထႅမ်        ၼမ်ႉၸႂ် လၢႆးဝႆႉဝၢင်းၸႂ်ယူႇဢၼ်ဝႃႈၼၼ်ႉ ယုမ်ႇယမ်ဝႆႉယူႇၶႃႈ။

------------------------

႑ႉ လွင်ႈၵတ်းယဵၼ်

လွင်ႈပဵင်းပေႃးၸဝ်ႈၵဝ်ႇၼၼ်ႉ ပၼ်လႆႈလွင်ႈၵတ်းယဵၼ်ၸႂ်ဢိူဝ်ႈ။

ၵူၼ်းၵေႃႉဢၼ်မေႃဝႆႉၸႂ် မေႃပဵင်းပေႃးၸႂ်ၶဝ်ၼၼ်ႉ လႆႈၼွၼ်းယူႇၼိူဝ်ၽၢၵ်ႈၵေႃႈ မိူၼ်ၼင်ႇဝႃႈ လႆႈႁွတ်ႈ          ထိုင်မိူင်းၽီယဝ်ႉ။ ၵူၼ်းၵေႃႉဢၼ်ဢမ်ႇမေႃမီးလွင်ႈပဵင်းပေႃးႁၢၼ်ႉၸႂ်ၼၼ်ႉ လႆႈၸၢမ်ႇပူၺ်ႈလွင်ႈၵျေႃႇ 

ထိုင်မိူင်းၽီၵေႃႈ မိူင်ၼင်ႇဝႃႈ လႆႈယူႇမိူင်းငရၢႆးလူင်ယဝ်ႉ။

ဢၼ်လွင်ႈယႂ်ႇတီႈသုတ်းၼၼ်ႉ ပဵၼ်ၸႂ်ၵူၼ်းႁဝ်းၼႆႉၵူၺ်း၊ဢၼ်ၶႂ်ႈလႆႈယူႇလႄႈပႆႇလႆႈသေ ပဵၼ်ဢၼ်မႆႈဢူၵ်းမႆႈၸႂ်ယူႇၼၼ်ႉ ၶူဝ်းၶွင်ဢၼ်ၸဝ်ႈၵဝ်ႇပိူင်ႇဝႆႉတင်းမူတ်းၼၼ်ႉၵေႃႈ မိူၼ်ၼင်ႇဝႃႈမၼ်းဢမ်ႇမီးၵႃႈၶၼ်သင်တွၼ်ႈတႃႇမၼ်း မိူၼ်ပဵၼ်ဝႆႉၵူၼ်းၽၢၼ်ယူႇၼၼ်ႉယဝ်ႉ။ ၶေႃႈၵႂၢမ်းဢၼ်ဝႃႈ ပေႃးၶႂ်ႈလႆႈၼႆ မိူၼ်ၵူၼ်းၶၢၼ်ၸႂ်ပေႃးဢမ်ႇၶႂ်ႈလႆႈၼႆ မိူၼ်ၵူၼ်း ၵတ်းယဵၼ်ၸႂ်ဢၼ်ဝႃႈၼၼ်ႉ တေယၢမ်ႈငိၼ်းၵၼ်ယူႇ။

႒ႉ ဝူၼ်ႉသွၼ်ႇတႃႇၶႂၢၵ်ႈလႄႈ ဢၼ်ဢမ်ႇဝူၼ်ႉသွၼ်ႇတႃႇၶႂၢၵ်ႈၼၼ်ႉၵႂၢင်ႈလိူဝ်ဢိူဝ်ႈ။

ၸႂ်ၵူၼ်းႁဝ်းၼႆႉ ပိုင်ႈဢိင်ဝႆႉသေပိူင်ပိူင်သေယူႇသဝ်းဝႆႉၼၼ်ႉယဝ်ႉ၊သင်ဝႃႈၸဝ်ႈၵဝ်ႇ သုတ်ႉပၼ်ပိူၼ်ႈတႃႇယၢင်ႈ

ၼိုင်ႈၵေႃႈ ပိူၼ်ႈတေၼပ်ႉယမ်ၸဝ်ႈၵဝ်ႇလိူဝ်မႃးတႃႇ ပေႇၼိုင်ႈၼၼ်ႉယဝ်ႉ၊ ၵွပ်ႈပိူဝ်ႈလႆႈပိုင်ႈဢိင်ၵၼ်ဝႆႉလႄႈ တီႈဢၼ်လွတ်ႈဝႆႉဢၼ်ဝႃႈၼၼ်ႉ မၼ်းဢမ်ႇမီး၊ သင်ဝႃႈၸဝ်ႈၵဝ်ႇယၢင်ႈၶဝ်ႈၵႂႃႇတီႈၼႂ်းပိူၼ်ႈၼိုင်ႈယၢင်ႈၼႆၵေႃႈ ပိူၼ်ႈတေထၢင်ႇလဵၵ်ႉၸဝ်ႈၵဝ်ႇၼိုင်ႈယၢင်ႈယူႇယဝ်ႉ။

ၸႂ်ၵူၼ်းႁဝ်း ဢၼ်ဝႃႈၼႆႉ မိူၼ်ဝႆႉသဵၼ်ႈတၢင်းဢၼ်ၼိုင်ႈၼၼ်ႉယဝ်ႉ၊ သင်ဝႃႈၸဝ်ႈၵဝ်ႇၶႂ်ႈမႄႇၶႂၢၵ်ႈသဵၼ်ႈတၢင်းတႃႇၸဝ်ႈၵဝ်ႇတေပႆပေႃးၼႆသဵၼ်ႈတၢင်းၼၼ်ႉ တေၵႅပ်ႈၵိၼ်းမႃးတႃႇၸဝ်ႈၵဝ်ႇယူႇယဝ်ႉ။

သင်ဝႃႈၸဝ်ႈၵဝ်ႇထူပ်းၺႃး ၽူႈမီးပၺ်ၺုႇပေႃးၼႆ ယႃႇပေတႂၢၵ်ႈ တႂ်ႈတႂၢၵ်ႈၼိူဝ်ႈတေႃႇၶဝ် ၵူဝ်ၶဝ်ဢမ်ႇၸွႆႈသင်သူ

ထႅင်ႈဢိူဝ်ႈ ပေႃးသူထူပ်းတင်းယၢပ်ႇမႃး၊ သင်ဝႃႈၸဝ်ႈၵဝ်ႇထူပ်းၺႃး ၽူႈမိူၵ်ႈၼႆၵေႃႈယႃႇ ယႃႇပေသွၼ်ႇတႂ်ႈသွၼ်ႇ

ၼိူဝ်သင်ၸူးၶဝ် ပေႃးဝႃႈၶဝ်လႆႈၶၢဝ်းယၢမ်းလီတႃႇထူပ်းသူထႅင်ႈ ၶဝ်တေႁဵတ်းႁၢႆႉသူဢိူဝ်ႈ။

လွင်ႈဢၼ်ႁဝ်းဝႆႉၸႂ်ယႂ်ႇၸႂ်ယၢဝ်းတေႃႇပိူၼ်ႈလႆႈၵူႈၵေႃႉၼၼ်ႉ ပဵၼ်တိုဝ်ႉတၢင်းတႃႇပိုတ်ႇပၼ်သဵၼ်ႈတၢင်းၸဝ်ႈ

ၵဝ်ႇၵႂႃႇဝၼ်းမိူဝ်းၼႃႈၼၼ်ႉယဝ်ႉ။

႓ႉ ပွႆႇဝၢင်းပၼ်၊

ပွႆႇဝၢင်းပၼ်လွင်ႈဢၼ်ပဵၼ်မႃးတင်းလင်ၼၼ်ႉသေ ယူႇလူမ်ၸႂ်လူမ်ၶေႃးလႄႈ။

တွၼ်ႈတႃႇမိူဝ်ႈၼႆႉ ပဵၼ်မႃးၵၢၼ်ယႂ်ႇလူင်ၸိူင်ႉႁိုဝ်ၵေႃႈ ပေႃးထိုင်မိူဝ်ႈၽုၵ်ႈမႃးတေပဵၼ်ၵႂႃႇၵၢၼ်ဢွၼ်ႇဢၼ်

ၼိုင်ႈၵူၺ်း၊ ပီၼႆႉ ပဵၼ်မႃးၵၢၼ်ယႂ်ႇလူင်ၸိူင်ႉႁိုဝ်ၵေႃႈ ပေႃးထိုင်ပီမႃး တေမိူၼ်ဝႆႉၼင်ႇဢပုမ်ႇဢွၼ်ႇဢၼ်

ၼိုင်ႈၵူၺ်း။

တႃႇၸၢတ်ႈၼႆႉ ပဵၼ်မႃးလွင်ႈၵၢၼ်ယႂ်ႇယၢပ်ႇယၢၵ်ႈလူင်တႃႇၸဝ်ႈၵဝ်ႇၸိူင်ႉႁိုဝ်

ၵေႃႈ ပေႃးဝႃႈတၢႆၵႂႃႇထိုင်ၸၢတ်ႈၼႃႈယဝ်ႉတေႉ တေပဵၼ်ၵႂၢမ်းပိူၼ်ႈလၢတ်ႈၵူၺ်း။

မိူဝ်ႈဢၼ်ၸဝ်ႈၵဝ်ႇ ႁဵတ်းၵၢၼ်သေ ဢွင်ႇမၢင်ႇလႆႈလီလႆႈပဵၼ်ယူႇၼၼ်ႉ ယႃႇလိုမ်းၽၢင်ႉပၼ် တူဝ်ၸဝ်ႈၵဝ်ႇ။ 

တွၼ်ႈတႃႇဝၼ်းမိူဝ်ႈၼႆႉ ၶဝ်ႈၼမ်ဢွၵ်ႇၼမ်ၵေႃႈ တွၼ်ႈတႃႇဝၼ်းမိူဝ်ႈၽုၵ်ႈ ၸဝ်ႈၵဝ်ႇတေလႆႈၶတ်းၸႂ်

ယူႇၶိူဝ်းၶိူဝ်းယႂ်းယႂ်းဢမ်ႇႁၢင်ႉ၊ ပေႃးယဝ်ႉ ၸဝ်ႈၵဝ်ႇတေလႆႈတေႇထႅင်ႈဝၼ်းမႂ်ႇတႃႇၸဝ်ႈၵဝ်ႇယူႇတိၵ်းတိၵ်းဢိူဝ်ႈ။

႔ႉ ႁဵတ်းငၢႆႈငၢႆႈၵူၺ်း၊

တူၺ်းႁႂ်ႈႁၼ်ငၢႆႈငၢႆႈတွၼ်ႈတႃႇၼႂ်းလူၵ်ႈၼႆႉ၊ လွင်ႈမူၼ်ႈသိူဝ်းဢၼ်ဝႃႈၼၼ်ႉမၼ်းမီးဝႆႉၵူႈတီႈ။

ပေႃးဝႃႈၸဝ်ႈၵဝ်ႇမေႃဝႆႉၸႂ် ၵႂၢင်ႈၵႂၢင်ႈသေယူႇၵႂႃႇၸိုင် တွၼ်ႈတႃႇၸဝ်ႈၵဝ်ႇၼႂ်းလေႃးၵလူင်ၼႆႉ တိုၼ်းၵႂၢင်ႈယူႇ

ယဝ်ႉ။ ထူၺ်ႈၸႂ်ၼႆႉ ငၢႆႈယူႇဝႃႈၼႆသေတႃႉမၢင်ပွၵ်ႈမၢင်လႂ်ယင်းထူၺ်ႈယၢပ်ႇၼႃႇလႃႈ၊ သင်ဝႃႈၸဝ်ႈၵဝ်ႇမေႃဝႆႉၸႂ်

လွတ်ႈလွတ်ႈလႅဝ်းလႅဝ်းၸိုင် တွၼ်ႈတႃႇၸၢတ်ႈပၢၼ်ၸဝ်ႈၵဝ်ႇၼၼ်ႉၵေႃႈ တိုၼ်းလွတ်ႈလႅဝ်းယူႇယဝ်ႉ။ ၸဝ်ႈၵဝ်ႇ

ထိုင်တီႈလႂ် ႁဵတ်းၵၢၼ်တီႈလႂ်ၼႆၵေႃႈ ၸဝ်ႈၵဝ်ႇတေမီးလွင်ႈမူၼ်ႈသိူဝ်းတဵမ်ၸႂ်ၸဝ်ႈၵဝ်ႇဢိူဝ်ႈ၊ တွၼ်ႈတႃႇၸၢတ်ႈပၢၼ်ၼႆႉ ၵၢၼ်မၢင်ၸိူဝ်ႉမၢင်လွင်ႈ ပေႃးဝႃႈၸဝ်ႈၵဝ်ႇ မေႃပွႆႇဝၢင်းပၼ်ၵွၼ်ႇ ၸဝ်ႈၵဝ်ႇၸွင်ႇတေမီးတၢင်းသိူဝ်းလႆႈ

ဢိူဝ်ႈ၊ ယွၼ်ႉဝႃႈၵၢၼ်မၢင်ဢၼ် တေႁဵတ်းႁႂ်ႈၸဝ်ႈၵဝ်ႇယူႇယၢပ်ႇ ၵႂႃႇယၢပ်ႇ၊ ၵိၼ်ယၢပ်ႇ ၼႂ်းၵႄႈၵၢင်ပိူၼ်ႈ။ သၢႆးဢၼ်မီးၼႂ်းမိုဝ်းၸဝ်ႈၵဝ်ႇၼိုင်ႈၵမ်ၼၼ်ႉ ပေႃးဝႃႈၸဝ်ႈၵဝ်ႇ ပွႆႇၽႃႈမၼ်းၵွၼ်ႇ ၸဝ်ႈၵဝ်ႇၸွင်ႇတေမီးသုၼ်ႇ

ၵမ်လႆႈထႅင်ႈသၢႆးဢၼ်မီးတင်းၼႃႈၸဝ်ႈၵဝ်ႇၼၼ်ႉဢိူဝ်ႈ၊ မၢင်ပွၵ်ႈမၢင်လႂ် လွင်ႈပွႆႇၽႃႈ လွင်ႈၸုၼ်ႉပႅတ်ႈ တီႈလိုၼ်းသုတ်းၼၼ်ႉ ပဵၼ်တိုဝ်ႉတၢင်းတႃႇတေလႆႈမႃးထႅင်ႈဢၼ်မႂ်ႇမႂ်ႇတင်းၼႃႈၼၼ်ႉယဝ်ႉ။ ဢီသင်ၵေႃႈယဝ်ႉ ပေႃးဝႃႈမၼ်းႁိုင်မႃးၼႆ တေပဵၼ်ဢၼ်ၵိုတ်းပႅတ်ႈတင်းလင်ၵူၺ်း။

႕ႉ မၢၵ်ႇႁူဝ်ၸႂ်

သင်ဝႃႈၸဝ်ႈၵဝ်ႇၶႂ်ႈလႆႈမၢၵ်ႇႁူဝ်ၸႂ်ပိူၼ်ႈၼႆ တေလႆႈဢဝ်မၢၵ်ႇႁူဝ်ၸႂ်ၸဝ်ႈၵဝ်ႇလႅၵ်ႈၸွင်ႇတေလႆႈ။

ၸဝ်ႈၵဝ်ႇယႃႇပေၵႂႃႇသႄႉၼႄးသႄႉသွမ်း လွင်ႈယူပ်ႈယွမ်းပိူၼ်ႈၼၼ်ႉ၊လူဝ်ႇလႆႈမေႃတူၺ်းႁၼ်ထိုင် ၽၢႆႇပိူၼ်ႈ

ၽၢႆႇႁဝ်းၼၼ်ႉဢိူဝ်ႈ။  ယႃႇပေၵႂႃႇၶူဝ်လဵၼ်ႈ ၵူၼ်းၵေႃႉဢၼ်မေႃဝႆႉၸႂ် ၵႂၢင်ႈယႂ်ႇယၢဝ်းၼၼ်ႉ ၸဝ်ႈၵဝ်ႇလူဝ်ႇမေႃ

ပွင်ႇၸႂ်ပၼ်ဢိူဝ်ႈ၊ ၵူၼ်းမေႃဝႆႉၸႂ်ၵႂၢင်ႈ ယႂ်ႇယၢဝ်းၶဝ်ၼၼ်ႉ ဢမ်ႇၸႂ်ႈဝႃႈ  ၶဝ်ဢမ်ႇမေႃဢွၵ်ႇတေႃးသ လွင်ႈဢၼ်

ၶဝ်ယိူၼ်ႉလႆႈၼၼ်ႉၵေႃႈ ဢမ်ႇၸႂ်ႈဝႃႈၶဝ်ပဵၼ်ၵူၼ်း ဢႃႉ ၊ လွင်ႈယိူၼ်ႉၵၼ်ႈဢၼ်ဝႃႈၼၼ်ႉ ပဵၼ်ဝႆႉ ယွၼ်ႉတၢင်း

ၵတ်ႉၽႂ်မၼ်းၼၼ်ႉယဝ်ႉ။ပေႃးမီးလွင်ႈယိူၼ်ႉၵၼ်ႈလႆႈၵွၼ်ႇ ၸွင်ႇတေမီးလႆႈလွင်ႈဢွင်ႇမၢင်ႇဢၼ်ဝႃႈၼၼ်ႉ ဢမ်ႇထုၵ်ႇလီလိုမ်း။

တၢင်းႁၵ်ႉဢၼ်ဝႃႈၼၼ်ႉၵေႃႈ ဢထမ်ႇမတိုၼ်ႉၸၼ်ဢဝ်ဢမ်ႇလႆႈ၊ ယွၼ်ႉဝႃႈမၢၵ်ႇႁူဝ်ၸႂ်ၵူၼ်းၼႆႉ မၼ်းဢမ်ႇၸႂ်တၢင်းလဵၼ်ႈ ၸိူင်ႉႁုၼ်ႇႁၢင်ႈၼၼ်ႉယဝ်ႉ။ ပေႃးၸဝ်ႈၵဝ်ႇၶႂ်ႈၵိၼ်ၼိူဝ်ႉတီႈပိူၼ်ႈၵေႃႈ ၸဝ်ႈၵဝ်ႇတေလႆႈၸွၵ်းပၼ်

ပႃ ဢၼ်ၸဝ်ႈၵဝ်ႇမီးၼၼ်ႉယဝ်ႉ၊ မိူၼ်ၼၼ်သင်ဝႃႈၸဝ်ႈၵဝ်ႇ ၶႂ်ႈလႆႈမၢၵ်ႇႁူဝ်ၸႂ်တၢင်းႁၵ်ႉတီႈပိူၼ်ႈၵေႃႈ ၸဝ်ႈၵဝ်ႇ

တေလႆႈဢဝ်မၢၵ်ႇႁူဝ်ၸႂ်တၢင်းႁၵ်ႉၸဝ်ႈၵဝ်ႇပၼ်ပိူၼ်ႈဢွၼ်တၢင်းၼၼ်ႉယဝ်ႉ။ ပေႃးလႅၵ်ႈၵၼ်လႆႈၸိူင်ႉၼၼ်ၵွၼ်ႇ ၸွင်ႇတေလႆႈတၢင်းႁၵ်ႉၸႅတ်ႈ ဢၼ်ဝႃႈၼၼ်ႉယဝ်ႉ။ ပေႃးၶႂ်ႈလႆႈၸႂ်ပိူၼ်ႈၵေႃႈတေလႆႈဢဝ်ၸႂ်ၸဝ်ႈၵဝ်ႇလႅၵ်ႈ

ဢဝ်ၼၼ်ႉယဝ်ႉ မၼ်းၸွင်ႇတေလႆႈၸႂ် ဢၼ်ၸႅတ်ႈဢၼ်ၸၢင်ႇမၼ်း။

႖ႉ ၵုသူဝ်ႇ ဢၵုသူဝ်ႇ

ပေႃးဝႃႈမီးၵုသူဝ်ႇၼမ်ၼႆ ဢၵုသူဝ်ႇၼၼ်ႉ မၼ်းလီၵူဝ်ဝႆႉဢိူဝ်ႈ။

ၸႂ်ၸဝ်ႈၵဝ်ႇၼၼ်ႉ ပိူၼ်ႈဢိုတ်းလႆႈယူႇၵေႃႈ ၵူၺ်းၵႃႈ ၸႂ်ၸဝ်ႈၵဝ်ႇ ဢၼ်ပဵၼ်ဝႆႉၼၼ်ႉ ပဵၼ်ၸႂ်ၵုသူဝ်ႇႁႃႉ

 ဢၵုသူဝ်ႇႁႃႉ ဢၼ်ဝႃႈၼၼ်ႉ ၽြႃးပဵၼ်ၸဝ်ႈႁူႉဢိူဝ်ႈ။ ၵူၼ်းၵေႃႉဢၼ် ႁဵတ်းၵၢၼ်လီၵုသူဝ်ႇၼၼ်ႉ

ၸႂ်ဢၵုသူဝ်ႇၸမ်ႉ ၵူဝ်သေလႅၼ်ႈပၢႆႈၵႂႃႇၵႆၵႆယဝ်ႉ။ မိူၼ်ၼၼ်သင်ဝႃႈ ႁဵတ်းၵၢၼ်မိူၵ်ႈ ၵၢၼ်ဢၵုသူဝ်ႇၵေႃႈ 

ၸႂ်ၵုသူဝ်ႇၼၼ်ႉ ၵူဝ်သေလႅၼ်ႈပၢႆႈၵႆၵႆၼၼ်ႉယဝ်ႉ။

ၵူၼ်းၵေႃႉဢၼ်ႁဵတ်းၵၢၼ်လီၵူႉသူဝ်ႇၼၼ်ႉ မၼ်းမိူၼ်တူၼ်ႈမွၵ်ႇဢၼ်လဵၵ်ႉလဵၵ်ႉမီးၼႂ်းသူၼ်မွၵ်ႇၼၼ်ႉယဝ်ႉ 

ဢမ်ႇႁၼ်မိူဝ်ႈမၼ်းယႂ်ႇဝႃႈၼႆသေတႃႉ ဝၼ်းၼိုင်ႈမႃး တေပဵၼ်တူၼ်ႈမွၵ်ႇ ယႂ်ႇမႃးသေ တေမီးမွၵ်ႇႁၢင်ႈလီၵီႈမႃး

ယူႇယဝ်ႉ။

ၵူၼ်းၵေႃႉဢၼ် ႁဵတ်းၵၢၼ်မိူၵ်ႈ ဢၵုသူဝ်ႇၼၼ်ႉ မိူၼ်မၢၵ်ႇႁိၼ်လပ်ႉၽႃႉယဝ်ႉ ဢမ်ႇႁၼ်မိူဝ်ႈၽႃႉမိတ်ႈယွမ်းဝႃႈဝႃႈၼႆသေတႃႉဝၼ်းၼိုင်ႈယဝ်ႉဝၼ်းၼိုင်ႈ ၸၢင်ႈႁဵတ်းႁႂ်ႈၽႃႉ မိတ်ႈ ယွမ်းသေႁၵ်းဝၢင်ႈၵႂႃႇဢိူဝ်ႈ။ ၵုသူဝ်ႇ လႄႈ 

ဢၵုသူဝ်ႇၼၼ်ႉ မၼ်းဢမ်ႇမီးဝႆႉၽၵ်းတူ ႁူးပွင်ႇသင် ဢမ်ႇမိူၼ်မိတ်ႈမိူၼ်ၽႃႉသင်ၵေႃႈ မၼ်းၶဝ်ႈဢွၵ်ႇလႆႈ တီႈၼႂ်းၸႂ် ၼႂ်းတူဝ်သူၼၼ်ႉဢိူဝ်ႈ။ လွင်ႈလပ်းသိင်ႇဢၵုသူဝ်ႇလူင်ၼၼ်ႉ ပိူၼ်ႈတၢင်ႇၵေႃႉဢမ်ႇႁူႉၸွမ်း ဢမ်ႇ

မွတ်ႇၽႆးသင်ပၼ် ဝႃႈၼႆသေတႃႉတႃႇၸဝ်ႈၵဝ်ႇတေႉ မိူၼ်ယူႇဝႆႉၼႂ်းလပ်းသိင်ႇလူင်ဝႆႉၼၼ်ႉယဝ်ႉ။

ၵုသူဝ်ႇၸမ်ႉ ပိူၼ်ႈတၢင်ႇၵေႃႉ ဢမ်ႇတႆႈၽႆးသင်ပၼ် ဢမ်ႇယုၵ်ႉယွင်ႈသင်ပၼ်ၸဝ်ႈၵဝ်ႇၵေႃႈ တွၼ်ႈတႃႇၵေႃႉ

ႁဵတ်းၵၢၼ်လီၵုသူဝ်ႇၼၼ်ႉတေႉၼႂ်းၸႂ်ၸဝ်ႈၵဝ်ႇၼၼ်ႉ မိူၼ်ၼင်ႇဝႃႈႁိူဝ်ႈလႅင်းမိူၼ်ၼင်ႇသၢႆဝၼ်းယူႇယဝ်ႉ။

႗ႉ တီႈလွတ်ႈလႅဝ်း

ယူႇတီႈဢၼ်လွတ်ႈလွတ်ႈၼၼ်ႉသေ ၸဝ်ႈၵဝ်ႇၶႂ်ႈသႂ်ႇသင်ၵေႃႈသႂ်ႇၵႂႃႇလႄႈ။

တွၼ်ႈတႃႇၸဝ်ႈၵဝ်ႇၼၼ်ႉ ၸဝ်ႈၵဝ်ႇတေလႆႈဝႆႉပၼ် တီႈဢၼ်ၵႂၢင်ႈတႃႇထူၺ်ႈၸႂ်လႆႈ လူမ်ၸႂ်လူမ်ၶေႃးၸဝ်ႈ

ၵဝ်ႇၼၼ်ႉယဝ်ႉ။ ပေႃးႁဵတ်းၼၼ်ၵွၼ်ႇ ၸွင်ႇတေမီး ႁူးဢွၵ်ႇၸႂ်လႆႈ၊ ၸႂ်ႁဝ်းၼႆႉ ပေႃးဝႃႈ မၼ်းယူႇ ၵႅပ်ႈၼႃႇ

ပေႃးၼႆ မၼ်းထူၺ်ႈၸႂ်ယၢပ်ႇၼၼ်ႉယဝ်ႉ။

မိူဝ်ႈဢၼ်ၸဝ်ႈၵဝ်ႇ လႆႈၵျေႃႇသေပိူၼ်ႈၼၼ်ႉ ၸဝ်ႈၵဝ်ႇတေလႆႈ ဝူၼ်ႉထတ်းသၢင်ႈပၼ်လွင်ႈဢၼ်ၸဝ်ႈ

ၵဝ်ႇၵျေႃႇၼၼ်ႉဢိူဝ်ႈ၊ ပေႃးႁဵတ်းၼၼ်ၵွၼ်ႇ ၸဝ်ႈၵဝ်ႇၸွင်ႇလႆႈလွင်ႈၵျေႃႇ ဢၼ်ၸႅတ်ႈၸၢင်ႇမၼ်း။

မိူဝ်ႈဢၼ် ၸဝ်ႈၵဝ်ႇၸဵပ်းၸႂ်ၼၼ်ႉၵေႃႈ ႁႂ်ႈၶိုၼ်းမေႃပၼ်ႁႅင်းၸႂ်ၸဝ်ႈၵဝ်ႇၶိုၼ်းဢိူဝ်ႈ၊ ပေႃးမေႃပၼ်ႁႅင်းၸႂ်ၸဝ်ႈ

ၵဝ်ႇၶိုၼ်းၵွၼ်ႇ လွင်ႈၸဵပ်းၸႂ်ၼၼ်ႉၸွင်ႇတေယူပ်ႈယွမ်းသေ ႁၢႆၵႂႃႇပႅတ်ႈ။

မိူဝ်ႈဢၼ်ၸဝ်ႈၵဝ်ႇ မီးလွင်ႈသုၵ်ႉသၵ်ႉၼႃႇၼၼ်ႉ ႁႂ်ႈပၼ်ၶၢဝ်းယၢမ်းတႃႇမီးတၢင်းသိူဝ်းၸႂ်လႄႈ၊ ပေႃးႁဵတ်း ၼၼ်ၵွၼ်ႇ လွင်ႈသုၵ်ႉယုင်ႈလူင်ၸဝ်ႈၵဝ်ႇၼၼ်ႉ ၸွင်ႇတေႁၢႆၵႂႃႇလႆႈ။

မိူဝ်ႈဢၼ်ၸဝ်ႈၵဝ်ႇလႆႈပွႆႇပႅတ်ႈသေ ၵိုတ်းၸဝ်ႈၵဝ်ႇၵေႃႉလဵဝ်ၼၼ်ႉႁႂ်ႈႁူႉဝႃႈ ၸဝ်ႈၵဝ်ႇႁၵ်ႉတူဝ်ၸဝ်ႈၵဝ်ႇလိူဝ်ပိူၼ်ႈဢၼ်ဝႃႈၼၼ်ႉယဝ်ႉ။ပေႃးပၼ်ႁႅင်းၸႂ်ၸဝ်ႈၵဝ်ႇလႆႈၸိူင်ႉၼၼ်ၵွၼ်ႇ လွင်ႈတၢင်းႁၵ်ႉဢၼ်လႆႈၶၢမ်ႇလွင်ႈပွႆႇ

ပႅတ်ႈၼၼ်ႉ ၸွင်ႇတေႁူႉဝႃႈ ၵေႃႉဢၼ်ၸဝ်ႈၵဝ်ႇႁၵ်ႉသုတ်းၼၼ်ႉ ဢမ်ႇၸႂ်ပိူၼ်ႈ ပဵၼ်တူဝ်ၸဝ်ႈၵဝ်ႇၼႆယဝ်ႉ။

လွင်ႈဢၼ်ဝႆႉ တီႈလွတ်ႈလႅဝ်းၼၼ်ႉ ႁႂ်ႈႁူႉဝႃႈ တေလႆႈမီးတႃႇၽိူမ်ႉထႅမ်၊ လွင်ႈဢၼ်ၸဝ်ႈၵဝ်ႇမေႃဝႆႉပၼ် ၶၢဝ်း

ယၢမ်းၸဝ်ႈၵဝ်ႇၼၼ်ႉမၼ်းမီးၵႃႈၶၼ်ၵႃႈႁိုဝ် ဢၼ်ဝႃႈၼၼ်ႉ ပဵၼ်ဢၼ်ၵူၼ်းႁဝ်းလိုမ်းႁူႉ လိုမ်းႁၼ် ဢၼ်ၼိုင်ႈ

ယဝ်ႉ။

႘ႉ တၢင်ႇၵျေးၸူးလႄႈ

တၢင်ႇၵျေးၸူးပၼ် ၵေႃႉဢၼ်ႁဵတ်းႁႂ်ႈၸဝ်ႈၵဝ်ႇ ၸဵပ်းၸႂ်ၼၼ်ႉလႄႈ၊

ယွၼ်ႉဝႃႈ မၼ်းႁဵတ်းပၼ် ႁႂ်ႈၸႂ်သူ မီးလွင်ႈၵႅၼ်ႇၶႅင်တိူဝ်းလိူဝ်မႃး။

တၢင်ႇၵျေးၸူးပၼ် ၵေႃႉဢၼ်လၵ်ႉလႅၼ်ၸဝ်ႈၵဝ်ႇၵႂႃႇၼၼ်ႉလႄႈယွၼ်ႉဝႃႈ မၼ်းႁဵတ်းႁႂ်ႈပၼ် ႁႂ်ႈသူ 

မီးလွင်ႈၽၢင်ႉသတိသေ ယႃႇႁႂ်ႈယူႇမဝ်ၵိၼ်မၢင် ယႃႇႁႂ်ႈလႆႈပဵၼ်ၵူၼ်းယုမ်ႇပိူၼ်ႈငၢႆႈၼၼ်ႉယဝ်ႉ။

တၢင်ႇၵျေးၸူးပၼ် ၵေႃႉဢၼ် ၸုၼ်ႉပွႆႇပႅတ်ႈသူၼၼ်ႉလႄႈ ယွၼ်ႉဝႃႈ ပေႃးဢမ်ႇမီးၶဝ်ယဝ်ႉ သူတေပဵၼ်

ၵူၼ်းမေႃပိုင်ႈဢိင်တူဝ်ၸဝ်ႈၵဝ်ႇၵႂႃႇလႆႈၼၼ်ႉယဝ်။

တၢင်ႇၵျေးၸူးပၼ် ၵေႃႉဢၼ် ဢီးသူလူမ်ႉၼၼ်ႉလႄႈ ယွၼ်ႉဝႃႈ မၼ်းသွၼ်ႁႂ်ႈသူလူမ်ႉသေ ႁႂ်ႈမေႃလုၵ်ႉ

ၶိုၼ်းႁင်းၵူၺ်း။

တၢင်ႇၵျေးၸူးပၼ် ၵေႃႉဢၼ် ဝူၺ်ႇၽၢၼ်ႇ ထတ်းသၢင်သူၼၼ်ႉလႄႈ ယွၼ်ႉၶဝ်ဝူၺ်ႇၽၢၼ်ႇ ထတ်းသၢင်ယဝ်ႉ 

ၸဝ်ႈၵဝ်ႇၸွင်ႇတေႁူႉဝႃႈ ၸဝ်ႈၵဝ်ႇမီးတီႈယူပ်ႈယွမ်းတီႈလႂ် ဢၼ်ဝႃႈၼၼ်ႉယဝ်ႉ။

တၢင်ႇၵျေးၸူးပၼ် ၵေႃႉဢၼ် ႁဵတ်းႁႂ်ႈၸဝ်ႈၵဝ်ႇ ႁူႉလႆႈ တူဝ်ထူပ်းလႆႈၵူႈၸိူဝ်းၵူႈလွင်ႈၼၼ်ႉလႄႈ ပေႃးဝႃႈၸဝ်ႈၵဝ်ႇ ႁူႉလႆႈ တူဝ်ထူပ်းလႆႈၼမ်ၵႃႈႁိုဝ်ၵေႃႈ တေပဵၼ်တွၼ်ႈသွၼ် တႃႇတူဝ်ၸဝ်ႈၵဝ်ႇၵႂႃႇၶၢဝ်းၵႆဢိူဝ်ႈ။

႙ႉ ႁဵတ်းၵႂႃႇၸွမ်း ၵၢမ်ႇၸႃႇတႃႇပၼ်မႃးလႄႈ

လွင်ႈ ၵတ်းယဵၼ်သိူဝ်းသႃႇၼၼ်ႉ တေၸပ်းၸွမ်းတူဝ်ႁဝ်းၵႂႃႇဢိူဝ်ႈ။

ၸၢတ်ႈပၢၼ်ၵူၼ်းဢၼ်ဝႃႈၼၼ်ႉ မၼ်းမိူၼ် ၵေႃႇၽီႇၼိုင်ႈၵွၵ်းယဝ်ႉ။ ၼမ်ၵေႃႈလီ ဢႄႇၵေႃႈလီ၊ ဢမ်ႇမီးလွင်ႈတႃႇတေႁိမ်ၵၼ်သင်၊ၼမ်ႉၼမ်ၵေႃႈလီ ၼမ်ႉဢႄႇဢႄႇၵေႃႈလီ၊ ယူႇတီႈၵူၼ်းမၵ်ႉမၼ်း သေလိူၵ်ႈၵိၼ်ၵူၺ်း၊ ၵိၼ်ဝႆးဝႆးၸိူင်ႉၼင်ႇၵိၼ်ၼမ်ႉၵေႃႈလႆႈ ၸၼ်ၶၢဝ်းယၢမ်းသေ သူတ်ႉၵိၼ်ၵမ်းဢိတ်းဢိတ်းၵေႃႈလႆႈ၊

ဢမ်ႇႁၼ်မၼ်းပဵၼ်သင်၊  ဢၼ်ၵတ်းၵေႃႈၵိၼ်ဝၢၼ်၊ ဢၼ်မႆႈ ၵေႃႈၵိၼ်ဝၢၼ်၊ မၵ်ႉၽႂ်မၵ်ႉမၼ်း၊ မိူဝ်ႈၵိၼ်ၼၼ်ႉ သင်ယုမ်ႉ သေၵိၼ် ယိုင်းၶႅၼ်းဝၢၼ် ယိုင်ႈၶႅၼ်းၶႅမ်ႉလိူဝ်၊ ဢၼ်ၶူမ်ၵေႃႈဝၢၼ် ဢၼ်ၸဵမ်းၵေႃႈဝၢၼ်၊ ယူတီႈၽႂ်ၵျိူၵ်ႈ ၸိူင်ႉႁိုဝ်၊ မၼ်းယူႇတီႈၸဝ်ႈၵဝ်ႇ ႁပ်ႉၶၢမ်ႇမၼ်းၵူၺ်း၊ မၼ်းမီးၵူႈလၢႆး။

တႃႇၵူၼ်းၼိုင်ႈၵေႃႉၼၼ်ႉ ယွၼ်ႉၸဝ်ႈၵဝ်ႇၵႂႃႇ လုမ်းလႃးတူၺ်းထိုင်လႄႈ မၼ်းၸင်ႇၶူမ်တႃႇၸဝ်ႈၵဝ်ႇယဝ်ႉ။ 

ယွၼ်ႉၸဝ်ႈၵဝ်ႇ ဝႆႉၸႂ်ထၢင်ႇၽိတ်းၼိူဝ်မၼ်းလႄႈ ၸဝ်ႈၵဝ်ႇၸွင်ႇ တေၸဵပ်ၸႂ် မႆႈၸႂ်ယဝ်ႉ။ ပေႃးမေႃတူၺ်း 

ၵႂႃႇသိုဝ်ႈသိုဝ်ႈၵွၼ်ႇၸွင်ႇတေမီးတၢင်းသိူဝ်းလႆႈ၊ ပေႃးဢဝ်မၢၵ်ႇတႃ မူၼ်ႈမူၼ်ႈသိူဝ်းသိူဝ်းၼႆႉ တူၺ်းႁၼ်ၵွၼ်ႇ 

လွင်ႈၵတ်းယဵၼ်ၸႂ် ဢၼ်ဝႃႈၼၼ်ႉ မၼ်းၸွင်ႇၸပ်းၸွမ်းႁဝ်းမႃးယဝ်ႉ။

ႁဝ်းၸိူဝ်းပဵၼ်ၵူၼ်းယူႇၼႆႉ ပဵၼ်ၶႅၵ်ႇၼႂ်းလေႃးၵ ပွတ်းဢွၼ်ႇ တွၼ်ႈၼိုင်ႈၵူၺ်း၊ ဢဝ်ၵိူဝ်သႂ်ႇတဵမ်ၵွၵ်းသေ ၵႂႃႇသႂ်ႇၵိၼ်ၼမ်ႉၼဵင်ႈၵေႃႈ တေၸဵမ်းပူၼ်ႉသေတေၶူမ်ၵႂႃႇဢိူဝ်ႈ၊ ပေႃးသႂ်ႇဢိတ်းဢိတ်းသေ သႂ်ႇၼမ်ႉၼဵင်ႈတဵမ် ၵွၵ်းၵွၼ်ႇ ၸွင်ႇၵွႆႈၵိၼ်လႆႈယဝ်ႉ။

သင်ဝႃႈ လေႃးၵထမ်ႇလူင်ၼႆႉ မိူၼ်ၼင်ႇၵိူဝ်ဝႆႉၼႆၸိုင်မၼ်းယူႇတီႈၸဝ်ႈၵဝ်ႇသေ လိူၵ်ႈသႂ်ႇၵိၼ်ၵူၺ်း၊ သင်ဝႃႈ 

ဢမ်ႇမီးတိုဝ်ႉတၢင်းတႃႇတေလိူၵ်ႈၵိၼ်ၼႆၵေႃႈ ယူႇၵႂႃႇၸွမ်းၵၢမ်ႇၸႃႇတႃႇပၼ်မႃးၼၼ်ႉလႄႈ။

ၶေႃႈလူပ်းလင်

တႃႇတေလႆႈသုတ်ႇ ဢဝ်လူမ်းၵတ်းလူမ်းယဵၼ်ၼၼ်ႉ ၽႂ်ၵေႃႈမုင်ႈမွင်းမႃးၵူႈၵေႃႉ၊ တႃႇတေမေႃပွင်ႇၸႂ်ပၼ်ၵၼ်ၼၼ်ႉၵေႃႈပိူၼ်ႈၵေႃႈ မုင်ႈမွင်းမႃးယူႇႁင်းၽႂ်ႁင်းမၼ်းၼၼ်ႉယဝ်ႉ။ ပေႃးၶႂ်ႈႁူႉၸႂ်ပိူၼ်ႈ ထၢမ်တူၺ်းၸႂ်ႁဝ်းဢၼ်ဝႃႈၼၼ်ႉယဝ်ႉ။ ယွၼ်ႉၼၼ် လွင်ႈပွင်ႇၸႂ်ပၼ်ၵၼ်ၼႆႉ မၼ်းလမ်ႇလွင်ႈတႃႇ ၸၢတ်ႈပၢၼ်ၵူၼ်းႁဝ်းတင်း ၼႃႈ တေႉတေႉဢိူဝ်ႈ။

ၼမ်ႉယမ်ၽူႈလူလိၵ်ႈႁဝ်းၶဝ်တင်းသဵင်ႈသေ ----

ပၢႆးဝူၼ်ႉၶပ်ႉ

Credit: Peace

Be a better than yesterday, I wish smile emotion.