လဵပ်ႈႁဵၼ်းတူၺ်း လွင်ႈ One Coin

One Coin ဢၼ်ဝႃႈၼႆႉ ပဵၼ်ငိုၼ်း ဢၼ်ၽူႈၶူင်ၶဝ် ၶူင်ဢွၵ်ႇမႃးၼိူဝ် IT ဢမ်ႇၼၼ် Online ႁႂ်ႈငၢႆးမိူၼ် မဵတ်ႉငိုၼ်း​​တေႉ ႉႉႉ ၵူၺ်း မၼ်းဢမ်ႇၸႂ်ႈငိုၼ်း​​တေႉ ဢၼ်ၸၢင်ႈဝၢၵ်ႉတၢဝ်းဢဝ်လႆႈ မၼ်းပဵၼ်ငိုၼ်း ဢၼ်မီးတီႈ Online ၵူၺ်း ႉႉႉ ႁဝ်း​​တေလႆႈဢဝ် ငိုၼ်း​​တေႉ သိုဝ်ႉဢဝ် ငိုၼ်း ဢၼ်ႁွင်ႉဝႃႈ One Coin ၼၼ်ႉ​​သေ ​​ပေႃးႁိုင်မႃး ​​တေလႆႈၼမ်ႉမႅတ်ႈမၼ်း ၼႆ ယဝ်ႉ ႉႉႉ ပိူင်တႅၵ်ႈမၼ်း ၽူႈၶူင်ၶဝ် ၶူင်ဢွၵ်ႇ One Coin ၼိုင်ႈသႅၼ်မဵတ်ႉတဵမ်ꧦ တိုၼ်း​​တေဢမ်ႇၶူင် ဢွၵ်ႇထႅင်ႈ ၼႆ​​သေ ၶဝ်​​တေႁူၺ်းၵူၺ်းမႃးသိုဝ်ႉ ​​ပေႃးၼၼ် သင်ဝႃႈႁိုင်မႃးမီးၵူၼ်းၶႂ်ႈလႆႈၼမ်မႃးၸိုင် ယွၼ်ႉဢမ်ႇၶူင်ဢွၵ်ႇမဵတ်ႉငိုၼ်း One Coin ထႅင်ႈ ယဝ်ႉလႄႈ ၶၼ်မၼ်း​​တေၸၢင်ႈၶိုၼ်ႈမႃး တိၵ်းꧦ ၼႆ ယဝ်ႉ ႉႉႉ



မိူဝ်ႈလၢႆလိူၼ်ပူၼ်ႉမႃး ၵူၼ်းႁူႉၸၵ်းၶႃႈ ​​ၵေႃႉၼိုင်ႈ သိုပ်ႇမိုတ်ႈၼႄ လွင်ႈ One Coin ၼႆႉၼင်ႇၵဝ်ႇ ႉႉႉ ၶႂ်ႈလၢၵ်ႇလၢႆးဝႆႉ ယွၼ်ႉဝႃႈတူဝ်ၶႃႈ​​ၵေႃႈ ပဵၼ်ၵူၼ်းၵႆႉ လဵပ်ႈႁဵၼ်း လွင်ႈလၢႆးႁႃငိုၼ်း Online ႉႉႉ ၵူၺ်းၵႃႈ ၶႃႈဢမ်ႇယၢမ်ႈႁႃႁၼ်မႅၼ်ႈ လွင်ႈ One Coin ၼႆႉ ​​သေပွၵ်ႈ ႉႉႉ မၼ်းလၢတ်ႈဝႃႈတႄႉ ၶဝ်ဢွၼ်ၵၼ် လူင်းတိုၼ်းလၢင်းႁဵတ်းမႃး မီးသွင်သၢမ်ပီယဝ်ႉဝႃႈ ၼႆ ႉႉ ဢၼ်လၢၵ်ႇလၢႆးထႅင်ႈၼႆႉ ​​တေႃႈၼင်ႇ ပီႈၼွင်ႉ တႆးဝၢၼ်ႈၼွၵ်ႈၼႃးပၢင်ႇ ၸိူဝ်းႁဵတ်းၵိၼ်သူၼ် ႁႆႈ ၼႃး ၸိူဝ်းၼၼ်ႉ​​ၵေႃႈ ​​တေႃႈလူင်းတိုၼ်းလၢင်းၸွမ်း One Coin ၼႆႉၼင်ႇၵဝ်ႇ ႉႉႉ တႃႇ​​တေလူင်းတိုၼ်း လၢင်းၼိူဝ် One Coin ၼၼ်ႉ ႁဝ်း​​တေလႆႈ​​တေႇ လူင်းတိုၼ်းလၢင်း တီႈ​​ဢေႇသုတ်း ​​တေႇ မွၵ်ႈ 200,000 ၵျၢပ်ႈ ထိုင် 100,000,000 ၵျၢပ်ႈ ႉႉႉ

ယင်းလႆႈငိၼ်းႁူႉမႃးဝႃႈ သင်ဝႃႈႁဝ်းၶႂ်ႈထုတ်ႇဢဝ် ငိုၼ်း​​တေႉ​​တေႉၶိုၼ်းၼႆ ​​တေလႆႈၵႂႃႇထုတ်ႇဢဝ် တီႈမိူင်းထႆး ဝႃႈၼႆႉ ႉႉႉ ဢမ်ႇၼၼ်​​ၵေႃႈ ဢဝ်သဵၼ်ႈမၢႆ ငိုၼ်း One Coin ​​ၸဝ်ႈၵဝ်ႇၼၼ်ႉ​​သေ လႅၵ်ႈဢဝ် လူတ်းၵႃး ႁိူၼ်း တီႈမိူင်းထႆး ​​ၵေႃႈလႆႈ ၼႆယဝ်ႉ ႉႉႉ

တီႈ​​တေႉမၼ်း One Coin ၼႆႉ တီႈၼႂ်းမိူင်းထႆး ၽူႈ လဵပ်းႁဵၼ်းၶဝ်လႄႈ ၽူႈပႂ်ႉလူလွမ် IT မိူင်းထႆးၶဝ် လၢတ်ႈဝႃႈ ယင်းပႆႇမီး မၢႆမီႈ ဢၼ်ႁပ်ႉႁွင်း One Coin လႄႈ ဢမ်ႇမီး​​ယေးငိုၼ်းထႆး ဢၼ်လႂ် ႁပ်ႉႁွင်းပႃး ႉႉႉ သိုဝ်ႇၶၢဝ်ႇ ၸိုဝ်ႈသဵင်ယႂ်ႇ မိူၼ်ၼင်ႇ Thai PBS လႄႈ ၶၢဝ်ႇတၢင်ႇဢၼ်​​ၵေႃႈ ယင်းဢွၵ်ႇမႃး ပၼ်ၾၢင်ႉထိုင် ပီႈၼွင်ႉႁဝ်းၶဝ်ယူႇ ဝႃႈႁႂ်ႈငိူၼ်ႈဝႄႈ One Coin ၼႆ ႉႉႉ လၢႆလၢႆမိူင်း​​ၵေႃႈ ဢွၵ်ႇပိုၼ်ၽၢဝ်ႇ ႁၢမ်ႈလွင်ႈ One Coin ဝႆႉယူႇ ႉႉႉ ထႅင်ႈလွင်ႈၼိုင်ႈ​​ၵေႃႈ မၼ်းပဵၼ် လွၵ်းလၢႆး MLM (Multi Level Marketing) ၵူၺ်း ၼႆယဝ်ႉ ႉႉႉ ယွၼ်ႉဝႃႈ ပဵၼ်​​ၶေႃႈမုၼ်း ဢၼ်ဢမ်ႇမီး မၢႆမီႈႁပ်ႉႁွင်းလႄႈ သင်ဝႃႈဝၼ်းၼိုင်မႃး ၸိုဝ်ႈဝႅပ်ႉ သၢႆႉ (Website) ၼၼ်ႉႁၢႆ ဢမ်ႇၼၼ် လုၵွႆၵႂႃႇ​​ၵေႃႈ ဢၼ်​​တေသုမ်းၼၼ်ႉ ပဵၼ်ႁဝ်းၶိုၼ်းၵူၺ်း ႉႉႉ ယွၼ်ႉ ဢမ်ႇမီး​​ၶေႃႈမုၼ်းမၼ်းလႄႈ ​​တေဢမ်ႇမီး လၵ်းထၢၼ် သၢၵ်ႈ​​သေသင် ႉႉႉ ၵႂႃႇတၢင်ႇၼႄ တီႈ ႁူင်းပရိၵ်ႈ(တမ်ႇၼူတ်ႇ) ၶဝ်​​ၵေႃႈ ယဝ်ႉလၢႆၵူၺ်း ႉႉႉ ဢမ်ႇမီးၽႂ်လႂ်ၸၢင်ႈဢဝ်လွင်ႈ ဢဝ်တၢင်း One Coin ႉႉႉ လီဢမ်ႇလီ ၵူၼ်းဢၼ်ၵႂႃႇတၢင်ႇၼၼ်ႉ ​​တေၸၢင်ႈၺႃးၵိၼ်ၶိုၼ်း​​ၵေႃႈၸၢင်ႈပဵၼ်လႆႈ ႉႉႉ

ဢၼ်တႅမ်ႈသပ်းလႅင်းၼႄၸိူင်ႉၼႆ ဢမ်ႇလႆႈမီး ယိူင်းဢၢၼ်း တႃႇယႃႉၵဝ်း ပၢႆးမၢၵ်ႈမီးၽႂ်လႂ် ႉႉႉ ယွၼ်ႉ ၶႂ်ႈႁႂ်ႈပီႈၼွင်ႉႁဝ်းၶဝ် ႁူႉၶိုတ်းတၼ်းလွင်ႈပဵၼ်​​တေႉ လႄႈ ၸင်ႇလႆႈတႅမ်ႈတၢင်ႇၼႄၵူၺ်း ႉႉႉ

ၵႅမ်မိူင်း