ၵူၼ်းဢၼ်ထုၵ်ႇလီၽၢင်ႉ တီႈၼႂ်းၼႃႈၵၢၼ်

ၵူၼ်းဢၼ်ထုၵ်ႇလီၽၢင်ႉ တီႈၼႂ်းၼႃႈၵၢၼ်

ပေႃးႁဵတ်းၵၢၼ် ပၢႆးမၢၵ်ႈမီးလႄႈ ၶႂ်ႈဢွင်ႇမၢင်ႇထၢင်ႇသႃးပေႃးၼႆၸိုင် ၸဝ်ႈၵဝ်ႇတေလႆႈၵပ်းသိုပ်ႇ ၶဝ်ႈဢွၵ်ႇၵူၼ်းတင်းၼမ်ဢမ်ႇႁၢင်ႉ၊ ယဝ်ႉၵေႃႈတိုၼ်းလူဝ်ႇမေႃၵပ်းသိုပ်ႇၶဝ်ႈဢွၵ်ႇၵူၼ်းတင်းၼမ် ၼၼ်ႉယဝ်ႉ။  ၵူၺ်းၵႃႈဝႃႈ မိူဝ်ႈၸဝ်ႈၵဝ်ႇ ၵပ်းသိုပ်ႇၶဝ်ႈဢွၵ်ႇၵူၼ်းတင်းၼမ်ၼၼ်ႉ ၵမ်ႈၽွင်ႈၵေႃႈ တေပဵၼ်ၽွၼ်းလီႁဵတ်းႁႂ်ႈၸဝ်ႈၵဝ်ႇၶိုၼ်ႈယႂ်ႇတိူဝ်းတွၼ်းၵေႃႈတေမီး၊ ၵမ်ႈၽွင်ႈၵေႃႈတေပဵၼ် ၽွၼ်းႁၢႆႉ ႁဵတ်းႁႂ်ႈၸဝ်ႈၵဝ်ႇ တူၵ်းတႅမ်ႇယူႇၵေႃႈတေမီးၼႆၼၼ်ႉယဝ်ႉ။

ပေႃးဝႃႈၼႆၸိုင် တႃႇၸဝ်ႈၵဝ်ႇၼၼ်ႉ တေလႆႈၽၢင်ႉသေၵိုပ်းသိုပ်ႇ တိတ်းတေႃႇၵူၼ်းၸိူင်ႉႁိုဝ် ဢၼ်ဝႃႈၼၼ်ႉ------

႑- ၵေႃႉဢၼ်ႁၼ်တၢင်းၽိတ်းႁဝ်းယူႇတႃႇသေႇ။

ၸဝ်ႈၵဝ်ႇၶတ်းၸႂ်တၢၼ်ႇႁိုဝ်ၵေႃႈယဝ်ႉ၊ ၼႃႈတီႈပုၼ်ႈၽွၼ်းၸဝ်ႈၵဝ်ႇ ႁဵတ်းလႆႈလီတၢၼ်ႇႁိုဝ်ၵေႃႈ ယဝ်ႉ၊ ၵေႃႉဢၼ်ဢမ်ႇႁၼ်လီၼိူဝ်ၸဝ်ႈၵဝ်ႇ ၵေႃႉဢၼ်ႁႃတၢင်းၽိတ်းသေဢၼ်ဢၼ်ၼိူဝ်ၸဝ်ႈၵဝ်ႇ ယူႇတႃႇသေႇၼၼ်ႉယဝ်ႉ။ ၵူၼ်းၵေႃႉၼႆႉ တိုၼ်းပႃးၸႂ်လွင်ႈထတ်းသၢင်ႈ ဢမ်ႇႁၼ်လီၼိူဝ်ပိူၼ်ႈ ၵူၺ်းသေဢမ်ႇၵႃး ၸဝ်ႈၵဝ်ႇၶႂ်ႈလၢတ်ႈသင်ၵေႃႈ ၶဝ်တိုၼ်းဢမ်ႇဢဝ်ၶဝ်ႈႁူၶဝ်ၼၼ်ႉယဝ်ႉ။ ပေႃးလၢတ်ႈဝႃႈ ၽၢႆႇၶဝ်ၽိတ်းၼႆ ၶဝ်ပဵၼ်ၵူၼ်းဢမ်ႇယွမ်းဝႃႈၶဝ်ၽိတ်းၼႆၼၼ်ႉယဝ်ႉ။

႒- ၵေႃႉဢၼ်သၢင်ႇႁၢင်ႈႁူႉ သၢင်ႇႁၢင်ႈမေႃၵေႃႉၼိုင်ႈ၊ (ႁဵတ်းၵဵင်ႈႁူႉ ႁဵတ်းၵဵင်ႈမေႃ၊)

ၵူၼ်းၵေႃႉၼႆႉ တီႈလႂ် ၵႃႈလႂ်သေဢမ်ႇဝႃႈ ၶဝ်တေသၢင်ႇႁၢင်ႈႁဵတ်းၵဵင်ႈႁူႉ ႁဵတ်းၵဵင်ႈမေႃ ၵူႈတီႈၼၼ်ႉ ယဝ်ႉ။ ၵူၼ်းၵေႃႉၼႆႉ ၶဝ်တေမေႃဢဝ်မၢၵ်ႇတႃထၢင်ႇလဵၵ်ႉတူၺ်း ၵူၼ်းႁဵတ်းၵၢၼ်ၼႂ်းၸုမ်းႁဝ်း၊ မိူၼ် ၼင်ႇဝႃႈ ႁဝ်းဢမ်ႇႁူႉ ဢမ်ႇမေႃသင် ၵၢၼ်ဢၼ်ႁဝ်းႁဵတ်းၼႆႉ မိူၼ်ၼင်ႇဝႃႈ ဢမ်ႇၵိုင်ႇတၢၼ်ႇတႃႇႁဝ်း ၼႆၼၼ်ႉယဝ်ႉ။ တီႈတေႉမၼ်း မၼ်းၵေႃႈပဵၼ်ၵူၼ်းဢမ်ႇႁူဝ်ဢမ်ႇႁၢင် ၵေႃႉၼိုင်ႈသေ ႁဵတ်းသင်ၵေႃႈ ဢမ်ႇတွၼ်ႉၶဝ်ႈတိၼ်ၶဝ်ႈမိုဝ်းပိူၼ်ႈသေပွၵ်ႈ ပဵၼ်ၵူၼ်းၸိူင်ႉၼၼ်ယဝ်ႉ။

႓- ၵေႃႉဢၼ် မီးၸႂ်ၶႂ်ႈၶေႉၶဵင်ႇ ႁၢဝ်ႈႁႅင်း။

လွင်ႈၶေႉၶဵင်ႇၵၼ်ၼႆႉ ၸၢင်ႈႁဵတ်းပၼ်လႆႈ လွင်ႈဢွၵ်ႇမၢင်ႇယူႇဝႃႈၼႆသေတႃႉ ၵူၺ်းၵႃႈ ႁဝ်းႁႃးၼင်ႇ ၵၼ် ၵူၼ်းႁဵတ်းၵၢၼ်လဵဝ်ၵၼ် ၶိုၼ်းမႃးၶေႉၶဵင်ႇၵၼ်တေႉ မၼ်းတေဢမ်ႇတူၵ်းထုၵ်ႇ၊ ပေႃးဝႃႈ ၵူၼ်း ႁဵတ်းၵၢၼ်လဵဝ်ၵၼ် ၶိုၼ်းမႃးၶေႉၶဵင်ႇၵၼ်ပေႃးၼႆ ၸၢင်ႈႁဵတ်းႁႂ်ႈတင်းသွင်ၽၢႆႇ ယဵၼ်းပဵၼ်ၶဵၼ်ၵၼ် ၵႂႃႇၼႆၼၼ်ႉယဝ်ႉ။ သင်ဝႃႈၸဝ်ႈၵဝ်ႇ ပဵၼ်ၸဝ်ႈၵၢၼ်လႄႈသင် ႁူဝ်ၼႃႈၵူၼ်းႁဵၼ်းၵၢၼ်လႄႈသင် တေလႆႈၽၢင်ႉတူၺ်းပၼ်ယူႇတႃႇသေႇၼၼ်ႉယဝ်ႉ။

႔- ၵူႈတီႈႁဵတ်းသင်ၵေႃႈ ႁႂ်ႈပႃးမၼ်း။

ႁဵတ်းၵၢၼ်သင်တီႈလႂ်သေဢမ်ႇဝႃႈ ႁႂ်ႈပႃးမၼ်း ႁႂ်ႈမၼ်းဢွၼ်ႁူဝ်၊ ပေႃးဝႃႈဢမ်ႇပႃးမၼ်း မၼ်းဢမ်ႇ လႆႈဢွၼ်ႁူဝ်ပေႃးၼႆ မိူင်ၼင်ႇဝႃႈ ၽႂ်ဢမ်ႇမေႃႁဵတ်းသင်ၼၼ်ႉယဝ်ႉ။ မၼ်းၶႂ်ႈႁဵတ်းသြႃႇလူင်ၵႂႃႇၵူႈတီႈ ၵူၼ်းၸၼႆႉ ပေႃးဝႃႈႁဵတ်းၵၢၼ်တေႉတေႉမႃးၼႆ ပဵၼ်ၵူၼ်းဢမ်ႇၶႂ်ႈႁဵတ်းသင်ၵႂႃႇပႅတ်ႈၼၼ်ႉယဝ်ႉ။ သင်ဝႃႈၼႂ်းၼႃႈၵၢၼ်ၸဝ်ႈၵဝ်ႇ ပႃးၵူၼ်းၸိူင်ႉၼႆမႃးၼႆတေႉ မိူၼ်ၵၼ်တင်း ၶွၵ်ႈၵႆႇဢၼ်ၵႆႇၽူႈ ၼမ် သေၵႆႇမႄႈၵႂႃႇပႅတ်ႈၼၼ်ႉယဝ်ႉ။ ပေႃးပဵၼ်ၼၼ် ၼႃႈၵၢၼ်ၸဝ်ႈၵဝ်ႇၼၼ်ႉ မၼ်းဢမ်ႇၸၢင်ႈၶိုပ်ႈၼႃႈ လႆႈမိူၼ်ၼင်ႇၸဝ်ႈၵဝ်ႇထၢင်ႇဝႆႉၼၼ်ႉ။

႕- ၵေႃႉဢၼ်မေႃႁၼ်ၽိတ်းသေ ဢမ်ႇမီးတၢင်းယိူင်းဢၢၼ်း။

ၵေႃႉဢၼ်မေႃႁၼ်လီၼိူဝ်ပိူၼ်ႈၼၼ်ႉ မၼ်းႁဵတ်းၵၢၼ်သင်ၵေႃႈ မၼ်းႁဵတ်းလႆႈလီတေႉၼၼ်ႉယဝ်ႉ။ ၵေႃႉဢၼ်ဢမ်ႇမေႃႁၼ်လီၼိူဝ်ပိူၼ်ႈၼၼ်ႉ မၼ်းႁဵတ်းၵၢၼ်သင်ၵေႃႈ မၼ်းဢဝ်ဢၼ်ဢမ်ႇႁၼ်လီ ၼၼ်ႉပဵၼ်ယႂ်ႇသေ ဢမ်ႇၸၢင်ႈဢွင်ႇမၢင်ႇလႆႈ။ ၵူၼ်းတီႈၵေႃႉဢၼ်မေႃၶၢင်း၊ ၵူၼ်းတီႈၵေႃႉဢၼ်မေႃ ၸႂ်သဵင်ႈၼႆႉ ၵႆႉပဵၼ်ၵူၼ်းဢၼ် ဢမ်ႇပေႃးမေႃတူၺ်းႁၼ်လီၼိူဝ်ပိူၼ်ႈၼၼ်ႉယဝ်ႉ။ ၵွပ်ႈၼၼ် ၼႂ်းၼႃႈၵၢၼ်ၸဝ်ႈၵဝ်ႇၼၼ်ႉ ပေႃးဝႃႈပႃးမႃးၵူၼ်း ဢမ်ႇမေႃႁၼ်လီၼိူဝ်ပိူၼ်ႈၸိူင်ႉၼၼ် ႁႂ်ႈဢွၼ် ၵၼ်ၽၢင်ႉယူႇတႃႇသေႇ။

႖- ၵူၼ်းလႅၼ်။

ၼႂ်းမုၵ်ႉၼႂ်းၸုမ်း ၼႂ်းၵေႃလႂ်သေဢမ်ႇဝႃႈ တွၼ်ႈတႃႇတေမၼ်ႈၵိုမ်းၼၼ်ႉ လႆႈဢဝ်ၸိူၵ်ႈ လွင်ႈယုမ်ႇ ယမ်ၵၼ်ၼၼ်ႉ မတ်ႉဝႆႉၼႆၼၼ်ႉယဝ်ႉ။ ဢၼ်ႁဵတ်းႁႂ်ႈ ၸိူၵ်ႈ လွင်ႈယုမ်ႇယမ်ၵၼ်ၼၼ်ႉ ယၢၼ်းလူင်း ၵႂႃႇၼႆပဵၼ်လွင်ႈလႅၼ်ၵၼ်ၼၼ်ႉယဝ်ႉ။ ၵူၼ်းလႅၼ်ၶဝ်ၼႆႉ ပေႃးၶဝ်လၢတ်ႈၵႂၢမ်းမႃးၼႆ တင်းၼႃႈတင်း လႂ် ၶဝ်တေဢမ်ႇလၢတ်ႈငၢမ်ႇၵၼ် တင်းၼႃႈပဵၼ်မဵဝ်းၼိုင်ႈ တင်းလင်ပဵၼ်မဵဝ်းၼိုင်ႈၼၼ်ႉယဝ်ႉ။

ၵူၼ်းၵေႃႉၼႆႉ ပေႃးဝႃႈပႃးမႃး မီးမႃးၼႂ်းၸုမ်းႁဵတ်းၵၢၼ်ၸဝ်ႈၵဝ်ႇပေႃးၼႆ ပဵၼ်ၵွင်ႉ ပဵၼ်ယၢင်တႃႇ မုၵ်ႉ ၸုမ်းၼၼ်ႉယဝ်ႉ။

႗- ၵူၼ်းသူပ်းၵျႅမ်း။ (ၵူၼ်းလၢတ်ႈလိူင်း)

ၵူၼ်းလၢတ်ႈၵႂၢမ်းၵျႅမ်း၊ လၢတ်ႈၵႂၢမ်းလိူင်းၼႆႉပဵၼ်ၵူၼ်းဢမ်ႇယဵၼ်ႇငႄႈ သေဢမ်ႇၵႃး တွၼ်ႈတႃႇ ၼႂ်း  မုၵ်ႉၸုမ်းၶဝ်ၼၼ်ႉၵေႃႈ လႆႈဝႃႈပဵၼ် ၵွင်ႉပဵၼ်ယၢင်ယူႇတႃႇၶဝ်ၼၼ်ႉယဝ်ႉ။ ၵူၼ်းမဵဝ်းၼၼ်ႉ မၼ်း မေႃဝူၼ်ႉဢၼ်မၼ်းၶႂ်ႈလၢတ်ႈၵူၺ်း၊ ဢၼ်မၼ်းလၢတ်ႈၵႂႃႇယဝ်ႉၼၼ်ႉ တေၵႂႃႇတိူဝ်ႉၶိူၵ်ႈၽႂ်ၼႆ မၼ်း ဢမ်ႇမေႃဝူၼ်ႉၼၼ်ႉယဝ်ႉ။ သင်ဝႃႈၶႂ်ႈႁဵတ်းၵၢၼ်တႃငၢၼ်းလီလီပေႃးၼႆ ၵႂၢမ်းၵူၼ်းလၢတ်ႈၵျႅမ်းၶဝ် ၼၼ်ႉ တေလႆႈဢဝ်ဝႆႉတင်းၶၢင်ႈသေႁဵတ်းၼၼ်ႉယဝ်ႉ။

႘-ၵူၼ်းဝႃႈဢမ်ႇထၢတ်ႇ။

ၵူၼ်းလၢတ်ႈဢမ်ႇထၢတ်ႇၼႆၵေႃႈ မိူၼ်ၵၼ်တင်းၵူၼ်းမေႃလၢတ်ႈလႅၼ်ၼၼ်ႉယဝ်ႉ၊ ၶဝ်ၶႂ်ႈမေႃလၢတ်ႈ မေႃၸႃဝႆႉ။ မၢင်ပွၵ်ႈၶဝ်တေၵႆႉလၢတ်ႈ ဢၼ်ဢမ်ႇသႅင်ႇသင်ၵၼ်တင်းၼႃႈၵၢၼ်၊ ၵႆႉလၢတ်ႈပူၼ်ႉလၢတ်ႈ လိူဝ်ၼၼ်ႉယဝ်ႉ။ ပေႃးမီးမႃးၼႂ်းမုၵ်ႉၼႂ်းၸုမ်း ၵႆႉၸၢင်ႈတိူဝ်ႉၶိူၵ်ႈၵၢၼ်ၸုမ်း။ သင်ဝႃႈၵူၼ်းၵေႃႉၼၼ်ႉ မႃးလၢတ်ႈတေႃႇၸူးၸဝ်ႈၵဝ်ႇ ၵႂၢမ်းဢမ်ႇႁူဝ်ဢမ်ႇႁၢင်ပေႃးၼႆ ၸဝ်ႈၵဝ်ႇတေလႆႈၽၢင်ႉဝႆႉ၊ လွင်ႈၸဝ်ႈ ၵဝ်ႇၼၼ်ႉမၼ်းတေၶိုၼ်းဢဝ်ၵႂႃႇလၢတ်ႈၼႄပိူၼ်ႈၼၼ်ႉယဝ်ႉ။

ၼပ်ႉယမ်ၽူႈလူလိၵ်ႈႁဝ်းၶဝ်တင်းသဵင်ႈသေ

ပၢႆးဝူၼ်ႉၶပ်ႉ

Trainer & Speaker

Master Trainer Coach