လွၵ်းလၢႆး- ၵူၼ်းမၢၵ်ႈမီးၶဝ်ၸႂ်ႉတိုဝ်းမႃး တႃႇႁႂ်ႈပဵၼ်သထေးငိုၼ်းသႃး"

လွၵ်းလၢႆး- ၵူၼ်းမၢၵ်ႈမီးၶဝ်ၸႂ်ႉတိုဝ်းမႃးတႃႇႁႂ်ႈပဵၼ်သထေးငိုၼ်းသႃး"

ဢၼ်လူဝ်ႇ ႄလႈ ဢၼ်ၶႂ်ႈလႆႈ ႁႂ်ႈေမႃႁိဝ်ႈၸင်ႈေသၸႂ်ႉတိုဝ်း။

သထေးၶဝ်ၼႆႉ ေပထၢင်ႇဝႃႈ ၶဝ်ႁႃငိုၼ်းယဝ်ႉေသ ၸၢႆႇၽူင်ႉ
ၸၢႆႇႄၽႉၸိူင်ႉၼင်ႇဢၼ်ႁဝ်းထၢင်ႇ။ ၶဝ်ၼႆႉ လူင်ႉလႅၼ်ႇ
လွၵ်းလၢႆးႁႃငိုၼ်းေသဢမ်ႇၵႃး၊ လူင်ႉလႅၼ်ႇပႃး လွၵ်းလၢႆး
ၸႂ်ႉၸၢႆႇငိုၼ်းယူႇယဝ်ႉ။ ယွၼ်ႉၼၼ်ႄလႈ လွင်ႈဢၼ်ေတ
ႁဵတ်းႁႂ်ႈႁဝ်းမၢၵ်ႈမီးလႆႈၼၼ်ႉ ဢၼ်လမ်ႇလွင်ႈေသပိူၼ်ႈၼႆႉ
လွင်ႈၸႂ်ႉၸၢႆႇႁဝ်းၼၼ်ႉယဝ်ႉ။

1. ေပႁႂ်ႈသိုဝ်ႉၺႃး ၶူဝ်းၶွင်ဢၼ်ၸဝ်ႈၵဝ်ႇဢမ်ႇလူဝ်ႇေတႉေတႉ၊

သထေးၶဝ်ၼႆႉ တႃႇႁႂ်ႈပိူၼ်ႈေတထၢင်ႇယႂ်ႇၶဝ်ၼၼ်ႉ ၶူဝ်းၶွင်
ဢၼ်ၶဝ်ဢမ်ႇလူဝ်ႇေတႉေတႉၼၼ်ႉ ၶဝ်ဢမ်ႇတွၼ်ႉသိုဝ်ႉ
ေသပွၵ်ႈ။

2. ႁွမ်ငိုၼ်းဝႆႉထႃႈ တႃႇၶၢဝ်းတၢင်းၼႃႈ၊

ၽွင်းမိူဝ်ႈလဵၵ်ႉႄတႉ ဢမ်ႇမီးငိုၼ်းေသတႃႉေၵႃႈ ေတယူႇလႆႈယူႇ။
ေပႃးဢႃႈသၢၵ်ႈယႂ်ႇမႃးႄတႉ ဢမ်ႇမီးငိုၼ်းၼႆႉ ေတဢမ်ႇယူႇလႆႈ။
မိူၼ်ၼၼ်ၵူၺ်း၊ သထေးၶဝ်ၼႆႉ ၶဝ်ၵႆႉႁွမ်ငိုၼ်းဝႆႉထႃႈ တႃႇ
ၶၢဝ်းတၢင်းၼႃႈၶဝ်ယူႇယဝ်ႉ။

3. ႁဵတ်းဝႆႉသဵၼ်ႈမၢႆ ငိုၼ်းၶဝ်ႈ ႄလႈ ငိုၼ်းဢွၵ်ႇ၊

သထေးၶဝ်ၼႆႉ ၶဝ်ၵႆႉႁဵတ်းသဵၼ်ႈမၢႆ ငိုၼ်းၶဝ်ႈ ႄလႈ ငိုၼ်းဢွၵ်ႇ
ၶဝ်တႃႇေသႇၼၼ်ႉယဝ်ႉ။ ေပႃးၸိူင်ႉၼၼ်ၵွၼ်ႇ လွင်ႈၸႂ်ႉၸၢႆႇၼႆႉ
လူဝ်ႇယူႇႁႃႉ? ဢမ်ႇလူဝ်ႇ! ၼႆၼၼ်ႉ ၸွင်ႇႁိဝ်ႈၸင်ႈတူၺ်းလႆႈ။

4. ၶတ်းၸႂ်ႁဵတ်းၵၢၼ်၊

ယွၼ်ႉပဵၼ်သထေးႄလႈ သူေတထၢင်ႇဝႃႈ ၶဝ်ဢမ်ႇႁဵတ်းၵၢၼ်
ထၢၼ်ႇလုၵ်ႈၼွၵ်ႉတပေးၶဝ်ၼႆေၵႃႈ ၸၢင်ႈပဵၼ်လႆႈယူႇ။
ၵူၺ်းၵႃႈ သထေးၸႃႉဢၼ်ဢိင်ၼမ်ႉၵတ်ႉၸဝ်ႈၵဝ်ႇေသ
ပူၵ်းတင်ႈမႃးၼၼ်ႉႄတႉ ၶဝ်ၵႆႉႁဵတ်းၵၢၼ်ၼမ် လိူဝ် ေသ
လုၵ်ႈၼွင်ႉတပေးၶဝ်သွင်ပုၼ်ႇယူႇယဝ်ႉ။ ယွၼ်ႉႁဵတ်းၸိူင်ႉၼႆ
ႄလႈ ၼႃႈၵၢၼ်ေၵႃႈ ေတၵႂၢင်ႈၶႂၢင်မႃးေသဢမ်ႇၵႃး၊
လွင်ႈသဵင်ႈငုိၼ်းေၵႃႈ ေတသၢၵ်ႈသႃႇမႃးယူႇယဝ်ႉ။

5. သဵတ်ႈၵႃႈၶၼ်ၽွင်ႈ၊

ေပႃးသူထၢင်ႇဝႃႈ ယွၼ်ႉၶဝ်ပဵၼ်သထေးႄလႈ ၶဝ်သိုဝ်ႉၶူဝ်း
ဢမ်ႇသဵတ်ႈၵႃႈၶၼ်ၼႆႄတႉ ၽိတ်းယဝ်ႉ။ တီႈေတႉမၼ်း
သထေးၶဝ်ၼႆႉ ေမႃသဵတ်ႈၵႃႈၶၼ်လိူဝ် ေသ ၵူၼ်းထမ်ႇမတႃႇ
ပၢၼ်ၵၢင်ၶဝ်ေတႉေတႉၵွၼ်ႇယဝ်ႉ။

6. ၸႂ်ႉလွၵ်းလၢႆးၼင်ႇ သထေးႁူဝ်လၢၼ်ႉၶဝ်၊

ငိုၼ်းၶဝ်ႈဢၼ်လႆႈမႃးၼၼ်ႉ ေၽဝႆႉၶၼ်တႅတ်ႈေတႃး တွၼ်ႈတႃႇ
ၼႃႈၵၢၼ်ဢၼ်ေတႁဵတ်းၽွၼ်းလီ ႄလႈ
ေၽဝႆႉၶၼ်တႅတ်ႈေတႃး တွၼ်ႈတႃႇၽင်တိုၼ်းလၢင်းၼႃႈၵၢၼ်။
ေပႃးယဝ်ႉ ၸင်ႇၵွႆႈၸႂ်ႉၸၢႆႇဢၼ်လိူဝ်မၼ်း။

7. ဢိုတ်းပႅတ်ႈ ႁူးငိုၼ်းဢွၵ်ႇ ငိုၼ်းပွင်ႇ၊

ႁူးပွင်ႇလဵၵ်ႉလဵၵ်ႉဢွၼ်ႇၼၼ်ႉၵူၺ်းေၵႃႈ ၸၢင်ႈႁဵတ်းႁႂ်ႈ
ႁိူဝ်းသၢင်းေၽႃးလူင်ၸူမ်ၼမ်ႉၵႂႃႇလႆႈယူႇၼႆ ပိၼ်ႇၵျမိၼ်ႇၾရၢင်
ၶလိၼ်း လၢတ်ႈဝႆႉၼင်ႇၼႆယူႇယဝ်ႉ။ ၼင်ႇေၶႃႈၵႂၢမ်းၼၼ်ႉ
ၵူၼ်းမၢၵ်ႈမီးၶဝ်ၼႆႉ ေပႃးဢမ်ႇမီးလွင်ႇလူဝ်ႇ၊ ငိုၼ်းၼိုင်ႈဢိတ်း
ဢွၼ်ႇၵူၺ်းေၵႃႈ ၶဝ်ဢမ်ႇၸႂ်ႉေသဢိတ်းၼၼ်ႉယဝ်ႉ။

ယွၼ်ႉၼၼ် ၽႂ်ၶႂ်ႈမၢၵ်ႈမီးေၵႃႈ ၶႅၼ်းေတႃႈ ၶတ်းၸႂ်ယိပ်းၵမ်
ငမ်လၢႆးၼင်ႇႄၼဝႆႉပႃႈၼိူဝ်ၸိူဝ်းၼၼ်ႉေသ ႁဵတ်းသၢင်ႈၵႂႃႇၸွမ်း
ၸၢမ်းတူၺ်းၶႃႈႄလႈ။ ယုမ်ႇယမ်ဝႃႈ ေတမီးၽွၼ်းလီတႃႇပီႈၼွင်ႉ
ႁဝ်းၶဝ်တင်းသဵင်ႈယူႇၼႆၶႃႈ။

ၼပ်ႉယမ်ယႂ်ႇၼမ်ထုိင်ၵူႈေၵႃႉေသ ........

ပိၼ်ႇတႅမ်ႈ ... မႆႉသၢင်းၶမ်း