သူၸႂ်ႉတိုဝ်းၸူဝ်ႈပၢၼ်မၢဝ်ႇသၢဝ်သူၶဝ် ၸိူင်ႉၼင်ႇႁိုဝ်

သူၸႂ်ႉတိုဝ်းၸူဝ်ႈပၢၼ်မၢဝ်ႇသၢဝ်သူၶဝ်ၸိူင်ႉၼင်ႇႁိုဝ်
==========

တီႈၼႂ်းပၢင်သွၼ်တီႈၼိုင်ႈ ၶူးသွၼ်ၵေႃႉၼိုင်ႈ
ထၢမ်ထိုင်လုၵ်ႈႁဵၼ်းမၼ်းဝႃႈ သူၸႂ်ႉတိုဝ်းၸူဝ်ႈပၢၼ်
မၢဝ်ႇသၢဝ်သူၶဝ်ၸိူင်ႉၼင်ႇႁိုဝ်ၼႆယဝ်ႉ။

လုၵ်ႈႁဵၼ်းၶဝ်ၵေႃႈ ဢမ်ႇၵိုင်ႉၵၢင်ႉတွပ်ႇလႆႈ ယဵၼ်႔
လူင်ဝႆႉတၢင်းႁွင်ႈႁဵၼ်း ၸိူဝ်းယုမ်ႉၵေႃႈမီး ၸိူဝ်းၼႃႈ
လႅင်ၵေႃႈမီး ၵုမ်ႇပဵၼ်ၵဝ်တူၺ်းၼႃႈမႂ်း မႂ်းတူၺ်းၼႃႈ
ၵဝ်ယူႇ ၽႂ်ၵေႃႈဢမ်ႇပဵၼ်တွပ်ႇ။

ဢမ်ႇၸႂ်ႈဝႃႈ ၵႂၢမ်းထၢမ်မၼ်း ယၢပ်ႇၼႃႇလႄႈ ၶဝ်
တွပ်ႇဢမ်ႇလႆႈဢမ်ႇၸႂ်ႈ တီႈတေႉမၼ်း ပဵၼ်ယွၼ်ႉ
ၵွပ်ႈပိူဝ်ႈ ၶဝ်ယူႇၸိူင်ႉႁိုဝ်မႃး တေႇသိုပ်ႇႁဵတ်းႁိုဝ်ၵႂႃႇ

ၼႆၼၼ်ႉ ၶဝ်ဢမ်ႇတွၼ်ႉဝူၼ်ႉ တွၼ်ႉၶႆႈၸႂ်မႃးလႄႈထိုင်မိူဝ်ၺႃးထုၵ်ႇထၢမ်ၼၼ်ႉ ၸင်ႇဢမ်ႇၸၢင်ႈတွပ်ႇ
သင်လႆႈၼၼ်ႉယဝ်ႉ။

ၸွမ်းၼင်ႇၶႃႈယၢမ်ႈႁၼ် လႄႈယၢမ်ႈထူပ်းမႃးတႄႉလုၵ်ႈဢွၼ်ႇၵူၼ်းၼုမ်ႇ ပၢၼ်ၼႆႉ ဢၼ်ႁၢင်ႈႁၢႆႉၼႃႇ
သုတ်း ပဵၼ်မိူင်းႁဝ်းယဝ်ႉ ၸဝ်ႈၵဝ်ႇႁဵတ်းသင်ယူႇႁႃသင်ယူႇ သွၼ်သင်ႁဵၼ်းသင်ယူႇၼႆ ဢမ်ႇႁူႉသေ
လၢမ်းလိမ်း ယူႇသဝ်းဢဝ်ၵမ်ႉမၼ်းတေႃႇ ပေႃးႁႃႁၼ်ၵေႃႉႁၵ်ႉၵေႃႉပႅင်းယဝ်ႉၵေႃႈ တေႇၼႃႈႁိူၼ်း
ၸွမ်းၵၼ်ၵႂႃႇၸဝ်ႉၸဝ်ႉၸဵဝ်းၸဵဝ်းပႅတ်ႈယဝ်ႈ။

တႆးၵေႃႉၽူႈလူလိၵ်ႈႁဝ်းၶဝ်ၶႃႈ ၼႂ်းၸူဝ်ႈပၢၼ်ၽဝၵူၼ်းၼိုင်ႈၵေႃႉၼႆႉ တေႇဢဝ်ၸူဝ်ႈၶူပ်ႇ႑႕တေႃႇ႓႐
ၼႂ်းၶၢဝ်းတၢင်း ႑႕ ပီၼႆႉပဵၼ်ၶၢဝ်းယၢမ်းဢၼ် ၵိုင်ႇဢၢပ်ႈလီတီႈသုတ်းတႃႇတေႇတင်ႈ ၽဝဢၼ်ၶိုၼ်ႈ
ယႂ်ႇမႂ်ႇသုင် ၽဝဢၼ် တေဢွင်ႇမၢၼ်မၢၵ်ႈမီးလႆႈၼၼ်ႉယဝ်ႈၶႃႈ။

ၸူဝ်ႈၶူပ်ႇပၢၼ်ၼႆႉ ၽၢႆႇႁႅင်းတူဝ်ႁႅင်းၸႂ် ႁႅင်းၺၢၼ်ႇလႄႈ ပၢႆးယူႇလီၵူႈၵူႈဢၼ်ဢၼ် တိုၵ်ႉၶႅမ်ႉၵူႈဢၼ်
ယူႇ တိုၵ်ႉပဵၼ်ၽွင်း တိုၵ်ႉၶိုၼ်ႈယဝ်ႉၶိုၼ်ႈထႅင်ႈယူႇတိၵ်းတိၵ်းၼၼ်ႉယဝ်ႉ။

ၽဝၵူၼ်း ဢၼ်မီးၵႃႈၶၼ်ယႂ်ႇလူင် ၸိူင်ႉၼင်ႇၼႆၼႆႉသူၶဝ်လိူၵ်ႈဢဝ် လႆႈယူႇဝႃႈ တေယူႇသဝ်းၵႂႃႇၸလိူဝ်ႈ
ၸလႃႈသေ တၢႆၵႂႃႇၸလိူဝ်ႈၸလႃႈ ၵူၺ်းယဝ်ႉႁႃႉဢမ်ႇၼၼ်ၵေႃႈတေၶတ်းၸႂ် ႁႂ်ႈပဵၼ်သေလွင်ႈ"ႁႃႉ
ၼႂ်းၽဝၼႆႉၼႆၼၼ်ႉ။

တေပဵၼ်ၸိူင်ႉႁိုဝ်ၼႆၼၼ်ႉ မီးတီႈသူၶဝ်သဵင်ႈသဵင်ႈယဝ်ႈၶႃႈ။

ၸူဝ်ႈပၢၼ်ၽဝၼႆႉ သူၶဝ်မီးသုၼ်ႇ ပူၵ်းပွင်မၼ်းလႆႈပွၵ်ႈလဵဝ်ၵွၺ်း ဢမ်ႇမီးပွၵ်ႈၵမ်းသွင်။
သူၶဝ်တေၶႂ်ႈပူၵ်းပွင် တေႇတင်ႈၽဝၸိူင်ႉၼင်ႇႁိုဝ်။

ပေႃးပဵၼ်ၵူၼ်း ဢၼ်ၼပ်ႉယမ်တူဝ်ၵဝ်ႇ ဝႆႉၵႃႈၶၼ်ၽဝတူဝ်ၵဝ်ႇတႄႉၸိုင် တိုၼ်းတေတေႇတင်ႈပၼ်
ၽဝၸဝ်ႈၵဝ်ႇ ႁႂ်ႈၶိုၼ်ႈယႂ်ႇသုတ်း ၶိုၵ်ႉၶႅမ်ႉသုတ်းၼႆဢမ်ႇႁၢင်ႉယဝ်ႉ။

ဝၼ်းၼိုင်ႈမႃး ၵဝ်တေလႆႈပဵၼ်သင်ၼႆ
#မီးယိူင်းဢၢၼ်းဢမ်ႇပဵၼ်လႆႈၵေႃႈ ၶဝ်တေၶတ်းၸႂ်ႁႂ်ႈပဵၼ် မီးထၢတ်ႈၸႂ် #ဢၼ်တႅပ်းတတ်းပုတ်းပုတ်းၶၢတ်ႇ"
#မီးၸႂ်ႁတ်းႁၢၼ် တႃႇတေတေႃႇသူႈလွင်ႈယၢပ်ႇၽိုတ်ႇ #မီးၸႂ်ၼိမ်မၼ်ႈ တီႈၼိူဝ်သဵၼ်ႈတၢင်း
ယိူင်းမၢႆတူဝ်ၸဝ်ႈၵဝ်ႇ ၼင်ႇႁိုဝ်တေဢမ်ႇပိူင်ႈတၢင်းမၼ်းၼၼ်ႉ #မေႃသတိလီလီသေပႆယၢင်ႈ။

သင်ဝႃႈ ဢမ်ႇမီးၸႂ်မေႃဝူၼ်ႉ ဢမ်ႇမီးတၢင်းႁူႉသင်ပေႃးၼႆၸိုင် တေဢမ်ႇမီးၸႂ် ၶႂ်ႈပူၵ်းပွင်ၽဝၸဝ်ႈၵဝ်ႇ
ၽဝဢၼ်ဢမ်ႇလႆႈၶၢမ်ႇတၢင်း ပူၵ်းပွင်ၼၼ်ႉၵေႃႈတေမိူၼ်ၼင်ႇ ၽႃႉဢမ်ႇလပ်ႉလႄႈ ႁေႃတေၵိၼ်
သေ ပဵၼ်ၽႃႉဢမ်ႇလီၵႂႃႇၼၼ်ႉယဝ်ႉ။ ၽဝႁဝ်းၵေႃႈပေႃးဢမ်ႇလုမ်းလႃး ပူၵ်းပွင်ၸႂ်ႉတိုဝ်းမၼ်းၸိုင်
ဢၼ်လႆႈၵိူတ်ႇမႃးပဵၼ်ၵူၼ်း မီးတိၼ်မီးမိုဝ်းတဵမ်ထူၼ်ႈ ယူႇၼႆႉၵေႃႈဢမ်ႇမီးတီႈပွင်ႇသင်ယဝ်ႉ။

ယွၼ်ႉၵွပ်ႈဢမ်ႇဝႆႉၵႃႈၶၼ် ၽဝၸဝ်ႈၵဝ်ႇလႄႈၽဝလႆႈလူႉသုမ်းတူၵ်းတႅမ်ႇၵႂႃႇၼၼ်ႉ ပိုၼ်း၊ၸိူင်း
လႄႈဢပုမ်ႇမၼ်း ဢွၵ်ႇမႃး ပေႃးဢမ်ႇၼပ်ႉဢၢၼ်ႇလႆႈယဝ်ႉ။

#ၸဝ်ႈယေႇသူႉလႄႈလုၵ်ႈၼွင်ႉႁၵ်းလင်ယုတ။

ယင်းမီးပိူင်ပဵၼ် ဢၼ်မိူၼ်ဢပုမ်ႇ ဢၼ်ၼိုင်ႈဢၼ်မုၼ်ၸဝ်ႈၶရိၸ်ႉယၢၼ်ႇၶဝ် ၵႆႉၵႆႉႁေႃးလၢတ်ႈၼၼ်ႉ။

မိူဝ်ႈပွၵ်ႈၼိုင်ႈ တီႈမိူင်းဢီႇတလီႇ ၼႂ်းဝဵင်းဝဵင်းၼိုင်ႈဢၼ်မီး ၼိုဝ်ၵုၼ်ၸီႇၸလီႇၼၼ်ႉ မီးမေႃၸၼ်ႁၢင်ႈ
လူင်ၵေႃႉၼိုင်ႈ မၼ်းၸၼ်ႁၢင်ႈ ပိုၼ်းၸဝ်ႈယေႇသူႉတေႇဢဝ်မိူဝ်ႈလဵၵ်ႉ တေႃႇထိုင်မၼ်းပေႃးသဵင်ႈသၢႆၸႂ်
ၼၼ်ႉလူႇၼႆယဝ်ႉ။

ပေႃးမၼ်းၸၼ်ၼႆ ၸၼ်ႁႂ်ႈမၼ်းမိူၼ်လီလီလႄႈတိုၼ်းႁႃၵူၼ်းဢၼ် ၼႃႈတႃမိူၼ်ၵူၼ်း ၼႂ်းပၢၼ်ၵူႈ
ပွၵ်ႈတေႉတေႉၼၼ်ႉ မႃးၼင်ႈၽၢႆႇၼႃႈသေၸင်ႇၸၼ်ၼႆယဝ်ႉ။

ႁၢင်ႈၵူႈဢၼ်ဢၼ် ယဝ်ႉၵႂႃႇမူတ်းယဝ်ႉ သေတႃႉၵိုတ်းယူႇထႅင်းသွင်ဢၼ် မၼ်းႁႃၵူၼ်းမိူၼ်မၼ်းပႆႇ
လႆႈ ၼၼ်ႉတႄႉ ပဵၼ်ႁၢင်ႈၸဝ်ႈယေႇသူႉမိူဝ်ႈဢွၼ်ႇလႄႈ လုၵ်ႈၼွင်ႈမိူၵ်ႈမႆႈလူင် ယုတၼၼ်ႉယဝ်ႉ။

ႁႃတေႉႁႃဝႃႈ တၢၼ်ႇႁိုဝ်ၵေႃႈ ဢမ်ႇပႆႇထူပ်းႁၼ်။ထႅင်ႈဝၼ်းၼိုင်ႈ မၼ်းၸင်ႇၵႂႃႇႁၼ် လုၵ်ႈဢွၼ်ႇၸုမ်း

ၼိုင်ႈလဵၼ်ႈယူႇၸွမ်းၵၼ်တီႈၼိူဝ်တၢင်းၼၼ်ႉ။  မၼ်းၾၢင်ႉသတိႁၼ်မႅၼ်ႈ ဢွၼ်ႇၸၢႆးၵေႃႉၼိုင်ႈ
ၸူဝ်ႈၶူပ်ႇမွၵ်ႈၶိူဝ်ႈသိပ်းသွင် ၼႃတႃၵေႃႈၸိုၼ်ႈသႂ်တူဝ်ၶိင်းၵေႃႈ ယိုတ်ႈလဝ်း ပုင်ႇၵူၼ်း မီးတၢင်းႁူႉ
တၢင်းႁၼ်ဝႆႉၼၼ်ႉယဝ်ႉ။

မေႃၼၼ်ႉၸင်ႇႁွင်ႉ လုၵ်ႈဢွၼ်ႇမႃးၼင်ႈသေယဝ်ႉၸၼ်ႁၢင်ႈၸဝ်ႈယေႇသူႉ မိူဝ်ႈပၢၼ်ဢွၼ်ႇယူႇယဝ်ႈ။
ႁၢင်ႈၼၼ်ႉၵေႃႈ ယဝ်ႉၵႂႃႇယဝ်ႉလႄႈ ၵိုတ်းထႅင်ႈႁၢင်ႈယုတလုၵ်ႈၼွင်ႉမိူၵ်ႈၵွၺ်းယဝ်ႈ။

လွင်ႈဝႃႈ တႃႇၸၼ်ႁၢင်ႈယုတၼၼ်ႉ ႁႃၵူၼ်းမိူၼ်မၼ်း ဢမ်ႇႁၼ်လႄႈ လွင်ႈၸၼ်ႁၢင်ႈပႆႇၸၢင်ႈယဝ်ႉ
တူဝ်ႈၼႆၼၼ်ႉ ၶၢဝ်ႇမၼ်းလိုဝ်းလင်ၵႂႃႇသဵင်ႈ။ မၢင်ၵေႃႉ ၸိူဝ်းယုမ်ႇယမ်ဝႃႈ ၼႃတႃၶဝ်မိူၼ်ၼႆၼၼ်ႉ
မႃးၸူး မေႃၸၼ်ႁၢင်ႈႁႂ်ႈၸၼ်ယူႇ ၵူၺ်းၵႃႈမေႃၸၼ်ႁၢင်ႈ တူၺ်းဢမ်ႇပႆႇႁၢၼ်ႉၸႂ်မၼ်း။

ႁဵတ်းၼၼ် ႁိုင်ၵႂႃႇပဵၼ်လၢႆပီၵေႃႈ ဢမ်ႇႁႃႁၼ်လႆႈၵူၼ်းဢၼ်ၼႃႈတႃတေမိူၼ် လုၵ်ႈၼွင်ႉမိူၵ်ႈ ဢၼ်
ႁၵ်းလင် ဢၼ်တႃႁၼ်ငိုၼ်းဢွၼ်ႇဢိတ်းဢီႈသေဢဝ်ၸဝ်ႈၸွမ်ၸဝ်ႈၵဝ်ႇ ဢၢပ်ႈပၼ်ၸိူဝ်းပိူၼ်ႈၶႃႈတၢႆ
ၸိူင်ႉၼင်ႇယုတလႆႈ။ပူၼ်ႉၵႂႃႇပီယၢဝ်း ၶၢဝ်းႁိုင်ၵေႃႈႁႃဢမ်ႇပႆႇႁၼ်။

ၵူၺ်းၼႃႇ ၼႂ်းဝၼ်းၼိုင်ႈတႄႉ ၽွင်းမေႃၸၼ်ႁၢင်ႈတိုၵ်ႉၼင်ႈယူႇတီူၼႂ်းလၢၼ်ႉ တီႈၼိုင်ႈၼၼ်ႉ။

``ပၼ်လဝ်ႈၵဝ်ဢိတ်းၼိုင်ႈလႄႈ ပၼ်လဝ်ႈၵဝ်ဢိတ်းၼိုင်ႈ ..´´ၼႆ ၵူၼ်းဢမ်ႇၵူဝ် ဢမ်ႇဢၢႆသင်ၵေႃႉၼိုင်ႈ
မႃးယွၼ်းၵိၼ်လဝ်ႈယူႇ။သိူဝ်ႈၶူဝ်းၵေႃႈ ပူတ်ႇယူတ်ႇပၢတ်ႇယၢတ်ႇ ၵိူဝ်ႇၵိူဝ်ႇၶႆးၶႆး ၶူၼ်ႁူဝ်ၵေႃႈ ယုင်ႈ"
တူၺ်းယဝ်ႉဢမ်ႇမီးတီႈလီဢဝ်သေတီႈ။

မိူဝ်ႈမေႃၸၼ်ႁၢင်ႈ ႁၼ်မၼ်းၼၼ်ႉ ၼႅတ်ႈၶဝ်ႈၵႂႃႇႁွင်ႉမၼ်းမႃးသေ ဢၢႆႈၼႆႉယဝ်ႉတေမိူၼ်သေပိူၼ်ႈ
ၼႆလႄႈ ႁွင်ႉမိူဝ်းလဵင်ႉလဝ်ႈဢၢႆႈၼၼ်ႉယူႇယဝ်ႉ။  မိူဝ်ႈၸၸၸၼ်ယူႇၼၼ်ႉ ပေႃးလႆႈၵိၼ်လဝ်ႈၵေႃႈ

ပေႃးယဝ်ႉ သႂ်ႇၸႂ်ဝႃႈၼႆလႄႈ ဢၢႆႈၼၼ်ႉဢမ်ႇတၼ်းတူၺ်းသင် ၽိူဝ်ႇၵိၼ်ဢိမ်ႇယဝ်ႉ မႃးယၵ်ႉတူၺ်းၼႃႈ
မေႃၸၼ်ႁၢင်ႈၼၼ်ႉ တွင်းၶိုၼ်းလီလီလႄႈႁႆႈမင်ယဝ်ႈ။  မိူဝ်မေႃၼၼ်ႉၶိုၼ်းထၢမ် ယွၼ်ႉသင်ႁႆႈၼႆ
ၼၼ်ႉ မၼ်းၸင်ႇဝႃႈမေႃႁဝ်း ဢမ်ႇတွင်းၶႃႈယဝ်ႉႁႃႉမိူဝ်ႈၼၼ်ႉ မိူဝ်ႈမေႃႁဝ်းၸွမ်းႁႃ ၵူၼ်းဢၼ်ၼႃႈတႃ
မိူၼ်ၸဝ်ႈယေႇသူႉသေ ၸၼ်ႁၢင်ႈၼၼ်ႉ ပဵၼ်ၶႃႈဢေႃႈၼႆယဝ်ႉ။

ႁၢင်ႈၽၢင်ၼႃႈတႃ လၢႆးႁဵတ်းသၢင်ႈ ပိူင်ႈလႅၵ်ႈလၢႆႈၵႂႃႇၵၼ်ၼႃႇ ထိုင်တီႈမေႃၸၼ်ႁၢင်ႈ ပေႃးဢမ်ႇတွင်း
လႆႈသေဢိတ်းၼၼ်ႉယဝ်ႉ။  ၶိုင်ႈၸူဝ်ႈပၢၼ်ၵူၼ်းၵေႃႉၼိုင်ႈ ယမ်ႉဢမ်ႇမီးသင်
လုၵ်ႉဢဝ်တီႈ ၵူၼ်းၼႃတႃမိူၼ် ၽူႈလီမျႅတ်ႈၼင်ႇၸဝ်ႈယေႇသူႉသေ ယဵၼ်းပဵၼ်ၵူၼ်းၼႃႈတႃမိူၼ်
လုၵ်ႈၼွင်ႉမိူၵ်ႈ ယုတၵႂႃႇပႅတ်ႈယဝ်ႈ။  မၼ်းလီသေလၢႆလူင်လၢင်ပေႃးၵႃႈႁိုဝ်။ပေႃႈမႄႈ

ပီႈတွင်ႉ လႄႈၶူးသွၼ်းႁဝ်းၶဝ် တေၸႂ်ဢမ်ႇလီၸွမ်းၵႃႈႁိုဝ်ၵမ်းလဵဝ်။
ၵူၺ်းၼႃႇ ၵူၼ်းၸိူင်ႉၼႆ ၼႂ်းမိူင်းၵူၼ်း တိုၵ်ႉမီးယူႇထႅင်ႈ တၢင်းၼမ်တၢင်းလၢႆယဝ်ႈ။

ၽႂ်သေဢမ်ႇဝႃႈ ပေႃးဢမ်ႇႁူႉတူဝ် မေႃဝႆႉၵႃႈၶၼ်ၽဝတူဝ်ၵဝ်ႇ ႁဝ်းၵိုင်ႇလီ ပူၵ်းပွင်ၽဝတူဝ်ၵဝ်ႇဢိူဝ်ႈ
ၼႆဢမ်ႇႁူႉၸိုင် တေလႆႈလူႉလႅဝ်တူၵ်းသုမ်းပႅတ်ႈလၢႆၵႂႃႇၸိူင်ႉၼင်ႇၵူၼ်း ၼႂ်းဢပုမ်ႇၼႆႉဢမ်ႇႁၢင်ႉယဝ်ႉ။

ပေႃးမေႃဝႆႉၵႃႈၶၼ်ၽဝတူဝ်ၵဝ်ႇ မေႃႁၵ်ႉတူဝ်ၸဝ်ႈၵဝ်ႇသေ ၶတ်းသၢင်ႈႁၢင်ႈပွင်တေႉတေႉၼႆ ဢမ်ႇမီး
ယိူင်းဢၢၼ်းဢၼ်လႂ်လေႃႇ ဢၼ်တေဢမ်ႇပဵၼ်လႆႈ။  ႁႂ်ႈမေႃၸႂ်ႉတိုဝ်းၽဝၼင်ႇ မီးၵႃႈမီးၶၼ်သေၵမ်း။

မႂ်ႇသုင်ၵၢင်ၼႂ်ၶႃႈ-

#ၼေႃႇလၢဝ်မိူင်း(ၼွင်ဢူႇ)
႒႒။ၵျုႇလၢႆႇ။႒႐႑႗။ဝၼ်းသဝ်