ၸႂ်တူၵ်းႁိုဝ်/ တိူဝ်ႉၸႂ်မိူဝ်ႈလႂ် ႁႂ်ႈလူပၼ်တႃႇသေႇ

ၸႂ်တူၵ်းႁိုဝ်/ တိူဝ်ႉၸႂ်မိူဝ်ႈလႂ် ႁႂ်ႈလူပၼ်တႃႇသေႇ
--------------------------------------
သင်ဝႃႈၵူၼ်းၵေႃႉၼၼ်ႉ ဢမ်ႇၶႂ်ႈမႃးၸူးႁဝ်းယဝ်ႉၼႆ ယႃႇပေၸွမ်းႁွင်ႉမၼ်းယူႇတိၵ်းတိၵ်း။


ဢၼ်ႁဝ်းထၢမ်ၵႂႃႇၼၼ်ႉ သင်ဝႃႈမၼ်းဢမ်ႇၶႂ်ႈတွပ်ႇၼႆ ယႃႇပေၸွမ်းထၢမ်ယူႇတိၵ်းတိၵ်း။

သင်ဝႃႈၵူၼ်းၵေႃႉၼၼ်ႉ ဢမ်ႇၶဝ်ႈၸႂ်ၼိူဝ်ႁဝ်းယဝ်ႉၼႆ ယႃႇပေၸွမ်းလၢတ်ႈတေႃႇမၼ်းယူႇတိၵ်းတိၵ်း။

သင်ဝႃႈၶဝ်ဢမ်ႇၶႂ်ႈပၼ်ႁဝ်းပေႃးၼႆ ယႃႇပေၵႂႃႇၸွမ်းယွၼ်းမၼ်းယူႇတိၵ်းတိၵ်း။

သင်ဝႃႈၵူၼ်းၵေႃႉၼၼ်ႉ ၶႂ်ႈပၢႆႈၽၢတ်ႇယၢၼ်ႁဝ်းၵႂႃႇၼႆ  ယႃႇပေၵုမ်ႇၸွမ်းတိုတ်ႉၸၼ်ၶဝ်ဝႆႉယူႇတိၵ်းတိၵ်း။

ၵူၼ်းၵေႃႉဢၼ်ဢမ်ႇပႃးၸႂ်သေ ၶဝ်ဢမ်ႇႁဵတ်းပၼ်ၵၢၼ်ႁဝ်းလႆႈၼၼ်ႉ ပေႃးဝႃႈႁဝ်းၵုမ်ႇၵႂႃႇပွင်းၶဝ်သေႁဵတ်းယူႇတိၵ်းတိၵ်း
ပေႃးၼႆ ႁဝ်းၵူၺ်းဢိူဝ်ႈဢၼ်တေႁိူဝ်ႉ၊ ယွၼ်ႉၶဝ်ဢမ်ႇပႃးၸႂ်သေၶႂ်ႈႁဵတ်းလႄႈ တွၼ်ႈတႃႇႁဝ်းတေလႆႈလွင်ႈႁိူဝ်ၸႂ်
လၢႆလၢႆၵူၺ်း။  ပေႃးဝႃႈၸဝ်ႈၵဝ်ႇလႆႈႁိူဝ်ႉၸႂ်မႃးၼမ်ယဝ်ႉသေ ၽၢႆႇၶဝ်သမ်ႉ တေပဵၼ် ၵၢၼ်လိူဝ်တႃႇၶဝ်ၵူၺ်းလႄႈ 
ႁိုင်ႁိုင်မႃး တူဝ်ယူႇၸမ်ၵၼ်ယူႇၵေႃႈ ၸႂ်တင်းသွင်တေႉတေယူႇၵႆၵၼ်ဝႆႉယူႇယဝ်ႉ။

ဢၼ်ၸွမ်းထိင်းပၼ်ၸႂ်ၸဝ်ႈၵဝ်ႇ ယႃႇႁႂ်ႈပဵၼ်ၼင်ႇဢၼ်ၶႂ်ႈပဵၼ်ၼၼ်ႉ ပဵၼ်ၵၢၼ်ဢၼ်ယၢပ်ႇသုတ်းၼၼ်ႉယဝ်ႉ။
ၵၢၼ်ဢၼ်ယၢပ်ႇၼၼ်ႉ ယၢပ်ႇယူႇၵေႃႈ ၶၢဝ်းယၢမ်းဢၼ် ၶတ်းၸႂ်ႁႂ်ႈၶၢမ်ႈပူၼ်ႉမၼ်းၵႂႃႇလႆႈၼၼ်ႉ ၸႂ်ၸဝ်ႈၵဝ်ႇတေ
ယူႇယၢပ်ႇ လိူတ်ႇမႆႈယူႇဢၼ်ဝႃႈၼၼ်ႉ ႁပ်ႉၶၢမ်ႇပၼ်ယူႇ။

ၵူၺ်းၵႃႈ မိူဝ်ႈၶၢဝ်းယၢမ်းၼၼ်ႉ တေလႆႈၵၼ်ႈၸႂ်ၵၼ်ႈၶေႃးသေႁႂ်ႈၶၢမ်ႈပူၼ်ႉၵႂႃႇလႆႈ။

မိူဝ်ႈၶၢဝ်းယၢမ်းၼၼ်ႉ သင်ဝႃႈၵေႃႉဢၼ်ၶႂ်ႈၶဝ်ႈမႃးၼၼ်ႉၶိုၼ်းၶဝ်ႈမႃးပေႃးၼႆၸဝ်ႈၵဝ်ႇတေလႆႈႁပ်ႉတွၼ်ႈမၼ်းယူႇႁႃႉ
ဢမ်ႇလႆႈႁပ်ႉတွၼ်ႈႁႃႉ ဢၼ်ဝႃႈၼၼ်ႉ ၶေႃႈတွပ်ႇမၼ်း  မိူဝ်ႈၶၢဝ်းယၢမ်းၸဝ်ႈၵဝ်ႇ လႆႈၶူမ်ၸႂ်ၶူမ်ၶေႃးၼႃႇၼၼ်ႉ တေတႅပ်းတတ်းပၼ်ၸဝ်ႈၵႂႃႇဢမ်ႇႁၢင်ႉ။

မိူဝ်ႈဢွၼ်တၢင်း မိူဝ်ႈၵႆႉထၢမ်တွပ်ႇၵၼ်ၼၼ်ႉ ၸွင်ႇၸဝ်ႈၵဝ်ႇတိုၵ်ႉၶႂ်ႈႁူႉယူႇႁႃႉ ၼႆၼၼ်ႉ ယွၼ်ႉၸဝ်ႈၵဝ်ႇလႆႈၶၢမ်ႇ 
တၢင်းလွင်ႈလိူတ်ႇမႆႈယွၼ်ႉမၼ်းမႃးလႄႈ လွင်ႈလႆႈၶၢမ်ႇတၢမ်ႇလွင်ႈလိူတ်ႇမႆႈၼၼ်ႉတေပၼ်ၶေႃႈတွပ်ႇမၼ်းၵႂႃႇယူႇ။

သင်ဝႃႈမၼ်း ၶဝ်ႈၸႂ်ၼိူဝ်ႁဝ်းမႃးထႅင်ႈပွၵ်ႈၼိုင်ႈလူးတေလႆႈႁူမ်ၸူမ်းႁပ်ႉတွၼ်ႈမၼ်းထႅင်ႈယူႇႁႃႉၼႆၼၼ်ႉ
သမ်ႉၺႃးမိူဝ်ႈဢၼ်ၸဝ်ႈၵဝ်ႇ တိုၵ်ႉလႆႈတိူဝ်ႉၸႂ်ၼၼ်ႉလႄႈ လွင်ႈလႆႈတိူဝ်ႉၸႂ်ၸဝ်ႈၵဝ်ႇၼၼ်ႉ
တေတွပ်ႇပၼ်ၶေႃႈတွပ်ႇမၼ်းၵႂႃႇယူႇ။

သင်ဝႃႈမၼ်းၶႂ်ႈပၼ်ႁဝ်းမႃးထႅင်ႈပွၵ်ႈၼိုင်ႈလႄႈတေလႆႈႁပ်ႉဢဝ်ယူႇႁႃႉ ဢၼ်ဝႃႈၼၼ်ႉ၊ လွင်ႈၶူမ်ၸႂ်ၶူမ်ၶေႃး
ဢွၼ်ႇၸဝ်ႈၵဝ်ႇဢၼ်လႆႈၶၢမ်ႇမႃးၵူႈၶၢဝ်းယၢမ်းၼၼ်ႉ တေတွပ်ႇပၼ်မၼ်းၵႂႃႇယူႇ။

သင်ဝႃႈၶဝ်ဢမ်ႇၶႂ်ႈပၢႆႈပၢႆႈႁဝ်းထႅင်ႈယဝ်ႉၼႆၵေႃႈ ၸႂ်ၸဝ်ႈၵဝ်ႇဢၼ်လႆႈထိတိူဝ်ႉလွင်ႈၸႅပ်းသႅပ်ႇၼႂ်းႁူဝ်ၸဝ်ႈၸဝ်ႈၵဝ်ႇမႃး
ၵူႈၶၢဝ်းယၢမ်းၼၼ်ႉ တေတွပ်ႇပၼ်မၼ်းၵႂႃႇယူႇ။

မိူဝ်ႈၽွင်းႁဝ်း လႆႈတိူဝ်ႉၸႂ်၊ ၶူမ်ၸႂ်ၶူမ်ၶေႃး၊ လႆႈမႆႈလိူတ်ႇ၊လႆႈပဵၼ်ၶီႈမုၵ်ႈၼမ်ႉတႃ၊ လႆႈၶီငဝ်၊ ယူႇမႃးၼႂ်းၶၢဝ်းတၢင်း
ၸိူဝ်းၼၼ်ႉ သင်ဝႃႈၶိုၼ်းမႃးၺႃးၶဝ်ထႅင်ႈပွၵ်ႈၵမ်းသွင်ၼႆ ၸဝ်ႈၵဝ်ႇ တေလႆႈဢဝ်လွင်ႈ ဢၼ်လႆႈၶၢမ်ႇတၢမ်ႇမၼ်းမႃး
တင်းသဵင်ႈတင်းမူတ်းၼၼ်ႉ တေႃႇသူႈမၼ်းၵႂႃႇႁႂ်ႈလႆႈ၊  ပေႃးဝႃႈၸဝ်ႈၵဝ်ႇဢဝ်ပႄႉလႆႈပုၼ်ႈၶဝ်ပေႃးၼႆ ၼႂ်းၸႂ်
ၸဝ်ႈၵဝ်ႇၼၼ်ႉၵေႃႈ တေယူႇသႃႇၵႂႃႇၵမ်းလဵဝ်။
ယဝ်ႉၵေႃႈ ၶၢဝ်းယၢမ်းတင်းၼႃႈဢၼ်ဝႃႈၼၼ်ႉၵေႃႈ တေတႅပ်းတတ်းပၼ်ၸဝ်ႈၵဝ်ႇၵႂႃႇလွႆးလွႆးယူႇ။
ၵူႈၸိူဝ်းၵူႈလွင်ႈဢၼ်လႆႈၸဵပ်း၊ ဢၼ်လႆႈႁႆႈ၊ ဢၼ်လႆႈငဝ် ၸၵႂႃႇတင်းသဵင်ႈ ဢၼ်မၼ်းႁဵတ်းပၼ်ၼၼ်ႉ ႁႂ်ႈၶိုၼ်းဢဝ်
မၼ်းၵေႃႉ ၶိုၼ်းႁဵတ်းသၢင်ႈပၼ် တၢင်းမူၼ်ႈသိူဝ်းၸႂ်ႁဝ်း လႄႈလွင်ႈမေႃဝႆႉၸႂ်ၵႅၼ်ႇၶႅင်ၸဝ်ႈၵဝ်ႇၼၼ်ႉယဝ်ႉ။
ၼႂ်းလေႃးၵလူင်ၼႆႉ ၽႂ်ၵေႃႈဢမ်ႇလွတ်ႈလႆႈ လွင်ႈလိူတ်ႇမႆႈတုၵ်ႉၶလူင်ၼင်ႇၵဝ်ႇ၊ ၵူၺ်းၵႃႈ မိူဝ်းၶၢဝ်းယၢမ်းၼၼ်ႉ
ဢၼ်ပဵၼ်မေႃယႃလူင်တႃႇႁဝ်းတေႉ ပဵၼ်ၶၢဝ်းယၢမ်းၼၼ်ႉယဝ်ႉ။
ၵူႈၸိူဝ်းၵူႈလွင်ႈတေလႆႈဢဝ်ၶၢဝ်းယၢမ်းသေ မူၼ်ႉမႄးပၼ် ယူတ်းယႃပၼ်ၵႂႃႇ၊ ပေႃးဝႃႈ လႆႈပဵၼ်မႃးၼႆ တႃႇၸဝ်ႈၵဝ်ႇ
ႁႂ်ႈမီးၸႂ်ၵႅၼ်ႇၶႅင်သေ တေႃႇသူႈမၼ်းၵႂႃႇ ႁႂ်ႈလႆႈၼၼ်ႉၵူၺ်းယဝ်ႉ။