သိမ်ႇ လႄႈ ၼၢင်းယိင်း

သိမ်ႇ လႄႈ ၼၢင်းယိင်း
------------------------------------
ၼႂ်းပုတ်ႉထၽႃႇသႃႇႁဝ်းၼႆႉ တေၵႆႉလႆႈငိၼ်းယူႇ လွင်ႈယုမ်ႇယမ်ဢၼ်ဝႃႈ ပေႃးပဵၼ်ၼၢင်းယိင်းတေ ဢမ်ႇလႆႈၶဝ်ႈၼႂ်းသိမ်ႇ၊ တေဢမ်ႇလႆႈၶိုၼ်ႈသိမ်ႇဢၼ်ဝႃႈၼၼ်ႉ လွင်ႈယုမ်ႇယမ်ဢၼ်ၼႆႉ ဢဝ်ၽင်ဝႆႉ ၼႂ်းၸႂ် ႁၢၼ်ႇတေႃႇထိုင်တၢႆၵွၼ်ႇၼၼ်ႉယဝ်ႉ၊ ၵမ်ႉၼမ်တေႉ တေပဵၼ်ၸွမ်းဝၢၼ်ႈၼွၵ်ႈၼႃးပၢင်ႇၸိူဝ်း ၼၼ်ႉၵူၺ်းၼင်ႇၵဝ်ႇ တေႃႈလဵဝ်ၼႆႉတေႉ ပေႃးပဵၼ်ဝဵင်းလူင် မိူၼ်ၼင်ႇ

တႃႈၵုင်ႈ မၼ်းလေး တူၼ်ႈတီး ၸၵႂႃႇဝဵင်းလူင်ၸိူဝ်းၼၼ်ႉတေႉ တေၵႆႉလႆႈၶဝ်ႈတူၺ်းၼႂ်းသိမ်ႇယူႇ။ ယွၼ်ႉဝႃႈဝဵင်းလူင်ၼႆႉ ပဵၼ်ၵူၼ်းမီးတၢင်းႁူႉၶဝ်ယူႇသဝ်းႁမ်ႉၼမ်။ ၵပ်းၵၢႆႇလူၺ်ႈလွင်ႈၼႆႉသေ မိူဝ်ႈၼၼ်ႉ မီးမုၼ်ၸၢင်း ပႃးၼိုင်ႈ တုၵ်းယွၼ်းၸဝ်ႈသြႃႇလူင်ၶဝ် ႁႂ်ႈတႅမ်ႈသပ်းလႅင်းၼႄလွင်ႈၼႆႉ၊ ၸဝ်ႈသြႃႇလူင်ၶဝ်ၵေႃႈဝႃႈ မီးယိူင်းဢၢၼ်းၶႂ်ႈတႅမ်ႈယူႇၸဵမ်မိူဝ်ႈလႂ် ၵူၺ်းၵႃႈတိုဝ်ႉတၢင်းဢမ်ႇပေႃးပၼ်လႄႈၸင်ႇလႆဝႃႈဢမ်ႇပႆႇ ပဵၼ်တႅမ်ႈဝႆႉၸဵမ်မိူဝ်ႈလႂ်၊ ၵမ်းၼႆႉတေႉ ယွၼ်ႉၸဝ်ႈၸၢင်းၶဝ်တူၵ်းယွၼ်းမႃးၵေႃႈပိူင်ၼိုင်ႈ ဢၼ်တိုၼ်း ၶႂ်ႈတႅမ်ႈယူႇၼၼ်ႉၵေႃႈပိူင်ၼိုင်ႈ ဢဝ်မႃးလေႃးၵၼ်သေ ပဵၼ်တႅမ်ႈၵႂႃႇၼၼ်ႉယဝ်ႉ။
(မုၼ်ၸဝ်ႈလူင်မၢၼ်ႈပႃးၼိုင်ႈတႅမ်ႈဝႆႉ ၵူၺ်းဢမ်ႇတွင်းၸိုဝ်ႈမၼ်းၸဝ်ႈယဝ်ႉ။)

ၼႂ်းမိူင်းမၢၼ်ႈ မိူင်းတႆးပတ်းပိုၼ်ႉ ၸွမ်းဝၢၼ်ႈၼွၵ်ႈၼၼ်ႉ ၼိုဝ်ႈၵျွင်းတိုၼ်းမီးဝႆႉယူႇသိမ်ႇၼိုင်ႈ လင်။ ၼႂ်းသိမ်ႇၸိူဝ်းၼၼ်ႉ ပေႃးပဵၼ်ၼၢင်းယိင်းၼႆ တိုၼ်းဝႃႈတေဢမ်ႇလႆႈၶဝ်ႈၼႂ်းသိမ်ႇလႃးလႃး။
ဢၼ်ဝႃႈဢမ်ႇလီၶဝ်ႈၼႂ်းသိမ်ႇဢၼ်ဝႃႈၼၼ်ႉ တိုၼ်းဝႃႈယုမ်ႇယမ်ဝႆႉ တေႃႇထိုင်တၢႆၼၼ်ႉယဝ်ႉ။ ၵွပ်ႈၼၼ် ၼၢင်းယိင်းၸိူဝ်းဢၼ်ယူႇဝၢၼ်ႈၼွၵ်ႈၶဝ်ၼၼ်ႉ ၵိူတ်ႇမႃးသေတၢႆၵႂႃႇလၢႆလၢႆၵေႃႈ ဢမ်ႇလႆႈ ၶဝ်ႈတူၺ်းၼႂ်းသိမ်ႇသေပွၵ်ႈ၊ ယူႇတင်းၼွၵ်ႈမၼ်းသေမုင်ႈႁၼ်ၵူၺ်း။ ယွၼ်ႉသင်လႄႈ ဢမ်ႇပၼ် ၼၢင်းယိင်းၶဝ်ႈဢၼ်ဝႃႈၼၼ်ႉ----
ၽြႃးပဵၼ်ၸဝ်ႈႁေႃးဝႆႉႁႃႉ၊ ပေႃးဝႃႈၶဝ်ႈၼႂ်းသိမ်ႇၼႆ ၵူဝ်သိမ်ႇတေဢမ်ႇၸႂ်ႉလႆႈတႃႇရႁၢၼ်းၶဝ်ႁႃႉ၊ ဢမ်ႇၼၼ် ၵူဝ်ၵၢမ်ႇလူႉလႅဝ်ၵႂႃႇႁႃႉ၊ ၵွပ်ႈပဵၼ်ၼၢင်းယိင်းလႄႈ ၶဝ်ႈဢမ်ႇလႆႈႁႃႉ ၶေႃႈထၢမ်ၸိူဝ်းၼႆႉ သင်ဝႃႈထၢမ်မႃးၼႆ တေဢမ်ႇမီးၽႂ်သပ်းလႅင်းလႆႈၸႅင်ႈၸႅင်ႈလႅင်းလႅင်း ၵိုၵ်းပႃးလူၺ်ႈၶေႃႈၵမ်ႉမၼ်း ၼင်ႇၵဝ်ႇ။ ပေႃးဢမ်ႇႁူႉလီလီတေႉ ဢၼ်ဝႃႈၼၢင်းယိင်းဢမ်ႇၶဝ်ႈၼႂ်းသိမ်ႇလႆႈဢၼ်ဝႃႈၼၼ်ႉ ႁင်ႈမိူၼ်ၽြႃးပဵၼ်ၸဝ်ႈ ႁေႃးဝႆႉၵေႃႈလူဝ်လူဝ်၊ ပဵၼ်ထုင်းမိူဝ်ႈၵွၼ်ႇယိပ်းမႃးလႄႈ တေလႆႈသိုပ်ႇယိပ်းၵႂႃႇၵေႃႈလူဝ်လူဝ်ယဝ်ႉ။ လွင်ႈယုမ်ႇယမ်ဢၼ်ၼႆႉၵေႃႈ ဢဝ်သၢင်းဝႆႉၼႂ်း မၢၵ်ႇႁူဝ်ၸဝ်ၶဝ်သေ ဢဝ်ပဵၼ်လွင်ႈ ယုမ်ႇယမ်ၵႂႃႇဢၼ်ၼိုင်ႈၼၼ်ႉယဝ်ႉ။

ပေႃးဝႃႈၵပ်းၵၢႆႇလူၺ်ႈဝၼ်းဢၼ်ၸဝ်ႈသင်ႇၶႃႇၶဝ်ၶဝ်ႈသိမ်ႇ ၺၢပ်ႈၸၢင်းလႄႈသင် ၼႄပႃႇတိမွၵ်ႈ လႄႈသင်ၸိူဝ်းၼႆႉတေႉ ယႃႇဝႃႈၼႂ်းသိမ်ႇလႃႈ ၼႂ်းဝၢင်သိမ်ႇၼၼ်ႉၵေႃႈယင်းဢမ်ႇလီၶဝ် လွင်ႈၼႆႉတေႉ ဢမ်ႇလၢတ်ႈၵေႃႈတေႁူႉၵၼ်ယူႇ။ ၵွပ်ႈသင်လႄႈ ဢမ်ႇပၼ်ၶဝ်ႈၼႂ်းဝၢင်းသိမ်ႇပေႃးၼႆ မိူဝ်ႈၸဝ်ႈသင်ႇၶႃႇၶဝ်တိုၵ်ႉမီးယူႇၼႂ်းသိမ်ႇလႄႈ သမုၵ်ႈယူႇသေမဵဝ်းမဵဝ်းၼၼ်ႉ ပေႃးဝႃႈ ၸဝ်ႈသၢင်ႇ ဢမ်ႇၼၼ်ၵူၼ်းႁိူၼ်းသေၵေႃႉၵေႃႉၶဝ်ႈမီးယူႇၼႂ်းဝၢင်းသိမ်ႇပေႃးၼႆ၊ ၸဝ်ႈသင်ႇၶႃႇၶဝ်ဢၼ်တိုၵ်ႉမီး ယူႇၼႂ်းသိမ်ႇၼၼ်ႉထုၵ်ႇဢႃႇပၢတ်ႈၼၼ်ႉယဝ်ႉ၊
ပေႃးဝႃႈၶဝ်ႈၵႂႃႇၼႂ်းသိမ်ႇပေႃးၼႆ ဢၼ်ၸဝ်ႈၶဝ်တိုၵ်ႉလွတ်ႈႁေႃးယူႇၼႂ်းသိမ်ႇၼၼ်ႉ ၵၢမ်ႇမၼ်းတေ
လူႉလႅဝ်ၼၼ်ႉယဝ်ႉ။
ၵူၺ်းၵႃႈ ဢၼ်တေႃႈလဵဝ်ၼႆႉ ဢမ်ႇၸႂ်ႈဝၼ်းဢၼ်ၸဝ်ႈသင်ႇၶႃႇၶဝ်ၶဝ်ႈသိမ်ႇၵေႃႈယဝ်ႉ ပေႃးဝႃႈၵပ်း ၵၢႆႇလူၺ်ႈလွင်ႈသိမ်ႇၼႆ ပေႃးပဵၼ်ၼၢင်းယိင်းတိုၼ်းဝႃႈဢမ်ႇထုၵ်ႇလီၶဝ်ႈ ဢမ်ႇထုၵ်ႇၵၢႆၼႆၼၼ်ႉ ဢဝ်မႃးမူၵ်းဝႆႉယူႇၼႂ်းမၢၵ်ႇႁူဝ်ၸႂ်ၶဝ်ၼၼ်ႉယဝ်ႉ။

တီႈတေႉမၼ်း ဢၼ်ဝႃႈဢမ်ႇလႆႈၶဝ်ႈၼႂ်းသိမ်ႇဢၼ်ဝႃႈၼၼ်ႉ ဢမ်ႇဝႃႈၼၢင်းယိင်းႁိုဝ် ၸဝ်ႈၸၢင်းပႃး လႂ်ၵေႃႈယဝ်ႉ ပေႃးဝႃႈတီႈၼႂ်းသိမ်ႇတိုၵ်ႉၺၢပ်ႈယူႇသေဢၼ်ဢၼ်ပေႃးၼႆ ၵူၼ်းတင်းၼွၵ်ႈ ၽႂ်ၵေႃႈယဝ်ႉ တိုၼ်းဝႃႈတေဢမ်ႇလႆႈၶဝ်ႈၼႂ်းသိမ်ႇ၊ ၸဝ်ႈဢၼ်ယူႇၼႂ်းသိမ်ႇၼၼ်ႉၵေႃႈ တေလႆႈၼင်ႈ ယူႇၸမ်ၵၼ်တင်းၵႆၼိုင်ႈသွၵ်ႇ တေဢမ်ႇလႆႈၼင်ႈယၢၼ်ၵၼ်၊ ပေႃးၼင်ႈယၢၼ်ၵႆၵၼ်လႄႈသင်၊ ၵူၼ်းတင်းၼွၵ်ႈသေၵေႃႉၵေႃႉၶဝ်ႈမႃးၼႂ်းသိမ်ႇလႄႈသင် ပေႃးပဵၼ်ၼၼ် ဢၼ်ၺၢပ်ႈယူႇၼၼ်ႉ ၵၢမ်ႇ မၼ်းတေလူႉလႅဝ်ၼၼ်ႉယဝ်ႉ။ မိူဝ်ႈတိုၵ်ႉၺၢပ်ႈယူႇၼႂ်းသိမ်ႇၼၼ်ႉ သင်ဝႃႈသေၵေႃႉၵေႃႉၶဝ်ႈၵႂႃႇၼႂ်း သိမ်ႇပေႃးၼႆ ၵူၼ်းၶဝ်ႈၵႂႃႇၼၼ်ႉတေႉ ဢမ်ႇပဵၼ်သင် ဢၼ်တိုၵ်ႉၺၢပ်ႈယူႇၼၼ်ႉဢိူဝ်ႈ တေလူႉလႅဝ် တေဢမ်ႇမီးၽွၼ်းလီသင် ယဝ်ႉၵေႃႈ ၸဝ်ႈဢၼ်ၺၢပ်ႈယူႇၸိူဝ်းၼၼ်ႉၵေႃႈ တေထုၵ်ႇဢႃႇပၢတ်ႈပႃး ထႅင်ႈၵွၼ်ႇ။ ဢၼ်ၼႆႉၵူၺ်းၼင်ႇၵဝ်ႇ ဢၼ်လမ်ႇလွင်ႈမၼ်းတေႉ။ ပေႃးဝႃႈဢမ်ႇၺႃးမိူဝ်ႈၸဝ်ႈသင်ႇၶႃႇၶဝ်ၶဝ်ႈသိမ်ႇ ၺၢပ်ႈသိမ်ႇပေႃးၼႆ ၽႂ်ၵေႃႈယဝ်ႉ မီးသုၼ်ႇလႆႈၶဝ်ႈ ၼႂ်းသိမ်ႇၵူႈၵေႃႉ ဢမ်ႇဝႃႈယိင်းႁိုဝ် ၸၢႆး ထဝ်ႈႁိုဝ်ၼုမ်ႇ။

// ဢၼ်ဝႃႈၼၢင်းယိင်းဢမ်ႇၶဝ်ႈလႆႈၼႂ်းသိမ်ႇဢၼ်ဝႃႈၼၼ်ႉ ဢမ်ႇၸႂ်ႈဝႃႈၼၢင်းယိင်းၵူၺ်း ၸဝ်ႈပႃးလႂ် ၸၢႆးလႂ် ၵေႃႈယဝ်ႉ ၵူၼ်းဢၼ်မီးယူႇတင်းၼွၵ်ႈသိမ်ႇၼၼ်ႉ ပေႃးဝႃႈတိုၵ်ႉၺၢပ်ႈယူႇၼႂ်းသိမ်ႇပေႃးၼႆ ဢမ်ႇမီးတိုဝ်ႉတၢင်းတႃႇတေ ၶဝ်ႈလႆႈ။ //

လိူဝ်သေၼၼ်ႉတေႉ ၼၢင်းယိင်းဢမ်ႇၶဝ်ႈလႆႈၼႂ်းသိမ်ႇဢၼ်ဝႃႈၼၼ်ႉ ပဵၼ်လွင်ႈယုမ်ႇယမ်ၽိတ်း ဢၼ်ၼိုင်ႈၼႆၼၼ်ႉယဝ်ႉ။