မႃးလႄႈႁဝ်းၽိုၵ်းထွမ်ႇၽိုၵ်းလၢတ်ႈ

#မႃးလႄႈႁဝ်းၽိုၵ်းထွမ်ႇၽိုၵ်းလၢတ်ႈ
**************************************
မိူဝ်ႈတေႇၵိူတ်ႇပဵၼ်ၵူၼ်းမႃးၼၼ်ႉ ငဝ်ႈပိုင်းမၼ်း
ႁဝ်းဢမ်ႇပႃးသင်သေမဵဝ်း ဢၼ်ၵိုင်ႉၵၢင်ႉၵိူတ်ႇလႄႈ
ၵိုင်ႉၵၢင်ႉမေႃၼႆႉ မီးႁွင်ႉႁႆႈမဵဝ်းလဵဝ်ၼၼ်ႉၵွၺ်း။

ၸဵမ်လွင်ႈၵႂႃႇ လွင်ႈၵိၼ်လွင်ႈႁဵတ်းသၢင်ႈလႄႈလွင်ႈ
လၢတ်ၸႃၸိူဝ်းၼႆႉ လႆႈၽိုၵ်းဢဝ်ၶိုၼ်ႈၵမ်းဢိတ်း"
လၢႆလၢႆယဝ်ႈ။

ၽိူဝ်ႇဢၼ်မေႃလၢတ်ႈၵႂၢမ်းမႃး မေႃႁဵတ်းသၢင်ႈ
မေႃယၢင်ႈပႆမႃးယဝ်ႉတႄႉ ငဝ်ႈၶၢမ်ႇပိုၼ်ႉပၺ်ႇၺႃႇ
ဢၼ်ႁဝ်းလႆႈႁဵၼ်းမႃးၸဵမ်လဵၵ်ႉၼၼ်ႉ ၵူၼ်းႁဝ်းၼႆႉ
ဢွၼ်ၵၼ်လိုမ်းမၼ်းပႅတ်ႈသေ ဝႆႉတၢင်ႇလွင်ႈပဵၼ်

လွင်ႈယႂ်ႇလိူဝ်မၼ်းပႅတ်ႈ။   ယွၼ်ႉမေႃလၢတ်ႈ ၵႂၢမ်းၵူၼ်းယဝ်ႉလႄႈ ၶႂ်ႈလၢတ်ႈ

သင်ၵေႃႈလၢတ်ႈ ၶႂ်ႈဝႃႈသင်ၵေႃႈဝႃႈၵႂႃႇတိၵ်းတိၵ်းသေ လူင်လိုမ်းလွင်ႈမေႃထွမ်ႇၵႂႃႇ။ဢမ်ႇဝူၼ်ႉမႅၼ်ႈ
ဝႃႈသင်ဢမ်ႇထွမ်ႇမႃး တေဢမ်ႇမေႃလၢတ်ႈၸိူင်ႉၼင်ႇၼႆၼႆ။ ယွၼ်ဢမ်ႇထွမ်ႇပိူၼ်ႈလႄႈ ဢမ်ႇႁူႉ
ဝႃႈတေၵိုင်ႇလီလၢတ်ႈၸိူင်ႉႁိုဝ် ၵိုင်ႇလီလၢတ်ႈသင်ပေႃးဢမ်ႇမေႃလၢတ်ႈၼႆႉ ၼႂ်းၼႃႈတီႈၵၢၼ်ငၢၼ်း
ၽၢႆႇလႂ်ဢမ်ႇဝႃႈ ၸဝ်ႈၵဝ်ႇတိုၼ်းသုမ်းယဝ်ႈ။

ၽွင်းမိူဝ်ႈၵပ်းသိုပ်ႇလၢတ်ႈတေႃႇၵူၼ်းသေသေၵေႃႉ"ၼၼ်ႉလွင်ႈမေႃထွမ်ႇၶေႃႈၵႂၢမ်းၶဝ်ၼၼ်ႉ ပဵၼ်လွင်ႈ
ယဵၼ်ႇငႄႈလူင် ဢၼ်ၵူၼ်းတၢင်းလုမ်ႈၾႃႉၶဝ်မၵ်းမၼ်ႈလႆႈၸႂ်ၵၼ်ၼၼ်ႉယဝ်ႉ။

(႑)မၼ်းလၢတ်ႈသင်ထွမ်ႇႁႂ်ႈႁူႉလီလီ။  ၽူႈၵတ်ႉၶႅၼ်ႇၽၢႆႇၵၢၼ်ၵပ်းသိုပ်ႇၵူၼ်းၶဝ်ၼႆႉ ၶဝ်

တိုၼ်းဝႆႉသတိသေ ထွမ်ႇလီလီယဝ်ႈ ဝႃႈမၼ်းလၢတ်ႈသင်ၼႆၼၼ်ႉ ၶဝ်ဢမ်ႇဢဝ်သၢႆတႃၵႂႃႇတၢင်ႇတၢင်း
ယၵ်ႉတူၺ်းၼႃႈ ၵူၼ်းလၢတ်ႈမၼ်းၼၼ်ႉသေ ၵိုင်ႇဢေႃႈၵေႃႈဢေႃႈ ၵိုင်ႇထၢမ်ၵေႃႈထၢမ်ယဝ်ႈ။

လွင်ႈၼႆႉလီၾၢင်ႉတေႉတေႉ မၢင်ၵေႃႉၽွင်းပိူၼ်ႈတိုၵ်ႉလၢတ်ႈယူႇၼၼ်ႉ ဢၢပ်ႈဝူၼ်ႉသင်လူဝ်လူဝ်
ဢမ်ႇၶဝ်ႈၸႂ်လူဝ်လူဝ် မိုဝ်းယၵ်းဢၼ်ၼိုင်ႈယိပ်းဢၼ်ၼိုင်ႈ ၼၼ်ႉမၼ်းပဵၼ်သၢႆငၢႆလၵ်ႉၶၼႃႇ ၵူၼ်း
ဢမ်ႇယဵၼ်ႇငႄႈၶဝ်ၵူၼ်းၸၼ်ႉတႅမ်ႇယဝ်ႈ။

သင်ၸဝ်ႈၵဝ်ႇ ၶႂ်ႈပဵၼ်ၵူၼ်းၶႅၼ်ႇၽၢႆႇၵၢၼ် ၵပ်းသိုပ်ႇၵူၼ်းယူႇပေႃးၼႆ သႂ်ႇၸႂ်ၼိူဝ်ၵႂၢမ်းလၢတ်ႈပိူၼ်ႈၼၼ်ႉ
လီလီသေၵမ်း။

(႒)လွင်ႈယႃႇတတ်းၵႂၢမ်းပိူၼ်ႈ။

ယႃႇပေတတ်းၵႂၢမ်းပိူၼ်ႈၼႆၶႃႈ ပၼ်မၼ်းလၢတ်ႈႁႂ်ႈယဝ်ႉယဝ်ႉၼႆႉ မၼ်းၼေဝႃႈႁဝ်းဝႆႉၵႃႈၶၼ်ၵႂၢမ်း
လၢတ်ႈၶဝ်ၼႆယဝ်ႉ။ယဝ်ႉၵေႃႈ တေႁဵတ်းႁႂ်ႈၵူၼ်းလၢတ်ႈၶဝ် ၶႂ်ႈထွမ်ႇၶိုၼ်းၵႂၢမ်းတွပ်ႇႁဝ်း ၽွင်းႁဝ်း
လၢတ်ႈၼၼ်ႉယဝ်ႉ။

သင်ၸဝ်ႈၵဝ်ႇဢမ်ႇမီး ၶၢဝ်းယၢမ်းတဵမ်ထူၼ်ႈလႄႈၵူၼ်းလၢတ်ႈၼၼ်ႉ သမ်ႉပဵၼ်ၵူၼ်းသူပ်းယႂ်း လၢတ်ႈ
ၼမ်လိူဝ်ပူၼ်ႉၼႆ သင်ၶႂ်ႈတတ်း ႁႂ်ႈမေႃၸႂ်ႉၶေႃႈၼွမ်းသေၸင်ႇတတ်းၵႂၢမ်းၶဝ်ၼၼ်ႉလီသေပိူၼ်ႈ။

မိူၼ်ၼင်ႇ ဢေႃႈၶႃႈ..ၶႂၢင်ႉပၼ်ဢိတ်းၼိုင်ႈႁဝ်းယွၼ်းတတ်းၵႂၢမ်းသူ..ယဝ်ႉၸိူင်ႉႁိုဝ်ၸိူင်ႉႁိုဝ်ၼႆ သိုပ်ႇလၢတ်ႈၵႂႃႇ
တႃႉ။ ပေႃးႁဵတ်းၼၼ် ၵေႃႉလၢတ်ႈၵေႃႈ တေဢမ်ႇၼႃႈမႆႈယွၼ်ႉႁဝ်းတတ်းသေ မၼ်းတေၼႅတ်ႈလၢတ်ႈ
ဢဝ်တီႈယမ်လမ်ႇလွင်ႈမၼ်းၵွၺ်းယူႇယဝ်ႉ။   ၶၢဝ်းယၢမ်းႁဝ်းၵေႃႈတေဢမ်ႇသဵင်ႈလၢႆ ၶဝ်ၵေႃႈတေ
ဢမ်ႇၸင်းႁဝ်းပေႃးႁဵတ်းၼႆ။

(႓)ငိူင်ႉဝႄႈလွင်ႈထဵင်မေႃးၵၼ်။

ပေႃးလၢတ်ႈလၢတ်ႈၵႂႃႇ ၼမ်မႃးယဝ်ႉၼႆ ၸၢင်ႈမီးမႃးတီႈဢၼ်ႁဝ်းၵေႃႈဝႃႈႁဝ်းထုၵ်ႇ ၶဝ်ၵေႃႈဝႃႈၶဝ်
ၸႂ်ႈၼၼ်ႉယဝ်ႉ။ၽွင်းၼၼ်ႉ ယႃႇပေထဵင်တိၵ်းတိၵ်းႁဝ်းမႅၼ်ႈယူႇသေၵေႃႈယႃႇ ပေႃးၺႃးၵူၼ်းဢၼ်
ယုမ်ယမ်တူဝ်ၶဝ်ၼႃႇၼၼ်ႉ ၶဝ်တေဢမ်ႇယွမ်းႁပ်ႉၵႂၢမ်းလၢတ်ႈႁဝ်းငၢႆႈငၢႆႈလႆႈ။ သိုပ်ႇထဵင်ယူႇၵေႃႈ ႁိူဝ်ႉ
လၢႆလၢႆသေ ပေႃးၵႂႃႇတိူဝ်ႉၺႃးမႃၼၶဝ်ၵေႃႈ ၸၢင်ႈမေႃးၵၼ်ယဝ်ႉ ၵၢၼ်ဢၼ်ႁဝ်းဢၢၼ်းလၢတ်ႈၼၼ်ႉ
ၵေႃႈ ဢမ်ႇၸၢင်ႈသိုပ်ႇၼႃႈလႆႈ။

ယၢမ်းၸိူင်ႉၼႆ ႁႂ်ႈၸႂ်ႉတိုဝ်းၵႂၢမ်းဝႃႈ ဢေႃႈၶႃႈ....တၢင်းႁၼ်ႁႃးဢၼ်ၼႆႉတႄႉပိူင်ႈၵၼ်ယဝ်ႉ..ႁဵတ်း
ၼႆႁိုဝ်ႉ ၶႃႈတေမႄးလဵပ်ႈႁဵၼ်းတၢင်းႁၼ် ဢၼ်ၸဝ်ႈၵဝ်ႇဝႃႈၼၼ်ႉ ၸဝ်ႈၵဝ်ႇၵေႃႈလဵပ်ႈႁဵၼ်းတူၺ်း
ၽၢႆႇတၢင်းႁၼ်ၶႃႈလႄႈ ႁႃးၽေမႅင်ႇၵၼ်ဝူၼ်ႉ..ၼႆၶႃႈတႃႉ။

(႔)ယႃႇပဵၼ်ၵူၼ်းဢိူဝ်ႈငၢႆႈ

မၢင်ၸိူဝ်ႉမၢင်လွင်ႈ ၸဝ်ႈၵဝ်ႇဢမ်ႇလႆႈၸႂ်သေတႃႉၵဵင်ၸႂ်လူဝ်လူဝ် ၸႂ်လီလူဝ်လူဝ်သေ ႁပ်ႉဢဝ်ၵႂၢမ်း
ပိူၼ်ႈၼၼ်ႉ ၸၢင်ႈတိူဝ်ႉသၢင်ႈၵၢၼ်ငၢၼ်းႁဝ်းတေႉတေႉ။

လၢႆးထဵင်ၶိုၼ်းဢၼ်ယဵၼ်ႇငႄႈၼၼ်ႉတႄႉ လၢတ်ႈပၼ်တႅၵ်ႇတႅၵ်ႇလႅင်းလႅင်း ယႃႇပၼ်တၢင်းမုင်ႈမွင်း
ၶဝ် ပေႃးဝႃႈဢမ်ႇတၼ်းၵေႃႈ လၢတ်ႈဝႃႈဢမ်ႇတၼ်းၼႆၵမ်းလဵဝ် တေဝူၼ်ႉတူၺ်းၵွၼ်ႇၼႆယႃႇပေဝႃႈ။

ပေႃးပဵၼ်ပၢၵ်ႇၼႃႈၵူၼ်းလူင် ဢမ်ႇၼၼ်ၵူၼ်းၵေႃႉဢၼ်ႁဝ်းလၢတ်ႈတေႃႇၼၼ်ႉ ပဵၼ်ၵူၼ်းလွင်ႈယႂ်ႇ
ၵေႃႉၼိုင်ႈၼႆႁႂ်ႈၸႂ်ႉၶေႃႈၵႂၢမ်းဝႃႈ ဢၼ်ၼႆႉတႄႉၶႃႈႁပ်ႉၶၢမ်ႇယူႇ ထႅင်ႈဢၼ်ၼိုင်ႈတႄႉ ၶႃႈဢမ်ႇၽွမ်ႉ
ၸွမ်းသူၸဝ်ႈလႆႈၼႆသေ.. ယဵၼ်ႇယဵၼ်ငႄႈငႄႈ ထဵင်ၶိုၼ်းတႃႉ။

(႕)ဢမ်ႇလူဝ်ႇသေယႃႇပေသပ်းလႅင်းႁူဝ်ယွၺ်ႈမၼ်းၼေပိူၼ်ႈ။

ၵႆႉႁၼ်ၼႃႇ ဢမ်ႇလူဝ်ႇသေတႃႉ ၵူၼ်းဢၼ်ၵုမ်ႇသပ်းလႅင်းၼေပိူၼ်ႈႁူဝ်ယွၺ်ႈမၼ်းၼၼ်ႉ ၸိူင်ႉၼၼ်
ၸၢင်ႈႁဵတ်းႁႂ်ႈပိူၼ်ႈၶၢၼ်ႇထွမ်ႇသေဢမ်ႇၵႃး ပဵၼ်တီႈထၢင်ႇလဵၵ်ႉၼိူဝ်ႁဝ်းၶိုၼ်းယဝ်ႈ။

ၵႂၢမ်းလၢတ်ႈဢၼ်ဝႃႈၼၼ်ႉ ပွတ်းပွတ်းယမ်ယမ်ၼႆႉမီးၵႃႈၶၼ်သေပိူၼ်ႈ မိူၼ်ၼင်ႇၸဝ်ႈၵဝ်ႇၵႂႃႇၵၢတ်ႇမႃး
ၼႆ ၽိူဝ်ႇတႃႉတေၵုမ်ႇသပ်းလႅင်း လွင်ႈတိုၼ်ႇမႃးယဝ်ႉ ႁဵတ်းၼၼ်ႉႁဵတ်းၼႆႉယူႇၼႆၼၼ်ႉ လၢတ်ႈဢဝ်
လွင်ႈၵႂႃႇၵၢတ်ႇသေသိုဝ်ႉသင်မႃး ၼႆၵွၺ်းၵေႃႈလႆႈယဝ်ႉ။  ပေႃးၵႂၢမ်းႁဝ်းယွမ်းလႄႈ ၶဝ်ၶႂ်ႈႁူႉၼႆတေ
ထၢမ်ထႅင်ႈၵူၺ်း ၵႂၢမ်လိူဝ်ပူၼ်ႉတႄႉ တၢင်ႉပွၵ်ႈမႃးၽႂ်တေဢမ်ႇႁတ်းတေႃႇၼႃႈ ၸဝ်ႈၵဝ်ႇထႅင်ႈ။

လွင်ႈလၢတ်ႈၵႂၢမ်း ဢၼ်ဝႃႈၼၼ်ႉ ၼမ်ၵေႇဢမ်ႇၸႂ်ႈပိူင်လူင်မၼ်း ပိူင်လူင်မၼ်းတႄႉ ၵူၼ်းထွမ်ႇမၼ်းပွင်ႇ
ၸႂ်ယူႇႁႃႉၼႆၼၼ်ႉယဝ်ႉ။
ၾၢင်ႉတူၺ်း ၼႃႈတႃလႄႈလွင်ႈတုမ်ႉတွပ်ႇ ၵူၼ်းထွမ်ႇၶဝ်ယူႇတႃႇသေႇ။

ပေႃးပိူၼ်ႈ ၸဵတ်ႉၶူႈလင် ဢမ်ႇၼၼ် ဝၢႆႇပုၼ်ႉဝၢႆႇၼႆႉၼႆၸိုင် ယႃႇသိုပ်ႇလၢတ်ႈၼမ်ယဝ်ႉ။

ၼႅတ်ႈၵွၺ်ပၢႆၵႂၢမ်းလၢတ်ႈၸဝ်ႈၵဝ်ႇလႃႈ။  လၢတ်ႈၼမ်သေ ဢမ်ႇမီးၵူၼ်းထွမ်ႇၼႆႉ ဢမ်ႇ

မီၽွၼ်းလီၼႆၼၼ်ႉ ထၢင်ႇဢမ်ႇတၢပ်ႈသပ်းလႅင်းၼေၵၼ်ယဝ်ႉ။ ယဝ်ႉၵေႃႈ လွင်ႈဢၼ်လီမိူဝ်ႇၼႃႇ

လိူဝ်ၵူၼ်းသူပ်းၼမ်ၼၼ်ႉ ဢမ်ႇမီးသင်။လၢတ်ႈဢေႇဢေႇ ယမ်ယမ်ၼၼ်ႉ လီသေပိူၼ်ႈ။

မႂ်ႇသုင်ၵၢင်ၼႂ်ဝၼ်းၸၼ်ၶႃႈ-

#ၼေႃႇလၢဝ်မိူင်း (ၼွင်ဢူႇ)
႑႗။လိူၼ်ၵျူႇလၢႆႇ။႒႐႑႗