လိၵ်ႈႁိူင်းၵေႃႈ မိူင်းၶိုၼ်ႈယႂ်ႇ

လိၵ်ႈႁိူင်းၵေႃႈ မိူင်းၶိုၼ်ႈယႂ်ႇ
--------------------------------

လိၵ်ႈၼႆႉပၼ်တၢင်းႁူႉၵူႈလွင်ႈလွင်ႈ တႃႇၽဝၸၢတ်ႈပၢၼ် ၵူၼ်းႁဝ်းယဝ်ႉ၊ လိၵ်ူၼႆႉ ပဵၼ်သၢႆၸႂ် ၸိူဝ်ႉၶိူဝ်းသေဢမ်ႇၵႃး ပဵၼ်ဢၼ်ႁဵတ်းႁႂ်ႈၶိုၼ်ႈယႂ်ႇ ၸွမ်းၵၢပ်ႈပၢၼ်ၸိူဝ်းၼႆႉယဝ်ႉ။ လိၵ်ႈလၢႆးၼႆႉ ပဵၼ် မၢႆၶၢၼ်ႇသဵင်မဵတ်ႉၶေႃႈၵႂၢမ်း ၵူၼ်းမိူင်းၼိုင်ႈ ဢမ်ႇၼၼ် ၵူၼ်းၶိူဝ်းၼိုင်ႈ၊ ဢမ်ႇၼၼ် ၽူႈမေႃၵတ်ႉ ၵျၢင်ႇၵေႃႉၼိုင်ႈယဝ်ႉ။
လိၵ်ႈလၢႆးၼႆႉ ပဵၼ်ၵၢၵ်ႇသေႃး တွၼ်ႈတႃႇဝၢၼ်ႈမိူင်းၶိုၼ်ႈယႂ်ႇ ဢၼ်ၼိုင်ႈယဝ်ႉ၊ ယွၼ်ႉၼၼ် လိၵ်ႈၼႆႉပဵၼ်ပိုၼ်ႉထၢၼ်တႃႇၶိုၼ်ႈယႂ်ႇယဝ်ႉ။ ပေႃးႁၢမ်းလိၵ်ႈလၢႆးၵေႃႈ တၵ်းယၢၼ်ၵႆ လွင်ႈၶိုၼ်ႈယႂ်ႇဢမ်ႇႁၢင်ႉ။

ပေႃးလဵပ်ႈႁဵၼ်းတူၺ်း ၸၢဝ်းၶိူဝ်းၵူၼ်းႁဝ်း ၵူႈတီႈၵူႈမိူင်း ဢၼ်လႆႈႁူႉၵၼ်၊ ငိၼ်းၵၼ်ယူႇၼႂ်းလုမ်ႈ ၾႃႉယၢမ်းလဵဝ်ၼႆႉ ၵူၼ်းမိူင်းလႂ် ၸၢဝ်းၶိူဝ်းလႂ် ၶဝ်ႈၸႂ်ၵၢၼ်လိၵ်ႈလၢႆး ဢဝ်ၸႂ်သႂ်ႇၵၢၼ်လိၵ်ႈလၢႆး လိူဝ် သေပိူၼ်ႈၵေႃႈ ၵူၼ်းမိူင်းၼၼ်ႉ ၸၢဝ်းၶိူဝ်းၼၼ်ႉ ပဵၼ်ၵူၼ်းဢၼ်ၶိုၼ်ႈယႂ်ႇလိူဝ်သေပိူၼ်ႈသေဢမ်ႇ ၵႃး ထၢင်ႇႁၢင်ႈယုၵ်ႉမိုဝ်ႈပူၵ်းၶိုၼ်ႈၾႃႉသေ ႁတ်းႁွင်ႉတႃႉလွင်ႈၶိုၼ်ႈယႂ်ႇၵၼ် တေႃႇၵူႈမိူင်းမိူင်းၼၼ်ႉ ယဝ်ႉ။ ဢမ်ႇဝႃႈ လွင်ႈလီဢိၵ်ႇလွင်ႈၸႃႉ ပေႃးၵပ်းၵၢႆႇလူၺ်ႈလွင်ႈႁွင်ႉတႃႉ ၶႄႉၶဵင်ႇၵၼ်မႃးသေလွင်ႈ လွင်ႈ သေပိူင်ပိူင် ပေႃးၼႆၸိုင် ၽႂ်မီးၵၢၼ်လိၵ်ႈလၢႆးသုင် ၺၢၼ်ႇၽႂ်ၵႂၢင်ႈ၊ ဢွၵ်းၽႂ်လႅတ်း၊ လွင်ႈလဵပ်ႈ ႁဵၼ်းၽႂ်ၼမ်ၵေႃႈ မၼ်းတေပေႉဢမ်ႇႁၢင်ႉယဝ်ႉ။

ၼႂ်းမိူင်းတင်းၼမ် ၸၢဝ်းၶိူဝ်းတင်းၼမ်ၼၼ်ႉ မိူင်းတႆးဢၼ်ဝႃႈၼၼ်ႉၵေႃႈ တိုၼ်းယၢမ်ႈလႆႈပဵၼ် မိူင်း ဢၼ်ပူၵ်းတင်ႈၸုၵ်းမၼ်ႈမႃး ႁင်းၶေႃယူႇမိူင်းၼိုင်ႈယဝ်ႉ။ ၸၢဝ်းၶိူဝ်းၼႆႉဢၼ်ဝႃႈၼၼ်ႉၵေႃႈ တိုၼ်းယၢမ်ႈလႆႈပဵၼ်ၸၢဝ်းၶိူဝ်းမိူင်းလူင် ဢၼ်မီးၼႃႈ မီးတႃ မီးၼမ်ႉၵတ်ႉ မီးပိုၼ်းၶႅမ်ႉ ၼႅၼ်ႈၼႃ မီးၾိင်ႈထုင်း မီးၸိုဝ်ႈသဵင်လီ ပိုၼ်းႁၢင်ႈလီၶွင်တူဝ်ၸၢဝ်းၶိူဝ်းၸဝ်ႈၵဝ်ႇ ဢၼ်ယၢမ်ႈမီးမႃးဝႆႉၸဵမ်ႁိုင်ႁီး ၼၼ်ႉ ၼင်ႇႁိုဝ်ပေႃးတေဢမ်ႇလႆႈၸူမ်ႁၢႆၵႂႃႇပႅတ်ႈၼၼ်ႉ ထုၵ်ႇလီဢဝ်ၵၢၼ်ႁဵၼ်းပဵၼ်ယႂ်ႇသေ သိုပ်ႇ ယုၵ်ႉယွင်ႈႁွင်ႈသုင်ၸၢဝ်းၶိူဝ်းႁဝ်း ဝၢၼ်ႈမိူင်းႁဝ်း တေႉတေႉဝႃႈဝႃႈၵႂႃႇယူႇဢၼ်ဝႃႈၼၼ်ႉ တႆးၵူႈၵေႃႉ ဢမ်ႇထုၵ်ႇလီလိုမ်း လူဝ်ႉတွင်းၵိုမ်းဝႆႉၼႂ်းမၢၵ်ႇႁူဝ်ၸႂ် ၽႂ်မၼ်းၼၼ်ႉယဝ်ႉ။

ထုၵ်ႇလီဢဝ်ၵၢၼ်လိၵ်ႈလၢႆးပဵၼ်ယႂ်ႇသေ ၶိုၼ်းတိုတ်ႉတၢႆး ယုၵ်ႉယွင်ႈႁွင်ႈသုင်ၸၢဝ်းၶိူဝ်းတႆးႁဝ်း ၵႂႃႇၼႆၵေႃႈ ႁဝ်းလူဝ်ႇၶိုၼ်းထတ်းသၢင်ႈတူၺ်းၶိုၼ်း ပိူင်ပဵၼ်ၵၢၼ်လိၵ်ႈလၢႆးၸၢဝ်းၶိူဝ်းတႆးႁဝ်း ဢၼ် ပဵၼ်မႃး မီးမႃးယဝ်ႉလႄႈ ဢၼ်တိုၵ်ႉပဵၼ်တိုၵ်ႉမီးယူႇ ယၢမ်းလဵဝ်ၼႆႉၼၼ်ႉယဝ်ႉ။

ပေႃးမႃးတူၺ်းႁူဝ်ၵူၼ်းၸၢဝ်းၶိူဝ်းၼႆးႁဝ်းလႄႈ ၽူႈမီးပၺ်ၺႃႇ ၽူႈမီးၼမ်ႉၵတ်ႉ ဢွၼ်ႁူဝ်ၼႂ်း ၸၢဝ်းၶိူဝ်းႁဝ်းၼႆႉ တေလႆႈႁၼ်ဝႃႈ မၼ်းပႆႇမီးလွင်ႈငၢမ်ႇၵၼ် ပႆႇမီးလွင်ႈၵုမ်ႇထူၼ်ႈလႆႈငၢႆႈငၢႆႈၵွၼ်ႇ၊ ပေႃးဢဝ်ပိူင်ပဵၼ်မိူဝ်ႈလဵဝ်ၼႆႉ လႆႈႁၼ်ဝႃႈ ၽူႈမီးပၺ်ၺႃႇ ၽူႈမီးၼမ်ႉၵတ်ႉတႃႇပူၵ်ႈပွင်ၶိုင်သၢင်ႈ ဝၢၼ်ႈမိူင်း၊ တႃႇတိုတ်ႉၸၼ်ၸၢဝ်းၶိူဝ်းတႆးၶိုၼ်ႈသၢင်ႉ ၶိုၼ်ႈသုင်မႃးၼၼ်ႉ ၼႂ်းတႆးႁဝ်းၼႆႉ တိုၵ်ႉမီး ဢေႇတေႉတေႉသေ တိုၵ်ႉမီးမိူၼ်ၵၼ်တင်းမေႃႈ တႃႇတေႁုင်ၶဝ်ႈၼႆႉ တိုၵ်ႉၼမ်လိူဝ်သေၶဝ်ႈသၢၼ် တေႉတေႉဝႃႈဝႃႈယူႇယဝ်ႉ။ မိူဝ်ႈဢၼ်ထုၵ်ႈႁႃၶဝ်ႈသေမႃးသႂ်ႇယွင်ၼမ်ၼမ်ၼၼ်ႉ ႁဝ်းသမ်ႉၵုမ်ႇမိုင်ႉ ႁဵတ်းယွင်သေ ပႂ်ႉသႂ်ႇၶဝ်ႈယူႇတိၵ်းတိၵ်းၼၼ်ႉယဝ်ႉ။

ပေႃးၾၢင်ႉတူၺ်းမႅၼ်ႈၼႆၸိုင် တႆးၸိူဝ်းမေႃလိၵ်ႈပိူၼ်ႈသေ ၶိုၼ်ႈယႂ်ႇမႃးၸွမ်းၼႂ်းၵၢၼ်ႁဵၼ်းပိူၼ်ႈ ၼၼ်ႉ တီႈႁိမ်း တီႈၼင်ႈ တီႈၼွၼ်းၶဝ် ဢမ်ႇသူႈႁၼ်ပပ်ႉလိၵ်ႈတႆး၊ ယွၼ်ႉပိူဝ်ႈၸိူဝ်းမေႃလိၵ်ႈ ဢိင်းၵလဵတ်ႉၵေႃႈ ဢွၼ်ၵၼ်လူလိၵ်ႈဢိင်းၵလဵတ်ႉသေ ထၢင်ႇယႂ်ႇလိၵ်ႈဢိင်းၵလဵတ်ႉၵွႃႇ။ ၸိူဝ်းမေႃ လိၵ်ႈထႆး၊ လိၵ်ႈမၢၼ်ႈ၊ လိၵ်ႈၶႄႇ တေႇၵႂႃႇၸိူဝ်းၼၼ်ႉၵေႃႈ ပဵၼ်ၵႂႃႇလၢႆးၼၼ်ႉယဝ်ႉ။ တေႃႈၼင်ႇ လၢတ်ႈၵႂၢမ်းတႆးယူႇယႃႇယႃႇၸိူဝ်းမေႃၵႂၢမ်းမၢၼ်ႈၵေႃႈ ပေႃးပႆႇလႆႈလၢတ်ႈပႃးၵႂၢမ်းမၢၼ်ႈၸိမ်ၸွမ်း၊ ၸိူဝ်းမေႃၵႂၢမ်း ဢိင်းၵလဵတ်ႉ၊ ၵႂၢမ်းထႆး၊ ၵႂၢမ်းၶႄႇ ၸၵႂႃႇၸိူဝ်းၼၼ်ႉၵေႃႈ လၢႆးၼၼ်ႉ ပေႃးပႆႇလႆႈဢဝ် ၵွၢမ်းပိူၼ်ႈမႃးၸိမ်သေလၢတ်ႈ မိူၼ်ႁင်ႈဢမ်ႇပေႇယိၼ်ႉမၼ်းဝႆႉၵေႃႈမီးမီးယဝ်ႉ။

ၸိူဝ်းၼႆႉ ဝႃႈတၢင်းၽိတ်းၶဝ်ဢမ်ႇၸႂ်ႈ လၢတ်ႈၸွမ်းပိူင်ပဵၼ် ဢၼ်ပဵၼ်ယူႇမိူဝ်ႈလဵဝ်ၼႆႉသေ တေ လႆႈထတ်းႁၼ်ဝႃႈ လိၵ်ႈတႆးဢၼ်ႁဵတ်းပပ်ႉသေ ပိုၼ်ဢွၵ်ႇမႃးယဝ်ႉတင်းသဵင်ႈၸိူဝ်းၼၼ်ႉ ပႆႇႁဵတ်းႁႂ်ႈ တႆး ၵူႈသႅၼ်းသႅၼ်း ႁၢၼ်ႉၸႂ်လႆႈတႃႇပဵၼ်ၵၢၼ်ႁဵၼ်း လိၵ်ႈတႆးၼႆယဝ်ႉ။ ၼႆႉဢမ်ႇၸႂ်ႈလၢတ်ႈၵႂၢမ်း ထၢင်ႇလဵၵ်ႉသေ ႁဵတ်းႁႂ်ႈၸႂ်တႆးတူၵ်းၸွမ်း၊ ဢိင်ဢဝ်ပိူင်ပဵၼ်ၸိူဝ်းၼႆႉသေ ၶႂ်ႈႁႂ်ႈတႆးၵူႈၵေႃႉ တိုၵ်ႉမီး ႁႅင်းၶႂ်ႈၶူင်သၢင်ႈ လွၵ်းလၢႆးတႃႇႁႂ်ႈပၢႆးၵၢၼ်ႁဵၼ်းလိၵ်ႈလၢႆးတႆး ၶႂ်ႈႁႂ်ႈၶတ်းၸႂ်ႁႃလွၵ်းလၢႆး လုၵ်ႉႁဵတ်း လုၵ်ႉသၢင်ႈ ဢွၼ်ၵၼ်ၶူင်ဢွၵ်ႇ ႁႂ်ႈပေႉတူဝ်မႃး ႁင်းၶေႃႈလႄႈလၢတ်ႈၼင်ႇၼႆယဝ်ႉ။

(႑) ယူႇတီႈၵေႃလိၵ်ႈလၢႆးသေ တႅမ်ႈလိၵ်ႈတႆးၼိုင်းပီ တီႈဢေႇသုတ်းမၼ်း ၼိုင်ႈပပ်ႉ ၵွပ်ႈဝႃႈ ၼႂ်းၵေႃလိၵ်ႈလၢႆးၼႆႉ မေႃသူၼ် ၶူးသွၼ်ၶဝ်ပဵၼ်ၵူၼ်းမေႃလိၵ်ႈၵူႈၵေႃႉလႄႈ ၵွပ်ႈၼၼ်ဢမ်ႇပဵၼ်လႆႈ လွင်ႈတႅမ်ႈႁင်းၵူၺ်းၵေႃႈ ဢွၼ်ၵၼ်ႁူမ်ႈၵၼ်သေ ပိၼ်ႇပပ်ႉပိူၼ်ႈ ဢၼ်မီးတၢင်းႁူႉတၢင်းႁၼ်ၼၼ်ႉ မႃးႁဵတ်းပဵၼ်ပပ်ႉတႆး။

(႒) ပေႃးဝႃႈမီးၵေႃလိၵ်ႈလၢႆးၵေႃႈ တို်ၼ်းလူဝ်ႉလႆႈမီးႁူင်းတူၺ်းလိၵ်ႈ ၵိုၵ်းၸွမ်းၵမ်းလဵဝ်။ ယွၼ်ႉဝႃႈ တႆးႁဝ်းပေႃးၵပ်းၵၢႆႇလူၺ်ႈလိၵ်ႈလၢႆးမႃးၼႆ ႁႅင်းဢႄႇၵူႈဢၼ်ၼၼ်ႉယဝ်ႉ၊ မီးၵေႃလိၵ်ႈလၢႆးယူႇ သမ်ႉ ဢမ်ႇမီးႁူင်းတူၺ်းလိၵ်ႈ တႃႇပၼ်တၢင်းႁူႉ သႅၼ်းႁုၼ်ႈမႂ်ႇ။ မီးမေႃသူၼ် မီးၶူးသွၼ်ယူႇ သမ်ႉဢမ်ႇမီး ပပ်ႉဢၼ်ႁဵတ်းဢွၵ်ႇလႆႈႁင်းၵူၺ်းၼၼ်ႉ မီးဝႆႉတင်းၼမ်ယူႇယဝ်ႉ။ တီႈၼႆႈ ႁဝ်းထုၵ်ႇလီယိူင်ႈဢဝ် လၢႆးႁဵတ်းလၢႆးသၢင်ႈ ၶုၼ်မိူင်းၵျႃႇပၢၼ်ႇၶဝ်ယူႇ၊ ၶုၼ်မိူင်းၵျႃႇပၢၼ်ႇၶဝ်ၼႆႉ ၶဝ်တိုၼ်းတမ်းဝႆႉ ပိူင်ဢၼ်ဝႃႈၽႂ်ၶႂ်ႈၵႂႃႇႁဵၼ်းလိၵ်ႈမိူင်းလႂ်ၵႂႃႇၶႂ်ႈႁဵၼ်းလိၵ်ႈၸၢဝ်းၶိူဝ်းသင်ၵေႃႈႁဵၼ်း ၵူၺ်းၵႃႈပေႃးမေႃ
မႃး ႁူႉမႃး လႆႈၸုမ်ႈၶူးမႃးၼႆၸိုင် လိၵ်ႈဢၼ်ၶဝ်ႁူႉ လိၵ်ႈဢၼ်ၶဝ်မေႃ ဢၼ်လႆႈမႃးၼႂ်းလိၵ်ႈၸၢဝ်းၶိူဝ်း ပိူၼ်ႈ တီႈမိူင်းပိူၼ်ႈၼၼ်ႉ တိုၼ်းလႆႈမႃးပိၼ်ႇပဵၼ်လိၵ်ႈၵျႃႇပၢၼ်ႇၶဝ်မူတ်းမူတ်းၼႆယဝ်ႉ။ ဢၼ်ၼႆႉ မီးတီႈပွင်ႇဝႃႈ လိၵ်ႈပိူၼ်ႈၵွၢမ်းပိူၼ်ႈၼၼ်ႉ လီႁဵၼ်းႁႂ်ႈႁူႉႁႂ်ႈမေႃ ထိုင်တီးထိုင်လႅၼ်မၼ်းယူႇ၊ ၸွမ်း ၼင်ႇဢၼ်ႁူႉ ဢၼ်မေႃမႃးၼၼ်ႉ ႁႂ်ႈမေႃတူၺ်းႁၼ်ၸၢဝ်းၶိူဝ်းၸဝ်ႈၵဝ်ႇသေ ၶိုၼ်းဢဝ်ပိုၼ်ႉႁူႉ ပၢႆး ႁၼ်ၸိူဝ်းလိၵ်ႈဢၼ်လႆႈလဵပ်ႈႁဵၼ်းမႃးၸိူဝ်းၼၼ်ႉ ၶိုၼ်းမႃးပိုၼ်ၽႄပၼ်ၸၢဝ်းၶိူဝ်းၸဝ်ႈၵဝ်ႇၼႆယဝ်ႉ ၸင်ႇတေမီးၽွၼ်းလီ ဢတ်ႉတႁိတ၊ ပရႁိတ တင်းသွင်ၽၢႆႇသွင်ပႃႈ။ ႁၼ်ထိုင်ဝႃႈ လွၵ်းလၢႆးဢၼ် ၼႆႉဢၼ်တေမႃး ယုၵ်ႉယွင်ႈႁွင်ႈသုင် ဢဵၼ်ႁႅင်းၵၢၼ်လိၵ်ႈလၢႆးတႆး မိူဝ်းၼႃႈ ၽၢႆႇၼိုင်ႈတၢင်းၼိုင်ႈ ယူႇယဝ်ႉ။
"တုမ်ႇမွၵ်ႇ ႁႂ်ႈလႆႈၵီႈၵူႈလူင်ႇ၊ တႆးၵူႈတူင်ႇ ႁႂ်ႈလႆႈမေႃလိၵ်ႈတႆး၊ လိၵ်ႈတႆးႁူမ်ႈတူဝ် ၵႂၢမ်းတႆးႁူမ်ႈ
ၶေႃႈ" မီးဝႆႉၼင်ႇၼႆ ထုၵ်ႇလီဢွၼ်ၵၼ် တိုတ်ႉတၢႆးၸုင်ၸၼ်ၵၼ်ၵႂႃႇယူႇယဝ်ႉ။ ၵၢၼ်လိၵ်ႈလၢႆးဢၼ်
ဝႃႈ ၼၼ်ႉ ယႃႇပေထၢင်ႇဝႃႈ မၼ်းတေၵွႃႇသုတ်းတီႈလွင်ႈသွၼ်လိၵ်ႈ ၵ ၶ င a b c က ခ ဂ ၸိူဝ်းၼၼ်ႉ ၵူၺ်း ႁဝ်းလူဝ်ႉမုင်ႈတူၺ်း ဢၼ်ႁဝ်းလူဝ်ႇ၊ လွင်ႈဢၼ်ႁဝ်းပႆႇၵုမ်ႇထူၼ်ႈ ပႆႇပေႉတူဝ်
ၸိူဝ်းၼၼ်ႉယဝ်ႉ၊ တူၺ်းၶၢဝ်းၵႆၵႆသေ ၸိုၼ်ႇလဵၵ်ႉၸႂ်ၶႂ်ႈ ပူၵ်းပွင်မႃး၊ ၽိုၵ်းႁႂ်ႈမီးယိၼ်ႉၵၢၼ်ႁဵၼ်းမႃး
ၼမ်ၼမ်၊ ပွႆးလိူၼ် ၸဵင် ပီမႂ်ႇတႆး၊ လိၵ်ႈလၢႆးတႆး၊ ပိုၼ်းတႆး၊ ၸိူဝ်းၼႆႉပဵၼ် ၾိင်ႈထုင်းႁဝ်းဢၼ်ၼိုင်ႈ
ယဝ်ႉ။ ယွၼ်ႉၼၼ် ထုၵ်ႇလီတႅမ်ႈမၢႆဝႆႉၵွၼ်ႇ ၾိင်ႈထုင်းၸင်ႈယိုၼ်းယၢဝ်း ပုတ်ႈပၼ်လုၵ်ႈသိုပ်ႇလၢၼ် ၸိူဝ်းၼႆႉယဝ်ႉ။
သင်ဝႃႈ ဢမ်ႇၶႂ်ႈသႂ်ႇၵီႇယႃႇႁူၼ်ၼႆၸိုင် ၸဝ်ႈႁၵ်ႉၶိူဝ်းႁဝ်းၶဝ် ၸၢႆးႁၵ်ႉတႆး ယိင်းႁၵ်ႉၶိူဝ်း၊ လုင်း-ၸၢႆးႁၵ်ႉၶိူဝ်း၊ ပႃႈ- ၼၢင်းႁၵ်ႉၶိူဝ်းၶဝ် လိူဝ်သေၽုၵ်ႇၼမ်ႉၸႂ်ၶႂ်ႈပူၵ်းပွင်၊ ၽိုၵ်းႁႂ်ႈၸပ်းယိၼ်ႉၵၼ် သွၼ်လိၵ်ႈလၢႆးမႃးၼမ်ၼမ်ယဝ်ႉ၊ ဢွၼ်ၵၼ်လုၵ်ႉတိုၼ်ႇၸိုၼ်ႇဢီး ႁႂ်ႈမီးမႃးၵူၼ်းတၢင်းႁူႉယႂ်ႇ တၢင်း ႁၼ်ၼမ်၊ ၵူၼ်းႁဵၼ်းလိၵ်ႈ ၵူၼ်းဢွင်ႇလိၵ်ႈ ၵူၼ်းလႆႈၸုမ်ႈၶူး ၵူၼ်းမီးၼမ်ႉၵတ်ႉ ဢွၼ်ႁူဝ်ႁဝ်းၶဝ် မႃးၼမ်ၼမ်ၼၼ်ႉ ဢမ်ႇမီးလၢႆးလႂ်ထႅင်ႈယဝ်ႉ။ သင်မႃးထတ်းတူၺ်းၵၢၼ်ႁဵၼ်းၼႆၸိုင် ၵၢၼ်ပၢႆးမၢၵ်ႈ မီး ၵၢၼ်ပၢႆးပၺ်ၺႃႇ တူင်ႇဝူင်းၵူၼ်း ဢၼ်ပိူၼ်ႈၶိုၼ်ႈယႂ်ႇၼၼ်ႉ ယွၼ်ႉပိူဝ်ႈလိၵ်ႈလၢႆးယဝ်ႉ။ ၾိင်ႈငႄႈ ၾိင်ႈထုင်းႁဝ်းၵေႃႈ သင်ဝႃႈဢမ်ႇမီးလိၵ်ႈလၢႆးၼႆၸိုင် ၸၢင်ႈမွတ်ႇႁၢႆၵႂႃႇ။ ယွၼ်ႉၼၼ် လိၵ်ႈလၢႆးၼႆႉ လမ်ႇလွင်ႈတေႉတေႉယဝ်ႉ။ ပေႃးမီးလိၵ်ႈလၢႆးသေ တႅမ်ႈမၢႆဝႆႉၸိုင် ၾိင်ႈထုင်းဢၼ်မီးဝႆႉၼၼ်ႉၵေႃႈ မီးဝႆႉသေဢမ်ႇၵႃး ၾိင်ႈထုင်းႁဝ်းၵေႃႈ တေၸၢင်ႈမီးလွင်ႈၶိုၼ်ႈယႂ်ႇ ၸွမ်းလိၵ်ႈလၢႆးသေ လိၵ်ႈလၢႆး ၵေႃႈတေၶိုတ်းၵၢပ်ႈမႃး ၸွမ်းၾိင်ႈထုင်းႁဝ်းႁဵတ်းသၢင်ႈၵွႃႇ ၵူႈပီပီၼၼ်ႉယဝ်ႉ။ လိူဝ်သေၼၼ်ႉ ထုၵ်ႇလီဢွၼ်ၵၼ် ၽိုၵ်းလူလိၵ်ႈ ဢၢၼ်ႇလိၵ်ႈၼမ်ၼမ်။ ပေႃးလိၵ်ႈႁိူင်းၵေႃႈ မိူင်းၶိုၼ်ႈယႂ်ႇယဝ်ႉ။ လိၵ်ႈလၢႆးၼႆႉ ပဵၼ်ပိုၼ်ႉထၢၼ်တိုဝ်ႉတၢင်းတႃႇတေၶိုၼ်ႈယႂ်ႇယဝ်ႉ။

ၼၢင်းႁွမ်လိုၼ်း ၼမ်ႉလၼ်ႈ