ဢပုမ်ႇ ၼၢင်းၶူၼ်ႁူဝ်ႁွမ်

ဢပုမ်ႇ ၼၢင်းၶူၼ်ႁူဝ်ႁွမ်

==== ===========
ႁိုင်မႃးယဝ်ႉ ၼႂ်းဝၢၼ်ႈဢွၼ်ႇတီႈၼိုင်ႈ မီးသွင် ၵေႃႉၽူဝ်မေးၵူႈၼိုင်ႈ တေႇၼႃႈႁိူၼ်းယူႇၵိၼ်
ၸွမ်းၵၼ်မႃးတၢင်းႁိုင် ၵူၺ်းၵႃႈ ဢမ်ႇမီးလုၵ်ႈႁူမ်ႈ ၵၼ်ေသပွၵ်ႈ ၶႃတၢင်းသွင်ၸင်ႇၵႂႃႇၶူပ်ႉဝႆႈ 
ယွၼ်းတီႈၸဝ်ႈၶုၼ်ၽီ လိုၼ်းသုတ်းမေးၼၢင်း မၼ်းၵေႃႈ ၸင်ႇလႆႈၸပ်းတွင်ႉမႃးယူႇယဝ်ႉ။

မိူဝ်ႈၸပ်းတွင်ႉမႃးထိုင်ၵဝ်ႈလိူၼ်ယဝ်ႉ ၼၢင်းမေးမၼ်း
လႆႈၵိူတ်ႇလုၵ်ႈဢွၵ်ႇမႃးပဵၼ် ၽူႈယိင်းၼႃႈႁၵ်ႉဢွၼ်ႇ
ၵေႃႉၼိုင်ႈ တၢင်ႇၸိုဝ်ႈပၼ်ဝႃႈ( ထေႇဝီႇ ) ၼႆယဝ်ႉ
ၼၢင်းထေႇဝီႇၼႆႉ လႆႈႁပ်ႉလွင်ႈလဵင်ႉလူလုမ်းလႃးပဵၼ်
ၼင်ႇလီယူႇယဝ်ႉ။

ၸွမ်းၼင်ႇတၢင်းႁၵ်ႉ တီႈပေႃႈမႄႈတင်းသွင်မီးၼၼ်ႉ
ေသလဵင်ႉလူလုမ်းလႃးတေႃႇထိုင်ထေႇဝီႇ ပေႃးၵေႃႉယႂ်ႇ
ပဵၼ်သၢဝ်ၶိုၼ်ႈမႃးယူႇယဝ်ႉ ။
ယူႇမႃးဝၼ်းၼိုင်ႈ ၼၢင်းသၢဝ်ထေႇဝီႇ လႆႈၶဝ်ႈထိူၼ်ႇၵႂႃႇ
ႁႃၶွင်ထိူၼ်ႇလႄႈၽၵ်းဢွၼ်ႇဢိတ်းဢွတ်း ဝၼ်းၼၼ်ႉ
ၼၢင်းသၢဝ်ထေႇဝီႇ လႆႈၶဝ်ႈထိူၼ်ႇလိုၵ်ႉလိူဝ်ေသၵူႈပွၵ်ႈ
လႄႈၼမ်ႉတီႈႁၢင်ႈႁႅၼ်းမႃးဝႆႉၼၼ်ႉၵေႃႈ လႆႈမူတ်း
သဵင်ႈၵႂႃႇပ​ႅတ်ႈ။
မၼ်းၼၢင်းတွင်ႉမႆႈၼမ်ႉႁႅင်းၼႃႇ ၼႂ်းၶၢဝ်းယၢမ်းတီႈ
ပႆႁႃမေႃႇၼမ်ႉယူႇၼၼ်ႉ ဢမ်ႇထၢင်ႇေသလႄႈလႆႈၵႂႃႇ
ႁၼ်ၼမ်ႉ တီႈၼႂ်းဢွၵ်းလွၵ်းတိၼ်ဝူဝ်းေသ မၼ်း
ၼၢင်းၸင်ႇလႆႈၵူမ်ႈလူင်း လုတ်ႇၵိၼ်ၼမ်ႉၼၼ်ႉယဝ်ႉ
ၵေႃႈၸွႆႈႁႂ်ႈႁၢႆၶေႃးႁႅင်ႈ မႃးယူႇဢိတ်ႉၼိုင်ႈ ။
မၼ်းၼၢင်းၵိၼ်ယဝ်ႉသမ်ႉဢမ်ႇဢိမ်ႇ ဝၢႆးေသၼၼ်ႉ
မၼ်းတူၺ်းၵႂႃႇႁၼ် ၼမ်ႉတီႈမီးဝႆႉယူႇၼႂ်းဢွၵ်းလွၵ်း
တိၼ်ၸၢင်ႉၼၼ်ႉ တူၺ်းႁၢင်ႈမူတ်းသႂ်လီတေႉ ၸင်ႇ
ၵူမ်ႈလူင်းၵိၼ်ထႅင်ႈ ၵတ်းယဵၼ်ႁဵတ်းႁႂ်ႈၶေႃႈႁႅင်ႈမၼ်း
ႁၢႆလီၼႃႇ ၸင်ႇလႆႈၵူမ်ႈၵိၼ်ၸမ်မူတ်းယူႇယဝ်ႉ။
မိူဝ်ႈၵိၼ်ယဝ်ႉၵေႃႈ ၶိုၼ်းပွၵ်ႈမႃးႁိူၼ်းၶိုၼ်း ဝၢႆးေသ
ၼၼ်ႉဢမ်ႇႁိုင်သင် ၵေႃႈလႆႈၸပ်းတွင်ႉၵႂႃႇေသ ဢမ်ႇႁူႉ
ထိုင်ဝႃႈၽႂ်ပဵၼ်ပေႃႈလုၵ်ႈဢွၼ်ႇၼႂ်းတွင်ႉ ပေႃႈမႄႈမၼ်း
ၵေႃႈၶတ်းၸႂ်ထၢမ် လွင်ႈတီႈပဵၼ်တေႉၸိူင်ႉႁိုဝ်ၼႆယူႇ။
မၼ်းၼၢင်းၵေႃႈလၢတ်ႈၸွမ်းလွင်ႈပဵၼ်တေႉဝႃႈ ထၢင်ႇ
လုၵ်ႈမၼ်းတေပဵၼ်လုၵ်ႈၸဝ်ႈၸၢင်ႉ ဢမ်ႇၼၼ်ၸဝ်ႈ
ဝူဝ်းၼႆယဝ်ႉ ပေႃႈမႄႈမၼ်းၵေႃႈဢမ်ႇလႆႈထၢမ်သင်ထႅင်ႈ
ယွၼ်းႁႂ်ႈလႆႈလၢၼ်ၵေႃႈ ပဵင်းပေႃးၸႂ်ယဝ်ႉၼႆယူႇ။

မိူဝ်ႈၸပ်းတွင်ႉမႃးလႆႈၵဝ်ႈလိူၼ်ယဝ်ႉ မၼ်းၼၢင်းၵိူတ်ႇ
လုၵ်ႈဢွၵ်ႇမႃးပဵၼ် လုၵ်ႈဢွၼ်ႇယိင်းၽႃၽေသွင်ၵေႃႉ
ၵေႃႉပီႈတၢင်ႇၸိုဝ်ႈပၼ်ဝႃႈ (ၼၢင်းၶူၼ်ႁူဝ်ႁွမ်) ၵွပ်ႈဝႃႈ
ၶူၼ်ႁူဝ်မၼ်းၼၢင်း မီးဢၢႆႁွမ်မႃးတေႇၸဵမ်မိူဝ်ႈၸႃႉၵိူတ်ႇ
ၵေႃႉၼွင်ႉတၢင်ႇၸိုဝ်ႈဝႃႈ(ၼၢင်းၼူၼ်း) ၵွပ်ႈပဵၼ်ၼွင်ႉ။
ၼၢင်းၶူၼ်ႁူဝ်ႁွမ် ပဵၼ်ၵူၼ်းၼမ်ႉၸႂ်လီ မေႃလၢတ်ႈမေႃ
ၸႃ မေႃၸွႆႈထႅမ်ပိူၼ်ႈယူႇတႃႇေသႇ ၽိတ်းပိူင်ႈၵၼ်တၢင်း
ၼၢင်းၼူၼ်းႁႅင်းၼႃႇ ၼၢင်းၼူၼ်းပဵၼ်ၵူၼ်းၶီႈၶွႆ ၸႂ်ႁၢႆႉ
လႆႈၸႂ်ပေႉၵိၼ်ပိူၼ်ႈ ႁူမ်ႈပႃးႁဵတ်းႁၢႆႉၼၢင်းၶူၼ်ႁူဝ်ႁွမ်
ယူႇၵူႈၶၢဝ်းယၢမ်း။
ၼၢင်းၶူၼ်ႁူဝ်ႁွမ်လႄႈၼၢင်းၼူၼ်း ၵေႃႉယႂ်ႇၸွမ်းၶၢဝ်း
ယၢမ်း ၵႂႃႇႁႃလဵၼ်ႈၵေႃႉလုၵ်ႈဢွၼ်ႇပၢၼ်လဵဝ်ၵၼ်ၵေႃႈ
လႆႈထုၵ်ႇၶဝ်ဝႃႈၼေးယူႇတႃႇေသႇဝႃႈ ပဵၼ်လုၵ်ႈဢွၼ်ႇတီႈ
ဢၼ်ဢမ်ႇမီးပေႃႈ ႁၢၼ်ႉတေႃႇထိုင်ၵေႃႉယႂ်ႇပဵၼ်သၢဝ်မႃး
ၵေႃႈယင်းတိုၵ်ႉထုၵ်ႇပိူၼ်ႈၸွမ်းဝႃႈယူႇ။
ၵမ်းလိုၼ်းသုတ်းၵေႃႈယိူၼ်ႉၸႂ်ဢမ်ႇလႆႈ တၢင်းသွင်ၸင်ႇ
တတ်းသဵၼ်ႈၸႂ်မႃးထၢမ်လွင်ႈတေႉတီႈမႄႈၶဝ် မႄႈၶဝ်
ၼၢင်းထေႇဝီႇလၢတ်ႈလွင်ႈတေႉႁႂ်ႈၶႃထွမ်ႇဝႃႈ မႄႈလႆႈၵႂႃႇ
ၵိၼ်ၼမ်ႉၼႂ်းႁွႆးတိၼ်ၸၢင်ႉလႄႈ ၼႂ်းႁွႆႈတိၼ်ဝူဝ်း ႁိမ်း
ၵၢင်ပၢင်ႇေသ ပေႃးပွၵ်ႈမႃးၶိုၼ်းၵေႃႈလႆႈၸပ်းတွင်ႉၵမ်း
လဵဝ်ယဝ်ႉ။
ပေႃႈလုၵ်ႈတင်းသွင်ၵေႃႈပဵၼ် ၸဝ်ႈၸၢင်ႉလႄႈ
ၸဝ်ႈဝူဝ်းၼၼ်ႉယဝ်ႉ ၵူၺ်းၵႃႈဢမ်ႇႁူႉဝႃႈ ၽႂ်ပဵၼ်လုၵ်ႈ
ၸၢင်ႉ ၽႂ်ပဵၼ်လုၵ်ႈဝူဝ်း ၼၢင်းၶူၼ်ႁူဝ်ႁွမ် လႄႈ ၼၢင်း
ၼူၼ်းၸင်ႇယွၼ်းဢၶႂၢင်ႉတီႈမႄႈၶဝ်ေသ တေဢွၵ်ႇၵႂႃႇ
ၸွမ်းႁႃပေႃႈၶဝ်ၼႂ်းထိူၼ်ႇၼႆယူႇ ။

ယွၼ်းပွၵ်ႈၼိုင်ႈ မႄႈၶဝ်ဢမ်ႇပေႃးၶႂ်ႈပၼ်ၵႂႃႇ ၵႆႉၵႆႉယွၼ်း
ၼႃႇေသမႄႈၶဝ်ၸင်ႇဝၢင်းၶႂၢင်ႉပၼ်ၵႂႃႇယဝ်ႉ တၢင်းသွင်
ၸင်ႇဢွၵ်ႇပႆတၢင်းၶဝ်ႈၼႂ်းထိူၼ်ႇ ၸွမ်းၼင်ႇတီႈမႄႈၶဝ်
လၢတ်ႈၼၼ်ႉေသ ပႆတၢင်းမႃးႁႃပဵၼ်လၢႆဝၼ်း ထိုင်ၵမ်း
လိုၼ်းသုတ်းမႃး ၶႃတင်းသွင်ၵေႃႈလႆႈထူပ်းႁၼ်ၸဝ်ႈ
ၸၢင်ႉယႂ်ႇတူဝ်ၼိုင်ႈယူႇယဝ်ႉ။
ၸဝ်ႈၸၢင်ႉႁၼ်ၶႃတင်းသွင်ယဝ်ႉ ဝူၼ်ႉဝႃႈပဵၼ်ၸုမ်း
ၵူၼ်းတီႈဢၼ်တေမႃးႁၢႆႉၼႆလႄႈ ဢၢၼ်းတေၶႃႈႁႅမ်
ၶႃတၢင်းသွင်ပႅတ်ႈ၊ ၼၢင်းၶူၼ်ႁူဝ်ႁွမ်ၵေႃႉပဵၼ်ပီႈ ၸင်ႇ
လႆႈႁွင်ႉႁႆႈဢွၼ်ႈဝွၼ်းယွၼ်းၸၢတ်ႈပၢၼ် ၸဝ်ႈၸၢင်ႈ
ထၢင်ႇပိူင်ႈဝႃႈယွၼ်ႉသင်?
ယိင်းတင်းသွင်လႆႈပႆၶဝ်ႈၼႂ်းထိူၼ်ႇၸိူင်ႉၼႆ ၽိတ်းပိူင်ႈ
ၵၼ်တၢင်းၽူႈယိင်းတၢင်ႇၵေႃႉႁႅင်းၼႃႇ ၼၢင်းၶူၼ်ႁူဝ်
ႁွမ်ၸင်ႇလၢတ်ႈၼေဝႃႈ ၶႃပီႈၼွင်ႉပဵၼ်လုၵ်ႈၶွင်မႄႈထေႇ
ဝီႇလႄႈ ၸဝ်ႈဝူဝ်းတၢင်းၸဝ်ႈၸၢင်ႉၼႆယဝ်ႉ။
ၼၢင်းၼူၼ်းၸင်ႇႁိမ်လၢတ်ႈဝႃႈ မၼ်းပဵၼ်လုၵ်ႈၸဝ်ႈ
ၸၢင်ႉ တွၼ်ႈတႃႇၼၢင်းၶူၼ်ႁူဝ်ႁွမ်ပဵၼ်လုၵ်ႈၸဝ်ႈဝူဝ်း
ပေႃးတေႁိမ်ၵေႃႈ ႁႅမ်ၼၢင်းၶူၼ်ႁူဝ်ႁွမ်ၵႂႃႇလႃႈ!ၼႆယဝ်ႉ
ၼၢင်းၶူၼ်ႁူဝ်ႁွမ်လၢတ်ႈဝႃႈ မိူဝ်ႈလဵဝ်ယင်းဢမ်ႇပႂ်ႇႁူႉဝႃႈ
ၽႂ်ပဵၼ်လုၵ်ႈၸၢင်ႉ ၽႂ်ပဵၼ်လုၵ်ႈဝူဝ်း ၶႃတင်းသွင်ၵူၺ်း
ၶႂ်ႈထူပ်းႁၼ်ပေႃႈ ၸင်ႇလႆႈၶဝ်ႈမႃးၼႂ်းထိူၼ်ႇယႂ်ႇၼႆႉယဝ်ႉ
ဢွၼ်တၢင်းတေႁႅမ်ၶႃႈ ယွၼ်းႁႂ်ႈၶႃႈလႆႈၸႅတ်ႈတူၺ်း
တူဝ်ၵဝ်ႇၵွၼ်ႇ ပေႃးၶႃႈဢမ်ႇၸႂ်ႈလုၵ်ႈၸၢင်ႉတေႉၸိုင်တေ
ႁႅမ်ၶႃႈတၢႆၵေႃႈယွမ်းၼႆယူႇယဝ်ႉ ။
ၸဝ်ႈၸၢင်ႉၸင်ႇလၢတ်ႈဝႃႈ တေယွမ်းႁႂ်ႈၸႅတ်ႈၸၢမ်း
တူၺ်း သင်ဝႃႈၽႂ်ၶိုၼ်ႈၶီႇၼိူဝ်ၶေႃးၵဝ်လႆႈ ၵေႃႉၼၼ်ႉ
ယဝ်ႉတေပဵၼ်လုၵ်ႈ ပေႃးယဝ်ႉၵေႃႈၸဝ်ႈၸၢင်ႉတင်ႈ
တူဝ်ယွၼ်းသူးၸွမ်းၸိူင်ႉၼၼ်ေသ ၸုၵ်းဝႆႉလီလီ ၼၢင်း
ၼူၼ်းမၼ်ႈၸႂ်ႁႅင်းၼႃႇဝႃႈ တူဝ်ၵဝ်ႇပဵၼ်လုၵ်ႈၸၢင်ႉ
ၵၢၼ်းၶိုၼ်ႈတီႈငူင်းၸၢင်ႉ ဢၢၼ်းတေၶိုၼ်ႈႁႂ်ႈပေႃးလႆႈၼႆယူႇ။
ယွၼ်ႉမၼ်းပဵၼ်လုၵ်ႈဝူဝ်းလႄႈ ထိုင်တေၶတ်းၸႂ်တၢၼ်ႇ
လႂ်ၵေႃႈၶိုၼ်ႈဢမ်ႇလႆႈ ၵုမ်ႇတူၵ်းလူင်းမႃးၶိုၼ်းယူႇတိၵ်း
တိၵ်းယဝ်ႉ ၸဝ်ႈၸၢင်ႉၸင်ႇလၢတ်ႈႁႂ်ႈပေႃးၵွၼ်ႇ ၼၢင်း
ၶူၼ်ႁူဝ်ႁွမ​်တေႉ ၵၢၼ်းၶိုၼ်ႈလႆႈငၢႆႈငၢႆႈလီလီၵူၺ်း ယဝ်ႉ
မၼ်းၼၢင်းၵေႃႈ လႆႈယူႇၼိူဝ်ၶေႃးၸၢင်ႉၶဵမ်ႉလႅပ်ႈၵႂႃႇယူႇယဝ်ႉ။
ၼၢင်းၼူၼ်းႁၼ်ဝႃႈ ၼၢင်းၶူၼ်ႁူဝ်ႁွမ်ၵၢၼ်းၶိုၼ်ႈလႆႈငၢႆႈ
ငၢႆႈၵူၺ်းလႄႈ ၸင်ႇၶႂ်ႈၸၢမ်းတူၺ်းမႂ်ႇထႅင်ႈၵမ်းၼိုင်ႈ
ၸဝ်ႈၸၢင်ႉႁၢမ်ႈၵေႃႈဢမ်ႇထွမ်ႇ ၼၢင်းၼူၼ်းဢၢၼ်းတေ
ၶိုၼ်ႈႁႂ်ႈပေႃးလႆႈ လိုၼ်းသုတ်းၸဝ်ႈၸၢင်ႉၸႂ်လမ်ေသ
ဢဝ်ၶႃယဵပ်ႇသႂ်ႇပၼ်ၼၢင်းၼူၼ်းတၢႆၵႂႃႇယဝ်ႉ။
ဝၢႆးေသၼၼ်ႉၵေႃႈ ဢဝ်ၼၢင်းၶူၼ်ႁူဝ်ႁွမ်ၵေႃႉပဵၼ်လုၵ်ႈ
ၵႂႃႇတီႈယူႇမၼ်းၼၼ်ႉေသ ႁႂ်ႈၸုမ်းၶႃႈၸႂ်ႉၸၢင်ႉဢဝ်ႁိၼ်
မႃးႁဵတ်းသၢင်ႈ ႁႂ်ႈပဵၼ်ႁိူၼ်းတီႈလိုဝ်ႈတီႈယူႇၶွင်ၼၢင်း
ၶူၼ်ႁူဝ်ႁွမ် ႁွင်ႉၸိုဝ်ႈဝႃႈ ႁေႃၼၢင်းၶူၼ်ႁူဝ်ႁွမ်ၼႆယူႇ
ယဝ်ႉ။
ၼၢင်းၶူၼ်ႁူဝ်ႁွမ် ထိုင်တေၸူမ်းသိူဝ်းတီႈလႆႈထူပ်းပေႃႈ
ေသတႃႉ ၵူၺ်းၵႃႈ ဢေးလူၼၢင်းၼူၼ်းၵေႃႉပဵၼ်ၼွင်ႉ
သၢဝ်ႁႅင်းၼႃႇ ႁွင်ႉႁႆႈမႃးၸွမ်းတၢင်းတေႃႇပေႃးထိုင်တီႈ
ယူႇၸဝ်ႈၸၢင်ႉၼၼ်ႉယဝ်ႉ ၵူၺ်းၵႃႈဢမ်ႇႁတ်းလႃႇဝႃႈ
ၵေႃႉပဵၼ်ပေႃႈသင် လိူဝ်ေသၵႂႃႇယူႇၸွမ်းၸဝ်ႈၸၢင်ႉ
ၼၼ်ႉၵူၺ်းၸဝ်ႈၸၢင်ႉလုမ်းလႃးတူၺ်းထိုင် ၼၢင်းၶူၼ်
ႁူဝ်ႁွမ်ပဵၼ်ၼင်ႇလီ ၸွမ်းလူၺ်ႈတၢင်းႁၵ်ႉတီႈပေႃႈမီး
တေႃႇလုၵ်ႈေသ မိူဝ်ႈၼၢင်းၶူၼ်ႁူဝ်ႁွမ်လူဝ်ႇသင်ၵေႃႈ
ၸင်ႇႁႂ်ႈၶီႇၶေႃးေသ ဢွၵ်ႇၵႂႃႇယူႇတႃႇေသႇယဝ်ႉ။
ၼၢင်းၶူၼ်ႁူဝ်ႁွမ် လႆႈယူႇသဝ်းၸွမ်းၸဝ်ႈၸၢင်ႉပဵၼ်ၶၢဝ်း
ယၢမ်းလၢႆပီႊ ၼၢင်းပဵၼ်ၵူၼ်းယူႇၵေႃႉလဵဝ် ငဝ်ႁႅင်းၼႃႇ
တူဝ်ႇၵဝ်ႇၵေႃႈ ၵေႃႉယႂ်ႇပဵၼ်သၢဝ်ယဝ်ႉ ၶႂ်ႈမီးၽူႈၸၢႆးေသ
ၵေႃႉၼိုင်ႈ မႃးပဵၼ်ဢူၺ်းၵေႃႉၸႂ် ၸင်ႇဢွၵ်ႇယွၼ်းသူး
တႃႇႁႂ်ႈထူပ်း ၸၢႆးၵေႃႉပဵၼ်ပၢၼ်ဢွၼ်ၼႆယူႇယဝ်ႉ။
ဝၼ်းၼၼ်ႉၼၢင်းၶူၼ်ႁူဝ်ႁွမ် ၵႂႃႇဢၢပ်ႇၼမ်ႉတီႈႁွင်ႈ
ၼမ်ႉမိူၼ်ၼင်ႇၵူႈပွၵ်ႈ ၸင်ႇႁႅၼ်းဢဝ်ဢႅပ်ႇၵႂႃႇၸွမ်း
မၼ်းၼၢင်းၸၼ်ၶူၼ်ႁူဝ်တူဝ်ၵဝ်ႇ ဢွၵ်ႇမႃးၼိုင်ႈသဵၼ်ႈ
ေသ မုၼ်းသႂ်ႇၶဝ်ႈၼႂ်းဢႅပ်ႇယဝ်ႉ ၶူၼ်ႁူဝ်မၼ်းၼၢင်း
ယၢဝ်းပဵင်းၵုမ်ႇ ၸွမ်းလူၺ်ႈၵူႉသူဝ်ႇၵဝ်ႇဝၼ်းလင်ေသ
ႁဵတ်းႁႂ်ႈမၼ်းၼၢင်းမီးၶူၼ်ႁူဝ်တီႈႁွမ်ယူႇယဝ်ႉ ။

မိူဝ်ႈသႂ်ႇၶူၼ်ႁူဝ်လူင်းၼႂ်းဢႅပ်ႇ ပိၵ်ႉၽႃၶဵမ်ႉလႅပ်ႈယဝ်ႉ
ၼၼ်ႉ မၼ်းၼၢင်းၵေႃႈလႆႈဝႆႈတိူင်ႇၵၢဝ်ႇယွၼ်းသူးဝႃႈ
ဢွမ်ၶူၼ်ႁူဝ်ဢွၼ်ႇဢၼ်ၼႆႉ ႁႂ်ႈလႆၸွမ်းၼမ်ႉၵႂႃႇ ယွၼ်း
ႁႂ်ႈဢၢႆႁွမ်ၶွင်သဵၼ်ႈၶူဝ်ႁူဝ် ယႃႇမူတ်းႁၢႆလၢႆ ယွၼ်းႁႂ်ႈၸၢႆး
ၵေႃႉပဵၼ်ပၢၼ်ဢွၼ်ၼၼ်ႉၵူၺ်း တီႈတေၵဵပ်းဢွမ်သႂ်ႇ
ၶူၼ်ႁူဝ်ၼႆႉလႆႈ ။
ၵူၼ်းတၢင်ႇၵေႃႉထိုင်တေထူပ်းႁၼ်ၵေႃႈသင်ဢမ်ႇၸႂ်ႈ
ၵေႃႉၵူႈၸိုင် ယွၼ်းႁႂ်ႈယႃႇၵဵပ်းဢဝ်လႆႈေသၵမ်း ပေႃးၸၢႆး
တီႈပဵၼ်ၵေႃႉၵူႈၵဵပ်းလႆႈယဝ်ႉ ႁႂ်ႈမီးၸႂ်ႁတ်းတီႈတေဢွၵ်ႇ
ၸွမ်းႁႃတူဝ်ၶႃႈ တေႃႇပေႃးလႆႈထူပ်းႁၼ်ၵၼ်ေသၵမ်း။
ပေႃးမၼ်းၼၢင်းယွၼ်းသူးယဝ်ႉၵေႃႈ ပွႆႇဝၢင်းဢႅပ်ႇသႂ်ႇ
ၶူၼ်ႁူဝ်ၼၼ်ႉလွင်ႈၸွမ်းသၢႆၼမ်ႉၵႂႃႇ ဢႅပ်ႇသႂ်ႇၶူၼ်ႁူဝ်
ၼၼ်ႉလႆၸွမ်းသၢႆၼမ်ႉၵႂႃႇတိၵ်းတိၵ်း တေႃႇပေႃးထိုင်
မိူင်းလတ်ႉတႃႊၼႃး ဢႅပ်ႇသႂ်ႇၶူၼ်ႁူဝ်ၼၼ်ႉၵေႃႈလႆပၼ်ႇ
ၵႂႃႇပၼ်ႇမႃးယူၸိူဝ်းတႃႈၼမ်ႉ ၼႃႈဝၢင်းႁေႃၶမ်းၼၼ်ႉ
ယူႇယဝ်ႉ။
မိူင်းလတ်ႉတႃႈၼႃး မီးၸဝ်ႈၸၢႆးႁၢင်ႈလီၵေႃႉၼိုင်ႈ
လႆႈၶိုၼ်ႈပဵၼ်ၽူႈဢုပ်ႇပိူင်ႇမိူင်း ဝၢႆးေသမႄႈမၼ်းလႆႈတၢႆ
ၵႂႃႇယဝ်ႉ ၸဝ်ႈႁေႃၶမ်းလတ်ႉတႃႈၼႃးယင်းဢမ်ႇပႂ်ႇမီး
ၸဝ်ႈၼၢင်းမေႇႁေႇသီႇ၊ ဝၼ်းၼၼ်ႉ ၸဝ်ႈႁေႃႈၶမ်း
လႄႈတၢင်းသိုၵ်းႁၢၼ် မၼ်းတၢင်းၼမ် ဢွၼ်ၵၼ်ၵႂႃႇ
ဢၢပ်ႇၼမ်ႉ ၶၢဝ်းယၢမ်းပေႃးတၢင်းႁိုင်မိူၼ်ၵၼ်။
မိူဝ်ႈဢႅပ်ႇသႂ်ႇၶူၼ်ႁူဝ်ၼၼ်ႉလႆႁွတ်ႈမႃးထိုင် ဢၢႆႁွမ်ၶူၼ်
ႁူဝ်ၼၼ်ႉၵေႃႈ ပေႃးႁွမ်ၸွတ်ႇၵႂႃႇသဵင်ႈ၊ ၸဝ်ႈႁေႃၶမ်း
လႄသိုၵ်းႁၢၼ်မၼ်းဢွၼ်ၵၼ်လႆႈဢၢႆႁွမ်မၼ်း ပႅၵ်ႇပိူင်ႈ
ၵၼ်တၢင်း ဢၢႆႁွမ်ဢၼ်ယၢမ်ႈၼူမ်မႃးၸိူဝ်းၼၼ်ႉၼႃႇ
မိူဝ်ႈသိုၵ်းႁၢၼ်ႁၼ်ဢႅပ်ႇဢွၼႇ်ၼၼ်ႉ လႆယူႇၼိူဝ်ၼမ်ႉ
ထၢင်ႇပိူင်ႈႁႅင်းၼႃႇဝႃႈမၼ်းပဵၼ်ဢီႈသင်?
ၸင်ႇဢွၼ်ၵၼ်လုၺ်းၼမ်ႉၶဝ်ႈၵႂႃႇ တွၼ်ႈတႃႇတေၵဵပ်း
ဢဝ်ဢႅပ်ႇဢွၼ်ႇၼၼ်ႉ ၵူၺ်းၵႃႈ ဢမ်ႇမီးၽႂ်တီႈတေၵဵပ်း
ဢဝ်လႆႈ ႁဵတ်းႁႂ်ႈၶဝ်ပႅၵ်ႇပိူင်ႈၸႂ်ႁႅင်းၼႃႇ ၸင်ႇမႃးတိူင်ႇ
ၵၢဝ်ႇလၢတ်ႈၸဝ်ႈႁေႃၶမ်း ၸဝ်ႈႁေႃၶမ်းၸင်ႇၶႂ်ႈၸၢမ်း
ဢဝ်တူၺ်းႁင်းၵူၺ်းၽွင်ႈၼႆလႄႈ ၸင်ႇလုၺ်းၼမ်ႉၶဝ်ႈ
ၵႂႃႇ ၵဵပ်းဢဝ်မႃးငၢႆႈငၢႆႈလီလီ ႁဵတ်းႁႂ်ႈၸုမ်းသိုၵ်းႁၢၼ်
ပႅၵ်ႇပိူင်ႈၸႂ်ႁႅင်းၼႃႇ ။
ၸဝ်ႈႁေႃၶမ်းလတ်ႉတႃႈၼႃးႁူႉဝႃႈ ဢၢႆႁွမ်တိုၼ်းမႃးတီႈ
ၽၢႆႇၼႂ်းဢႅပ်ႇၼႆႉၵူၺ်း ၶိုၼ်ႈၽင်ႇၼမ်ႉမႃးၽုၺ်ႇဢႅပ်ႇ
ဢွၵ်ႇတူၺ်း ၵူၺ်းလႆႈႁၼ်သဵၼ်ႈၶူၼ်ႁူဝ်လမ်ယၢဝ်းငဝ်း
သဵၼ်ႈၼိုင်ႈ သဵၼ်ႈၶူၼ်ႁူဝ်ၼိုင်ႈၶႅၼ်းသူင်ႇဢၢႆႁွမ်ပေႃး
ၸွတ်ႇၵႂႃႇသဵင်ႈ ။
ၸဝ်ႈႁေႃၶမ်းဝူၼ်ႉဝႃႈ သဵၼ်ႈၶူၼ်ႁူဝ်ၼႆႉ ထၢင်ႇတေပဵၼ်
သဵၼ်ႈၶူၼ်ႁူဝ်ၼၢင်းၾႃႉယူဝ်ႉ ထိုင်လႆႈႁွမ်ထိုင်တၢၼ်ႇ
ၼၢႆႉ ဢမ်ႇၼၼ်သင်ပဵၼ်ၶူၼ်ႁူဝ်ၵူၼ်း ၽူႈယိင်းၵေႃႉ
ၼၼ်ႉ တိုၼ်းပဵၼ်ၽူႈမီးၵၢမ်ႇယႂ်ႇၼမ်တေႉတေႉ ယဝ်ႉ
ၸဝ်ႈႁေႃၶမ်းလၢတ်ႈဝႃႈ ပဵၼ်ၸိူင်ႉႁိုဝ်ၵေႃႈ တေဢွၵ်ႇ
ၸွမ်းဝႃမၼ်းၼၢင်းႁႂ်ႈပေႃးထူပ်း ဢဝ်မႃးပဵၼ်ၸဝ်ႈၼၢင်း
မေႇႁေႇသီႇႁဝ်းႁႂ်ႈပေႃးလႆႈ။
ၸဝ်ႈႁေႃၶမ်းၽၢၵ်ႇဝၢၼ်ႈမိူင်းဝႆႉပၼ် သိုၵ်းႁၢၼ်တီႈဝႆႉ
ၸႂ်ေသ ဢွၵ်ႇပႆတၢင်းၵႂႃႇၵေႃႉလဵဝ် ၵႂႃႇၸွမ်းသၢႆၼမ်ႉၶိုၼ်ႈ
ၵႂႃႇၸွမ်းတီႈဢႅပ်ႇၶူၼ်ႁူဝ်ၼၼ်ႉလႆလူင်းမႃး ဢဝ်ဢႅပ်ႇ
သႂ်ႇၶူၼ်ႁူဝ်ၼၼ်ႉၸွမ်းၵႂႃႇပႃးေသ ပႆတၢင်းႁႃမႃးပေႃးလၢႆ
ဝၼ်း လိုၼ်းသုတ်းၵေႃႈပႆမႃးထိုင်ႁိမ်းထႅဝ်တီႈယူႇၼၢင်း
ၶူၼ်ႁူဝ်ႁွမ်ယူႇယဝ်ႉ။
မၼ်းၸဝ်ႈလႆႈဢၢႆႁွမ်မႃးလိူဝ်ၵဝ်ႇ ထိုင်လႆႈမၼ်ႈၸႂ်ဝႃႈ
ၸဝ်ႈၶွင်ၶူၼ်ႁူဝ်တိုၼ်းယူꩡိူဝ်းၼႆႉၼႆယူႇ ပေႃးလီ
ဝႃႈဝၼ်းၼႆႉ ၸဝ်ႈၸၢင်ႉလႄႈတၢင်းတပေးမၼ်း ဢွၵ်ႇ
ၵႂႃႇႁႃၵိၼ် မီးၼၢင်းၶူၼ်ႁူဝ်ႁွမ်ယူႇၵေႃႉလဵဝ် ၸဝ်ႈႁေႃ
ၶမ်းလတ်ႉတႃႊၼႃးပႆၸွမ်း ဢၢႆႁွမ်သဵၼ်ႈၶူၼ်ႁူဝ်ၼၼ်ႉ
မႃးတိၵ်းတိၵ်းယူႇယဝ်ႉ။
ႁၢၼ်ႉတေႃႇပေႃးမႃးထိုင် တီႈဢၢပ်ႇၼမ်ႉၼၢင်းၶူၼ်ႁူဝ်
ႁွမ်ၼၼ်ႉယူႇ ၼႂ်းယၢမ်းၼၼ်ႉၼၢင်းၶူၼ်ႁူဝ်ႁွမ်တိုၵ်ႉ
ဢၢပ်ႇၼမ်ႉယူႇ မိူဝ်ႈတၢင်းသွင်ထူပ်းႁၼ်ၵၼ် ၸွမ်းၼင်ႇ
ဢၢမ်းၼၢတ်ႈၵူႉသူဝ်ႇ တီႈယၢမ်ႈႁဵတ်းႁူမ်ႈၵၼ်ဝႆႉ ႁႂ်ႈပဵၼ််
ၵေႃႉၵူႈၵၼ​်ေသ တၢင်းသွင်ၵေႃႈမီးၸႂ်ႁၵ်ႉတေႃႇၵၼ်မႃး
ၵမ်းလဵဝ် ၵဵပ်းယူႇဝႆႉၼႂ်းၸႂ်ၽႂ်မၼ်းယူႇယဝ်ႉ။
မိူဝ်ႈလၢတ်ႈတေႃႇထၢမ်တူၺ်း ထိုင်လႆႈႁူႉလွင်ႈတေႉပဵၼ်
မႃးၸိူင်ႉႁိုဝ်ေသ ၼၢင်းၶူၼ်ႁူဝ်ႁွမ်ဢွၼ် ၸဝ်ႈလတ်း
တႃႊၼႃး ၶိုၼ်ႈၵႂႃႇၼိူဝ်ႁေႃႁိၼ် ႁူမ်ႈၵိၼ်ၶဝ်ႈၽၵ်းၸွမ်း
ၵၼ်ၵၼ်ေသ ယူႇႁူမ်ႈၵၼ်တေႇဢဝ်ၼၼ်ႉမႃးယူႇယဝ်ႉ
မီးၶေႃႈႁၢမ်ႈဝႆႉဝႃႈ ႁၢမ်ႈၸဝ်ႈလတ်းတႃႈၼႃး လူင်းႁေႃ
ၼႆယူႇ ၵူဝ်ၸဝ်ႈပေႃႈၸၢင်ႉတေႁူႉလွင်ႈတၢင်းမၼ်းေသ
ႁႅမ်တၢႆပႅတ်ႈၼႆယဝ်ႉ။
ထိုင်ဝႃႈၸဝ်ႈၸၢင်ႉတေလႆႈဢၢႆၵူၼ်းတၢင်ႇၵေႃႉ တီႈဢမ်ႇ
မိူၼ်ဢၢႆတူဝ်ၼၢင်းၶူၼ်ႁူဝ်ႁွမ်ေသတႃႉ ယွၼ်ႉဢၢၼ်းၼႃႇ
လုၵ်ႈလႄႈၸိုင်ဢမ်ႇလႆႈထၢမ် ယဝ်ႉပႂ်ႉတူၺ်းယူႇတီႈႁေႃ
ပဵၼ်တီႈလီထၢင်ႇပိူင်ႈဝႆႉလႄႈ ၸင်ႇလႆႈယူႇၽၢႆႇၼွၵ်ႈေသ
ပႂ်ႉတူၺ်းယူႇၵူႈၶၢဝ်းယၢမ်းယဝ်ႉ။
တင်းသွင်လႆႈယူႇႁူမ်ႈႁၵ်ႉၵၼ်မႃး ထိုင်တီႈပေႃးမီးလုၵ်ႈ
ႁူမ်ႈၵၼ်သွင်ၵေႃႉ ၵေႃႉၼိုင်ႈပဵၼ်ၸၢႆး ၵေႃႉၼိုင်ႈပဵၼ်ယိင်း
ယူႇၵႂႃႇယူႇမႃးတင်းသွင်ၵူဝ်ဝႃႈ ေပႃးၸဝ်ႈၸၢင်ႉႁူႉ
လွင်ႈတေႉမႃး ၵူဝ်လႆႈပဵၼ​်ၽေးၼႆလႄႈ တင်းသွင်ၸင်ႇ
လႆႈဝၢင်းၽႅၼ်ဢွၵ်ႇပၢႆႈ တွၼ်ႈတႃႇတေမိူဝ်ႈဢုပ်ႉပိူင်ႇမိူင်း
လတ်းတႃႊၼႃး မိူၼ်ၵဝ်ႇၼႆယူႇယဝ်ႉ။
လိုၼ်းသုတ်းၶဝ်ပေႃႈမႄႈလုၵ်ႈၵေႃႈ ပၢႆႈဢွၵ်ႇၵႂႃႇလႆႈ မႅၼ်ႈ
ၼႂ်းဝၼ်းတီႈ ၸဝ်ႈၸဝ်ႈၸၢင်ႉလႄႈတ​ပေးဢွၵ်ႇ
ၵႂႃႇႁႃၵိၼ်တီႈၵႆၼၼ်ႉယူႇ မိူဝ်ႈၸဝ်ႈၸၢင်ႉပွၵ်ႈမႃးၶိုၼ်း
ဢမ်ႇႁၼ်ၼၢင်းၶူၼ်ႁူဝ်ႁွမ်ယဝ်ႉလႄႈ ၸင်ႇၼႅတ်ႈဢွၵ်ႇ
ၸွမ်းႁႃ လုၵ်ႈလႄႈလၢၼ်ႁၢၼႉ်တေႃႇပေႃးထူပ်း ၸွမ်း
လူၺ်ႈလွင်ႈတိူဝ်ႉၸႂ် တီႈထုၵ်ႇလုၵ်ႈလႄႈလၢၼ်ပွႆႇၽႃႈၵႂႃႇ
ယူႇတၢင်ႇမိူင်းၼၼ်ႉေသ ထိုင်တီႈႁဵတ်းႁႂ်ႈၸဝ်ႈၸၢင်ႉ
ပေႃးလႆႈၶၢတ်ႇၸႂ်တၢႆယူႇယဝ်ႉ ။
ဢွၼ်တၢင်းတေတၢႆ လႆႈဢဝ်ငႃးမၼ်းဢၢပ်ႈဝႆႉပၼ်ၸဝ်ႈ
ႁေႃၶမ်းလတ်းတႃႈၼႃး ဢဝ်ဝႆႉပဵၼ်ၶိူင်ႈမိုဝ်းႁေႉၵၢင်ႈ
ၽေးၶဵၼ်ၼႆယူႇယဝ်ႉ ၼႂ်းၶၢဝ်းယၢမ်းတီႈၶဝ်ပေႃႈမႄႈ
လုၵ်ႈတိုၵ်ႉပႆတၢင်းေသ လိုဝ်ႈႁိူဝ်ႉႁိမ်းတၢင်းၼၼ်ႉ ၼႂ်း
သဵၼ်ႈတၢင်းၼၼ်ႉမီးၼၢင်းၽီထိူၼ်ႇပႂ်ႉဝႆႉယူႇ ။
ၼၢင်းၽီၼၼ်ႉသမ်ႉ လႈႆၸႂ်ၸဝ်ႈႁေႃၶမ်းလတ်းတႃႈၼႃး
လႄႈ မိူဝ်ႈၼၢင်းၶူၼ်ႁူဝ်ႁွမ်ဢၢပ်ႇၼမ်ႉ ၸင်ႇလႆႈ
ထုၵ်ႇၺႃးၼၢင်းၽီထိူၼ်ႇဢီးယဝ်ႈတူၵ်းၼမ်ႉၵႂႃႇ ယဝ်ႉ
ၼၢင်းၽီထိူၼ်ႇၵေႃႈ ပွမ်တူဝ်ၵဝ်ႇပဵၼ်ၼၢင်းၶူၼ်ႁူဝ်ႁွမ်
တႅၼ်းယူႇယဝ်ႉ။
မိူဝ်ႈမိူဝ်းထိုင်မိူင်းလီငၢမ်းယဝ်ႉ ၼၢင်းၽီထိူၼ်ႇၵေႃႈၶဝ်ႈ
မိူဝ်းယူႇၸွမ်းၼႂ်းၶၢဝ်းယၢမ်းႁိုင်တၢၼ်ႇတၢၼ်ႇယူႇ ၵူၺ်း
ၵႃႈလွင်ႈႁဵတ်းလွင်ႈသၢင်ႈၼၢင်းၽီထိူၼ်ႇၼၼ်ႉ ပိူင်ႈၵၼ်
တၢင်းၼၢင်းၶူၼ်ႁူဝ်ႁွမ်ႁႅင်းၼႃႇ မိူဝ်ႈၸဝ်ႈႁေႃၶမ်းႁူႉ
လွင်ႈတေႉယဝ်ႉ ၸင်ႇႁႃတၢင်းၶႃႈႁႅမ်ၼၢင်းၽီထိူၼ်ႇ
ၼၼ်ႉတၢႆပႅတ်ႈေသ ဢွၵ်ႇၸွမ်းႁႃ ၼၢင်းၶူၼ်ႁူဝ်ႁွမ်
ႁၢၼ်ႉတေႃႇပေႃးထူပ်း ႁၼ်ယူႇယဝ်ႉ။
ၵႂႃႇႁပ်ႉဢဝ်ၼၢင်းၶူၼ်ႁူဝ်ႁွမ် မႃးယူႇႁူမ်ႈၵၼ်ၼင်ႇမီး
တၢင်းသိူဝ်းေသ ၸဝ်ႈႁေႃၶမ်းလတ်းတႃႈၼႃး ယုၵ်ႉ
ဢၢပ်ႈဢဝ်ၼၢင်းၶူၼ်းႁူဝ်ႁွမ် ပဵၼ်ၸဝ်ႈၼၢင်းမေႇႁေႇသီႇ
ေဝႇသတင်းသီႇၵေႃႉပေႃႈမႄႈလုၵ်ႈၵေႃႈ ယူႇႁူမ်ႈႁၵ်ႉ
ၸွမ်းၵၼ်ၼင်ႇမီးတၢင်းသိူဝ်းယူႇယဝ်ႉ ။

ၶွပ်ႈၸႂ်ထိုင်ၽူႈပၼ်ႁႅင်းလူဢၢၼ်ႇၵူႈၵေႃႉယူႇဢေႃႈ
တီႈလႂ်ၽိတ်းၵေႃႈၸွႆႈမူၼ်ႉမေးပၼ်ၵမ်း။
ပိၼ်ႇတႅမ်ႈ-မွၵ်ႇမွင်းၽူၼ်-လၢႆးၶႃႈ
6- 12-2017